Friday , September 20 2019
Home / གསར་འགྱུར། (page 11)

གསར་འགྱུར།

རྒྱ་གཞུང་གི་ཉེན་རྟོག་པས་བོད་མི་ཞི་རྒོལ་བའི་སྟེང་ཚད་ལས་བརྒལ་བའི་རྡེག་རྡུང་དབང་ཚད་བེད་སྤྱོད་བྱས།

འདི་ག་ལྟེ་གནས་ཁང་གིས་བོད་མི་ཞི་རྒོལ་བའི་སྟེང་རྒྱ་གཞུང་གི་ཉེན་རྟོག་པས་ཚད་ལས་བརྒལ་བའི་རྡུང་རྡེག་གི་དབང་ཚད་བེད་སྤྱོད་བྱས་པར་མཐའ་གཅིག་ཏུ་ངོ་རྒོལ་ཡོད། ཕྱི་ལོ་༢༠༡༦་ཟླ་༡༠ཕྱི་ཚེས་༡༧ཉིན། དགེ་འདུན་པ་བློ་བཟང་ཚུལ་ཁྲིམས་ཞེས་པ་ཞིག་གིས་རྔ་བ་རྫོང་བོད་ཡིག་སློབ་འབྲིང་གི་མདུན་ནས་འོ་སྐྱེས་གཙང་བོའི་ཕྱོགས་སུ་བོད་དོན་ཆེད་གོམ་བགྲོད་དང་།  ཁོང་གིས་༧གོང་ས་མཆོག་གི་སྐུ་པར་ཅིག་མགོ་སྟེང་དུ་ཁུར་ནས་༼བོད་ལ་རང་དབང་དགོས།  ༧རྒྱལ་བ་ཡིད་བཞིན་ནོར་བུ་མཆོག་ཁྲི་ལོར་བརྟན་པར་ཤོག་༽ཅེས་སྐད་འབོད་གནང་བར།  རྒྱ་གཞུང་གི་ས་གནས་ཉེན་རྟོག་པས་བོད་མི་ཞི་རྒོལ་བ་ཞིག་འཇུ་བཟུང་བཙན་འཁྲིད་དང་དྲག་རྡུང་ཚད་མེད་བྱས་རྐྱེན། ཞི་རྒོལ་གནང་མཁན་དགེ་འདུན་པར་རྨས་སྐྱོན་འཚབ་ཆེན་ཐེབས་ནས་སྨན་ཁང་དུ་བསྐྱལ་དགོས་བྱུང་འདུག བརྒྱུད་ལམ་ཁག་ལྟར་ན།  ཁོང་གི་ཁེར་རྐྱང་ངོ་རྒོལ་གནང་དོན་ནི།  ཉེ་ལམ་ཀིརྟི་རིན་པོ་ཆེ་ཡི་བླ་བྲང་གསར་རྒྱག་གིས་འཁྲུངས་སྐར་སྲུང་བརྩི་བྱས་པ་དང་ཕྱི་ཟླ་༡༠བའི་དགུན་ཆོས་འཚོགས་པའི་སྔ་ཕྱི་རུ་དམ་དྲག་ཤུགས་ཆེར་བྱས་པ་མ་བཟོད་པར་དེ་ལྟར་གནང་བ་རེད་ཅེས་གསལ་འདུག དགེ་འདུན་པ་ཁོང་གིས་གོམ་བགྲོད་བྱས་ནས་རིང་བོ་མ་འགོར་བར།   ས་གནས་ཉེན་རྟོག་པ་ཁོང་གི་སར་སླེབས་ནས་འཇུ་བཟུང་བཙན་འཁྲིད་བྱས་པ་མ་ཟད། ཕྱི་ཉིན་ཚེས་༡༨ ཁོང་ལ་ཉེན་རྟོག་པས་ཚད་ལས་བརྒལ་བའི་བཅར་རྡུང་བྱས་པར་བརྟེན།    གསང་བའི་སྒོ་ནས་སྨན་ཁང་དུ་སྐྱེལ་དགོས་བྱུང་བ་ཡུལ་མི་ཚོས་ཤེས་རྟོགས་བྱུང་འདུག ད་ལྟའི་ཆར་ཁོང་ས་གནས་གང་ནས་ཡིན་མིན་དང་ད་ལྟའི་གནས་སྟངས་གང་འདྲ་ཆགས་ཡོད་མེད།  ཁོང་གི་ནང་མིའི་གནས་ཚུལ་སོགས་ཤེས་རྟོགས་བྱུང་ཐབས་མི་འདུག་པས། འདི་གི་ལྟ་ེགནས་ཁང་གི་ངོས་ནས།  རྒྱ་གཞུང་གི་ས་གནས་སྲིད་གཞུང་གིས་ངེས་པར་དུ་དགེ་འདུན་པ་བློ་བཟང་ཚུལ་ཁྲིམས་ལ་ཚད་ལས་བརྒལ་བའི་རྡུང་རྡེག་དབང་ཚད་བདེ་སྤྱོད་བྱེད་མཁན་ཉེན་རྟོག་པ་དེ་ཉིད་སུ་ཡིན་གྱི་རྩད་གཙོད་དང་། མཚོན་ཆ་དང་ཕར་རྒོལ་གང་ཡང་བྱེད་མེད་པའི་ཞི་རྒོལ་བར་དེ་ལྟར་རྨས་སྐྱོན་འཚབ་ཆེན་ཕོག་ནས་སྨན་ཁང་དུ་བསྐྱལ་བ་འདི་རིགས་ནི་ཁྲིམས་འགལ་གྱི་བྱ་སྤྱོད་ཡིན་པ་ར་སྤྲོད་དང་ཁྲིམས་བཞིན་ཉེས་ཆད་གཅོད་དགོས་པའི་འབོད་བསྐུལ་ཞུ་རྒྱུ་ཡིན། མ་ཟད། ས་གནས་སྲིད་གཞུང་གིས་ངེས་པར་དུ་དགེ་འདུན་པ་བློ་བཟང་ཚུལ་ཁྲིམས་ཀྱི་ནང་མི་རྣམས་ལ་ཁོང་ལ་ཐུག་འཕྲད་ཀྱིས་སྨན་བཅོས་བྱེད་དུ་འཇུག་དགོས། ཉེན་རྟོག་པས་ཚད་ལས་བརྒལ་བའི་རྡུང་རྡེག་གི་དབང་ཚད་བེད་སྤྱོད་བྱས་པ་འདིས་མང་ཚོགས་དཀྱིལ་མའི་ཚེ་སྲོག་ལ་ཉེན་འཚབ་དང་བསམ་བློ་རང་དབང་འཇིགས་ཉེན་གྱི་གཤེན་མ་ལྟ་བུ་གྱུར་ཡོད། བསམ་བློ་རང་དབང་ནི་རྒྱ་གཞུང་གིས་ཁྲིམས་ཁར་གསལ་བའི་འགྲོ་བ་མིའི་གཞི་རྩའི་ཐོབ་ཐང་ཁག་གི་རྨང་གཞི་ལྟ་བུ་གྱུར་ཡོད་ཅིང་། དེ་ལྟ་བུ་རང་དབང་ལོངས་སུ་སྤྱོད་མཁན་བོད་མི་ཞི་རྒོལ་བའམ།  རང་གཞན་སུ་ལའང་གནོད་སྐྱོན་མེད་པའི་ཞི་བའི་སྐད་འབོད་གནང་བའི་བྱེད་བབ་འདི་ནི་རྒྱལ་སྤྱི་དང་རྒྱ་ནག་རང་གི་ཁྲིམས་སྒྲིག་ཁག་ཏུ་བྱེད་འཐུས་ཆོག་པའི་འབྲི་དོན་ལྟར་ལག་བསྟར་གནང་རྒྱུ་དྲན་སྐུལ་ཞུ་ཡི་ཡོད། དེ་མཚུངས་སུ་བློ་བཟང་ཚུལ་ཁྲིམས་ཀྱི་ནང་མིར་ཁོང་ལ་ཐུག་འཕྲད་བྱེད་དུ་འཇུག་དགོས་པ་མ་ཟད།  མུ་མཐུད་དུ་གང་དུ་བཀག་ཉར་བྱེད་ཡོད་མེད་གསང་རྒྱ་བྱེད་རྒྱུ་ལས་ལྡོག་ནས་ཁྲིམས་ཁ་བརྒྱུད་ནས་གནད་དོན་གཙང་བཟོ་བྱེད་རྒྱུར་འབོད་བསྐུལ་ཞུ་ཡི་ཡོད།  

Read More »

བླ་རུང་ནང་བསྟན་སློབ་གླིང་གཏོར་བཤིག་ལས་རྒྱ་ནག་གཞུང་གི་ཆོས་ལུགས་སྲིད་ཇུས་ཀྱི་གདོང་རིས་ངོ་མ་མངོན།

