Friday , September 20 2019
Home / Tag Archives: དཀར་མཛེས།

Tag Archives: དཀར་མཛེས།

བཙུན་མ་ཞིག་འཆི་གསོན་གནས་སྟངས་མ་ཤེས་པར་ལོ་བརྒྱད་རིང་གར་སོང་ཆ་མེད་གྱུར་འདུག

ཟི་ཁྲོན་དཀར་མཛེས་རྫོང་ནས་ཡིན་པའི་བཙུན་མ་ཡེ་ཤེས་ལྷག་སྒྲོན་ལགས། ཕྱི་ལོ་ ༢༠༠༨ ལོའི་ས་བྱི་ཞི་རྒོལ་ཆེན་མོའི་སྐབས་སྐད་འབོད་ངོ་རྒོལ་བྱས་པར་བརྟེན་ནས་རྒྱ་གཞུང་གིས་འཇུ་བཟུང་བཙན་ཁྲིད་ཀྱིས་ད་ལྟའི་བར་གར་སོང་ཆ་མེད་ཀྱི་གནས་སྟངས་འོག་ལྷག་ཡོད་པ་རེད། ཁོང་གི་ནང་མིས་གང་སར་འདྲི་རྟོག་འཚོལ་བཤེར་བྱས་ཀྱང་གར་ཡོད་ཅི་བྱུང་གི་གནས་ཚུལ་གང་ཡང་ཤེས་རྟོགས་མ་ཐུབ་པར་བརྟེན། རྒྱ་གཞུང་གི་འཇུ་བཟུང་མནར་གཅོད་འོག་ཁོང་མོ་འདས་གྲོངས་ཕྱིན་ཟིན་པའི་ངོས་འཛིན་བྱེད་ཀྱི་ཡོད་འདུག ཕྱི་ལོ་ ༢༠༠༨ ལོར་བོད་མདོ་ཁམས་དཀར་མཛེས་བྲག་དཀར་བཙུན་དགོན་གྱི་བཙུན་མ་ཡེ་ཤེས་ལྷག་སྒྲོན་དང་། སངས་རྒྱས་ལྷ་མོ། ཚེ་དབང་མཁའ་འགྲོ་གསུམ་ཀྱིས་ས་བྱི་ཞི་རྒོལ་ཆེན་མོའི་སྐབས་ཞི་བའི་སྐད་འབོད་ངོ་རྒོལ་བྱས་པར་བརྟེན། སྐབས་དེར་རྒྱ་གཞུང་ཉེན་རྟོག་པས་འཇུ་བཟུང་བཙན་འཁྲིད་ཀྱིས་གར་སོང་ཆ་མེད་དུ་གྱུར་ཡོད། ཁོ་ཚོའི་གྲས་ནས་སངས་རྒྱས་ལྷ་མོ་དང་ཚེ་དབང་མཁའ་འགྲོ་གཉིས་ལ་བཙོན་འཇུག་དུས་བཀག་ལོ་གཉིས་རེའི་ཁྲིམས་ཐག་བཅད་ཡོད་པ་དང་། མཐར་བཙོན་འཇུག་དུས་ཡུན་རྫོགས་ཏེ་ཕྱིར་གློད་གྲོལ་བཏང་ཡོད་མོད། བཙུན་མ་ཡེ་ཤེས་ལྷག་སྒྲོན་ལགས་སྐབས་དེར་འཇུ་བཟུང་བཙན་འཁྲིད་བྱས་རྗེས། ད་ལྟའི་བར་གནས་ཚུལ་གང་ཡང་ཤེས་རྟོགས་མ་བྱུང་བར་གར་སོང་ཆ་མེད་ཀྱི་གནས་སྟངས་འོག་ལྷག་ཡོད་པ་རེད། ཁོང་གི་ནང་མི་རྣམས་ཀྱིས་ཕྱོགས་ཡར་མར་ལ་འབྲེལ་གཏུགས་ཀྱིས་འདྲི་རྟོག་འཚོལ་ཞིབ་བྱས་ཀྱང་མཇུག་འབྲས་གང་ཡང་མ་བྱུང་སྟབས། བཙུན་མ་ཡེ་ཤེས་ལྷག་སྒྲོན་ལགས་རྒྱ་གཞུང་གི་འཇུ་བཟུང་མནར་གཅོད་འོག་འདས་གྲོངས་ཕྱིན་ཟིན་པའི་ངོས་འཛིན་བྱེད་ཀྱིན་ཡོད་འདུག

Read More »

