Friday , September 20 2019
Home / གསར་འགྱུར། (page 19)

གསར་འགྱུར།

རྒྱ་གཞུང་གིས་བོད་མིར་བཙན་དྲག་གཅར་རྡུང་གིས་དམར་དམག་དུས་ཆེན་བསུ་བཅུག་འདུག

རྒྱ་གཞུང་གིས་བོད་ས་བཅད་བགོས་ཀྱིས་མི་སེར་སྤེལ་བཞིན་པའི་ལྟའི་དབང་བསྒྱུར་སྲིད་འཛིན་ས་ཁོངས་ལྟར་བྱས་ན། མཚོ་སྔོན་ཞིང་ཆེན་ཡུལ་ཤུལ་ཁུལ་ནང་ཆེན་རྫོང་ཀ་གཞུང་ཡུལ་ཚོས་བཙན་དྲག་གྱི་སྒོ་ནས། ས་གནས་བོད་རིགས་མང་ཚོགས་ལ་རྒྱ་དམར་གྱི་དམག་བཙུགས་དུས་ཆེན་སྲུང་བརྩི་བཅུག་ཡོད་པར་མ་ཟད། མང་ཚོགས་ཀྱི་དུས་སྟོན་དེ་སྲུང་བརྩི་བྱས་པའི་རྣམ་འགྱུར་ཡག་པོ་མེད་པར་ཁ་གཡར་ནས། མཚན་མོ་མང་ཚོགས་ཐོག་དམག་མི་མང་པོ་བཏང་སྟེ་གཅར་རྡུང་དྲག་གནོན་བྱས་པ་དང་། འབྲི་རུ་རྫོང་དུ་བཙོན་གྱིས་བོད་མི་ཚོར་བཙན་གྱིས་གཅན་གཟན་གྱི་པགས་རིགས་གྱོན་དགོས་པ་དང་དམར་གཞུང་ལ་བསྟོད་གླུ་ལེན་བཅུག་ཡོད་འདུག ནམ་རྒྱུན་རྒྱ་གཞུང་གིས་བོད་རིགས་མང་ཚོགས་རྣམས་དམར་དམག་ལ་དགའ་མོས་ཡོད་སྐོར་གྱི་གནས་ཚུལ་རྫུན་སྒྲོག་དང་། རྒྱ་དམར་གྱི་དབང་བསྒྱུར་འོག་བོད་རིགས་མང་ཚོགས་ཀྱིས་བདེ་སྐྱིད་ཀྱི་འཚོ་བ་རོལ་བཞིན་པའི་རྣམ་འགྱུར་རྫུན་མ་དྲིལ་སྒྲོག་བྱ་ཐབས་སུ། ལོ་ལྟར་རྒྱ་དམར་གཞུང་འབྲེལ་དུས་སྟོན་ཁག་ལ་བོད་རིགས་མང་ཚོགས་རྣམས་ལ་བཙན་གྱིས་དུས་སྟོན་སྲུང་བརྩི་བྱེད་འཇུག་གི་ཡོད་པ་ལྟར། ཉེ་ཆར་ཡང་རྒྱ་གཞུང་གིས་བརྒྱད་གཅིག་དམག་བཙུགས་དུས་ཆེན་ཟེར་བ་སྲུང་བརྩི་དགོས་པའི་བཀའ་རྒྱ་བཏང་སྟེ། བོད་ཀྱི་ས་ཁུལ་སོ་སོའི་ནང་རྒྱ་དམར་བཅིངས་འགྲོལ་དམག་(དམར་དམག)བཙུགས་ནས་ལོ་ ༨༨ འཁོར་བའི་དུས་ཆེན་བརྩི་སྲུང་གོ་སྒྲིག་གིས་རིག་རྩེད་སྤྲོ་ཚོགས་བསྡུས་ཐོག ས་གནས་བོད་མི་རྣམས་བཙན་གྱིས་མཉམ་ཞུགས་བྱེད་འཇུག་གིན་ཡོད་འདུག

Read More »