བོད་ཀྱི་ནང་ཆོས་སློབ་སྦྱོང་དང་ཉམས་ལེན་བྱེད་སའི་ལྟེ་གནས་གལ་ཆེན་བླ་རུང་ནང་བསྟན་སློབ་གླིང་གཏོར་བཤིག་དང་གྲྭ་བཙུན་ཕྱིར་འབུད་གཏོང་བཞིན་པའི་གནས་ཚུལ་འདིས་བདེན་དབང་བྱས་པ་ནི།བོད་པའི་རྒྱ་ཆེ་དད་ལྡན་མི་དམངས་ལ་མཚོན་ན་དོན་དན་གྱི་ཆོས་དད་རང་དབང་ནི་ཧ་ཅང་རྒྱང་ཐག་རིང་བ་ཞིག་ཡིན། འདི་ལོའི་ཕྱི་ཟླ་༧བའི་ཚེས་༢༠ནས་བཟུང་རྒྱ་ནག་གཞུང་གིས་གླས་བའི་གཏོར་བཤིག་དཔུང་སྡེ་བླ་རུང་ནང་བསྟན་སློབ་གླིང་དུ་ཡོང་ནས་གྲྭ་ཤག་སོགས་གཏོར་བཤིག་ལས་གཞི་འགོ་འཛུགས་གནང་ཡོད་པ་རེད།དེ་སྔོན་རྒྱ་ནག་གཞུང་གི་འཆར་གཞི་ལྟར་ན་ད་ལོའི་ལོ་མཇུག་པར་དུ་བླ་རུང་ནང་བསྟན་སློབ་གླིང་གི་གྲྭ་ཤག་ཕྱེད་ཀ་གཏོར་བཤིག་གཏོང་རྒྱུ་ཡིན་པ་དང་།  གྲྭ་བཙུན་སྟོང་ཕྲག་མང་པོ་ཕྱིར་འབུད་གཏོང་ནས་གྲྭ་བཙུན་༥༠༠༠ཡི་ཚད་བཀག་བཟོ་ཡོད་པ་རེད།   དེའི་ནང་གྲྭ་བ་༢༠༠༠་དང་བཙུན་མ་༣༠༠༠ལས་གཞན་ཚང་མ་ཕྱིར་འབུད་གཏོང་རྒྱུ་ཡིན་པ་རེད།བླ་རུང་ནང་བསྟན་སློབ་གླིང་གཏོར་བཤིག་མ་བཏང་བའི་སྔོན་དུ་གྲྭ་བཙུན་ཆིག་ཁྲི་ཡས་མས་ཀྱིས་བོད་ཀྱི་ནང་ཆོས་ལ་སློབ་སྦྱོང།   ཞིབ་འཇུག་དང་ཉམས་ལེན་བྱེད་ཀྱི་ཡོད་པ་རེད། བླ་རུང་ནང་བསྟན་སློབ་གླིང་དུ་བོད་ཀྱི་ནང་ཆོས་རང་དབང་གིས་སློབ་སྦྱོང་དང་ཉམས་ལེན་བྱེད་མཁན་སྟོང་ཕྲག་མང་པོ་ཡོད་པའི་ནང་ངུ་བོད་པ།སོག་པོ་དང་རྒྱ་ནག་པ་སོགས་ཚུད་ཡོད།བླ་རུང་ནང་བསྟན་སློབ་གླིང་༡༩༨༧ལོར་ཕྱག་བཏབ་དང་དབུ་བརྙེས་པ་ནས་བཟུང་རྒྱ་ནག  ཐེ་ལེན། ཐེ་ཝེན།ཧང་ཀང་།སིན་གཱ་པོ།མ་ལེ་ཤི་ཡ།ཀོ་རེ་ཡ་སོགས་ནས་སློབ་གཉེར་བྱེད་མཁན་རྒྱུན་ཆད་མེད་པར་ཡོང་གི་པ་རེད།དེ་བཞིན་རྒྱ་ནག་རྒྱལ་ཡོངས་ཀྱི་ནང་བསྟན་སློབ་གཉེར་བ་དང་།  ལྗོངས་ལྔ།དེ་བཞིན་ཐད་སྐྱོང་གྲོང་ཁྱེར་བཞིའི་ནང་གི་ཞིབ་འཇུག་ཚན་པའི་དུས་སྐབས་མི་འདྲ་བའི་ཞིབ་འཇུག་དང་སློབ་གཉེར་བྱེད་བཞིན་ཡོད་པ་དང།བོད་པའི་སློབ་གཉེར་བ་ལ་མཚོན་ན་ཡང་ལྷ་ས།མངའ་རིས།ནག་ཆུ།ཆབ་མདོ།གསེར་རྟ། རྟའུ།དར་རྩེ་མདོ།དཀར་མཛེས།སྡེ་དགེ     ཉག་རོང་།མགོ་ལོག  བྲག་མགོ ཡུལ་ཤུལ།བླ་བྲང་།མཚོ་སྔོན་སོགས་ནས་ཡོད། བོད་ཀྱི་འགྲོ་བ་མའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་ལ་འབྱོར་པའི་གནས་ཚུལ་ལྟར་ན་བླ་རུང་ནང་བསྟན་སློབ་གླིང་དུ་ཡོད་པའི་རྒྱ་ནག་དང་ཕྱི་རྒྱལ་གྱི་སློབ་གཉེར་བ་འབོར་ཆེན་ཕྱིར་འབུད་གཏོང་བཞིན་ཡོད་པ་དང་།  བླ་རུང་ནང་བསྟན་སློབ་གླིང་གི་སྐྱ་བོ་དང་སྔགས་པ་ཕྱིར་འབུད་ལས་འགུལ་ནང་ཚུད་མེད་པ་རེད།དེ་ལས་གཞན་གྲྭ་བཙུན་རྒན་གྲས་རིགས་ཕྱིར་འབུད་གཏོང་རྒྱུ་མིན་པར་བརྗོད། གྲྭ་བཙུན་གྲངས་འབོར་མང་པོ་ད་ལོ་ཕྱི་ཟླ་༧བའི་ཚེས་༢༠སྔོན་ལ་ཕྱིར་འབུད་བཏང་ཟིན་པ་རེད། ༢༠༡༣ལོར་བོད་ཀྱི་འགྲོ་བ་མའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་ལ་འབྱོར་བའི་གནས་ཚུལ་ལ།བོད་རང་སྐྱོང་ལྗོངས་ཟེར་བའི་ནང་གི་བཙུན་མ་སུ་ཞིག་གལ་ཏེ་བླ་རུང་ནང་བསྟན་སློབ་གླིང་དུ་ཕྱིན་ནས་སློབ་སྦྱོང་བྱས་པ་ཡིན་ན་བཀག་ཉར་དང་ཡང་ན་ཁྲིམས་གཅོད་གནང་རྒྱུ་ཡིན་པའི་འཇིགས་སྣང་སྐུལ་འདུག        ༢༠༡༤ལོར་ཆབ་མདོ་དང་འབྲི་རུ་སོགས་སུ་རྒྱ་ནག་གཞུང་གིས་གལ་ཏེ་སོ་སོའི་ནང་མིས་བླ་རུང་ནང་བསྟན་སློབ་གླིང་དང་ཡ་ཆེན་སྒར་དུ་སློབ་གཉེར་བྱེད་མཁན་ཡོད་ན་དུས་ལྟར་ཕྱིར་རང་ཡུལ་དུ་ལོག་དགོས་པ་དང་གལ་ཏེ་མ་ལོག་ན་ཐེམ་ཐོ་མེད་པར་བཟོ་རྒྱུ་ཡིན་པའི་འཇིགས་སྐུལ་ཡང་བྱས་འདུག བླ་རུང་སྒར་ནི་གྲྭ་བ་དང་བཙུན་མར་གཅིག་མཚུངས་ཀྱི་སློབ་གཉེར་གོ་སྐབས་གནང་མཁན་གྱི་ནང་བསྟན་སློབ་གླིང་སྔ་གྲས་ཤིག་ཡིན།བླ་རུང་ནང་བསྟན་སློབ་གླིང་དུ་བཙུན་མའི་ཆེས་མཐོ་སློབ་གཉེར་ཁང་བཙུགས་ཡོད་པ་རེད།དེ་བས་མཁན་མོ་སློབ་མཐར་ཕྱིན་མཁན་ཇེ་མང་དང་ཇེ་མང་ཡིན།མཁན་མོ་ནི་མཁན་པོ་དང་འདྲ་བའི་སློབ་སྦྱོང་གི་གནས་རིམ་ཞིག་ཡིན།དེ་ནི་དེང་གི་འབུམ་རིམ་པའི་གནས་ཚུལ་དང་མཚུངས་པ་ཡིན།སྤྱི་བཏང་ཡིན་ན་ལོ་ངོ་༡༣ལ་གཞུང་ཆེན་བཀའ་པོད་ལྔ་ལ་སློབ་སྦྱོང་བྱེད་དགོས་པ་མ་ཟད།དེ་བཞིན་སྔ་འགྱུར་རྙིང་མ་དང་བཀའ་བརྒྱུད་སོགས་ཀྱི་གཞུང་ཆེན་རྣམས་ཀྱང་སློབ་གཉེར་བྱེད་དགོས་པ་ཡིན།༡༩༩༠ལོར་སློབ་གླིང་འདི་ནས་མཁན་མོ་དང་པོ་སློབ་ཐོན་བྱུང་པ་ནས་ད་པར་བཙུན་མ་བརྒྱ་ལས་མི་ཉུང་བས་མཁན་མོ་སློབ་ཐོན་བྱུང་ཡོད།  དེ་ལས་གཞན་བཙུན་མ་མང་པོ་ཞིག་ལ་བླ་རུང་ནང་བསྟན་སློབ་གླིང་ནས་སེམས་ཁམས་དང་འཇིག་རྟེན་འཚོ་བའི་ཕྱོགས་གཉིས་ནས་ཚེ་སྲོག་གསར་བ་ཞིག་གནང་ཡོད། ད་ལོའི་བླ་རུང་ནང་བསྟན་སློབ་གླིང་གི་གཏོར་བཤིག་སྲིད་ཇུས་འདི་༢༠༠༡ལོའི་གཏོར་བཤིག་དང་ཧ་ལས་པའི་འདྲ་བོ་རེད།ཉམས་ཞིབ་བྱས་པ་ལྟར་ན་ལོ་ངོ་༡༥ནང་རྒྱ་ནག་གི་ཆོས་ལུགས་སྲིད་ཇུས་ལ་འགྱུར་བ་གང་ཡང་བྱུང་མེད།(འདི་ན་༢༠༠༡ལོའི་བླ་རུང་སྒར་གཏོར་བཤིག་གི་སྙན་ཐོ་ཆ་ཚང་ཡོད།)གང་ལྟར་རྒྱ་ནག་གཞུང་གིས་ཡང་བསྐྱར་བླ་རུང་ནང་བསྟན་སློབ་གླིང་གཏོར་བཤིག་བྱས་པ་འདིས་རྒྱ་ནག་གཞུང་གི་འགོ་ཁྲིད། ཡང་ན་རྒྱ་ནག་གི་ནུས་སྟོབས་རྒྱལ་སྤྱིའི་ཐོག་ཤུགས་ཆེ་རུ་འགྲོ་བཞིན་པའི་སྐབས་འདིེར་འགྱུར་བ་དང་ཡང་ན་སྲིད་ཇུས་ཅི་ཞིག་ལག་བསྟར་གྱིས་བོད་ཀྱི་ཆོས་ལུགས་རང་དབང་འགན་ལེན་བྱེད་རྒྱུ་དེ་ཡིན།རྒྱ་ནག་འགོ་ཁྲིད་ཚོས་བོད་ཀྱི་ཆོས་ལུགས་མི་སྣ་དང་ཆོས་ལུགས་བྱེད་སྒོ་སོགས་ལ་དོགས་པ་དང་ཧ་ཅང་གུ་དོག་པོ་བྱེད་ཀྱི་ཡོད་པ་ཡིན། ཆབ་སྲིད་ཀྱི་རྒྱབ་ལྗོངས་མེད་ཀྱང་དེ་ལྟར་བྱེད་ཀྱི་ཡོད་པ་རེད།དོན་ངོ་མར་རྒྱ་ནག་གིས་ཆོས་ལུགས་ལ་ལག་བསྟར་བྱེད་བཞིན་པའི་སྲིད་ཇུས་ནི།དྲག་གནོན་ངོ་བོ་ཅན་གྱི་ཁྲིམས་དང་ཁྲིམས་སྲོལ་བེད་སྤྱོད།དེ་བཞིན་རྒྱལ་ཁབ་ཀྱིས་ཁྱབ་བསྒྲགས་དང་ཇུས་བཀོད་ལེགས་པར་གནང་བའི་གཟབ་ནན་གྱི་དམ་དྲག་ཡིན། ༢༠༡༦ལོར་སི་ཁྲན་ཞིང་ཆེན་གྱིས་ཁྱབ་བསྒྲགས་གནང་པའི་བླ་རུང་ནང་བསྟན་སློབ་གླིང་གཏོར་བཤིག་གི་བཀའ་རྒྱས་བོད་ཀྱི་ལས་དོན་བཞུགས་མོལ་ཚོགས་འདུ་ཐེངས་དྲུག་པ་དང་རྒྱལ་ཡོངས་ཐེངས་གཉིས་པའི་ཆོས་ལུགས་ལས་དོན་ཚོགས་འདུ་གཉིས་ལུང་འདྲེན་བྱས་ཡོད།བླ་རུང་ནང་བསྟན་སློབ་གླིང་ལ་བརྗོད་པ་ལྟར་ན་གཏོར་བཤིག་དང་ཕྱིར་འབུད་ནི་ཤི་ཅིན་ཕན་གནང་པའི་བཀའ་རྒྱ་ཡིན།ད་ལོ་ཕྱི་ཟླ་༤བའི་ཚེས་༢༢ནས་༢༣པར་གྱི་ཆོས་ལུགས་ཚོགས་འདུ་ཐོག་ཤི་ཅིན་ཕན་གྱིས། “ཀྲུང་གོ་གུང་ཁྲན་ཏང་གི་འགོ་ཁྲིད་ལ་བརྩི་བཀུར་དང་སྤྱི་ཚོགས་རིང་ལུགས་ཀྱི་ལམ་ལུགས་གོང་དུ་བཀུར་ནས་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་བགྲོད་ལམ་ཐོག་བསྐྱོད་རྒྱུ་མཐའ་འཁྱོངས་བྱེད་དགོས་པ།”ཞེས་བརྗོད་ཡོད། ༢༠༠༡ལོར་བླ་རུང་ནང་བསྟན་སློབ་གླིང་གཏོར་བཤིག་གཏོང་དུས་ཀྱང་བཀའ་རྒྱ་པེ་ཅིན་ནས་ཅིང་ཙི་མིན་ནས་ཐད་ཀར་བཏང་བ་ཡིན་པར་འགྲེལ་བརྗོད་གནང་ཡོད།འདི་ནི་༢༠༡༦ལོའི་གཏོར་བཤིག་གི་འགྲེལ་བརྗོད་ཀྱང་དེ་བཞིན་རེད།ང་ཚོས་གོང་རིམ་གྱི་བཀའ་ལག་བསྟར་བྱེད་ཀྱི་ཡོད་ཟེར་པ་ལས་ཡིག་ཐོག་གི་བདེན་དཔུང་སོགས་མེད་པ་རེད།དེ་ནི་༡༩༩༣ལོར་རྒྱལ་ཡོངས་འཐབ་ཕྱོགས་གཅིག་གྱུར་གྱི་ཚོགས་འདུ་དང་༢༠༠༡ལོའི་རྒྱལ་ཡོངས་ཆོས་ལུགས་ལས་དོན་ཚོགས་འདུ་ཐོག་ཅིང་ཙི་མིན་ནས་ཆོས་ལུགས་སྲིད་ཇུས་སྐོར་གྱི་བཀོད་པ་གསུམ་བཏང་ཡོད་པ་རེད།༡།ཕྱོགས་ཡོངས་ནས་ཏང་གི་ཆོས་དད་རང་མོས་ཀྱི་སྲིད་ཇུས་ཡང་དག་པ་ལག་བསྟར་བྱེད་དགོས་པ།༢།ཁྲིམས་ལྟར་ཆོས་ལུགས་ལས་དོན་དོ་དམ་བྱེད་དགོས།༣།ཆོས་ལུགས་དེ་སྤྱི་ཚོགས་རིང་ལུགས་སྤྱི་ཚོགས་དང་འཚམ་མཐུན་ཡོང་བར་སྣེ་ཁྲིད། ༡༩༩༤ལོར་ཅིང་ཙི་མིན་གྱིས་བོད་ཀྱི་ལས་དོན་བཞུགས་མོལ་ཚོགས་འདུ་ཐེངས་གསུམ་པ་གཙོ་སྐྱོང་གནང་ཡོད་པ་རེད།དེ་བས་ཁོ་རང་གིས་ཆོས་ལུགས་ལས་ཁུངས་བརྒྱུད་ནས་གྲྭ་བཙུན་ལ་དམ་དྲག་བྱེད་པ་ཤུགས་ཆེ་རུ་བཏང་པ་རེད།དེ་འབྲས་བུ་ནི་རྒྱལ་གཅེས་ཆོས་གཅེས་ཀྱི་ལས་འགུལ་རེད།བོད་ས་ཡོངས་སུ་བཙན་དབང་གིས་ཏཱ་ལའི་བླ་མ་སྐྱོན་བརྗོད་དང་།གུང་ཁྲན་ཏང་ལ་ལྷག་བསམ་ཡིན་དགོས་པའི་དྲག་རྡུང་ལས་འགུལ་སྤེལ་པ་རེད། སི་ཁྲན་ཞིང་ཆེན་གྱིས་༢༠༠༡ལོའི་ཡིག་ཆ་ལྟར་ན་གྲྭ་བཙུན་༡༤༠༠དང་༢༠༡༦ལོ་ཡི་ཡིག་ཆ་ལྟར་ན་གྲྭ་བཙུན་༥༠༠༠སློབ་གླིང་དུ་སྡད་ཆོག་གི་ཡོད་པ་རེད།   གནས་སྟངས་འདི་འདྲ་གཉིས་ཀྱི་འོག་ཏུ་རྒྱ་ནག་གཞུང་གིས་སྲིད་གཞུང་འགོ་ཁྲིད་དང་གཏོར་བཤིག་ལས་བཟོ་བ་མ་སླེབས་སྔོན་ལ་སློབ་གླིང་གི་སློབ་གཉེར་བ་དག་ལ་གཟབ་ནན་ངང་རྒྱལ་གཅེས་རིང་ལུགས་ཀྱི་སློབ་གསོ་ལས་འགུལ་སྤེལ་པ་རེད།དེ་མ་ཟད་གཞུང་གིས་ས་གནས་རྫོང་དང་ཁུལ་སོགས་ཀྱི་འགོ་ཁྲིད་དང་ལས་བྱེད་འབོད་བཀུག་གིས་རང་རང་ས་གནས་ཀྱི་སློབ་གཉེར་བ་རྣམས་རང་ཡུལ་དུ་ཁྲིད་ཅིག་པ་རེད།༢༠༡༦ལོར་རྒྱ་ནག་གི་དཔོན་རིགས་ཚོས་དངུལ་བརྔན་སྤྲད་ནས་རང་འགུལ་ངང་ཕ་ཡུལ་ལོག་པའི་གཡོ་ཐབས་བྱེད་བཞིན་འདུག ༢༠༠༡ལོར་བཙུན་མ་རྣམས་ལ་བྱ་དགའ་སྣ་ཚོགས་གནང་ནས་སློབ་གླིང་དང་བྲལ་ཐབས་བྱས་ཡོད། དཔེར་ན་དངུལ།གཡག་དྲུག་གམ་འབྲི་དྲུག དེ་བཞིན་འཛུགས་སྐྲུན་དང་ཁང་པ།ལས་ཀ་སྤྲད་པ་སོགས། ཕྱི་ལོ་༡༩༩༩ལོའི་ཟླ་བ་༣བའི་ནང་སི་ཁྲན་ཞིང་ཆེན་སྲིད་གཞུང་གིས་བླ་རུང་ནང་བསྟན་སློབ་གླིང་གི་དོ་དམ་མི་ལེགས་པ།འཕྲོད་བསྟན་ཆ་རྐྱེན་མི་ལེགས་པ་སོགས་མང་པོ་ཞིག་བགྲངས་པ་རེད།དེ་དག་ནི་༢༠༠༡ལོར་གཏོར་བཤིག་གི་སྔོན་འགྲོ་རེད།༢༠༡༦ལོའི་ཟླ་བ་༧ནང་དཀར་མཛེས་ས་གནས་སྲིད་གཞུང་གིས་ཡང་བསྐྱར་སློབ་གླིང་གི་མེ་སྐྱོན་འགོག་གསོད་བྱེད་ཐབས་ལ་དཀའ་ངལ་ཡོད་རབས་སོགས་བརྗོད་པ་རེད།སྐབས་དེར་ཁོ་ཚོས་༢༠༡༤ལོའི་ཟླ་བ་༡པོར་སློབ་གླིང་དུ་བྱུང་བའི་མེ་སྐྱོན་དོན་རྐྱེན་ཤུགས་ཆེན་གླེང་པ་རེད།མེ་སྐྱོན་དེ་ནང་གྲྭ་ཤག་༡༠༠ལྷག་ལ་མེ་སྐྱོན་བྱུང་པ་རེད།ཡིན་ཡང་མེ་སྐྱོན་བྱུང་རྐྱེན་གང་ཡིན་ཤེས་མེད་པ་རེད།ཟླ་བ་དེ་ནང་དཀར་མཛེས་ལི་ཐང་དགོན་དུ་ཡང་མེ་སྐྱོན་བྱུང་པ་རེད།དེའི་འབྱུང་རྐྱེན་ཡང་གང་ཡིན་ཤེས་མེད་པ་རེད། ཉེ་དུས་བོད་ནང་ལོག་གི་བོད་མི་ཞིག་གིས་ ༼གསེར་རྟ་བླ་རུང་གི་སྐྱིད་སྡུག་ཡར་ཞུ། ༽ཞིག་སྤྱི་ཚོགས་དྲ་རྒྱ་ཐོག་བཀོད་ཡོད་པ་རེད།ཡར་ཞུ་ཡི་གེ་དེ་ནང་དུ་ཆབ་སྲིད་ཐོག་ངོས་ལེན་ཡོད་པས་ཆེད་དུ་ཞུ་ཡིག་གིས་ཐོག་མར་ཏང་ཀྲུང་དབྱངས་ཀྱི་དབུ་ཁྲིད་འཚམ་འདྲི་ཞུས་ཡོད་པ་དང་།༼བློ་མཐུན་ཞི་ཅིན་ཕིན་དང་ཏང་ཀྲུང་དབྱངས་ཀྱིས་དབུ་ཁྲིད་འོག ང་ཚོའི་རྒྱལ་ནང་གིི་འགྲོ་བ་མིའི་ཐོབ་ཐང་དང་། ཆོས་ལུགས་དད་མོས། རང་དབང་འདྲ་མཉམ།  དམངས་གཙོ་འཕེལ་རྒྱས། རིག་གནས་སློབ་སྦྱོང་སོགས་ཀྱི་ཕྱོགས་ལ་བཟང་ཕྱོགས་ཀྱི་གྲུབ་འབྲས་ངེས་ཅན་ཐོན་པར་ངོས་རང་ནས་དགའ་གུས་ཚད་མེད་བྱེད་བཞིན་ཡོད།༽སོགས་བཀོད་ཡོད་པ་དང་།དེ་རྗེས་ཁོས་རྒྱ་ནག་གཞུང་གིས་མངོན་གསལ་དོ་བོས་གསེར་རྟ་བླ་རུང་སློབ་གླིང་གི་མི་འབོར་ཉུང་དུ་གཏོང་བའི་གྲོས་ཆོད་ལ་དོགས་འདྲི་དང་བཅས་དེ་འདྲ་ཉུང་དུ་བཏང་རྗེས་ཀྱི་ངན་འབྲས་ནི་བོད་ཀྱི་སྐད་ཡིག་དང་རིག་གཞུང་།ཆོས་ལུགས་སོགས་རྒྱུན་འཛིན་དང་དར་སྤེལ་ལ་གནོད་པ་ཡོད་པར་བརྗོད་ཡོད།  འདི་ནི་ཁོས་ཡར་ཞུ་ཐེངས་གཉིས་པ་དེ་ཡིན།ཡར་ཞུ་ཡི་གེ་གཤམ་གསལ།   གསེར་རྟ་བླ་རུང་གི་སྐྱིད་སྡུག་ཡར་ཞུ། 2016-10-01 དྲིན་ཆེན་རྩ་བའི་བླ་མ་མཁྱེན་ནོ། གསེར་རྟ་བླ་རུང་གི་སྐྱིད་སྡུག་ཡར་ཞུ། ཐོག་མར་རླབས་ཆེ་བའི་ཏང་ཀྲུང་དབྱངས་ཀྱི་དབུ་ཁྲིད་རིགས་ལ་འཚམ་འདྲི་ཞུ་བ་དང་ཆབས་གཅིག དེ་རིང་ཁོ་བོས་ཡང་བསྐྱར་ཁམས་ཀྱི་ཆོས་སྡེ་ཆེན་མོ་གསེར་རྟ་བླ་རུང་གི་སྐྱིད་སྡུག་སྐོར་ཡར་ཞུ་ཐེངས་གཉིས་པ་དེ་བྱེད་རྒྱུ་ཡིན། ༼༡༽ཉེ་བའི་ལོ་འདི་དག་གི་རིང་རླབས་ཆེ་བའི་བློ་མཐུན་ཞི་ཅིན་ཕིན་དང་ཏང་ཀྲུང་དབྱངས་ཀྱིས་དབུ་ཁྲིད་འོག ང་ཚོའི་རྒྱལ་ནང་གིི་འགྲོ་བ་མིའི་ཐོབ་ཐང་དང་། ཆོས་ལུགས་དད་མོས། རང་དབང་འདྲ་མཉམ། དམངས་གཙོ་འཕེལ་རྒྱས། རིག་གནས་སློབ་སྦྱོང་སོགས་ཀྱི་ཕྱོགས་ལ་བཟང་ཕྱོགས་ཀྱི་གྲུབ་འབྲས་ངེས་ཅན་ཐོན་པར་ངོས་རང་ནས་དགའ་གུས་ཚད་མེད་བྱེད་བཞིན་ཡོད། ལྷག་པར་དུ་དགའ་འོས་པ་ཞིག་ལ/༢༠༡༦/ད་ལོར་ཏང་ཀྲུང་དབྱངས་ཀྱིས་ང་ཚོ་གྲངས་ཉུང་མི་རིགས་ཀྱི་སྐྱིད་སྡུག་དམིགས་སུ་བཟུང་ནས་ཆེད་དུ་སྐབས་༦་པའི་བོད་ཁུལ་ལས་སྒྲུབ་བྱ་བའི་ཚོགས་འདུ་བསྡུས་པར་བཀའ་དྲིན་ཞུ་བ་དང་། ཏང་ཀྲུང་དབྱངས་ཀྱི་བརྩེ་སེམས་དང་དབུ་ཁྲིད་ཞི་ཅིན་ཕིན་སོགས་ཀྱིས་མཛད་རྗེས་ལ་བསྟོད་སྨོན་དང་ཡི་རང་བྱེད་བཞིན་ཡོད། ༼༢༽འོན་ཀྱང་བོད་ཁུལ་ལས་སྒྲུབ་ཚོགས་ཐོག་ཏུ་གསེར་རྟ་བླ་རུང་སྒར་གྱི་མི་འབོར་ཉུང་དུ་གཏོང་བའི་གྲོས་ཆོད་ཅིག་བྱུང་བ་དེ། ངོས་ཀྱིས་ཏང་ཀྲུང་དབྱངས་ཀྱིས་ཡང་སྙིང་གང་ཞིག་ལ་དམིགས་པ་ཡིན་རྟོགས་དཀའ་བར་འདུག་པས་གསལ་བཤད་ཡང་དག་ཅིག་ལ་སྒུག་ནས་ཡོད། གལ་ཏེ་གྲངས་ཚད་ལས་བརྒལ་ལོ་ཟེར་ན། འོ་ན་རྒྱ་ནག་གི་སློབ་ཆེན་ཚོའི་ནང་ནས་ཆུང་ཤོས། དཔེར་ན་ནུབ་བྱང་མི་རིགས་སློབ་ཆེན་གཅིག་ལ་མཚོན་ནའང་། ན་ནིང་ལོར་སྡོམ་རྩིས་བྱས་པའི་གྲངས་ཀ་ཁྲི་གསུམ་ལས་བརྒལ་བའི་གནས་ཚུལ་འདུག་ན། བླ་རུང་གི་གྲྭ་ཇོ་ཡོངས་རྫོགས་སྤྱི་སྡོམ་བྱས་ནའང་ཁྲི་གཉིས་ལ་ལོང་གིན་མེད་པས་མི་འབོར་ཉུང་དུ་གཏོང་དགོས་པའི་རྒྱུ་མཚན་མི་འདུག་མོད། གལ་ཏེ་སློབ་གྲྭ་དང་དགོན་པ་གཉིས་མི་འདྲ་ཟེར་ན། དེ་ནི་འདྲ་སྟེ། དགོན་པ་ནི་མཚན་ཉིད་རིག་པ་སོགས་ནང་པའི་རིགས་གནས་སློབ་ས་ཡིན་ལ། སློབ་གྲྭ་ནི་ཆབ་སྲིད་དང་དམག་དོན། དཔལ་འབྱོར་རིག་པ། རྩོལ་སྒྲུབ་རིག་པ་སོགས་འཇིག་རྟེན་གྱི་རིག་གནས་སློབ་ས་ཞིག་ཡིན་པས། སྦྱང་བྱའི་ངོ་བོ་ཙམ་མ་འདྲ་བ་མ་གཏོགས། རིག་གནས་སྦྱང་ས་ཡིན་པའི་ཆ་ནས་གཅིག་མ་ཡིན་ནམ། གལ་ཏེ་ཆབ་སྲིད་དང་འབྲེལ་བ་འདུག་ཅེས་ཉེས་འགེལ་བྱེད་ན། …