རྒྱ་གཞུང་གིས་གསེར་རྟ་བླ་རུང་སྒར་གཏོར་བཤིག་བྱེད་མགོ་བརྩམས་འདུག

གསེར་རྟ་བླ་རུང་དགོན་ལྔ་རིག་ནང་བསྟན་སློབ་གླིང་ནི། བོད་ཁུལ་དུ་གཞི་རྒྱ་ཆེས་ཆེ་ཞིང་གྲྭ་བཙུན་སྔགས་གསུམ་གྱི་གྲངས་འབོར་ཆེས་མང་པའི་ནང་པའི་ཆོས་སྡེ་ཞིག་ཡིན། ཉེ་ཆར་རྒྱ་གཞུང་གིས་བླ་རུང་སྒར་གྱི་གྲྭ་བཙུན་དང་དགེ་བསྙེན། སློབ་ཕྲུག་བཅས་ཀྱི་གྲངས་འབོར་ ༥༠༠༠ ལ་ཚོད་འཛིན་ཐོག གྲྭ་བཙུན་མང་པོ་ཕྱིར་འབུད་དང་གྲྭ་ཤག་མང་པོ་གཏོར་བཤིག་དགོས་པའི་དོན་ཚན་བརྒྱད་ཅན་གྱི་ཡིག་ཆ་ཞིག་འགྲེམས་བསྒྲགས་བྱས་འདུག དེ་སྔོན། ཕྱི་ལོ་ ༢༠༠༡ ལོར་རྒྱ་གཞུང་གིས་གསེར་རྟ་བླ་རུང་དགོན་དུ་གྲྭ་ཤག་མང་པོ་བཙན་གྱིས་གཏོར་བཤིག་དང་གྲྭ་བཙུན་མང་པོ་ཕྱིར་འབུད་བཏང་ཡོད་བར་བརྟེན་ནས། བཙུན་མ་རེ་ཟུང་རང་ཤི་བརྒྱབ་དང་གྲྭ་བཙུན་མང་པོ་སེམས་སྡུག་གིས་མནར་ཏེ་འདས་གྲོངས་ཕྱིན་པ་དང་། སེམས་ཁམས་ཐང་པོ་མེད་པ་ཆགས་པའི་གནས་ཚུལ་བྱུང་ཡོད་པ་མ་ཟད། རྗེས་སུ་མཁན་པོ་འཇིགས་མེད་ཕུན་ཚོགས་མཆོག་ཀྱང་རྒྱ་ནག་གི་སྨན་ཁང་ནང་གནས་ཚུལ་གསལ་ཁ་མེད་པའི་སྒོ་ནས་འདས་གྲོངས་ཕྱིན་ཡོད་པ་རེད། ཉེ་ཆར་རྒྱ་གཞུང་གིས་གསེར་རྟ་བླ་རུང་སྒར་གཏོར་བཤིག་དགོས་པའི་སྐོར་གྱི་ཤོག་ལྷེ་བཞི་ཅན་གྱི་བསྒྲགས་ཡིག་དེར་འཁོད་པ་ལྟར་ན། རྒྱ་གཞུང་གི་དམིགས་ཡུལ་ནི་ཕྱི་ལོ་ ༢༠༡༧ ཟླ་ ༩ པའི་ཚེས་ ༣༠ སྔོན་ལ་དགོན་པའི་མི་གྲངས་ ༥༠༠༠ ལ་ཚོད་འཛིན་བྱ་དགོས་པ་དང་། ཕྱིར་འབུད་བྱས་པའི་མི་གྲངས་དང་ཁང་པ་བཤིག་པའི་གྲངས་ཀ་གཉིས་མཐུན་དགོས་པ། སྡོད་ཁང་གི་གྲངས་ཀ་དང་མི་གྲངས་གཉིས་ཕན་ཚུན་བཤིབ་བསྡུར་ཀྱིས་བརྟག་དཔྱད་བྱ་དགོས་པ། དེ་བཞིན། དགོན་པར་སྡོད་པའི་དད་ལྡན་མང་ཚོགས་དང་གྲྭ་བཙུན་གཉིས་སོ་སོར་བགར་རྒྱུ་དང་། བླ་རུང་སྒར་དང་ལྔ་རིག་ནང་བསྟན་སློབ་གླིང་གཉིས་ཀྱང་སོ་སོར་བགར་དགོས་པ། རྒྱ་ནག་སྲིད་གཞུང་གི་སྤྱི་ཚོགས་བདག་གཉེར་བྱེད་ཕྱོགས་ཀྱི་སྲིད་ཇུས་བླ་རུང་སྒར་ནང་ལག་ལེན་བསྟར་རྒྱུ་དང་། རྒྱ་གཞུང་གིས་བརྗོད་པའི་སྤྱི་ཚོགས་ཞབས་ཞུའི་ལས་གཞི་ཟེར་བའི་སྲིད་ཇུས་སོགས་སྒར་ནང་དུ་སྤེལ་དགོས་པ་བཅས་ཡིན་འདུག

Read More »