རིན་པོ་ཆེའི་གདུང་ཐལ་ཕྱིར་བཙན་འཕྲོག་དང་སྐུ་སྲིང་མ་སྨད་གཉིས་གློད་འདུག

སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེའི་ནང་མི་དང་ས་གནས་དད་ལྡན་མང་ཚོགས་ཀྱི་ཞུ་འབོད་རིམ་པར་ཞུས་པ་བརྒྱུད། རིན་པོ་ཆེའི་གདུང་ཐལ་ཕྱིར་ནང་མིར་རྩིས་སྤྲོད་ཁས་ལེན་བྱས་ཡོད་ཀྱང་། བོད་མི་བཞིས་རིན་པོ་ཆེའི་གདུང་ཐལ་གདན་འདྲེན་གྱི་ལམ་སྐབས་སུ་ཉེན་རྟོག་པས་ཕྱིར་བཙན་འཕྲོག་བྱས་ཡོད་པ་དང་། དེ་བཞིན། ཉེ་སྔོན་འཇུ་བཟུང་བཀག་ཉར་བྱས་པའི་རིན་པོ་ཆེའི་སྐུ་སྲིང་དང་ཚ་མོ་གཉིས་ཕྱིར་གློད་དེ་ནང་དུ་ལོག་ཡོད་ནའང་། ནང་མི་སྤུན་མཆེད་དག་གི་ཁ་པར་ཨང་གྲངས་ཚང་མར་ཕྱི་ཕྱོགས་འབྲེལ་གཏུགས་མི་ཐུབ་པ་བཟོས་ཡོད་པ་མ་ཟད། ནང་མི་སྤུན་མཆེད་ཚོར་ཚོགས་འདུ་བསྐངས་ཏེ་འཇིགས་སྐུལ་བྱས་ཡོད་འདུག འདི་ག་ལྟེ་གནས་ཁང་ལ་གནས་ཚུལ་འབྱོར་དོན། ༢༠༡༥ ཕྱི་ཟླ་ ༧ ཚེས་ ༡༦ ཉིན་གྱི་ཞོགས་པར་ཁྲིན་ཏུའུ་གྲོང་ཁྱེར་གྱི་འདབས་འབྲེལ་ཁྲོན་ཏུང་བཙོན་ཁང་གིས། སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེའི་སྐུ་ཕུང་བཙན་གྱིས་མེར་བསྲེགས་བཏང་རྗེས། གདུང་ཐལ་ཕྱིར་ཕ་ཡུལ་དུ་འཁུར་མཁན་བོད་མི་བཞི་མ་གཏོགས་དེ་གར་བསྡད་བཅུག་མེད་པ་ལྟར། ཉིན་དེའི་ཕྱི་དྲོ་ཉེན་རྟོག་པ་འགའི་ལྟ་རྟོག་མཉམ་འཁྲིད་འོག་བོད་མི་བཞི་པོ་དེས་རིན་པོ་ཆེའི་གདུང་ཐལ་འཁུར་ནས་ཕྱིར་ཡུལ་དུ་ལོག་པའི་ལམ་བར་དུ། འཁྲིད་མཁན་ཉེན་རྟོག་པའི་བཀོད་འདོམ་ལྟར་དགོང་མོ་དེར་ལྕགས་ཟམ་རྫོང་དུ་སྡོད་བཅུག་རྗེས། གློ་བུར་ཉེན་རྟོག་པ་མང་པོ་ཞིག་སླེབས་ཏེ་རིན་པོ་ཆེའི་གདུང་ཐལ་ཕྱིར་ཕ་ཡུལ་དུ་འཁུར་ཆོག་གི་མ་རེད། དེ་ནི་རྒྱ་ནག་དབུས་གཞུང་གི་བཀའ་རེད་ཅེས་བརྗོད་ནས། ཁོང་ཚོའི་ལག་ནས་རིན་པོ་ཆེའི་གདུང་ཐལ་བཙན་འཕྲོག་བྱས་ཡོད་འདུག སྐབས་དེར་བོད་མི་བཞི་པོ་དེས་ང་ཚོས་འབྲེལ་ཡོད་ལ་ཞུ་བ་མང་པོ་བརྒྱབ་སྟེ་རིན་པོ་ཆེའི་གདུང་ཐལ་ཕྱིར་སྤྲོད་རྒྱུ་ཁས་ལེན་གྱིས་སྤྲད་པ་རེད། གདུང་ཐལ་ང་ཚོར་ཕྱིར་སྤྲོད་རོགས་ཞེས་ཞུ་བ་བརྒྱབ་ཡོད་ཀྱང་། ཉེན་རྟོག་པ་དེ་དག་གིས་སྣང་འཇོག་གང་ཡང་མ་བྱས་པར་གདུང་ཐལ་བཙན་འཕྲོག་བྱས་ཡོད་པར་མ་ཟད། གདུང་ཐལ་ལྕགས་ཟམ་ཁའི་ཆུ་ནང་དུ་འདེབས་རྒྱུ་ཡིན་སྐོར་ལབ་ཡོད་འདུག

Read More »

