Wednesday , November 21 2018
Home / ཆེད་དོན་སྙན་ཐོ།

ཆེད་དོན་སྙན་ཐོ།

བཀག་སྡོམ་དང་དབྱེ་འབྱེད་འོག་གི་བོད་ཀྱི་རྩོམ་རིག

བོད་ཀྱི་རྩོམ་རིག་དང་འབྲེལ་བའི་སྙན་ཐོ། སྙན་ཐོ་འདིའི་ནང་དུ་རྒྱ་ནག་གཞུང་གིས་དབང་བསྒྱུར་འོག་གི་བོད་ཀྱི་རྩོམ་རིག་གི་གནས་བབ་སྤྱི་དང་། ལྷག་དོན་རྩོམ་རིག་གི་ཁྱབ་ཁོངས་སུ་བཀག་སྡོམ་དང་དབྱེ་འབྱེད་ཀྱི་སྲིད་བྱུས་དང་བྱ་ཐབས་ཀྱི་གནོན་ཤུགས་ཇི་ལྟར་ཡོད་ཚུལ་གསལ་འདོན་བྱས་ཡོད། སྙན་ཐོ་འདི་ནི་རྒྱ་ནག་གི་དབང་བསྒྱུར་འོག་གི་བོད་ཀྱི་ལས་དབང་དང་འབྲེལ་བའི་བོད་ཀྱི་རྩོམ་རིག་གནས་བབ་མཚོན་པའི་ལོ་རྒྱུས་དང་བརྩམས་ཆོས། རྩོམ་པ་པོ་དག་ལ་བཀག་སྡོམ་ཇི་ལྟར་བྱས་པའི་བདེན་དཔང་ཞིག་ཡིན། ཞིབ་འཇུག་སྙན་ཐོ་འདི་བྲིས་པའི་བརྒྱུད་རིམ་གྱི་ཁྲོད་དུ་གནད་དོན་གཉིས་ཧ་ཅང་ཁ་གསལ་བྱུང་ཡོད། དེ་ནི་རྒྱ་གཞུང་གིས་བོད་ཀྱི་བསམ་བློའི་སྙིང་སྟོབས་དང་ཤེས་རིག་གི་རྒྱུ་ནོར་ཡིན་པའི་གནའ་རབས་ཀྱི་རྩོམ་རྒྱུན་བཅད་པ་དང་། བོད་མིའི་ལོ་རྒྱུས་ཀྱི་དྲན་ཤེས་དང་། སྤྱི་ཚོགས་འཚོ་བའི་གནས་བབ་དངོས། དེ་བཞིན་དུ་བོད་མིའི་སེམས་གཏིང་གི་འདུན་པ་མཚོན་པའི་རྩོམ་རིག་གསར་པར་འགོག་རྐྱེན་ཕྱོགས་ཡོངས་ནས་བཟོས་པ་དེ་དང་། ཕྱོགས་གཞན་ཞིག་ནས་རྒྱ་ནག་གཞུང་ཕྱོགས་ཀྱི་ལྟ་སྟངས་དང་། འདོད་ཚུལ། བཤད་ཕྱོགས་ཐམས་ཅད་བོད་ཀྱི་རྩོམ་རིག་གི་ཁྱབ་ཁོངས་སུ་མངོན་གསལ་དང་ཤུགས་ཆེན་པོས་མཚོན་པར་སྐུལ་སློང་འབད་བརྩོན་བྱས་པ་དེ་ཡིན། གནད་དོན་འདི་གཉི་ག་རྩ་བའི་ཆ་ནས་བོད་ནང་གི་རྩོམ་འབྲིའི་རང་དབང་ལ་བཀག་རྒྱ་དང་དབྱེ་འབྱེད་ཆེན་པོ་ཡོད་པའི་བདེན་དཔང་དུ་གྱུར་ཡོད་དེ། བོད་ཀྱི་རྩོམ་རིག་ནི་ངེས་པར་དུ་མཚོན་མི་ཆོག་པ་ཞིག་དང་། ངེས་པར་དུ་མཚོན་དགོས་པའི་སྲིད་བྱུས་དང་བྱ་ཐབས་ཤིག་གི་འོག་ན་ཡོད་པ་དེ་ཡིན། གནད་དོན་དེས་བོད་ནི་ཆབ་སྲིད་ཀྱི་ཐོག་ནས་བཙན་བཟུང་བྱས་པ་ཙམ་མ་ཡིན་པར་རིག་གཞུང་གི་ཐོག་ནས་བཙན་རྒྱལ་རིང་ལུགས་ཀྱི་བྱ་སྤྱོད་དང་བཀག་སྡོམ་འོག་ཏུ་ཚུད་པ་དེ་གསལ་ཡོད། འབྲེལ་ཐག་འདི་མནན་ན། སྙན་ཐོ་ཆ་ཚང་ཕབས་ལེན་དང་ལྟ་ཀློག་བྱེད་ཐུབ།