Read More »

ལོ་བཞིའི་སྔོན་རང་ལུས་མེ་བསྲེགས་གནང་མཁན་ཞིག་གི་ཕུང་བོ་བདག་པོ་རྒྱབ་པའི་བོད་མི་ཞིག་ཉེ་ལམ་འཇུ་བཟུང་བྱས་འདུག

རྒྱ་གཞུང་གིས་བླ་རུང་བཀྲ་ཤིས་འཁྱིལ་བསང་ཁོག་ཞང་ནས་རང་ལུས་མེར་བསྲེགས་གནང་མཁན་ཞིག་གིས་ཕུང་བོ་ཉེན་རྟོག་པའི་ལག་ཏུ་ཤོར་ཉེན་བྱུང་སྐབས།  ཉེན་རྟོག་པའི་ལག་ཏུ་མ་ཤོར་བའི་ཆེད་དུ་ཕུང་བོ་བོར་འདྲེན་གྱི་རོགས་པ་བྱས་པའི་བོད་མི་ཞིག་འཇུ་བཟུང་བྱས་འདུག རང་ལོ་༤༦ཡིན་པའི་གསང་བདག་སྐྱབས།    ཟླ་༩ཚེས་༢༩ཉིན་གྱི་བོད་ནང་གི་ཕྱི་དྲོ་ཆུ་ཚོད་ ༥ ཡས་མས་སུ།   ཁོང་དང་བཟའ་ཟླ་བྱམས་སྐྱིད་གཉིས་ཀས་ནང་ལས་ཙག་ཙིག་ཅིག་བྱེད་བཞིན་པའི་སྐབས་སུ།      ཉེན་རྟོག་པ་གློ་བུར་ཁྱིམ་དུ་འཛུལ་ནས་གསང་བདག་སྐྱབས་འཇུ་བཟུང་དང་། ད་ལྟ་བླ་བྲང་གྲོང་ཁྱེར་ནས་སྐར་མ་༡༥ནས་༢༠ཙམ་གྱི་བར་ཐག་ཡོད་པའི་བང་དཀར་ཐང་གི་བཀག་ཉར་ཁང་དུ་བཀག་སྐྱིལ་བྱས་འདུག་ལ། དུས་རྒྱུན་གྱི་གཟའ་པ་སངས་ཉིན། ཁོང་ལ་ཟ་མ་བསྐྱལ་ཆོག་པ་དང་།  ནང་མིར་ཁྲིམས་ལྟར་འཇུ་བཟུང་ཟིན་པའི་བརྡ་སྦྱོར་བྱས་འདུག ཕྱི་ལོ་༢༠༡༢ཟླ་༡༠ཚེས་༢༦ཉིན། ཨ་མདོ་བླ་བྲང་བཀྲ་ཤིས་འཁྱིལ་རྫོང་བསང་ཁོག་གསེར་ཁྲི་རུ་ཁག་བཞི་བའི་མགོ་བྷ་ཚང་གི་བུ་མོའི་མག་པ་ཐུབ་དབང་སྐྱབས་ཀྱིས་རང་ལུས་མེར་སྲེག་བཏང་སྟེ།  རྒྱལ་བ་རིན་པོ་ཆེ་བོད་ལ་ཆིབས་སྒྱུར་གནང་དུ་འཇུག་དགོས། པཎ་ཆེན་སྐུ་ཕྲེང་༡༡་པ་བཟང་བཙོན་འོག་ནས་གློད་གྲོལ་གཏོང་དགོས་ཞེས་ངོ་རྒོལ་བྱས་ནས་འདས་གྲོངས་སུ་སོང་བས།       སྐབས་དེར་བོད་མི་བོད་མི་རྡོ་རྗེ་རྣམ་རྒྱལ་དང་།  སྦྱིན་པ། རྡོ་རྗེ་བཀྲ་ཤིས།   གསང་བདག་སྐྱབས་བཅས་ཁོང་བཞི་ཡིས་འདས་པོའི་ཕུང་བོ་ཁྱིམ་དུ་འོར་འདྲེན་གྱི་ནང་མིར་རྩིས་སྤྲོད་གནང་བའི་དབང་གིས།    ཉེན་རྟོག་པ་ཁོང་ཚོ་བཞི་བོ་འཇུ་བཟུང་བྱེད་དུ་སླེབས།  གསང་བདག་སྐྱབས་དེ་མུར་ཉེན་ཡོལ་ལ་འགྲོ་བྱོལ་དུ་སོང་ཡོད་འདུག རྒྱ་གཞུང་གིས་རྡོ་རྗེ་རྣམ་རྒྱལ་དང་། སྦྱིན་པ། རྡོ་རྗེ་བཀྲ་ཤིས་བཅས་རེ་རེ་ལ་ཁྲིམས་ཆད་ལོ་གཉིས་དང་ཕྱེད་ཀ གསུམ་བཅས་དུས་ཡུན་མ་འདྲ་བ་བཅད་ནས་བཙོན་འཇུག་བྱས།   འདི་ལོར་རིམ་གྱི་ཁོང་ཚོ་བཙོན་གྲོལ་བཏང་བ་དང་བསྟུན།   གསང་བདག་སྐྱབས་ཀྱིས་ཀྱང་གནད་དོན་མི་འབྱུང་བར་སྙམ་ནས་ཚུར་རང་ཁྱིམ་དུ་ལོག་ཀྱང་། ཉེན་རྟོག་པས་ཅུང་མ་འགོར་བས་ཁོང་འཇུ་བཟུང་དང་ད་ལྟ་བང་དཀར་མངགས་གཏོང་ཁང་དུ་བཀག་ཉར་བྱས་འདུག མངགས་གཏོང་ཁང་དེ་ནི་ཕྱི་ལོ་༢༠༡༢ལོར།  བོད་དོན་ལས་འགུལ་བ་མགོ་ལོག་འཇིགས་མེད་ཐེངས་གསུམ་པ་བཀག་སྐྱིལ་བྱས་ས་དེ་ཆགས་ཡོད། གསང་བདག་སྐྱབས་ནི་བསང་ཁོག་སྡེ་བ་རུའི་རུ་ཁག་གཉིས་པ་ནས་ཡིན་པ་དང་། ཕོའི་མིང་ལ་ཚེ་ལོ་ཟེར། ཁོང་དང་བཟའ་ཟླ་བྱམས་སྐྱིད་གཉིས་ལ་ཕྲུ་གུ་ཕོ་གཉིས་ཡོད་འདུག