རོང་རྒྱས་ཨ་གྲགས་ལགས་བཙོན་འཇུག་དུས་བཅད་གཙང་སྟེ་གློད་འདུག

འདི་ག་ལྟེ་གནས་ཁང་གི་ངོས་ནས་རོང་རྒྱས་ཨ་གྲགས་ལགས་བཙོན་འཇུག་དུས་ཡུན་ལོ་ ༨ གཙང་སྟེ་ཁ་སང་དགོང་མོ་གློད་འདུག་པར་དགའ་འགུ་དང་། ཁོང་ལ་སྨན་ཁང་ནང་སྨན་བཅོས་ཐོབ་ཐང་དང་མཐུན་འགྱུར་སྤྲོད་དགོས་པའི་འབོད་སྐུལ་བྱེད་བཞིན་ཡོད། འདི་ག་ལྟེ་གནས་ཁང་ལ་གནས་ཚུལ་འབྱོར་དོན། ཕྱི་ལོ་ ༢༠༡༥ ཟླ་ ༧ ཚེས་ ༣༠ ཉིན་གྱི་བོད་ནང་གི་མཚན་མོའི་ཆུ་ཚོད་དང་པོ་སྟེང་(ཕྱི་ཟླ་ ༧ ཚེས་ ༣༡ ཉིན་གྱི་ཆུ་ཚོད་དང་པོ)། བོད་མི་ཆབ་སྲིད་བཙོན་པ་རོང་རྒྱས་ཨ་གྲགས་ལགས་བཙོན་འཇུག་དུས་ཡུན་གཙང་སྟེ་གློད་ཡོད་འདུག ཡིན་ནའང་། རྒྱ་གཞུང་གིས་བརྒྱུད་ལམ་དང་ས་གནས་སུ་དམ་དྲག་ཤུགས་ཆེན་པོ་བྱས་བཞིན་ཡོད་སྟབས། ད་ལྟའི་ཆར་ཁོང་གི་གཟུགས་པོའི་གནས་སྟངས་ག་འདྲ་ཆགས་ཡོད་མེད་སོགས་གནས་ཚུལ་གང་ཡང་ཤེས་རྟོགས་ཐུབ་ཀྱི་མེད་པ་རེད། རོང་རྒྱས་ཨ་གྲགས་ལགས་བཙོན་འཇུག་དུས་བཅད་གཙང་སྟེ་ཕྱིར་རང་ཁྱིམ་དུ་ལོག་ཐུབ་པ་བྱུང་བར། འདི་ག་ལྟེ་གནས་ཁང་གིས་ངོས་ནས་དགའ་འགུ་ཡི་རངས་བྱེད་བཞིན་ཡོད། དེ་སྔོན་བཙོན་འཇུག་སྐབས་ཁོང་ལ་སྡུག་སྦྱོང་མནར་གཅོད་བཏང་བར་བརྟེན་ནས། མིག་ཡ་གཅིག་གིས་མ་མཐོང་བ་དང་རྣ་ཡ་གཅིག་གིས་ཐོས་མ་ཐུབ་པའི་གནས་སྟངས་བྱུང་ཡོད་པ་རེད། ད་ལྟའི་ཆར་ཁོང་གི་བཙོན་འཇུག་དུས་ཡུན་གཙང་ནས་གློད་གྲོལ་ཐོབ་ཡོད་སྟབས། རྒྱ་གཞུང་གིས་ཁོང་གི་འགྲོ་འདུག་ཐད་བཟང་བཙོན་ལྟ་བུར་མུ་མཐུད་བཀག་སྡོམ་མི་བྱེད་པར། ཁོང་ལ་སྨན་ཁང་ནང་སྨན་བཅོས་བྱེད་པའི་ཐོབ་ཐང་དང་མཐུན་འགྱུར་སྦྱོར་དགོས་པའི་འབོད་སྐུལ་ཞུ་བཞིན་ཡོད།

Read More »