Read More »

རང་དབང་དང་འདྲ་མཉམ་གྱི་ཆེད་དུ།

<<རང་དབང་དང་འདྲ་མཉམ་ཆེད།>>ཅེས་པའི་དེབ་འདི་ནི་བོད་ཀྱི་རྩོམ་པ་པོ་ཞོགས་ལྗང་གི་རྩོམ་ཡིག་ཕྱོགས་བསྒྲིགས་ཀྱིས་ཨིན་བོད་སྐད་གཉིས་ཐོག་བཏོན་པ་ཞིག་ཡིན། དེབ་འདིའི་ནང་རྩོམ་པ་པོས་རྒྱ་ནག་གཞུང་གིས་བོད་ནང་འཛིན་པའི་སྲིད་ཇུས་དང་སྲིད་ཇུས་ལག་བསྟར་བྱེད་ཕྱོགས་ནོར་གྱི་ཡོད་ཚུལ་ལ་སྙིང་སྟོབས་ཆེན་པོ་སྐྱོན་བརྗོད་ཀྱི་རྩོམ་ཡིག་མང་པོ་སྤེལ་ཅིང་། སྨྲ་བརྗོད་རང་དབང་མེད་པའི་ཁོར་ཡུག་ཞིག་ནས་ཁོང་གིས་སྨྱུ་གུའི་སྟོགས་ཤུགས་ལ་བརྟེན་ནས་སྨྲ་བརྗོད་རང་དབང་རྩོད་ལེན་བྱས་ཏེ་བོད་ཀྱི་གནས་བབས་གླེང་ཡོད། འབྲུག་དཀར་རྒྱལ་ལམ་ཨ་དགའ་འབྲུག་ལོ་༼སྨྱུག་མིང་ལ་ཞོགས་ལྗང་།༽ ནི་ཕོ་ལོ་སུམ་ཅུར་སོན་པའི་མདོ་སྨད་བླ་བྲང་ས་ཁུལ་གྱི་རྩོམ་པ་པོ་ཞིག་ཡིན། ཁོང་ནི་སྙན་ངག་དང་། གཞས་ཚིག། སྒྲུང་ཐུང་བཅས་འབྲི་མཁན་ཞིག་ཡིན་པ་མ་ཟད། ལོ་ཙཱ་བ་དང་། དཔྱད་བརྗོད་རྩོམ་ཡིག་འབྲི་སྤེལ་མཁན་ཞིག་ཀྱང་ཡིན། ད་བར་ཁོང་གིས་ལམ་གྱི་སྙིང་སྟོབས་དང་། སྨྱུ་གུའི་སྟོབས། རང་དབང་གི་སླད་དུ་ང་ལ་བློ་འགྱོད་མེད། རང་གྲོལ་སྙིང་སྟོབས་སོགས་དེབ་བཞི་བྲིས་ཡོད། ཁོང་ནི་ནུབ་བྱང་མི་རིགས་སློབ་ཆེན་ནས་མཐར་ཕྱིན་ཅིང་། ལོ་ན་བཞི་ལ་སོན་པའི་བྱིས་པ་ཞིག་གི་ཨ་ཕ་ཡང་ཡིན་འདུག ཁོང་གིས་བསམ་བློ་དང་སྨྲ་བརྗོད་ཀྱི་རང་དབང་ལོངས་སུ་སྤྱད་སྟབས། ཁོང་ཕྱི་ལོ་༢༠༡༠ དང་༢༠༡༥ བཅས་སུ་རིམ་པར་ཐེངས་གཉིས་ལ་འཛིན་བཟུང་བྱས་ཤིང་། ཐེངས་སྔོན་མར་ཁོང་གིས་ས་བྱི་ཞི་རྒོལ་ཆེན་མོ་དང་འབྲེལ་བའི་རྩོམ་ཡིག་ཤར་དུང་རི་དུས་དེབ་སྟེང་སྤེལ་བར་བརྟེན་ཟླ་གཅིག་རིང་བཀག་ཉར་བྱས་ཡོད། དེ་རྗེས་ཁོང་འཛིན་བཟུང་བྱས་ནས་ལོ་གཅིག་ཙམ་གྱི་རྗེས་སུ་༼ ཕྱི་ལོ་ ༢༠༡༥ ཟླ་ ༣ ནས་འཛིན་བཟུང་བྱས་ཏེ་ཕྱི་ལོ་ ༢༠༡༦ ཟླ་ ༢ ༽ ལོ་གཙུམ་གྱི་བཙོན་འཇུག་ཁྲིམས་ཆད་བཅད་ཡོད། འོན་ཀྱང་ཁོང་གིས་རང་ཉིད་ལ་རྒྱ་ནག་གཞུང་གིས་ཁྲིམས་འགལ་གྱི་ཉེས་འགེལ་བྱས་པར་ངོས་ལེན་མེད་པའི་སྙན་ཞུ་ཤོག་ལྷེ་༡༢ ཅན་ཞིག་ཕུལ་ཏེ་རང་ཉིད་ཀྱི་སྨྲ་བརྗོད་རང་དབང་སྲུང་ཐབས་བྱས་ཡོད། འདི་ཡིས་ཕྱི་ལོ་༢༠༠༨ ལོ་ནས་རྒྱ་ནག་སྲིད་གཞུང་འོག་གི་བོད་ཀྱི་ཤེས་ཡོན་པ་དང་རྩོམ་པ་པོ་ཚོའི་བསམ་བློ་དང་སྨྲ་བརྗོད་ཀྱི་རང་དབང་ལ་ཚོད་འཛིན་ཤུགས་ཆེན་བྱས་དང་བྱེད་མུས་ཡིན་པ་གསལ་བོར་མཚོན་གྱི་ཡོད། འབྲེལ་ཐག་འདི་བརྒྱུད་ནས་དེབ་ཆ་ཚང་ཀློག་ཐུབ།