Read More »

ཁྲིམས་ཆད་ལོ་༤ཚང་ནས་གློད་གྲོལ་བྱུང་བའི་གཞས་པ་གཉིས་ལ་ཆབ་སྲིད་བཙོན་ཟུར་གང་མང་གིས་སྣེ་ལེན་བྱས་འདུག

ཆེད་སྒྲིག་གླུ་གཞས་འོད་སྡེར་༼སོས་མེད་རྨ་ཁའི་ཟུག་གཟེར་༽ཞེས་པའི་གཞས་པ་པདྨ་འཕྲིན་ལས་དང་ཕྱག་རྡོར་གཉིས་ཀྱིས་བཙོན་འཇུག་ཁྲིམས་ཆད་ལོ་༤ཚང་ནས་གློད་གྲོལ་བྱུང་འདུག རྒྱ་གཞུང་གིས་བོད་ཁུལ་དུ་དམ་དྲག་ཤུགས་ཆེར་བྱས་རྐྱེན།  འདི་ག་ལྟེ་གནས་ཁང་མཚོན་པའི་ཕྱི་ཕྱོགས་ཀྱི་བརྒྱུད་ལམ་ཁག་ཏུ།  དེ་སྔོན་གཞས་པ་ཁོང་གཉིས་ལ་ཁྲིམས་ཆད་ལོ་༢བཅད་པ་བཀོད་ཡོད་ཀྱང་།   ཉེ་ཆར་བོད་ནས་རྒྱུས་ཡོད་ཁུངས་ལྡན་གནས་ཚུལ་ལྟར་ན།  འདི་ཟླ་༡༠་ཚེས་༣ ཉིན།    བོད་མདོ་སྨད་རྔ་པ་རང་སྐྱོང་ཁུལ་རྨེའུ་རུ་མའི་གཞས་པ་པདྨ་འཕྲིན་ལས་དང་ཕྱག་རྡོར་གཉིས་བཙོན་འཇུག་ཁྲིམས་ཆད་༤ཚང་ནས་གློད་གྲོལ་གྱི།  རྩོམ་པ་པོ་དང་སྒྱུ་རྩལ།  གཞས་པ་སོགས་བོད་ཀྱི་ཆབ་སྲིད་བཙོན་ཟུར་ཐེའུ་རང་དང་འཇང་ཁོ། བུད་དྷ། སངས་དགའ་སོགས་ཀྱིས་སྣེ་ལེན་ཞུས་འདུག སྣེ་ལེན་མཉམ་པར་གྱི་ནང་དུ་གཞས་པ་ཁོང་གཉིས་ཀྱི་ལག་ཏུ་སྐྱེས་ཆེན་དམ་པ་གྷན་རྡི་ལགས་ཀྱི་པར་ཅིག་པར་སྒྲོམ་ནང་དུ་བཅུག་པའི་གཡས་སུ་བོད་ཡིག་བྲིས་འདུག་ཀྱང་ཁ་བཏགས་ཀྱིས་གབ་ནས་གསལ་པོ་མཐོང་གི་མི་འདུག   སྐྱེས་ཆེན་དམ་པ་གྷན་རྡི་ནི་ཡོངས་གྲགས་སུ་འཚེ་མེད་ཞི་བའི་འཐབ་རྩོད་ཀྱི་མེས་དཔོན་ཞེས་གུས་བཀུར་ཞུ་བཞིན་ཡོད། སྣེ་ལེན་མཉམ་པར་དང་འབྲེལ་ནས་རྩོམ་པ་པོ་ཐེའུ་རང་གིས་”སྤུན་ཟླ་འདི་གཉིས་ཀས་གཞས་བཏང་བས་བཙོན་ལ་འགྲོ་དགོས་ཐུག་པ་རེད།   མི་ལོ་ཧྲིལ་བོ་བཞི་ལ་བཙོན་ནས་བསྡད་བཞག མདང་ནུབ་ཁོང་གཉིས་ཀ་ཕ་ས་ཕ་ཡུལ་དུ་བདེ་ལེགས་ངང་ལོག གཅིག་གི་མིང་ལ་པད་མ་འཕྲིན་ལས་ཟེར།   བཙོན་ཟས་བཙོན་ཆུ་ཅ་ནེ་གཅིག་གི་ནང་ཟ་རོགས་འཐུང་རོགས་ཡིན།   གཅིག་གི་མིང་ལ་ཕྱག་རྡོར་ཟེར། ངེད་གཉིས་བཙོན་ཁང་གཅིག་ཡིན་ནའང་།    བཙོན་ཁག་ཁ་ཁ་ཡིན། གཉིས་ཀ་ཨ་མདོ་རྔ་བ་རྨེ་རུ་མའི་མྱི་ཡིན། རྨེ་རུ་མ་ནི་རི་སྒང་ཞིག་ན་སོ་ཁང་ཁེར་ཧྲེང་ཧྲེང་ཞིག་ཡོད་ས་དེ་ཡིན། རི་སྒང་དེ་ནས་ཉིན་ཕྱེད་ཙམ་ལ་མྱི་རྟ་སུམ་ཅུ་ལྷག་བཞུད་སོང་”  ཞེས་བཀོད་འདུག   རྒྱ་གཞུང་གིས་ཕྱི་ལོ་༢༠༡༢ཟླ་༧་ཡས་མས་ཙམ་ལ།    བོད་མདོ་སྨད་རྔ་པ་རང་སྐྱོང་ཁུལ་རྔ་པ་རྫོང་རྨེའུ་རུ་མའི་རུ་ཆེན་དང་པོའི་གླུ་བ་པདྨ་འཕྲིན་ལས་དང་གླུ་བ་ཕྱག་རྡོར་གཉིས་ཀྱིས།   རང་ལུས་མེར་སྲེག་གིས་མཚོན་པའི་བོད་ནང་གི་གནས་སྟངས་དང་།  དེ་བཞིན་༸གོང་ས་མཆོག་དང་༸པཎ་ཆེན་རིན་པོ་ཆེ། ཀིརྟི་རིན་པོ་ཆེ་བཅས་ལ་དྲན་གླུ་དང་བསྟོད་གླུ།  སྲིད་སྐྱོང་བློ་བཟང་སེང་གེ་ལ་བསྟོད་གླུ་བླངས་ཡོད་པའི་ཆེད་སྒྲིག་གླུ་གཞས་འོད་སྡེར་༼སོས་མེད་རྨ་ཁའི་ཟུག་གཟེར།༽ཞེས་པ་ཞིག་འགྲེམས་སྤེལ་བྱས་ཏེ་ཉིན་ཤས་ལས་མ་སོང་བར།  རྒྱ་གཞུང་གིས་ཀན་ལྷོ་རྨ་ཆུ་རྫོང་ཐོག་ནས་གླུ་བ་ཁོང་གཉིས་འཇུ་བཟུང་བཙན་ཁྲིད་བྱས་ཏེ་ཟླ་བ་ ༦    ལྷག་རིང་རྔ་པ་རྫོང་དུ་བཀག་ཉར་འདྲི་གཅོད་བྱས་མཐར།     ཁོང་གཉིས་ཀྱི་ནང་མིར་ཁོང་གཉིས་ལ་ཕྱི་ལོ་༢༠༡༣ ཕྱི་ཟླ་ ༢ནང་ལོ་ ༢ རེའི་བཙོན་འཇུག་ཁྲིམས་ཐག་བཅད་དེ་སི་ཁྲོན་གྱི་མེན་ཡང་ཞེས་པའི་ས་གནས་ཀྱི་བཙོན་ཁང་ཞིག་ཏུ་བསྐྱལ་ཡོད་སྐོར་གྱི་ཡི་གེ་ཞིག་སྤྲད་ཡོད་པ་བཞིན།  ཁོང་གཉིས་ཀྱི་ནང་མི་རྣམས་ཐེངས་གཉིས་ལ་ཐུག་འཕྲད་དུ་བསྐྱོད་ཀྱང་།      མེན་ཡྰང་ས་གནས་ཀྱི་འབྲེལ་ཡོད་མི་སྣས་ཁོང་གཉིས་དེེེར་མེད་ཚུལ་བརྗོད་ནས་ཐུག་འཕྲད་བྱེད་བཅུག་མེད།    མ་ཟད་སྐབས་  དེར་ཁོང་གཉིས་ལ་རོལ་མོའི་རམ་འདེགས་པ་མཁྱེན་རབ་དང་ཚིག་རྩོམ་པ་པོ་ཉག་ལྡོམ་པོ་གཉིས་ཀྱང་གང་བྱུང་འཇུ་བཟུང་རྗེས།  གནས་ཚུལ་ག་རེ་བྱུང་ཡོད་མེད་ཤེས་རྟོགས་མ་བྱུང་རྐྱེན།  འདི་ག་ལྟེ་གནས་ཁང་གི་ལས་བྱེད་ཀྱིས།  ཕྱི་ལོ་༢༠༡༣ཟླ་༦ཚེས་༡༥ཉིན།  མེན་ཡྰང་བཙོན་ཁང་གི་འགོ་གཙོ་ཞི་ཕིན་( Mr Xie Ping )ལ་ཐད་ཀར་ཁ་པར་((0086 8162890762)བཏང་ནས་གཞས་པ་ཁོང་གཉིས་གང་དུ་ཡོད་མེད་དྲིས་པ་ན། ཁ་པར་སྒོ་དེ་མུར་གཏད་ནས་ལན་མ་རྒྱབ་པ་རེད།    འདི་ག་ལྟེ་གནས་ཁང་གིས།  རྒྱ་གཞུང་གིས་དེ་ལྟར་གཞི་རྒྱ་ཆེ་བའི་ཇུས་དང་འཆར་གཞི་ལྡན་པའི་སྒོ་ནས་བོད་ཀྱི་ཤེས་ཡོན་པ་དང་སྒྱུ་རྩལ་པ་རྩ་མེད་དང་འབུར་འཇོམས་བྱས་པ་དང།     བོད་མི་གང་བྱུང་འཛིན་བཟུང་བཀག་ཉར་སྐབས་སུ་མི་སྤྱོད་ལས་འདས་པའི་བཅར་རྡུང་དང་། གསང་བའི་སྒོ་ནས་ཁྲིམས་ར་འཚོགས་པ་དང།   ཁྲིམས་ཁང་དུ་ཞུ་གཏུག་དབང་ཚད་དང་སྒེར་གྱི་ཁྲིམས་རྩོད་པ་གླས་མི་ཆོག་པར་གང་བྱུང་ཁྲིམས་ཐག་བཅད་པ་འདི་དག་ནི། ཆེས་སྤྱིར་བཏང་གི་འགྲོ་བ་མིའི་གཞི་རྩའི་ཐོབ་ཐང་ཁག་ལ་རྡོག་རོལ་དང་།  རྒྱལ་སྤྱིའི་སྤྱི་ཆིངས་ཁག་དང་རྒྱ་ནག་རང་གི་རྩ་ཁྲིམས་བཅའ་ཁྲིམས་སོགས་ལ་རྩིས་མེད་རྒྱབ་འགལ་ཞིག་ཏུ་ངོས་འཛིན་མ་ཞུས་ཐབས་མེད་བྱུང་། གླུ་བ་ཕྱག་རྡོར་ནི། ཕྱི་ལོ་ ༢༠༡༢ ཟླ་ ༨ ཚེས་ ༡༠ ཉིན་རང་ལུས་མེར་སྲེག་གནང་སྟེ་འདས་གྲོངས་སུ་གྱུར་པའི་རྒྱལ་གཅེས་དཔའ་བོ་གཅོད་པ་ལགས་གཉིས་ནི་ཕ་སྤུན་གྱི་བུ་སྤུན་ཡིན་པ་དང་།  གླུ་བ་ཕྱག་རྡོར་དང་པདྨ་འཕྲིན་ལས་གཉིས་ཀྱང་ཕན་ཚུན་ཉེ་འབྲེལ་ཞིག་ཡིན་འདུག   གླུ་བ་པདྨ་འཕྲིན་ལས་ལགས་ནི་རང་ལོ་༢༦ ཡིན་ལ། ཕའི་མིང་ལ་འཛམ་ལྷ་ཟེར་ཞིང་གྲོངས་ཟིན་པ་དང་མའི་མིང་ལ་ཚེ་རིས་མ་ཟེར། གླུ་བ་ཕྱག་རྡོར་ལགས་ནི་རང་ལོ་ ༣༦ ཡིན་ལ། ཕའི་མིང་ལ་མཆོག་ལྡན་མདོ་བ་ཟེར་གྱི་ཡོད་འདུག ༼སོས་མེད་རྨ་ཁའི་ཟུག་གཟེར།༽  ཞེས་པའི་གླུ་གཞས་འོད་སྡེར་དེའི་ནང་། ༡ གངས་རིའི་མགོན། ༢ སྐྱོ་འབོད། ༣ ང་ཡི་རྩ་བའི་བླ་མ། ༤ ངོ་ཚ། ༥ བཟོད་མེད་ཀྱི་སྡུག་བསྔལ། ༦ བདེན་དོན་ཁྲག་གི་དར་ཆ། ༧ འཐད་པ་ཡིན། ༨ སྲིན་པོ། ༩ མག་མོག་བྱང་ཐང་གི་ན་བུན། ༡༠ ཡིད་ཐང་ཆད་འགྲོ། བཅས་ཁྱོན་གླུ་གཞས་བཅུ་གཉིས་ཡོད་པ་རེད། གླུ་བ་ཕྱག་རྡོར་གྱི་༼འེ་རེད།༽ཅེས་པའི་གཞས་ཀྱི་གླུ་ཚིག་ཏུ། ང་ཚོའི་རིན་ཆེན་གཏེར་ཁ།།  བཙན་པོའི་འཕྲུལ་གྱིས་གཏོར་ནས།། གནས་འདི་སྟོངས་པར་བཟོས་པ།། དབང་མེད་བཙན་ཤེད་འེ་རེད།། སྔོན་བྱོན་མཁས་པའི་མཛད་རྗེས།། ལྔ་ཟུང་རིག་པའི་གནས་མཆོག། …