གྲྭ་ཆོས་ཀྱིས་ལགས་རྒྱ་གཞུང་གིས་འཇུ་བཟུང་ཐོག་གར་སོང་ཆ་མེད་དུ་གྱུར་འདུག

ཟླ་སྔོན་མའི་ནང་རྒྱ་གཞུང་གིས་དབལ་ཤུལ་གསེར་རྟའི་གྲྭ་ཆོས་ཀྱིས་ལགས་འཇུ་བཟུང་གིས་ད་ལྟ་གར་ཡོད་ཆ་མེད་དུ་གྱུར་ཡོད་པ་དང་། དེ་བཞིན། ཁོང་གི་ཨ་ཅེ་སྐྱིད་འཛོམས་དང་ཁོ་མོའི་བུ་གྲགས་པ་གཉིས་འཇུ་བཟུང་གིས་ཉིན་བཅོ་ལྔའི་རིང་བཀག་ཉར་གཅར་རྡུང་བྱས་མཐར་ཉེ་སྔོན་ཕྱིར་གློད་ཡོད་འདུག འདི་ག་ལྟེ་གནས་ཁང་ལ་གནས་ཚུལ་འབྱོར་དོན། ཕྱི་ལོ་ ༢༠༡༥ ཕྱི་ཟླ་ ༦ ཚེས་ ༡༩ ཉིན་གྱི་ཕྱི་དྲོ་དུས་ཚོད་ ༥ དང་ཕྱེད་ཀ་ཙམ་ལ། བོད་དབལ་ཤུལ་གསེར་རྟའི་ཕུ་གུ་དགོན་གྱི་གྲྭ་ཆོས་ཀྱིས་ཟེར་བ་ཞིག་རྒྱ་གཞུང་གིས་འཇུ་བཟུང་བཙན་ཁྲིད་བྱས་འདུག ཡིན་ནའང་། ཁོང་འཇུ་བཟུང་དགོས་པའི་ནག་ཉེས་གང་ཡིན་གསལ་ཁ་བཏོན་མེད་པ་རེད། ཁོང་འཇུ་བཟུང་བཙན་ཁྲིད་ཀྱིས་ཟླ་གཅིག་ལྷག་ཕྱིན་ཡོད་ཀྱང་། ད་དུང་གར་ཡོད་གང་ཁྲིད་ཀྱི་གནས་ཚུལ་ཅི་ཡང་ཤེས་རྟོགས་མ་ཐུབ་པར་གར་སོང་ཆ་མེད་ཀྱི་གནས་སྟངས་འོག་ལྷག་ཡོད་འདུག གྲྭ་ཆོས་ཀྱིས་ལགས་འཇུ་བཟུང་བྱས་པའི་ཕྱི་ཉིན་དེ། ཕྱི་ཟླ་ ༦ ཚེས་ ༢༠ ཉིན་གུང་ཙམ་ལ། ཁོང་དང་ཕ་མ་གཅིག་པའི་ཨ་ཅེ་སྐྱིད་འཛོམས་དང་། མོའི་བུ་གྲགས་པ་གཉིས་ཀྱང་གློ་བུར་འཇུ་བཟུང་བཙན་ཁྲིད་བྱས་ཐོག ཉིན་བཅོ་ལྔ་ཙམ་གྱི་རིང་ལ་རྡུང་རྡེག་མནར་གཅོད་སྣ་ཚོགས་བཏང་མཐར་ཉེ་སྔོན་ཕྱིར་གློད་གྲོལ་བཏང་ཡོད་འདུག

Read More »

རིན་པོའི་ཆེའི་འདས་རྐྱེན་ཐད་བསྐྱར་ཞིབ་དང་སྐུ་སྲིང་མ་སྨད་གཉིས་འཕྲལ་དུ་གློད་དགོས།

རྒྱ་གཞུང་གིས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེའི་འདས་རྐྱེན་ཐད་བསྐྱར་ཞིབ་བརྟག་དཔྱད་ཀྱིས་གསལ་ཁ་བཟོ་དགོས་པ་དང་། སྐུའི་སྲིང་མོ་སྒྲོལ་དཀར་མ་སྨད་གཉིས་ཁྲིམས་འགལ་འཇུ་བཟུང་བ་འཕྲལ་དུ་གློད་གྲོལ་གཏོང་དགོས་པའི་འབོད་སྐུལ་བྱེད་བཞིན་ཡོད། འདི་ག་ལྟེ་གནས་ཁང་ལ་གནས་ཚུལ་འབྱོར་དོན། ཕྱི་ལོ་ ༢༠༡༥ ཟླ་ ༧ ཚེས་ ༡༧ ཉིན། ཟི་ཁྲོན་ཁྲིན་ཏུའུ་གྲོང་ཁྱེར་གྱི་ཟ་ཁང་ཞིག་ནང་ནས། སྤྲུལ་སྐུ་བསྟན་འཛིན་བདེ་ལེགས་ཀྱི་སྐུ་སྲིང་རང་ལོ་ ༥༢ ཡིན་པའི་སྒྲོལ་དཀར་ལྷ་མོ་དང་། ཁོ་མོའི་བུ་མོ་རང་ལོ་ ༢༥ ཡིན་པ་ཉི་མ་ལྷ་མོ་གཉིས་ལི་ཐང་རྫོང་གི་ཉེན་རྟོག་པས་འཇུ་བཟུང་བཙན་འཁྲིད་བྱས་ཡོད་པ་དང་། དེ་རྗེས་གནས་ཚུལ་གང་ཡང་ཤེས་རྟོག་ཐུབ་ཀྱི་མེད་པར་གར་སོང་ཆ་མེད་དུ་གནས་སྟངས་འོག་ལྷག་ཡོད་པ་རེད། རྒྱ་གཞུང་གིས་རིན་པོ་ཆེའི་ནང་མི་དེ་གཉིས་འཇུ་བཟུང་དགོས་དོན་ནི། སྐུའི་སྲིང་མོ་སྒྲོལ་དཀར་ལྷ་མོ་ལགས་ཀྱིས་རིན་པོ་ཆེའི་འདས་རྐྱེན་ཐད་བསྐྱར་ཞིབ་བརྟག་དཔྱད་དགོས་པའི་ཞུ་གཏུགས་བྱས་པ་དང་། རིན་པོ་ཆེའི་གདུང་ཐལ་ཕྱིར་ནང་མིར་རྩིས་སྤྲོད་དགོས་པའི་རེ་འདུན་བཏོན་པར་བརྟེན་ནས་འཇུ་བཟུང་བྱས་པ་ཞིག་ཆགས་ཡོད།