རང་ལུས་མེར་བསྲེགས་ཀྱི་བསམ་ཚུལ་བཀག་སྡོམ་ཆེད་གྲྭ་པ་ཞིག་འཇུ་བཟུང་བྱས་འདུག

རྒྱ་གཞུང་ཉེན་རྟོག་པས་བོད་མི་གྲྭ་པ་ཞིག་གིས་རང་ལུས་མེར་བསྲེག་བྱ་འདུན་གྱི་བསམ་ཚུལ་བཅངས་པ་དང་། བོད་ཀྱི་རྒྱལ་དར་མདུན་དུ་པར་བརྒྱབ་པའི་དོགས་གཞིའི་འོག་འཇུ་བཟུང་བཙན་འཁྲིད་བྱས་ཡོད་འདུག འདི་ག་ལྟེ་གནས་ཁང་ལ་གནས་ཚུལ་འབྱོར་དོན། ཕྱི་ལོ་ ༢༠༡༦ ཟླ་ ༥ ཚེས་ ༡༦ ཉིན་གྱི་བོད་ནང་གི་ཕྱི་དྲོ་ཆུ་ཚོད་ ༨ དང་ཕྱེད་ཀ་ཡས་མས་སུ། བོད་མདོ་ཁམས་རྟའུ་ཉི་མཚོ་དགོན་པའི་ནང་བསྟན་གཙུག་ལག་སློབ་གྲྭའི་གྲྭ་བྱམས་པ་དགེ་ལེགས་ལགས་རྟའུ་རྣམ་རྒྱལ་མཆོད་རྟེན་གྱི་གླིང་འགྲམ་ན་འགྲོ་བཞིན་པའི་སྐབས་སུ། གློ་བུར་དུ་རྒྱ་ནག་གཞུང་ཉེན་རྟོག་པས་རྒྱུ་མཚན་སོགས་ཅི་ཡང་གསལ་བཤད་མ་བྱས་པར་འཛིན་བཟུང་བཙན་ཁྲིད་བྱས་ཡོད་འདུག དེ་བཞིན། བོད་ནང་གི་མཚན་མོ་ཆུ་ཚོད་ ༡༠ ཙམ་ལ་ཉེན་རྟོག་པ་ཕོན་ཆེན་པོ་གྲྭ་བྱམས་པ་དགེ་ལེགས་ཀྱི་གྲྭ་ཤག་ནང་དུ་འཛུལ་ནས་བསྔོག་བཤེར་བྱས་ཡོད་པ་མ་ཟད། མཚན་མོ་དེར་ཉེན་རྟོག་པས་གྲྭ་བྱམས་པ་དགེ་ལེགས་དར་རྩེ་མདོའི་བཙོན་ཁང་དུ་འཁྲིད་ནས་བཀག་བྱས་ཡོད་འདུག

Read More »

གློད་གྲོལ་ཐོབ་པའི་སྲིད་བཙོན་དངོས་དགའ་ལགས་ཀྱི་གཟུགས་པོ་ནད་གཅོང་ཆགས་འདུག

ཆབ་སྲིད་བཙོན་པ་དངོས་སྒྲུབ་ཕུན་ཚོགས་ལགས་ལོ་ ༨ བཙོན་དུས་གཙང་སྟེ་གློད་ཡོད་ནའང་། བཙོན་འོག་སྡུག་སྦྱོང་མནར་གཅོད་ཚད་མེད་བཏང་སྟེ་རྐེད་པ་གཅོང་ནད་བཟོས་ཡོད་སྟབས། ད་ལྟའི་ཆར་འགྲོ་བསྐྱོད་མི་ཐུབ་པར་གཟུགས་པོའི་གནས་སྟངས་ཛ་དྲག་ཆགས་འདུག འདི་ལྟེ་གནས་ཁང་ལ་གནས་ཚུལ་འབྱོར་དོན། བོད་མི་ཆབ་སྲིད་བཙོན་པ་དངོས་སྒྲུབ་ཕུན་ཚོགས་སམ་དངོས་དགའ་ཞེས་འབོད་པ་ཁོང་ལོ་ ༨ ཀྱི་བཙོན་དུས་གཙང་སྟེ་གློད་གྲོལ་གྱིས་ཕྱི་ཟླ་ ༣ ཚེས་ ༢༠ དགོང་མོ་ནང་དུ་བསྐྱལ་ཡོད་འདུག མ་གཞི་ཁོང་གི་བཙོན་དུས་ཕྱི་ཚེས་ ༡༨ ཉིན་གཙང་ཟིན་ཡོད་ནའང་། ཉིན་གཉིས་ཕྱིར་འགྱངས་ཐོག་ནང་ལ་བསྐྱལ་ཡོད་པ་རེད། བཙོན་འཇུག་སྐབས་ཁོང་ལ་མནར་གཅོད་སྡུག་སྦྱོང་ཚད་མེད་བཏང་སྟེ་ཁོང་གི་རྐེད་པ་ནད་གཅོང་བཟོས་ཡོད་སྟབས། མི་གཉིས་ཀྱིས་མཆན་གཡས་གཡོན་ནས་སྐྱོར་ཏེ་ཡར་ལངས་སློང་དགོས་ཀྱི་ཡོད་པ་དང་། གོམ་པ་རྒྱག་དུས་ཀྱང་འཁར་རྒྱུག་ལ་ཁེན་པ་དང་མི་གཞན་གྱིས་སྐྱོར་ན་མ་གཏོགས། རང་སྟེང་ནས་གོམ་པ་བརྒྱབ་སྟེ་འགྲོ་བསྐྱོད་ཐུབ་ཀྱི་མེད་པ་སོགས་གཟུགས་པོའི་གནས་སྟངས་ཧ་ཅང་ཛ་དྲག་ཆགས་འདུག ད་ལྟའི་ཆར་ཁོང་སྨན་ཁང་དུ་སྨན་བཅོས་ཆེད་བསྐྱོད་མེད་པར་སོ་སོའི་ནང་དུ་བསྡད་ཡོད་འདུག