Read More »

དུར་ས་འཚོལ་བའི་མི།

དུར་ས་འཚོལ་བའི་མི་ཞེས་པའི་དེབ་འདི་ནི་བོད་ནང་གནས་བཞུགས་རྩོམ་པ་པོ་སྨར་ལྗང་སྨྱུག་ལགས་ཀྱིས་བརྩམས་ཤིང་།  དེབ་འདིའི་ནང་བོད་ནང་མི་རབས་རྒན་པ་རྣམས་ལ་བཅར་འདྲིའི་ལམ་ནས་རྒྱ་གཞུང་གིས་བོད་ལ་ཐོག་མར་བཙན་འཛུལ་སྐབས་ཀྱི་ལོ་རྒྱུས་དང་། ད་ལྟའི་བོད་ནང་གི་ཛ་དྲག་གནས་སྟངས།  རྩོམ་པ་པོ་རང་ཉིད་ཀྱི་སེམས་ཚོར་མཚོན་པའི་སྙན་ངག་བཅས་འཁོད་ཡོད། དེབ་ཧྲིལ་བོར་གཤམ་གྱི་དྲ་ཐག་བརྒྱུད་གཟིགས་ཐུབ།  http://www.scribd.com/doc/154289811/Nyapa-Tibetan-Book  

Read More »