Read More »

ཆབ་སྲིད་བཙོན་པ་བློ་བཟང་ཡེ་ཤེས་བཙོན་འོག་རྐྱེན་འདས་སུ་བཏང་འདུག

ཁོར་ཡུག་སྲུང་སྐྱོབ་ཆེད་ཞི་བའི་ངོ་རྒོལ་གནང་མཁན་བོད་མི་ཆབ་སྲིད་བཙོན་པ་སྡེ་དཔོན་བློ་བཟང་ཡེ་ཤེས་ལགས། ལྷ་ས་ཆུ་ཤུལ་བཙོན་ཁང་ནང་སྡུག་སྦྱོང་མནར་གཅོད་ཀྱི་རྐྱེན་པས། ཉེ་ཆར་བཙོན་འོག་རྐྱེན་འདས་སུ་གྱུར་ཡོད་པ་མ་ཟད། སྐུ་ཕུང་ཡང་ནང་མིར་རྩིས་སྤྲོད་མ་བྱས་པར་རྒྱ་གཞུང་གིས་མེར་བསྲེགས་བཏང་ཡོད་འདུག འདི་ལྟེ་གནས་ཁང་ལ་གནས་ཚུལ་འབྱོར་དོན། ལྷ་སའི་ཆུ་ཤུལ་བཙོན་འོག་ནང་བཙོན་འཇུག་བྱས་ཡོད་པའི་རང་ལོ་ ༦༤ ཡིན་པའི་བོད་མི་སྡེ་དཔོན་བློ་བཟང་ཡེ་ཤེས་ལགས་ལ་མི་སྤྱོད་ལས་འདས་པའི་སྡུག་སྦྱོང་མནར་གཅོད་བཏང་བར་བརྟེན་ནས། ཁོང་གི་གཟུགས་པོ་ནད་གཅོང་དུ་གྱུར་ཏེ་མགོ་ཡུ་འཁོར་བ་སོགས་བྱུང་བཞིན་ཡོད་པ་དང་། ཉེ་ཆར་གནས་སྟངས་ཛ་དྲག་འོག་ལྷ་སའི་སྨན་ཁང་ཞིག་ཏུ་ཁྱེར་ཡོད་ཀྱང་། ཕྱི་ལོ་ ༢༠༡༥ ཟླ་ ༧ ཚེས་ ༡༩ ཉིན་གྱི་ཆུ་ཚོད་གཉིས་པ་ཡས་མས་ཞིག་ལ་འདས་གྲོངས་སུ་ཕྱིན་འདུག ཁོང་བཙོན་འོག་རྐྱེན་འདས་བཏང་རྗེས་སྐུ་ཕུང་ནང་མི་ལ་རྩིས་སྤྲོད་བྱས་མེད་པ་མ་ཟད། སྐུ་ཕུང་མེར་བསྲེགས་སྐབས་ཀྱང་སྤུན་མཆེད་གཉིས་ལས་ལྷག་ཡོང་མི་ཆོག་པ་བརྗོད་འདུག དེ་བཞིན། ནང་མི་རྣམས་ཁོང་གི་སྐུ་ཕུང་འགྲམ་ལའང་འགྲོར་བཅུག་མེད་པ་རེད། ནང་མི་སྤུན་མཆེད་ཚོས་སྔ་ཕྱི་རིམ་པར་ཞུ་བ་འཐེན་རྗེས། གྲྭ་པ་གཅིག་ཁོ་ན་སྔོ་སྨོན་གསུང་བར་ཕུང་པོའི་འགྲམ་ལ་བཏང་ཡོད་འདུག

Read More »