Read More »

ལྕོག་རི་དགོན་པའི་མཁན་པོ་དང་དགེ་བཤེས་ཤིག་འཇུ་བཟུང་བྱས་འདུག

ལྕོག་རི་དགོན་གྲོང་གཉིས་ནས་༧རྒྱལ་བའི་ཞབས་རིམ་གསོག་སྒྲུབ་དང་འབྲེལ་བའི་ཐོག་ནས། རྒྱ་གཞུང་ཉེན་རྟོག་པས་ཉིན་ཤས་གོང་ལྕོག་རི་དགོན་པའི་མཁན་པོ་དཔལ་དགའ་དང་དགེ་བཤེས་ཨོ་རྒྱན་རྣམ་གཉིས་འཇུ་བཟུང་བཙན་འཁྲིད་བྱས་འདུག ཕྱི་ལོ་ ༢༠༡༦ ཟླ་ ༡ ཚེས་ ༢༥ ཉིན་ཁམས་དཀར་མཛེས་ཏྲེ་ཧོར་ལྕོག་རི་དགོན་དུ་ཏྲེ་ཧོར་སེར་སྐྱ་མི་མང་ཡོངས་ནས། ༸རྒྱལ་བའི་སྐུ་ཕྱྭའི་ཞབས་རིམ་རྒྱས་པ་ཞིག་ཚོགས་ཡོད་པའི་གནས་ཚུལ་རྣམས་བོད་ཕྱི་ནང་གཉིས་ཀྱི་སྤྱི་ཚོགས་དྲྭ་རྒྱའི་ཐོག་གང་སར་ཁྱབ་གདལ་དུ་ཕྱིན་ཡོད་པ་ལྟར། སྐབས་དེར་རྒྱ་ནག་གཞུང་གི་ཁ་ཐུག་དྲག་གནོན་བཀག་སྡོམ་རིགས་བྱས་མེད་པ་རེད། དེའི་རྗེས་ཕྱི་ལོ་ ༢༠༡༦ ཟླ་ ༡ ཚེས་ ༣༡ ཉིན་བྲག་མགོ་རྫོང་རིག་གནས་ཡུལ་སྐོར་ལས་ཁུངས་དང་བྲག་མགོ་རྫོང་སྤྱི་བདེ་ལས་ཁུངས། མི་རིགས་ཆོས་དོན་ལས་ཁུངས་བཅས་ཀྱིས་ཏཱ་ལའི་བླ་མའི་སྐུ་པར་སྒྲིག་གཤོམ་བྱས་པ་ནི་དྲིལ་བསྒྲགས་ལོག་པར་འགྲོ་བའི་དངོས་རྫས་ཡིན་པས་ཚོང་ཁང་དང་མི་མང་འདུ་འཛོམས་བྱ་སའི་སྤྱི་པའི་ཚོང་ར་བཅས་ཀྱི་ནང་སྒྲིག་གཤོམ་མི་ཆོག་པ་དང་། ཕྱི་ཟླ་ ༢ ཚེས་ ༢ སྔོན་དུ་རང་འགུལ་རང་རྫོང་རིག་གནས་ཁྲིམས་འཛིན་རུ་ཆེན་ཟེར་བར་སྤྲོད་དགོས་པ་མ་ཟད། དུས་ཚོད་ཕྱིར་འགྱངས་བྱེད་པ་དང་གཏན་ནས་མི་སྤྲོད་མཁན་ལ་ཐབས་ཤེས་དྲག་པོ་སྤྱད་ནས་རྩིས་ལེན་བྱེད་པ་དང་དོ་བདག་གི་མི་ལ་ཐག་གཅོད་ནན་མོ་བྱེད་རྒྱུ་ཡིན་སྐོར་ས་གནས་རྒྱ་གཞུང་འབྲེལ་ཡོད་ལས་ཁུངས་བཞིའི་ཐེལ་ཙེ་བརྒྱབ་སྟེ་བཙན་བཀའ་བཏང་ཡོད་པ་རེད།