Read More »

རང་ལུས་མེར་སྲེག་གཏོང་མཁན་སྐལ་སྐྱིད་ཀྱི་གཉེན་ཉེ་ཆོས་འཛིན་ཁྲིམས་ཆད་ལོ་༣ཚང་ནས་གློད་གྲོལ་བཏང་འདུག

བཙན་བྱོལ་གྱི་རྒྱུད་ལམ་ཁག་ཏུ་གནས་ཚུལ་ཐོན་གསལ་ལྟར་ན།  ཕྱི་ལོ་༢༠༡༣ཟླ་༣ཚེས་༢༤་ཉིན་འཛམ་ཐང་ནས་རང་ལོ་༣༠ཡིན་པའི་སྐལ་སྐྱིད་ཀྱིས་རང་ལུས་མེར་བསྲེགས་གནང་བ་དང་བསྟུན།       རྒྱ་གཞུང་གིས་སྐལ་སྐྱིད་དང་འབྲེལ་བར་བསྙད་ནས།     རྒྱ་གཞུང་གིས་འཛམ་ཐང་ནས་ཡིན་པའི་ཆོས་འཛིན་ཞེས་པའི་བོད་མི་ཞིག་འཇུ་བཟུང་བཀག་ཉར་དང་།   ཟི་ཁྲོན་མེན་ཡེང་བཙོན་ཁང་དུ་བཙོན་འཇུག་གིས། ཁྲིམས་ཆད་ལོ་༣བྱས་ནས་ཟླ་འདིའི་ཚེས་༢༧ཉིན་གློད་གྲོལ་བཏང་ཡོད་འདུག འབྲེལ་བ་ཡོད་རབས་ཀྱི་བཙོན་འཇུག་ཁྲིམས་ཆད་བྱས་པ་འདི་ནི་རྒྱ་གཞུང་གིས་བོད་མི་རང་ལུས་མེར་བསྲེགས་གཏོང་མཁན་མ་ལུས་པ་ཁྲིམས་འགལ་ཞིག་ཏུ་བརྩིས་པ་མཚོན་པ་མ་ཟད།   འབྲེལ་བ་ཡོད་མཁན་ཚང་མ་ལ་༼བསམ་བཞིན་མི་གསོད་པའི་ནག་ཉེས་དང་བརྒྱུད་སྐུལ་བསླུ་བྲིད་བྱས་ནས་མི་བསད་པའི་ནག་ཉེས་༽   ཞེས་ཉེས་འགལ་ཞིག་ཏུ་དྲངས་ཀྱི་ཡོད་པ་བསྟན་ཡོད། དེ་བས་འདི་ག་ལྟེ་གནས་ཁང་གི་ཆབ་སྲིད་བཙོན་པའི་མིང་གཞུང་ཐོ་འགོད་སྡེ་ཚན་གྱིས།  བོད་ནང་དུ་ཕྱི་ལོ་༢༠༠༩ནས་ད་ལྟའི་བར་(༢༠༡༦།༩།༣༠)རང་ལུས་མེར་བསྲེགས་གནང་མཁན་༡༤༥དང་།  རང་ལུས་མེར་བསྲེགས་གནང་མཁན་ལ་ངན་སྐུལ་དང་།     རང་ལུས་མེར་བསྲེགས་གནང་མཁན་གྱི་གནས་ཚུལ་ཕྱི་བསྒྲགས་བྱས་སོང་སོགས་རྒྱ་གཞུང་གིས་མ་ཉེས་ཁ་གཡོག་འོག   བོད་མི་༨༧་ལྷག་བཙོན་འཇུག་ཁྲིམས་ཆད་བྱས་ཡོད་པ་ཐོ་བཀོད་བྱས་འདུག དེ་ནི་འདི་ག་ལྟེ་གནས་ཁང་གིས་བོད་ནང་དུ་གོང་འཁོད་ལག་སོན་བྱུང་པའི་གྲངས་ཀ་ཙམ་ལས།    འདི་ལས་མང་བ་ཞིག་གི་གནས་ཚུལ་ཕྱི་ཕྱོགས་སུ་མཁོ་སྤྲོད་མ་ཐུབ་པར་ལྷག་ཡོད་པའི་ཡིད་ཆེས་བྱེད་ཀྱི་ཡོད། རྒྱ་གཞུང་གི་<<ཉེས་ཁྲིམས་>>གྱི་དོན་ཚན་༢༣༢ནང་དུ།   གང་ཟག་སུ་ཞིག་ཕ་རོལ་བོ་ཤི་རྨས་གང་བྱུང་གི་གནས་ཚུལ་ལྷག་པ་དང་འབྲེལ་བ་བྱུང་ཚེ།  དེ་ལ་བསམ་བཞིན་མི་བསད་པའི་ནག་ཉེས་དང་ཀུན་སློང་ཡོད་བཞིན་དུ་ངན་སྐུལ་དང་བརྒྱུད་སྐུལ་ཞེས། ཁྲིམས་ཆད་དུས་ཡུན་ཀྱི་དུས་བཀག་ནི། སྲོག་ཐོག་ཁྲིམས་ཆད་དང་ཚེ་བཙོན།  ཡང་ན་ལོ་བཅུ། ཉུང་ཤོས་ལོ་གསུམ་གཅོད་ངེས་ཞེས་གསལ་ཡོད་པ་བཞིན། གོང་འཁོད་རང་ལུས་མེར་བསྲེགས་དང་འབྲེལ་བར་བསྙད་ནས་ཁྲིམས་ཆད་ཁུར་བའི་བོད་མི་༨༧ཁྲོད།   སྲོག་ཐོག་ཁྲིམས་གཅོད་བྱུང་བ་༡་དང་།      ཉུང་ཤོས་བདུན་ཕྲག་༣དང་ཉིན་༥བཀག་ཉར་བྱས་པ་སོགས་སྣ་ཚོགས་ཡོད་པས། འདས་པོ་སྐལ་སྐྱིད་དང་འབྲེལ་བ་ཡོད་པར་བསྙད་པའི་ཆོས་འཛིན་ལགས།  སྐལ་སྐྱིད་ཀྱི་གནས་ཚུལ་དང་གནད་དོན་གང་ཐད་ལ་འབྲེལ་བ་ཡོད་རབས་ཀྱི་མ་ཉེས་ཁ་གཡོག་གང་བྱས་ཁག་ད་ལྟའི་བར་ཤེས་རྟོགས་མ་བྱུང་རུང་།     རྒྱ་གཞུང་གིས་ཆོས་འཛིན་བཞིན་གྱི་འབྲེལ་བར་བསྙད་ནས་བཙོན་འཇུག་ཁྲིམས་ཆད་ལོ་༣བྱས་པའི་བོད་མི་ད་ལྟའི་བར་༡༣ བྱུང་ཡོད། འདི་ཟླ་༩ཚེས་༢༧ཉིན།   རྒྱ་གཞུང་གིས་ཆོས་འཛིན་གློད་གྲོལ་བྱས་པའི་གནས་ཚུལ་ནང་མི་གཉེན་ཉེ་རྣམས་ཀྱིས་ཐོས་འཕྲལ། ནང་མི་རྣམས་ཟི་ཁྲོན་མེན་ཡེང་བཙོན་ཁང་དུ་ཆོས་འཛིན་སྣེ་ལེན་བསུ་མར་བཅར་ཡང་། ཉེན་རྟོག་པ་ལྷན་བཅར་གྱིས་ཁྱིམ་བར་དུ་བསྐྱལ་འདུག   ཁོང་ཕྱིར་ཁྱིམ་དུ་འབྱོར་བའི་ཉིན་གཉིས་པར་གྲོང་སྡེ་དང་ཉེ་སར་ཡོད་པའི་ཇོ་ནང་དགོན་དུ་མཆོད་འབུལ་བྱེད་དུ་ཕྱིན་འདུག  ཕྱིའི་མཐོང་སྣང་ལ་ཆོས་འཛིན་གྱི་གཟུགས་གཞི་སྐམ་ཞིང་རིད་པ་ལས་བདེ་ཐང་ཡིན་མིན་གྱི་གནས་ཚུལ་གསལ་ཁ་མི་འདུག

Read More »