རྔ་པ་རྨེའུ་རུ་མའི་བུ་མོ་དབང་མོ་རྒྱ་གཞུང་གིས་འཇུ་བཟུང་བཙན་འཁྲིད་བྱས་འདུག

རྔ་པ་རྫོང་རྨེའུ་རུ་མ་ཡུལ་ཚོའི་སྟེང་བོད་རིགས་བུ་མོ་དབང་མོ་ལགས་ཀྱིས། ༧གོང་ས་མཆོག་གི་སྐུ་པར་ལག་ཏུ་བཟུང་སྟེ་རྒྱ་གཞུང་གི་སྲིད་ཇུས་ལ་ཞི་བའི་ངོ་རྒོལ་སྐབས། རྒྱ་གཞུང་ཉེན་རྟོག་པས་བཙན་འཁྲིད་ཀྱིས་གར་སོང་ཆ་མེད་དུ་གྱུར་འདུག འདི་ག་ལྟེ་གནས་ཁང་ལ་གནས་ཚུལ་འབྱོར་དོན། ཕྱི་ལོ་ ༢༠༡༥ ཟླ་ ༧ ཚེས་ ༡༥ ཉིན་བོད་མདོ་སྨད་རྔ་པ་རྫོང་རྨེའུ་རུ་མ་ཡུལ་ཚོའི་སྟེང་ནས། རང་ལོ་ ༢༢ ཡས་མས་ཤིག་ཡིན་པའི་བུ་མོ་དབང་མོ་ལགས་ཀྱིས་རྒྱ་གཞུང་གིས་བོད་ཐོག་འཛིན་པའི་སྲིད་བྱུས་ལ་ངོ་རྒོལ་སྐད་འབོད་བྱེད་བཞིན། ༸གོང་ས་མཆོག་གི་སྐུ་པར་ལག་ཏུ་བཟུང་ནས་ཡུལ་ཚོའི་གཞུང་ལམ་དུ་གོམ་བགྲོད་བྱས་ཡོད་ཅིང་། གནས་ཚུལ་དེ་བྱུང་རྗེས་རྔ་པའི་ཉེན་རྟོག་པས་ཁོ་མོ་འཛིན་བཟུང་བཙན་ཁྲིད་བྱས་འདུག ད་ལྟའི་ཆར་གར་ཡོད་ཅི་བྱུང་གི་གནས་ཚུལ་གང་ཡང་ཤེས་རྟོགས་ཐུབ་ཀྱི་མེད་པ་རེད།

Read More »

རྒྱ་གཞུང་གིས་རིན་པོ་ཆེའི་འདས་རྐྱེན་ལ་བརྟག་དཔྱད་དང་གདུང་ཐལ་ནང་མིར་རྩིས་སྤྲོད་དགོས་པའི་བསྒྲགས་གཏམ།

འདི་ག་ལྟེ་གནས་ཁང་གིས་ངོས་ནས། རྒྱ་གཞུང་གིས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེའི་འདས་རྐྱེན་ཐད་ལ། ཁོང་གི་ནང་མིས་དོགས་སློང་བྱས་པ་ལྟར་དྲང་བདེན་གྱི་སྒོ་ནས་ཞིབ་བཤེར་ཐག་གཅོད་དང་། རིན་པོ་ཆེའི་གདུང་ཐལ་ཕྱིར་ནང་མིར་གང་མགྱོགས་རྩིས་སྤྲོད་དགོས་པ་ནན་སྐུལ་ཞུ་བཞིན་ཡོད། ཕྱི་ལོ་ ༢༠༡༥ ཕྱི་ཟླ་ ༧ ཚེས་ ༡༦ ཉིན་ནང་ཆུ་ཚོད་ ༧ ཙམ་ལ། ཟི་ཁྲོན་ཞིང་ཆེན་ཁྲིན་ཏུའུ་གྲོང་ཁྱེར་གྱི་འདབས་འབྲེལ་ཏཱ་ཀྲུའུ་གྲོང་ཁྱེར་ཏཱ་ཀྲོག་རྫོང་དུ་ཡོད་པའི་ཁྲོན་ཏུང་བཙོན་ཁང་ནང་། བོད་རིགས་དགེ་འདུན་པ་གྲངས་ ༡༨ དང་སྤུན་གཉེན་གྲངས་ ༡༤ བཅས་བོད་མི་ ༣༢ རིན་པོ་ཆེའི་སྐུ་ཕུང་མཇལ་བར་ཁྲིད་དེ་ཁོང་ཚོ་སྐུ་ཕུང་ལ་མཇལ་བཅུག་རྗེས། རྒྱ་གཞུང་གིས་རིན་པོ་ཆེའི་སྐུ་ཕུང་གློག་འཕྲུལ་ཐོག་པུར་བསྲེགས་བྱེད་དུ་ཁྱེར་ཡོད་པ་དང་། སྐུ་ཕུང་ལ་མཇལ་ཁར་བཅར་མཁན་བོད་མི་དེ་ཕྱིར་འཕུད་བཏང་ཡོད་འདུག རིན་པོ་ཆེའི་གདུང་ཐལ་ཕྱིར་ནང་མིར་རེག་ཐབས་སུ་ནང་མི་ཉེ་འབྲེལ་མི་ ༤ ཡིས་དེ་གར་མུ་མཐུད་སྒུག་སྡོད་བྱས་ཡོད་ཀྱང་། ད་ལྟའི་བར་དུ་གདུང་ཐལ་ཕྱིར་ནང་མིར་རྩིས་སྤྲོད་བྱས་ཡོད་ཀྱི་གནས་ཚུལ་གང་ཡང་ཤེས་རྟོགས་ཐུབ་ཀྱི་མི་འདུག