Read More »

སྲིད་བཙོན་གཉིས་ཀྱི་གནས་ཚུལ་གྱིས་མནར་གཅོད་གཏོང་བཞིན་པ་ཐེར་འདོན་བྱས་ཡོད།

ལོ་སྔོན་མར་མཉམ་འབྲེལ་རྒྱལ་ཚོགས་ཀྱི་མནར་གཅོད་བཀག་སྡོམ་ཚོགས་ཆུང་གི་ངོས་ནས། རྒྱ་ནག་ནང་མནར་གཅོད་གནས་སྟངས་ཐད་རྒྱ་གཞུང་ལ་འདྲི་རྩད་རྟོག་ཞིབ་བྱས་ཚར་མ་ཐག་ཡིན། ཉེ་ཆར་འདི་གར་འབྱོར་བའི་བོད་ནང་བཙོན་འོག་མནར་གཅོད་མྱངས་མཁན་ཆབ་སྲིད་བཙོན་པ་གཉིས་ཀྱི་གནས་ཚུལ་དེས། རྒྱ་གཞུང་གིས་བོད་མི་ཚོར་མུ་མཐུད་མི་སྤྱོད་ལས་འདས་པའི་མནར་གཏོང་བཞིན་པ་ཐེར་འདོན་བྱས་ཡོད། མནར་གཅོད་མྱོངས་མཁན་ཆབ་སྲིད་བཙོན་པ་ཁོང་གཉིས་ནི། ༢༠༠༨ ལོའི་ས་བྱི་ཞི་རྒོལ་ཆེན་མོ་ཁྲོད་མཉམ་ཞུགས་བྱས་པར་བརྟེན་ནས། རྒྱ་གཞུང་གིས་ལོ་བདུན་རེའི་བཙོན་འཇུག་ཁྲིམས་ཐག་བཅད་ཡོད་པ་རེད། ༢༠༡༥ ཟླ་ ༡༡ ནང་མཉམ་འབྲེལ་རྒྱལ་ཚོགས་མནར་གཅོད་བཀག་སྡོམ་ཚོགས་ཆུང་གི་ངོས་ནས། རྒྱ་ནག་མི་དམངས་སྤྱི་མཐུན་རྒྱལ་ཁབ་ལ་མནར་གཅོད་གནས་སྟངས་ཐད་བསྐྱར་ཞིབ་ཐེངས་ལྔ་པ་དེ་བྱས་ཡོད་པ་རེད། སྐབས་དེར་རྒྱ་གཞུང་གིས་བོད་པ་དང་ཡུ་གུར་སོགས་ལ་མནར་གཅོད་གཏོང་གི་མེད་སྐོར་རྫུན་སྒྲོག་བྱས་ཡོད། ༢༠༠༨ ལོར་བོད་ནང་ཞི་རྒོལ་ཆེན་མོ་བྱུང་སྐབས་ཀྱང་། མཉམ་འབྲེལ་རྒྱལ་ཚོགས་ཀྱིས་རྒྱ་གཞུང་ལ་མནར་གཅོད་བཀག་སྡོམ་ཐད་ནས་བསྐྱར་ཞིབ་ཐེངས་གཅིག་བྱས་ཡོད། སྐབས་དེ་དུས་ཀྱང་རྒྱ་གཞུང་གིས་མནར་གཅོད་བཀག་སྡོམ་སྤྱི་ཆིངས་ཀྱི་བཀོད་ཁྱབ་སྣང་མེད་ཐོག་མནར་གཅོད་སྐོར་གྱི་གནས་ཚུལ་གང་ཡང་ཚོགས་ཆུང་ལ་མཁོ་སྤྲོད་བྱས་མེད་པ་མ་ཟད། བོད་མི་ཚོར་མནར་གཅོད་བཏང་མེད་སྐོར་རྫུན་སྒྲོག་བྱས་ཡོད། ཡིན་ནའང་། རྒྱ་གཞུང་གི་རྫུན་སྒྲོག་དེ་དག་ལམ་ལྷོངས་བྱུང་མེད་པ་རེད། བོད་ཀྱི་རྒྱལ་ས་ལྷ་སའི་ཁུལ་དུ་ས་བྱི་ཞི་རྒོལ་སྐབས་རྒྱ་དམག་གིས་བོད་མི་དམར་གསོད་བཏང་བ་རྣམས་ཀྱི་ཕུང་པོར་རྒྱ་གཞུང་ཉེན་རྟོག་ཚན་པས་བརྟག་དཔྱད་བྱས་པའི་སྐོར་གྱི་གསང་བའི་ཡིག་ཆ་ཞིག་འདི་ག་ལྟེ་གནས་ཁང་ལ་ལག་སོན་བྱུང་པ་དེས། རྒྱ་གཞུང་གིས་ས་བྱི་ཞི་རྒོལ་ཆེན་མོའི་སྐབས་བོད་མིར་དྲག་གནོན་དམར་གསོད་དང་མནར་གཅོད་ཚད་མེད་བཏང་ཡོད་པ་ཐེར་འདོན་གསལ་པོ་བྱས་ཡོད།