གངས་སྐྱེས་སྒྲུབ་པ་སྐྱབས་དང་བསམ་འགྲུབ་གཉིས་བསྐྱར་དུ་འཇུ་བཟུང་བཀག་ཉར་བྱས་འདུག

རྒྱ་གཞུང་གིས་བསྐྱར་དུ་རྩོམ་པ་པོ་གངས་སྐྱེས་སྒྲུབ་པ་སྐྱབས་དང་བསམ་འགྲུབ་གཉིས་གང་བྱུང་འཇུ་བཟུང་བཀག་ཉར་བྱས་འདུག  བཀག་ཉར་འདི་རིགས་ལ་ཁྲིམས་ཀྱི་ཐ་སྙད་ལྟར་ན་སྲིད་འཛིན་བཀག་ཉར་ཟེར་གྱི་ཡོད། བརྒྱུད་ལམ་ཁག་ནས་གནས་ཚུལ་སྤེལ་གསལ་ལྟར་ན།  ཉེ་ཆར་ཕྱི་ཟླ་༩ཚེས་༡༦ཉིན་གློད་གྲོལ་བྱུང་བའི་གངས་སྐྱེས་སྒྲུབ་པ་སྐྱབས་ཕྱི་ཚེས་༡༧ཉིན་བསྐྱར་དུ་འཇུ་བཟུང་བཀག་ཉར་དང་།   ཕྱི་ཟླ་༨ཚེས་༡༩ཉིན་གློད་གྲོལ་བྱུང་བའི་བསམ་འགྲུབ་ཕྱི་ཚེས་༡༨ཉིན་འཇུ་བཟུང་བཀག་ཉར་གྱིས། ད་ལྟ་ཁོང་གཉིས་གསེར་རྟ་རྫོང་གི་བཀག་ཉར་ཁང་དུ་ཡོད་འདུག ཨེ་ཤ་ཡ་རང་དབང་རླུང་འཕྲིན་ཁང་ལྟར་ན།    གངས་སྐྱེས་སྒྲུབ་པ་སྐྱབས་དང་འབྲེལ་ཡོད་བོད་མི་མིང་བརྗོད་འདོད་མེད་པ་ཞིག་གིས་༼ས་གནས་ཉེན་རྟོག་ཁང་གི་སྒྲུབ་པ་སྐྱབས་དེ་གར་ཐོ་འགོད་བྱེད་དུ་སྐད་གཏོང་བ་བཞིན། ཕྱི་ཉིན་དེར་སོང་ཡང་།  ཉེན་རྟོག་པས་ཁོང་ཕྱིར་ཁྱིམ་དུ་མ་བཏང་བ་མ་ཟད། ཉིན་༡༥རིང་བཀག་ཉར་གྱིས།  གངས་སྐྱེས་སྒྲུབ་པ་སྐྱབས་ཀྱིས་གཞུང་ཕྱོགས་ཀྱི་ཆབ་སྲིད་ལངས་ཕྱོགས་ལ་འཛིན་པའི་བློ་བསམ་གཙང་མ་མེད་པའི་ཉེན་བརྡ་བཏང་འདུག་ཐོག  གཟབ་གཟབ་མ་བྱས་ཚེ་སླར་ཡང་བཙོན་འཇུག་བྱེད་ངེས་༽ཞེས་བཤད་འདུག རྒྱ་གཞུང་གིས་ཁྲིམས་ཆད་དུས་ཡུན་ཚང་མིན་ལ་མ་ལྟས་པར་གློད་གྲོལ་བྱུང་རྗེས། སླར་ཡང་གང་བྱུང་འཇུ་བཟུང་བྱས་པ་ནི་འགྲོ་བ་མིའི་གཞི་རྩའི་ཐོབ་ཐང་ལ་རྡོག་རོལ་གཏོང་བ་ཞིག་ཆགས་ཡོད་པ་མ་ཟད།  རྒྱལ་སྤྱིའི་ཁག་ནས་རྒྱ་གཞུང་གི་འགྲོ་བ་མིའི་ཐོབ་ཐང་དང་།      ལྷག་པར་ཆབ་སྲིད་བཙོན་པའི་གནས་སྟངས་ཐད་ཡང་ཡང་སྐྱོན་བརྗོད་དང་ཐེར་འདོན་བྱས་མཐར།  རྒྱ་གཞུང་གི་སྲིད་འཛིན་ཞི་ཅིན་ཕིང་གིས་ཕྱི་ལོ་༢༠༡༣་ཟླ་༡༢ ནས༼ངལ་རྩོལ་སྒྱུར་བཀོད་སྲིད་ཇུས་༽མེད་པར་བཟོས་རབས་ཕྱི་བསྒྲགས་བྱས་ཡོད་ཀྱང་།    དོན་དངོས་སུ་བོད་ནང་དུ་མུ་མཐུད་ལག་བསྟར་རྒྱུན་འཁྱོངས་གནས་མུས་སུ་ཡོད་པ་བསྟན་ཡོད། གང་ཡིན་ཞེ་ན།    རྒྱ་གཞུང་གིས་སྲིད་འཛིན་བཀག་ཉར་ཅེས། ཉེན་རྟོག་ཁང་ལ་དམིགས་བསལ་གྱི་དབང་ཚད་ཅིག་སྤྲད་ནས།  བཙོན་ཁང་དུ་བཙོན་འཇུག་མ་ཡིན་པར་ཉེན་རྟོག་ཁང་དུ་བཀག་ཉར་གྱི་སྒོ་ནས་བཙོན་པའི་སྟེང་ཚད་ལས་བརྒལ་བའི་འདྲི་གཅོད་དང་རྡུང་རྡེག མི་སྤྱོད་ལས་འདས་པའི་མནར་སྤྱོད་གཏོང་ཆོག་གི་ཡོད་པས། འདིའི་ཐད་རྒྱ་ནག་གི་ཉེས་ཁྲིམས་སྐོར་གྱི་ཆེད་མཁས་པ་ཐན་བྷོལ་ལགས་ཀྱིས་༼འཇུ་བཟུང་བཙོན་འཇུག་གི་བརྒྱུད་རིམ་ཁྲོད་དུ།  དུས་ཚོད་སྡུག་ཤོས་ནི་བཀག་ཉར་ཁང་དུ་བཀག་ཉར་བྱེད་སྐབས་དེ་ཆགས་ཡོད་༽ཅེས་བཤད་ཡོད་པ་བཞིན།     བཙོན་དུས་རྫོགས་ནས་སླར་ཡང་འཇུ་བཟུང་གིས་༼ཁྲིམས་ཀྱི་སློབ་གསོ་༽ཞེས་པའི་མིང་བྱང་འོག  ས་གནས་ཉེན་རྟོག་པས་བོད་ཀྱི་ཆབ་སྲིད་བཙོན་པ་ཚོར་གང་བྱུང་དྲག་རྡུང་བྱེད་ཀྱི་ཡོད་པ་མ་ཟད།      ཐབས་ལམ་སྣ་ཚོགས་ཀྱི་སྒོ་ནས་བསམ་བློའི་གནོན་ཤུགས་དང་ཀླད་པ་གཙང་ཕྱགས་ཞེས་ཏིང་ལ་དགའ་ཞེན་ལས་དེ་མིན་གྱི་བསམ་བློ་འདྲ་མིན་ཡོད་མི་ཆོག་པའི་སློབ་གསོ་བསྟུད་མར་སྤྲོད་པ་ནི། བོད་དང་བོད་མིའི་ཆབ་སྲིད་བཙོན་པར་མཚོན་ན་རྒྱུན་ལྡན་ལྟ་བུ་ཆགས་ཡོད། བོད་དང་བོད་མིའི་ཆབ་སྲིད་ཚོར་མཚོན་ན་རྒྱུན་ལྡན་ལྟ་བུ་ཆགས་ཡོད། དེ་མཚུངས་སུ།   གང་བྱུང་བཀག་ཉར་དང་ཡང་ཡང་ཉེན་རྟོག་ཁང་དུ་སྐོང་འགུག་གིས་སྙན་གསེང་ཞུ་རུ་བཅུག་པ་སོགས་ནི་ཐད་ཀར་བོད་ཀྱི་ཆབ་སྲིད་བཙོན་པ་ཚོ་བོད་མིའི་མིག་ལམ་དུ་ཉེས་ཅན་པར་བསྐྲུན་ཐབས་དང་།   བོད་མིའི་བསམ་བློར་ཉེན་ཅན་པའི་གནས་བབ་ནི་ཡ་ང་བ་ཞིག་ཡིན་པའི་བག་ཆགས་བཞག་ནས།   བོད་མི་སྤྱི་ཡོངས་ལ་འཇིགས་བསྐུལ་བྱེད་སྟངས་ཤིག་ཏུ་གྱུར་ཡོད་ན། འདི་ག་ལྟེ་གནས་ཁང་གིས།  རྒྱ་གཞུང་གིས་བྱེད་བབ་དེ་ལ་སུན་འབྱིན་རྒོལ་རྒྱག་མཚོན། གང་བྱུང་འཇུ་བཟུང་བྱས་པའི་གངས་སྐྱེས་སྒྲུབ་པ་སྐྱབས་དང་བསམ་འགྲུབ་གཉིས་ལ་བཀག་ཉར་ཁང་ནས་མི་སྤྱོད་ལས་འདས་པའི་མནར་གཅོད་དང་བཅར་རྡུང་བྱེད་ཐད་ལ་སེམས་འཚབ་ཆེན་པོ་ཡོད་པ་མ་ཟད།    ཆ་རྐྱེན་གང་ཡང་མེད་པའི་སྒོ་ནས་མགྱོགས་མྱུར་གློད་གྲོལ་གཏོང་དགོས་པའི་སྐུལ་ལྕག་བརྡ་འདེད་བྱེད་ཀྱི་ཡོད། དེའང་རྒྱ་གཞུང་གིས་ཁུངས་འཕེར་བདེན་དཔང་གང་ཡང་མེད་པར།    ༢༠༡༣ ལོའི་ཕྱི་ཟླ་༨ ཚེས་༡ ཉིན་བསམ་འགྲུབ་དང་།  སྒྲུབ་པ་སྐྱབས། ཤེལ་རྒྱལ། དྲན་གསལ། གཡུ་སྦྲང་བཅས་ལ་རྒྱ་གཞུང་གིས་“དམར་ཤོག་རྒོལ་ལན་ཚོགས་པ་”ཞེས་པའི་ཚོགས་པ་དེའི་ཚོགས་མི་ཡིན་པ་དང་། བོད་དོན་ལས་འགུལ་སྣེ་མང་སྤེལ་བའི་ཉེས་མིང་འོག དཀར་མཛེས་ཁུལ། ཉག་ཆུ་རྫོང་ཁྲིམས་ཁང་ནས་བཙོན་འཇུག་གི་ཁྲིམས་ཐག་བཅད། ཁྲིམས་ཆད་དུས་ཡུན་གངས་སྐྱེས་སྒྲུབ་པ་སྐྱབས་ལ་ལོ་༥ དང་ཟླ་༦་དང་།  བསམ་འགྲུབ་ལ་ཁྲིམས་ཆད་ལོ་༥།  གཡུ་སྦྲང་ཁྲིམས་ཆད་ལོ་༢།   དྲན་གསལ་ཁྲིམས་ཆད་ལོ་༣།   ཤེལ་རྒྱལ་ལ་ཁྲིམས་ཆད་ལོ་༢་བཅས་བཅད་པ་རེད། ཁོང་ཚོ་ཚང་མ་གསེར་རྟ་རྫོང་ཁོངས་ཀྱི་མི་ཡིན་འདུག་ལ་རིམ་པས་གློད་གྲོལ་བཏང་ཁྲོད།       གངས་སྐྱེས་སྒྲུབ་པ་སྐྱབས་དང་བསམ་འགྲུབ་གཉིས་འཇུ་བཟུང་བཀག་ཉར་བྱས་འདུག ཕྱི་ལོ་༢༠༡༦ཟླ་༩་ཚེས་༡༦ཉིན། གངས་སྐྱེས་སྒྲུབ་པ་སྐྱབས་བཙོན་གྲོལ་ཐོབ་ཉིན། ཁོང་གི་ཁྱིམ་མི་གཉེན་ཉེ་དང་ཡུལ་མི་རྒྱ་ཆེར་འཛོམས་ཐོག  གུར་ཆེན་ཕུག་པའི་ནང་དུ་༼གངས་སྐྱེས་སྒྲུབ་པ་སྐྱབས་གཟི་བརྗིད་ངང་ཕྱིར་ཕེབས་པར་རྟེན་འབྲེལ་ཞུ་་༽ཞེས་འཕྲེད་དར་བཀལ་ཞིང་། བོད་ལྭ་དཀར་པོ་ཆ་ཚང་ཞིག་གོན་ནས་ཁྲི་ཀར་བཞུགས་པའི་རྩོམ་པ་པོ་ཁོང་གིས།     མགོ་སྟེང་དུ་༧གོང་ས་མཆོག་གི་སྐུ་པར་བཞག་ནས་གསོལ་འདེབས་ཞུ་ཡི་འདུག་ལ།    བོད་ཟས་ཐུད་དང་ཞོ།   གོ་རེ་སོགས་སྡེར་ཁ་བསྒྲིགས་ཏེ་ཕེབས་བསུའི་དགའ་སྟོན་ཟབ་རྒྱས་ཞུས་འདུག གངས་སྐྱེས་སྒྲུབ་པ་སྐྱབས་ནི་དཀར་མཛེས་ཁུལ།  གསེར་རྟ་རྫོང་། རགས་བཀྲམ་ཡུལ་ཚོ། གེ་འཕེན་སྡེ་པ་ནས་ཡི་པ་དང་།    རགས་བཀྲམ་ཡུལ་ཚོའི་སློབ་ཆུང་དང་། གསེར་རྟ་རྫོང་སློབ་འབྲིང། དཀར་མཛེས་རྫོང་དུ་ཡོད་པའི་དགེ་འོས་སློབ་གྲྭ་རུ་སློབ་ཐོན་བྱུང་རྗེས། བརྡར་ཚང་དང་། ཧོར་ཤུལ་ཡུལ་ཚོ་གཉིས་ཀྱི་སློབ་གྲྭ་རུ་སྔ་རྗེས་དགེ་རྒན་དང། ཁོང་འཛིན་བཟུང་སྐབས་མཁན་པོ་ཚུལ་ཁྲིམས་བློ་གྲོས་ཀྱིས་བྲག་མགོ་རྫོང་ཁོངས་སུ་གསར་འཛུགས་གནང་བའི་སློབ་གྲྭ་ཞིག་ཏུ་དགེ་རྒན་གྱི་ལས་ཀ་བྱས་ཡོད་པ་རེད།    ཁོང་གིས་ལས་ཞོར་དུ་རྩོམ་ཡིག་མང་པོ་བྲིས་ཡོད་པ་དང་། ཁོང་སྒེར་ངོས་ནས་བྲིས་པའི་རྩོམ་ཡིག་དེབ་ཁག་ཅིག་ཀྱང་འགྲེམས་སྤེལ་བྱས་ཡོད་འདུག  རྩོམ་ཡིག་“གྲོང་ཁྱེར་དང་བོད་མིའི་ཟུར་སྣེ་ཞིག”ཅེས་པའི་བོད་མིའི་གྲོང་ཁྱེར་ནང་འཚོ་བ་སྐྱེལ་སྟངས་སྐོར་དང།  “༧ཁྲག་འཐུང་བདུད་འཇོམས་རྡོ་རྗེའི་ཡོན་ཏན་གྱི་ཟུར་ཙམ་ལ་བསྔགས་པ་དྲི་མེད་དར་དཀར་རིང་མོ།”ཞེས་པའི་སྙན་ངག “ཁ་བའི་ཁྲོད་ཀྱི་རྣམ་ཤེས།”སོགས་བོད་མིའི་བདེ་སྡུག་སྐོར་གྱི་སྙན་ངག་སོགས་རྩོམ་ཡིག་མང་པོ་འདུག་ལ། དེ་བཞིན་<<ལས་དབང་གི་རྒྱང་འབོད།>>  <<ལོ་ཟླའི་ཁ་མདོག>>  <<དུས་རབས་ཀྱི་ན་ཟུག>> <<དེ་རིང་གི་མིག་ཆུ།>> ཞེས་པ་སོགས་ཡོད་འདུག   ཕྱི་ལོ་༢༠༠༨ལོར་རྒྱ་ནག་གཞུང་ལ་ངོ་རྒོལ་སྐབས་ཀྱི་གནས་ཚུལ་<<ས་བྱི་ཁྲག་བྲིས་དམར་པོ་>>ཞེས་པའི་དཔེ་དེབ་ཅིག་ཀྱང་བཏོན་ནས་བཙན་བྱོལ་ནང་པར་སྐྲུན་འགྲེམས་སྤེལ་བྱས་ཡོད། བསམ་འགྲུབ་ལགས་ནི་གསེར་རྟ་རྫོང་མགོན་མཆོག་སྡེ་པ་ནས་ཡིན་པ་དང་། བཙོན་འཇུག་ལོ་༤་ཟླ་༢་ཡི་ཁྲིམས་ཆད་ཚང་ནས་གློད་གྲོལ་བཏང་ཡང་བསྐྱར་དུ་འཇུ་བཟུང་བྱས་ཡོད།

Read More »

མེད། ང་ཚོས་ཁྱེད་རང་བརྗེད་མེད། ཁ་ན་ཌའི་ཁུའེ་བྷེག་གི་རྩོམ་པ་པོ་གྲགས་ཅན་ཞིག་གིས་གངས་སྐྱེས་སྒྲུབ་པ་སྐྱབས་ལ་མོ་རང་གི་རྩོམ་དེབ་བསྔོ་འབུལ་ཞུས།