Read More »

སྤྲུལ་སྐུ་བསྟན་འཛིན་བདེ་ལེགས་ཚེ་བཙོན་འོག་རྐྱེན་འདས་སུ་བཏང་གསལ་འདོན་དང་སྐུ་གདུང་ནང་མིར་རྩིས་སྤྲོད་མཆོད་འབུལ་བྱེད་འཇུག་དགོས་པའི་འབོད་སྐུལ།

འདི་ག་ལྟེ་གནས་ཁང་གི་ངོས་ནས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེར་རྒྱ་གཞུང་གིས་ཚེ་བཙོན་གྱི་བཙོན་འཇུག་འོག སྡུག་སྦྱོར་མནར་གཅོད་བཏང་སྟེ་རྐྱེན་འདས་སུ་བཏང་ཡོད་པ་གསལ་འདོན་དང་། དེ་བཞིན། ཟླ་འདིའི་ཕྱི་ཚེས་ ༡༢ དགོང་མོ་ནང་མིར་རིན་པོ་ཆེ་གྲོངས་ཡོད་སྐོར་བརྗོད་པ་ནས་ད་ལྟའི་བར་ཉིན་གྲངས་ ༤ ལྷག་ཕྱིན་ཡོད་ནའང་། ད་དུང་རིན་པོ་ཆེའི་སྐུ་ཕུང་ནང་མིར་རྩིས་སྤྲོད་བྱས་མེད་པ་མ་ཟད། ས་གནས་དད་ལྡན་མང་ཚོགས་ཀྱིས་ཞུ་གཏུགས་ངོ་རྒོལ་ལ་དྲག་གནོན་བྱས་ཏེ། ད་ལྟའི་ཆར་ས་གནས་མང་ཚོགས་ཀྱི་གནས་སྟངས་ཀྱང་ཛ་དྲག་ཆགས་ཡོད་སྟབས། འདི་ག་ལྟེ་གནས་ཁང་གི་ངོས་ན་རྒྱལ་སྤྱིའི་ཚོགས་སྡེ་ཁག་གིས་རྒྱ་གཞུང་ལ་གནོན་ཤུགས་སྤྲད་དེ། རིན་པོ་ཆེའི་འདས་རྐྱེན་གསལ་ཁ་དང་སྐུ་གདུང་རང་ཡུལ་དུ་གདན་འདྲེན་གྱིས་མཆོད་འབུལ་བསྔོ་སྨོན་བྱེད་འཇུག་དགོས་པའི་འབོད་སྐུལ་བྱེད་བཞིན་ཡོད། འདི་ག་ལྟེ་གནས་ཁང་ལ་གནས་ཚུལ་འབྱོར་དོན། ཕྱི་ཟླ་ ༧ ཚེས་ ༡༢ ཉིན་གྱི་དགོང་མོ་རྒྱ་གཞུང་འབྲེལ་ཡོད་མི་སྣས། ཁྲིན་ཏུའུ་རུ་འབོད་འགུག་བྱས་པའི་སྤྲུལ་སྐུ་བསྟན་འཛིན་བདེ་ལེགས་ཀྱི་ནང་མི་སྐུ་སྲིང་གཉིས་ལ་རིན་པོ་ཆེ་སྐུ་གྲོངས་ཟིན་པའི་སྐོར་བརྗོད་ཡོད་པ་ལྟར། ས་གནས་བོད་རིགས་དད་ལྡན་སེར་སྐྱ་མང་ཚོགས་ཀྱིས་གནས་ཚུལ་དེ་ཐོས་རྗེས། ཕྱི་ཚེས་ ༡༣ ཉིན་གྱི་ཞོགས་པར་རིན་པོ་ཆེ་ཁོང་གི་དགོན་པ་ཆེ་ཤོས་ན་ལེན་ཌ་ཐེག་ཆེན་བྱང་ཆུབ་ཆོས་གླིང་དགོན་པའི་གནས་ཡུལ་ཉེ་འདབས་ཏེ། ཐང་དཀར་མ་ཞེས་པའི་ས་ཆར་ཡོད་པའི་ས་གནས་རྒྱ་གཞུང་ཞང་སྲིད་གཞུང་ཡོད་ས་དེར། སྐྱ་སེར་དད་ལྡན་མང་ཚོགས་སྟོང་ཕྲག་ལྷག་འདུ་འཛོམས་ཐོག རྒྱ་གཞུང་གིས་རིན་པོ་ཆེ་ཁོང་བཙོན་ཁང་ནང་རྐྱེན་འདས་སུ་བཏང་བར་ངོ་རྒོལ་དང་། རིན་པོ་ཆེའི་སྐུ་ཕུང་ཕྱིར་གདན་འདྲེན་ཞུ་འཇུག་དགོས་པའི་སྐོར་སོགས་ཞུ་གཏུགས་བྱས་པར། རྒྱ་གཞུང་ཉེན་རྟོག་པས་བཀག་སྡོམ་བྱས་པར་བརྟེན་ནས། མཐར་ས་གནས་མང་ཚོགས་དང་རྒྱ་གཞུང་ཉེན་རྟོག་པའི་བར་འཁྲུག་རྩོད་ཤོར་ཡོད་འདུག སྐབས་དེར་རྒྱ་གཞུང་གིས་ཉེན་རྟོག་པ་དང་དམག་མི་ཕོན་ཆེན་འགྲེམས་འཇོག་གིས་མང་ཚོགས་ལ་དྲག་གནོན་བྱས་ཏེ། མང་ཚོགས་ཀྱི་ཁྲོད་དུ་མིག་སྦྲིད་དུག་རླངས་དང་མེ་མདའ་བརྒྱབ་ཡོད་འདུག