Read More »

ཞི་བའི་ངོ་རྒོལ་གནང་མཁན་བོད་མི་སེང་གེ་རྒྱ་གཞུང་གིས་འཇུ་བཟུང་བཙན་འཁྲིད་བྱས་འདུག

བོད་མདོ་ཁམས་དཀར་མཛེས་རྫོང་གི་ཁྲོམ་གཞུང་དུ་བོད་མི་སེང་གེ་ཟེར་བ་ཞིག་གིས་༧གོང་ས་མཆོག་སྐུ་ཚེ་བརྟན་པར་ཤོག བོད་ལ་རང་དབང་དགོས་ཞེས་ཞི་བའི་ངོ་རྒོལ་སྐད་འབོད་བྱས་སྐབས། རྒྱ་གཞུང་ཉེན་རྟོག་པས་འཕྲལ་དུ་ཁོང་འཇུ་བཟུང་བཙན་འཁྲིད་ཀྱིས་གར་སོང་ཆ་མེད་གྱུར་ཡོད་འདུག འདི་ག་ལྟེ་གནས་ཁང་ལ་གནས་ཚུལ་འབྱོར་དོན། ཕྱི་ལོ་ ༢༠༡༥ ཟླ་ ༡༡ ཚེས་ ༢༧ ཉིན་བོད་མདོ་ཁམས་དཀར་མཛེས་རྫོང་དུ། མིང་ལ་སེང་གེ་ཟེར་བའི་བོད་མི་ཞིག་གིས་”༧གོང་ས་མཆོག་སྐུ་ཚེ་བརྟན་པར་ཤོག བོད་ལ་རང་དབང་དགོས་”ཞེས་སྐད་འབོད་བྱེད་བཞིན། རླུང་རྟ་གནམ་ལ་གཏོར་ཏེ་ཁྲོམ་གཞུང་དུ་ཞི་བའི་ངོ་རྒོལ་བྱེད་སྐབས། རྒྱ་གཞུང་ཉེན་རྟོག་པས་ལམ་སང་འཛིན་བཟུང་བཙན་འཁྲིད་བྱས་ཡོད་འདུག གནས་ཚུལ་མཁོ་སྤྲོད་པར་ས་གནས་ཡུལ་མི་ཞིག་གིས་འགྲེལ་བརྗོད་བྱས་པ་ལྟར་ན། བོད་མི་སེང་གེ་ལགས་ཀྱིས་ཉིན་ཤས་སྔོན་ལ་༧གོང་ས་མཆོག་ཞབས་ཐང་དུ་ཕེབས་བཞིན་པའི་བརྙན་ཐུང་ཞིག་མཇལ་ཞོར། ༧གོང་ས་མཆོག་དགུང་ལོ་བགྲེས་པོ་ཕེབས་ཡོང་གི་འདུག བླ་མ་མཇལ་མ་ཐུབ་ན་གསོན་པོར་བསྡད་ཀྱང་སྙིང་པོ་མེད་ཚུལ་སོགས་བཤད་ཞོར་ཐེངས་མང་ངུས་ཡོད་འདུག

Read More »