   ཁ་ན་ཌའི་གྲགས་ཅན་རྩོམ་པ་པོ་(SYLVAIN MEUNIER   )ལགས་ཀྱིས་ཉེ་ལམ་གློད་གྲོལ་ཐོབ་པའི་བོད་ཀྱི་ན་གཞོན་རྩོམ་པ་པོ་གངས་སྐྱེས་སྒྲུབ་པ་སྐྱབས་ལ་རྒྱབ་སྐྱོར་མཚོན་དུ། ཧ་ཅང་ཡིད་སེམས་འགུལ་པའི་འཕྲིན་པ་ཞིག་བྲིས་གནང་འདུག་པ་མ་ཟད། སེམས་གདུང་མཉམ་སྐྱེས་མཚོན་ཆེད་དུ། རྩོམ་པ་པོ་ཁོང་མོས་མོའི་རྩོམ་དེབ་The Night of the Psychedelic Nurses’ ཞེས་པ་ཞིག་བསྔོ་འབུལ་ཞུས་འདུག འདི་ག་ལྟེ་གནས་ཁང་གིས་རྩོམ་པ་པོའི་འཕྲིན་ཡིག་ཧྥི་རན་ཆིའི་སྐད་བོད་ཡིག་གཉིས་ཀའི་ནང་ཕབ་སྒྱུར་བྱས་པ་གཤམ་གསལ། བརྩེ་བའི་གྲོགས་པོ་སྐྱབས་ལགས།  ངས་སྐད་ཤུགས་ཡོད་ཚད་བཏོན་ནས་ཞེ་སྡང་དང་ཁྲོ་སེམས་མ་ལུས་པ་ཕྱི་རུ་བཏོན་འདུན་ཆེ་ཡང།   ངས་རང་ཉིད་སྟངས་འཛིན་བྱས་སྟེ་ངག་འཇམ་པོའི་སྒོ་ནས་བཤད།    དེ་ལྟར་བྱེད་ན་གཞི་ནས་ཁྱེད་ཀྱི་ལྟ་རྟོག་པས་ངའི་སྐད་གོ་མི་ཐུབ།  ཡང་ང་ལ་ཁྱད་མཚར་གྱི་རེ་བ་ཞིག་ཡོད་པ་དེ་ནི། ངའི་སྐད་ངག་ཆུང་ཆུང་དེ།  ཁྱེད་རང་བཀག་ཉར་ཁང་དུ་གསང་བཏུམས་བྱས་པའི་རྩིག་པའི་སྲུབས་ཀ་ནས་འཛུལ་ཐུབ་པ་བྱུང་ནས།   ཁྱེད་ཀྱིས། ང་ཚོས་ཁྱེད་རང་བརྗེད་མེད་པ་ཤེས་སུ་བཅུག་རྒྱུ་དེ་རེད།   ང་ཚོས་ཁྱེད་རང་བརྗེད་མེད་པ་མ་ཟད།  ཕྱི་ཟླ་༢ ཚེས་༡༥ ཉིན་གྱི་དགོང་མོར་ཁྱེད་རང་ཉེན་རྟོག་པས་བཙན་ཤེད་ཀྱིས་འཛིན་བཟུང་བྱས་པའི་གཏམ་རྒྱུད་དེ།  རི་རབ་དང་རྒྱལ་མཚམས། གླིང་ཕྲན་དང་རྒྱ་མཚོ་བརྒལ་ནས་ང་ཚོའི་སྒོ་དྲུང་དུ་འབྱོར་སོང་། དེ་ནི་ང་རང་ཁྱེད་དང་ཐུག་འཕྲད་བྱུང་སྟངས་རེད།  སྐྱབས་ལགས། ངས་ང་ཚོ་འཕྲད་སྟངས་དེ་འདི་འདྲ་ཞིག་མིན་ན་ཅི་མ་རུང་ཨང་སྙམ་འགྲོ  ངས་ཁྱེད་དང་ལྷན་དུ་སྦི་རག་གྲང་མོ་ཞིག་འཐུང་ནས་འདུག་པའི་སྣང་བརྙན་དེ་(དུས་རྒྱུན་རྩོམ་པ་པོ་ཚོ་མཉམ་འཛོམས་བྱེད་སྟངས་ཤིག་ཡིན་)ཡིད་ལ་འཆར་གྱི་འདུག  སྐད་བརྡའིི་བཀག་རྒྱ་ཟེར་བ་ཞིག་ཡོད་མེད་ལ་མ་ལྟོས་པར་(ཕལ་ཆེར་ཁྱེད་ཀྱི་ཧྥ་རན་སིའི་སྐད་ཏོག་ཙམ་ཤེས་ཀྱང་སྲིད་མོད། ངས་བོད་སྐད་ཅུང་ཟད་ཤེས་རྒྱུའི་རེ་བ་རྩ་བྲལ་རེད་) ང་ཚོས་ཕན་ཚུན་གོ་བརྡ་འཕྲོད་ཐུབ་པའི་ཐབས་ལམ་ཞིག་རྙེད་ངེས།       ཁྱེད་ཀྱིས་ང་ལ་ཁྱེད་ཀྱི་ཆུང་མ་ལྷ་མོ་དང་བུ་བུ་མོ།  བོད་ཀྱི་གཏམ་རྒྱུད་བཤད་བཞིན་པའི་རྣམ་པ་ཡིད་ལ་འཆར་ཡན་བྱེད་ཐུབ་ཀྱི་འདུག  ཡིན་ད་ཡིན།   རྒྱ་ནག་སྲིད་གཞུང་གིས་དཀའ་སྡུག་འོག་ལུས་པའི་བོད་འདི་བཅིངས་འགྲོལ་བཏང་རབས་བརྗོད་ནས་ང་ཚོའི་བློ་ཁ་སྒྱུར་ཐབས་ལ་འབད་པ་བྱེད་ཀྱི་འདུག      དེར་བརྟེན།  སྐྱབས་ལགས། ངས་ཁྱེད་ལ་གསལ་འདེབས་བྱ་རྒྱུ་ཞིག་ནི།  བོད་ཀྱི་གནས་ཚུལ་ཕྲན་བུ་ལས་མི་ཤེས་པའི་མི་མང་ཕལ་མོ་ཆེ་ལྟར། ངས་རྒྱ་ནག་གི་གཞུང་འབྲེལ་ལོ་རྒྱུས་ལ་ཡིད་ཆེས་གཏན་ནས་བྱེད་ཀྱི་མེད་པ་དེ་ཡིན།     ཁོང་ཚོས་ཁྱེད་རང་དང་གཞན་གང་མང་ཞིག་འཇུ་བཟུང་བྱས་ཐུབ་པ་མ་ཟད།  སྡུག་རྩུབ་དྲག་པོའི་སྒོ་ནས་ཁྱེད་རང་རྩ་མེད་ཀྱང་བཟོ་རྒྱུར་ཐེ་ཚོམ་གང་ཡང་ཡོད་མི་སྲིད་མོད།  ཡིན་ན་ཡང་། ཁོང་ཚོས་ཅི་ཙམ་གཞི་རྒྱ་ཆེ་བའི་ཐབས་ལམ་གྱི་སྒོ་ནས་བོད་ཀྱི་ངོ་རྟགས་གནག་སུབ་གཏོང་རྒྱུར་འབད་པ་ནི་གད་མོ་སློང་བ་ཙམ་ལས། ཁོང་ཚོས་རང་ཉིད་ཀྱི་བྱས་ཉེས་དེ་ཇི་ཙམ་ངོ་གནོང་གིས་གབ་ཀྱང་གསང་རྒྱ་དུས་ནམ་ཡང་བྱེད་མི་ཐུབ།    ངས་འདིར་ཁུའོ་པེཀ་(Quebec)སྐོར་ལ་ཅུང་ཙམ་བཤད།  དེ་ནི་ཁྱེད་ཀྱི་སྣང་བ་སྐྱིད་སྐྱིད་ཀྱི་གུང་གསེང་གཏོང་སྟངས་ཤིག་ཏུ་བརྩི་ཆོག  བོད་ནང་བཞིན།     ཁུའོ་པེཀ་( Quebec )ནི་གཞི་རྒྱ་ཆེ་ཞིང་དགུན་དུས་གྲང་ངར་ཆེ་ས་ཞིག་ཡིན། ཡང་བོད་བཞིན།  ཁུའོ་པེཀ་(Quebec)ནི་ཁྲིམས་ཀྱི་ཐ་སྙད་ཁྲོད།   རྒྱལ་ཁབ་ཅིག་མ་རེད། ཡུལ་ལུང་དེའི་མི་ཚོས་ཀྱང་། ཕྱི་མིས་བཙན་འཛུལ་གྱི་སྡུག་རྩུབ་མྱངས་ཡོད། བཙན་འཛུལ་པས་ཡུལ་ལུང་དེའི་འཚོ་གནས་ནི་བདེ་སྐྱིད་མེད་པ་ཞིག་དང་གྲུབ་འབྲས་མེད་མཁན་ཞིག་ཏུ་བརྩིས་ཡོད།   ཡིན་ན་ཡང་། ཁྱེད་ལ་སྐད་ཆ་བཤད་བཞིན་རང་ཉིད་རྩོམ་པ་པོ་ཞིག་ཏུ་འགྲེལ་བཞིན་པའི་མི་ང་ནི་ཁུའོ་པེཀ་ནས་ཡིན་ཞིང་།  དེར་ང་ལྟ་བུ་བརྒྱ་ཕྲག་མང་བོ་ཡོད། དེ་ནི་ཁོང་ཚོ་(བཙན་འཛུལ་བ)ཕམ་ཉེས་བྱུང་བ་མཚོན་པ་ཞིག་ཡིན།   མ་ཟད། དོན་འདིས་བོད་ནང་གི་བཙན་འཛུལ་བའང་ཕམ་ཉེས་འགྲོ་སྲིད་པ་བསྟན་ཡོད་ལ། ཡང་ཉིན་མ་དེ་ནི། ཁྱེད་ཀྱི་སྨྱུག་གུར་རང་དབང་ཅུང་ཟད་ལྡན་པའི་སྒོ་ནས་འཇུ་ཐུབ་པའི་སྐབས་དེ་དུས་ཡིན་ཕྱིར། སུ་གང་གིས་ཀྱང་སང་ཉིན་ཅི་ཞིག་འབྱུང་མིན་ལབ་ཚོད་མི་ཐུག་པ་བཞིན། ང་ཚོ་དུས་ནམ་ཡང་ཡིད་ཐང་ཆད་མི་རུང་།  ཁུའོ་པཀེ་( Quebec ) རྒྱལ་ཁབ་ནང་བོད་པ་སླེབས་མྱོང་ཡོད།  གལ་སྲིད་དགོས་ངེས་ཤིག་གམ། ཡང་ན་འབྱུང་སྲིད་པ་ཞིག་ཡིན་ན།  ངས་ཐབས་བརྒྱ་ཇུས་སྟོང་གིས་ཁྱེད་རང་ཡང་འདིར་ཡོང་རྒྱུའི་སྣེ་ལེན་བྱ་ངེས་ཡིན།    སྐབས་དེར་ངས་ཁྱེད་རང་ཕྱི་རུ་ཁྲིད་ནས་གོང་དུ་བཤད་པའི་སྦི་རག་གྲང་མོ་དེ་འཐུང་དུ་འཁྲིད་ཆོག དེ་ནི་དམ་བཅའ་ཞིག་ཡིན།     གནས་སྐབས་རིང་།   ངས་ཁོང་ཚོས་ཁྱེད་ལ་རྩོམ་འབྲིའི་རང་དབང་ཏོག་ཙམ་སྤྲོད་པའི་རེ་བ་བྱེད་ཀྱི་ཡོད། འོན་ཀྱང་སྐབས་རེར་འབྲི་བྱེད་ཀྱི་མཁོ་ཆས་སྟོང་ཡང་། རྩོམ་པ་པོ་ནི་མུ་མཐུད་དུ་བསམ་བློའི་ནང་དུ་འབྲི་འདུག་ངེས་ཤིག་ཡིན། ་ མཐར་ངས་གཞས་པ་ཧྥུརན་སིསུ་ཀཔརལ་(Francis Cabrel)ལགས་ཀྱི་གཞས་ཚིག་གྲགས་ཅན་༼ ཁོང་མོར་གང་ཡོད་པ་མ་ལུས་པ།   ཁྱེད་ཀྱི་གང་འདོད་བཞིན་གང་ཡང་གཏོར་བཅོམ་བྱེད་ཆོག  ཡིན་ན་ཡང། ཁོང་མོ་ལའང་ལག་ཟུང་བརྐྱངས་ནས་ཡོད་ཚད་བསྐྱར་བཞེངས་བྱེད་པའི་ནུས་མཐུ་ལྡན་ཡོད་ )ཞེས་པ་གཞས་ཀྱི་ཚིག་ཕྲེང་འདི་བཞག་ནས། ང་ཁྱེད་དང་གྱེས་ཆོག་པ་ཞུ།     རྗེས་ནས་མཇལ་ཡོང། སྐྱབས་ལགས།                ཕྱི་ལོ་༢༠༡༥   ཟླ་ ༡༡ ཚེས་ ༡༥ ཉིན་ཁ་ན་ཌའི་གྲོང་ཁྱེར་ཁུའེ་བྷེག་ཏུ། ཁེའུ་བྷེག་གི་རྒྱལ་སྤྱིའི་རྩོམ་པ་པོའི་ཡན་ལག་མཐུན་ཚོགས་དང་།  ཁེའུ་བྷེག་གྲོང་ཁྱེར་ས་གནས་རྩོམ་པ་པོའི་མཐུན་ཚོགས། རྒྱལ་སྤྱིའི་ཉེས་ཡང་ཚོགས་པ་གསུམ་གྱིས་གོ་སྒྲིག་འོག བཙོན་འོག་དུ་ཚུད་པའི་རྒྱལ་སྤྱིའི་རྩོམ་པ་པོའི་རང་དབང་སྐོར་ལ་ཚོགས་འདུ་ཞིག་བསྐངས་པའི་ཐོག ཁ་ན་ཌའི་གྲགས་ཅན་རྩོམ་པ་པོ་ ༡༠ ཡིས་སོ་སོའི་ངོས་ནས་འཛམ་གླིང་རྒྱལ་ཁབ་ཁག་ནང་བཙོན་འོག་ཏུ་ཡོད་པའི་རྩོམ་པ་པོ་རེ་བདམས་ཏེ།  ཁོང་ཚོར་རྒྱབ་སྐྱོར་དང་ཁོང་ཚོའི་གནས་སྟངས་ལ་བློ་འཚབ་ཀྱི་རྣམ་པ་མཚོན་ཐབས་བྱས་ཡོད་པ་ལྟར། …

Read More »