Read More »

གྲྭ་བསྟན་འཛིན་ལྷུན་གྲུབ་ལ་ལོ་ ༡༢ ཁྲིམས་ཐག་བཅད་འདུག

རྒྱ་གཞུང་གིས་ཁམས་འབྲི་རུའི་གྲྭ་བསྟན་འཛིན་ལྷུན་གྲུབ་ལགས་འཇུ་བཟུང་བཙན་འཁྲིད་ལོ་གཅིག་རིང་བཀག་བསྐྱིལ་བྱས་མཐར། འདི་ལོའི་ཕྱི་ཟླ་ ༥ ནང་ལྷ་ས་རུ་ལོ་ ༡༢ དུས་བཀག་བཙོན་འཇུག་ཁྲིམས་ཐག་བཅད་འདུག འདི་ག་ལྟེ་གནས་ཁང་ལ་གནས་ཚུལ་འབྱོར་དོན། ཕྱི་ལོ་ ༢༠༡༥ ཕྱི་ཟླ་ ༥ ནང་གཞུང་གིས་ལྷ་ས་རུ་ཁམས་འབྲི་རུ་རྫོང་ཆུ་གཉིས་ཡུལ་ཚོ་(རླན་ཆུ་) དགོན་གསར་དགོན་པའི་གྲྭ་བསྟན་འཛིན་ལྷུན་གྲུབ་ལ་ལོ་ ༡༢ ཀྱི་དུས་བཀག་བཙོན་འཇུག་ཁྲིམས་ཐག་བཅད་ཡོད་འདུག ཁོང་ལ་ནག་ཉེས་ཅི་ཞིག་བཀལ་ཏེ་ཁྲིམས་གཅོད་བྱས་མིན་དང་། ད་ལྟ་བཙོན་ཁང་གང་དུ་བཙོན་འཇུག་བྱས་ཡོད་མེད་སོགས་གནས་ཚུལ་ཞིབ་ཕྲ་ཤེས་རྟོགས་ཐུབ་ཀྱི་མེད་པ་རེད། ནམ་རྒྱུན་རྒྱ་གཞུང་གིས་བོད་མི་ཚོར་བཙོན་འཇུག་ཁྲིམས་ཐག་གཅོད་སྐབས། ཁྲིམས་ལུགས་ནང་གཏན་འབེབས་བྱས་པ་གཞིར་བཟུང་ཁྲིམས་ཞིབ་བྱེད་ཀྱིན་མེད་པར། གསང་བའི་ཐོག་ནས་ཁྲིམས་ཐག་གཅོད་བཞིན་ཡོད་པ་རེད། གྲྭ་བསྟན་འཛིན་ལྷུན་གྲུབ་ལགས་ལ་མཚོན་ནའང་ལོ་གཅིག་ལྷག་རིང་བཀག་ཉར་བྱས་མཐར་བཙོན་འཇུག་ཁྲིམས་ཐག་བཅད་ཡོད་པ་རེད།

Read More »