རོང་རྒྱས་ཨ་གྲགས་ལགས་བཙོན་འཇུག་དུས་བཅད་གཙང་སྟེ་གློད་འདུག

འདི་ག་ལྟེ་གནས་ཁང་གི་ངོས་ནས་རོང་རྒྱས་ཨ་གྲགས་ལགས་བཙོན་འཇུག་དུས་ཡུན་ལོ་ ༨ གཙང་སྟེ་ཁ་སང་དགོང་མོ་གློད་འདུག་པར་དགའ་འགུ་དང་། ཁོང་ལ་སྨན་ཁང་ནང་སྨན་བཅོས་ཐོབ་ཐང་དང་མཐུན་འགྱུར་སྤྲོད་དགོས་པའི་འབོད་སྐུལ་བྱེད་བཞིན་ཡོད། འདི་ག་ལྟེ་གནས་ཁང་ལ་གནས་ཚུལ་འབྱོར་དོན། ཕྱི་ལོ་ ༢༠༡༥ ཟླ་ ༧ ཚེས་ ༣༠ ཉིན་གྱི་བོད་ནང་གི་མཚན་མོའི་ཆུ་ཚོད་དང་པོ་སྟེང་(ཕྱི་ཟླ་ ༧ ཚེས་ ༣༡ ཉིན་གྱི་ཆུ་ཚོད་དང་པོ)། བོད་མི་ཆབ་སྲིད་བཙོན་པ་རོང་རྒྱས་ཨ་གྲགས་ལགས་བཙོན་འཇུག་དུས་ཡུན་གཙང་སྟེ་གློད་ཡོད་འདུག ཡིན་ནའང་། རྒྱ་གཞུང་གིས་བརྒྱུད་ལམ་དང་ས་གནས་སུ་དམ་དྲག་ཤུགས་ཆེན་པོ་བྱས་བཞིན་ཡོད་སྟབས། ད་ལྟའི་ཆར་ཁོང་གི་གཟུགས་པོའི་གནས་སྟངས་ག་འདྲ་ཆགས་ཡོད་མེད་སོགས་གནས་ཚུལ་གང་ཡང་ཤེས་རྟོགས་ཐུབ་ཀྱི་མེད་པ་རེད། རོང་རྒྱས་ཨ་གྲགས་ལགས་བཙོན་འཇུག་དུས་བཅད་གཙང་སྟེ་ཕྱིར་རང་ཁྱིམ་དུ་ལོག་ཐུབ་པ་བྱུང་བར། འདི་ག་ལྟེ་གནས་ཁང་གིས་ངོས་ནས་དགའ་འགུ་ཡི་རངས་བྱེད་བཞིན་ཡོད། དེ་སྔོན་བཙོན་འཇུག་སྐབས་ཁོང་ལ་སྡུག་སྦྱོང་མནར་གཅོད་བཏང་བར་བརྟེན་ནས། མིག་ཡ་གཅིག་གིས་མ་མཐོང་བ་དང་རྣ་ཡ་གཅིག་གིས་ཐོས་མ་ཐུབ་པའི་གནས་སྟངས་བྱུང་ཡོད་པ་རེད། ད་ལྟའི་ཆར་ཁོང་གི་བཙོན་འཇུག་དུས་ཡུན་གཙང་ནས་གློད་གྲོལ་ཐོབ་ཡོད་སྟབས། རྒྱ་གཞུང་གིས་ཁོང་གི་འགྲོ་འདུག་ཐད་བཟང་བཙོན་ལྟ་བུར་མུ་མཐུད་བཀག་སྡོམ་མི་བྱེད་པར། ཁོང་ལ་སྨན་ཁང་ནང་སྨན་བཅོས་བྱེད་པའི་ཐོབ་ཐང་དང་མཐུན་འགྱུར་སྦྱོར་དགོས་པའི་འབོད་སྐུལ་ཞུ་བཞིན་ཡོད།

Read More »

གྲྭ་ཆོས་ཀྱིས་ལགས་རྒྱ་གཞུང་གིས་འཇུ་བཟུང་ཐོག་གར་སོང་ཆ་མེད་དུ་གྱུར་འདུག

ཟླ་སྔོན་མའི་ནང་རྒྱ་གཞུང་གིས་དབལ་ཤུལ་གསེར་རྟའི་གྲྭ་ཆོས་ཀྱིས་ལགས་འཇུ་བཟུང་གིས་ད་ལྟ་གར་ཡོད་ཆ་མེད་དུ་གྱུར་ཡོད་པ་དང་། དེ་བཞིན། ཁོང་གི་ཨ་ཅེ་སྐྱིད་འཛོམས་དང་ཁོ་མོའི་བུ་གྲགས་པ་གཉིས་འཇུ་བཟུང་གིས་ཉིན་བཅོ་ལྔའི་རིང་བཀག་ཉར་གཅར་རྡུང་བྱས་མཐར་ཉེ་སྔོན་ཕྱིར་གློད་ཡོད་འདུག འདི་ག་ལྟེ་གནས་ཁང་ལ་གནས་ཚུལ་འབྱོར་དོན། ཕྱི་ལོ་ ༢༠༡༥ ཕྱི་ཟླ་ ༦ ཚེས་ ༡༩ ཉིན་གྱི་ཕྱི་དྲོ་དུས་ཚོད་ ༥ དང་ཕྱེད་ཀ་ཙམ་ལ། བོད་དབལ་ཤུལ་གསེར་རྟའི་ཕུ་གུ་དགོན་གྱི་གྲྭ་ཆོས་ཀྱིས་ཟེར་བ་ཞིག་རྒྱ་གཞུང་གིས་འཇུ་བཟུང་བཙན་ཁྲིད་བྱས་འདུག ཡིན་ནའང་། ཁོང་འཇུ་བཟུང་དགོས་པའི་ནག་ཉེས་གང་ཡིན་གསལ་ཁ་བཏོན་མེད་པ་རེད། ཁོང་འཇུ་བཟུང་བཙན་ཁྲིད་ཀྱིས་ཟླ་གཅིག་ལྷག་ཕྱིན་ཡོད་ཀྱང་། ད་དུང་གར་ཡོད་གང་ཁྲིད་ཀྱི་གནས་ཚུལ་ཅི་ཡང་ཤེས་རྟོགས་མ་ཐུབ་པར་གར་སོང་ཆ་མེད་ཀྱི་གནས་སྟངས་འོག་ལྷག་ཡོད་འདུག གྲྭ་ཆོས་ཀྱིས་ལགས་འཇུ་བཟུང་བྱས་པའི་ཕྱི་ཉིན་དེ། ཕྱི་ཟླ་ ༦ ཚེས་ ༢༠ ཉིན་གུང་ཙམ་ལ། ཁོང་དང་ཕ་མ་གཅིག་པའི་ཨ་ཅེ་སྐྱིད་འཛོམས་དང་། མོའི་བུ་གྲགས་པ་གཉིས་ཀྱང་གློ་བུར་འཇུ་བཟུང་བཙན་ཁྲིད་བྱས་ཐོག ཉིན་བཅོ་ལྔ་ཙམ་གྱི་རིང་ལ་རྡུང་རྡེག་མནར་གཅོད་སྣ་ཚོགས་བཏང་མཐར་ཉེ་སྔོན་ཕྱིར་གློད་གྲོལ་བཏང་ཡོད་འདུག

Read More »

རྒྱ་གཞུང་གིས་རིན་པོ་ཆེའི་འདས་རྐྱེན་ལ་བརྟག་དཔྱད་དང་གདུང་ཐལ་ནང་མིར་རྩིས་སྤྲོད་དགོས་པའི་བསྒྲགས་གཏམ།

འདི་ག་ལྟེ་གནས་ཁང་གིས་ངོས་ནས། རྒྱ་གཞུང་གིས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེའི་འདས་རྐྱེན་ཐད་ལ། ཁོང་གི་ནང་མིས་དོགས་སློང་བྱས་པ་ལྟར་དྲང་བདེན་གྱི་སྒོ་ནས་ཞིབ་བཤེར་ཐག་གཅོད་དང་། རིན་པོ་ཆེའི་གདུང་ཐལ་ཕྱིར་ནང་མིར་གང་མགྱོགས་རྩིས་སྤྲོད་དགོས་པ་ནན་སྐུལ་ཞུ་བཞིན་ཡོད། ཕྱི་ལོ་ ༢༠༡༥ ཕྱི་ཟླ་ ༧ ཚེས་ ༡༦ ཉིན་ནང་ཆུ་ཚོད་ ༧ ཙམ་ལ། ཟི་ཁྲོན་ཞིང་ཆེན་ཁྲིན་ཏུའུ་གྲོང་ཁྱེར་གྱི་འདབས་འབྲེལ་ཏཱ་ཀྲུའུ་གྲོང་ཁྱེར་ཏཱ་ཀྲོག་རྫོང་དུ་ཡོད་པའི་ཁྲོན་ཏུང་བཙོན་ཁང་ནང་། བོད་རིགས་དགེ་འདུན་པ་གྲངས་ ༡༨ དང་སྤུན་གཉེན་གྲངས་ ༡༤ བཅས་བོད་མི་ ༣༢ རིན་པོ་ཆེའི་སྐུ་ཕུང་མཇལ་བར་ཁྲིད་དེ་ཁོང་ཚོ་སྐུ་ཕུང་ལ་མཇལ་བཅུག་རྗེས། རྒྱ་གཞུང་གིས་རིན་པོ་ཆེའི་སྐུ་ཕུང་གློག་འཕྲུལ་ཐོག་པུར་བསྲེགས་བྱེད་དུ་ཁྱེར་ཡོད་པ་དང་། སྐུ་ཕུང་ལ་མཇལ་ཁར་བཅར་མཁན་བོད་མི་དེ་ཕྱིར་འཕུད་བཏང་ཡོད་འདུག རིན་པོ་ཆེའི་གདུང་ཐལ་ཕྱིར་ནང་མིར་རེག་ཐབས་སུ་ནང་མི་ཉེ་འབྲེལ་མི་ ༤ ཡིས་དེ་གར་མུ་མཐུད་སྒུག་སྡོད་བྱས་ཡོད་ཀྱང་། ད་ལྟའི་བར་དུ་གདུང་ཐལ་ཕྱིར་ནང་མིར་རྩིས་སྤྲོད་བྱས་ཡོད་ཀྱི་གནས་ཚུལ་གང་ཡང་ཤེས་རྟོགས་ཐུབ་ཀྱི་མི་འདུག

Read More »