བླ་བྲང་བཀྲ་ཤིས་འཁྱིལ་གྱི་དགེ་འདུན་པ་གཉིས་ཀྱིས་ཕྱི་ཕྱོགས་ལ་གནས་ཚུལ་བསྐྱལ་བར་བསྙད་ནས་ཁྲིམས་ཆད་ལོ་གཅིག་དང་ཕྱེད་ཀ་བཅད་འདུག

ཕྱི་ལོ་༢༠༡༦ཟླ་༩ཕྱི་ཚེས་༡༢ཉིན། སྔར་ལོ་འཇུ་བཟུང་བྱས་ཤིང་བླ་བྲང་བཀྲ་ཤིས་འཁྱིལ་ནས་ཡིན་པའི་གྲྭ་བ་གཉིས་ལ་ལོ་གཅིག་དང་ཕྱེད་ཀའི་ཁྲིམས་ཐག་བཅད་འདུག འདི་ག་ལྟེ་གནས་ཁང་ལ་གནས་ཚུལ་ཁུངས་ལྡན་འབྱོར་གསལ་ལྟར་ན། ཉེ་ལམ་བསང་ཆུ་རྫོང་མི་དམངས་ཁྲིམས་ཁང་གིས་དགེ་འདུན་པ་སྦྱིན་པ་རྒྱ་མཚོ་དང་སྐལ་བཟང་སྨོན་ལམ་ཁོང་གཉིས་ལ།     ལོ་གཅིག་དང་ཕྱེད་ཀའི་ཁྲིམས་ཐག་བཅད་འདུག རྒྱ་གཞུང་གིས་དགེ་འདུན་པ་ཁོང་གཉིིས་ནི་ཕྱི་ལོ་༢༠༡༥ཟླ་༦ཚེས་༤ ་ནང་སངས་རྒྱས་མཚོ་ཡིས་རང་ལུས་མེར་བསྲེགས་དང་འབྲེལ་ནས་འཇུ་བཟུང་བཀག་ཉར་དང་།  གནས་ཚུལ་ཕྱི་ལ་བསྐྱལ་བའི་ནག་ཉེས་བཙུགས་ནས་བཙོན་འཇུག་བྱས་པ་ཞིག་ཆགས་ཡོད། ཕྱི་ལོ་༢༠༡༥ཟླ་༥ཚེས་༢༧ཉིན་རང་ལུས་མེར་བསྲེགས་གནང་བའི་ སངས་རྒྱས་མཚོ་ནི(  སངས་རྒྱས་མཚོ་ཡིས་རང་ལུས་མེར་བསྲེགས་  )།   ཕྲུ་གུ་གཉིས་ཀྱི་ཨ་མ་ཡིན་པ།  ཁོང་གིས་རྒྱ་གཞུང་གིས་བོད་ས་བཅད་བགོས་ཀྱིས་མི་སེར་སྤེལ་བའི་ས་ཁོངས་ལྟར་བྱས་ན། ཀན་སུའུ་ཞིང་ཆེན་ཀན་ལྷོ་བོད་རིགས་རང་སྐྱོང་ཁུལ་ཅོ་ནེ་རྫོང་མདོ་ཁོག་ཞང་ཁོངས།  ཆབ་བུ་གཤིས་སམ་ཆོས་དཔལ་ཞིང་བཀྲ་ཤིས་ཆོས་འཁོར་གླིང་དགོན་པའི་ཉེ་འདབས་སུ་བཅའ་སྡོད་ཉེན་རྟོག་ལས་ཁུངས་ཀྱི་སྒོ་ཁ་ནས།   རང་ལུས་མེར་བསྲེགས་ཀྱིས་ཞི་བའི་ངོ་རྒོལ་གནང་སྟེ་འདས་གྲོངས་ཕྱིན་ཡོད། འདི་ག་ལྟེ་གནས་ཁང་གི་གནས་ཚུལ་ལྟར་ན།    སངས་རྒྱས་མཚོས་རང་ལུས་མེར་བསྲེགས་གནང་བར་འབྲེལ་བ་ཡོད་པའི་ཁག་དཀྲི་ཐོག  བོད་མི་ལྔ་གང་བྱུང་འཇུ་བཟུང་བྱས་ཁྲོད།  སངས་རྒྱས་མཚོའི་བཟའ་ཟླ་རྟ་མགྲིན་དབང་རྒྱལ་དང་།  ཉིན་པ་ཡུལ་མཚོའི་བཀྲ་ཤིས་ཆོས་གླིང་གི་དགེ་འདུན་པ་བཞི་རེད་འདུག     དགེ་འདུན་པ་བཞི་བོ་ནི།  ཕྱི་ལོ་༢༠༡༥ཟླ་༥ཚེས་༢༨ཉིན་འཇུ་བཟུང་བཀག་ཉར་བྱས་པའི་བསྟན་འཛིན་བཟོད་པ་དང་ཁོང་ནི་སངས་རྒྱས་མཚོའི་ཚ་བོ་རེད་འདུག   ཕྱི་ཟླ་༦ཕྱི་ཚེས་༤ཉིན་འཇུ་བཟུང་བྱས་པའི་བསམ་གཏན་རྒྱ་མཚོ།  ཕྱི་ཟླ་༦ཚེས་༥ཉིན་འཇུ་བཟུང་བྱས་པའི་དགེ་འདུན་པ་བློ་བཟང་བསྟན་འཛིན།   ཕྱི་ཟླ་༦ཚེས་༡༠ཉིན་རྟ་མགྲིན་དབང་རྒྱལ་དང་ལྷན་དུ་འཛིན་བཟུང་བྱས་པའི་འཕྲིན་ལས་རྒྱ་མཚོ་བཅས་རེད། དགེ་འདུན་པ་སྦྱིན་པ་རྒྱ་མཚོ་ནི་བསང་ཆུ་རྫོང་འབོ་ར་ཞང་ནས་ཡིན་ཞིང་།   ད་ལྟ་དགུང་ལོ་༣༩་ཡས་མས་སུ་རེད་འདུག   ཆུང་དུས་འབོ་ར་ནས་གྲྭ་བ་བྱས་ཤིང་། རྗེས་སུ་བླ་བྲང་གི་ནང་བསྟན་ལྔ་རིག་སློབ་གླིང་ནས་སློབ་གཉེར་གནང་དང་།   ཕྱི་ལོ་༡༩༩༨ལོར་སློབ་མཐར་ཕྱིན་རྗེས་བླ་བྲང་གི་མཚན་ཉིད་དགྲྭ་ཚང་ལ་འཛུལ་ཞུགས་གནང་འདུག  དགེ་འདུན་པ་སྦྱིན་པ་རྒྱ་མཚོ་འཇུ་བཟུང་གི་སྐབས་དེར། ཁོང་གི་རོགས་པ་དགེ་འདུན་པ་འཇམ་དབྱངས་རྒྱ་མཚོ་དང་སྐལ་བཟང་རྒྱ་མཚོ་ཞེས་པ་གཉིས་བཅས། ཁོང་ཚོ་གསུམ་འབོ་རའི་ཁྲོམ་གཞུང་ལ་འགྲོ་བཞིན་པའི་སྐབས་ལ་ཉེན་རྟོག་པས་གློ་བུར་འཇུ་བཟུང་བཀག་ཉར་བྱས་ཤིང་། འཇམ་དབྱངས་རྒྱ་མཚོ་དང་སྐལ་བཟང་རྒྱ་མཚོ་གཉིས་ཉིན་གཉིས་རིང་བཀག་ཉར་འདྲི་བརྩད་བྱས་རྗེས་གློད་འདུག དགེ་འདུན་པ་སྐལ་བཟང་སྨོན་ལམ་ནི་ཅོ་ནེ་ཆུབ་བུ་གཤིས་ཞང་ནས་ཡིན་ཞིང་།    ཁོང་གི་ཕའི་མིང་ལ་སྐལ་བཟང་སྐྱབས་དང་མའི་མིང་ལ་རྟ་བདུན་མཚོ་རེད་འདུག   ཕྱི་ལོ་༡༩༩༧ལོར་བླ་བྲང་དགོན་པར་འཛུལ་ཞུགས་གྱི་སློབ་གཉེར་གནང་འདུག རྒྱ་ནག་དམར་གཞུང་གིས་བོད་ཁུལ་གྱི་རང་ལུས་མེར་བསྲེགས་དང་འབྲེལ་བར་བསྙད་ནས་དོགས་ཡོད་མི་སྣ་ཞེས་བོད་མིའི་སྟེང་ཤུགས་ཆེར་དྲག་གནོན་དང་གང་བྱུང་འཇུ་བཟུང་བྱེད་མུས་སུ་ཡོད། དེ་བས་འདི་ག་ལྟེ་གནས་ཁང་གིས།  གོང་གི་དགེ་འདུན་པ་གཉིས།  གང་བྱུང་འཇུ་བཟང་དང་།  ཁྲིམས་འགལ་བཀག་ཉར།  གསང་བའི་སྒོ་ནས་ཚོགས་ར་ཚོགས་པའི་བྱེད་བབ་འདི་ནི་རྒྱ་གཞུང་གིས་དུས་རྒྱུན་རང་ལུས་མེར་བསྲེགས་དང་འབྲེལ་བའི་ཁག་དཀྲི་བྱེད་སྟངས་ཤིག་ལས། དེར་ ཁུངས་འཕེར་གྱི་བདེན་དཔང་གང་ཡང་མེད་པས་ངོ་རྒོལ་ཡོད།

Read More »

གངས་སྐྱེས་སྒྲུབ་པ་སྐྱབས་ལོ་དུས་མ་རྫོགས་པར་གློད་གྲོལ་བཏང་འདུག

རྒྱ་གཞུང་གིས་གངས་སྐྱེས་སྒྲུབ་པ་སྐྱབས་ལ་“དམར་ཤོག་རྒོལ་ལན་ཚོགས་པ་”ཞེས་པའི་ཚོགས་མི་དང་བོད་དོན་ལས་འགུལ་སྣ་མང་སྤེལ་བའི་ཉེས་འཛུགས་བྱས་ཏེ། འཇུ་བཟུང་བཀག་ཉར་དང་ཁྲིམས་ཐག་ལོ་ལྔ་དང་ཕྱེད་ཀ་བཅད་ཡོད་ཀྱང་།   ལོ་དུས་མ་ཚང་བར་གློད་གྲོལ་བཏང་འདུག བཙན་བྱོལ་གྱི་བརྒྱུད་ལམ་ཁག་ཏུ་གནས་ཚུལ་ཐོན་གསལ་ལྟར་ན། ཕྱི་ལོ་༢༠༡༦ཟླ་༩ཚེས་༡༦ཉིན་གྱི་བོད་ནང་གི་ཕྱི་བྲོའི་ཆུ་ཚོད་༥སྟེང།  རྩོམ་པ་པོ་གངས་སྐྱེས་སྒྲུབ་པ་སྐྱབས་རྒྱ་གཞུང་གི་བཙོན་ཁང་ར་རྔ་ཁ་ཞེས་པ་ནས་གློད་གྲོལ་བཏང་འདུག  དེ་ནི་ཁོང་གི་ཁྲིམས་ཆད་ཀྱི་དུས་ཡུན་ལོ་ལྔ་དང་ཕྱེད་ཀར་ཚང་རྒྱུར་ལོ་གཅིག་ལྷག་ཡོད་ཀྱང་གློད་གྲོལ་བྱུང་བ་ཞིག་ཆགས་ཡོད། ཁོང་གི་ཁྱིམ་མི་གཉེན་ཉེ་དང་ཡུལ་མི་རྒྱ་ཆེར་འཛོམས་ཐོག  གུར་ཆེན་ཕུག་པའི་ནང་དུ་༼གངས་སྐྱེས་སྒྲུབ་པ་སྐྱབས་གཟི་བརྗིད་ངང་ཕྱིར་ཕེབས་པར་རྟེན་འབྲེལ་ཞུ་་༽ཞེས་འཕྲེད་དར་བཀལ་ཞིང་། བོད་ལྭ་དཀར་པོ་ཆ་ཚང་ཞིག་གོན་ནས་ཁྲི་ཀར་བཞུགས་པའི་རྩོམ་པ་པོ་ཁོང་གིས།     མགོ་སྟེང་དུ་༧གོང་ས་མཆོག་གི་སྐུ་པར་བཞག་ནས་གསོལ་འདེབས་ཞུ་ཡི་འདུག་ལ།    བོད་ཟས་ཐུད་དང་ཞོ།   གོ་རེ་སོགས་སྡེར་ཁ་བསྒྲིགས་ཏེ་ཕེབས་བསུའི་དགའ་སྟོན་ཟབ་རྒྱས་ཞུས་འདུག

Read More »

རྒྱ་གཞུང་གིས་བོད་མི་ཞི་རྒོལ་བཞི་ལ་ཁ་བྲལ་བརྒྱུད་སྐུལ་བར་བསྙད་ནས་ཁྲིམས་ཐག་བཅད་འདུག

བོད་མི་ཞི་རྒོལ་བ་བཞིས། བོད་ལ་རང་དབང་དགོས། བོད་ལ་འགྲོ་བ་མིའི་ཐོབ་ཐང་དགོས། ༧གོང་ས་མཆོག་སྐུ་ཚེ་ཁྲི་ལོར་བརྟན་པོ་ཤོག་དང་༧གོང་ས་མཆོག་བོད་ལ་ཕེབས་བཅུག་དགོས་སོགས་ཀྱི་སྐད་འབོད་བྱས་པར་བརྟེན། རྒྱ་གཞུང་གིས་ཉེ་ཆར་རྒྱལ་ཁབ་ཁ་བྲལ་ལ་ངན་སྐུལ་བྱས་པའི་ཉེས་བཙུགས་ཀྱི་ཁྲིམས་ཐག་བཅད་འདུག ལོ་སྔོན་མར།  ཨ་མདོ་རྔ་བའི་གྲོང་ཁྱེར་གྱི་གཞུང་ལམ་དུ་དགེ་འདུན་པ་བཞིས་དུས་ཚོད་མ་འདྲ་བའི་ནང་། ༧གོང་ས་མཆོག་གི་སྐུ་པར་འཕྱར་ཅིང་ཞི་བའི་སྐད་འབོད་བྱས་( འདི་ག་ལྟེ་གནས་ཁང་གིས་གནས་ཚུལ་འདིའི་སྐོར་བཏོན་ཟིན་)ཡོད། ཀིརྟི་དགོན་པ་ནས་ཡིན་པའི་དགེ་འདུན་པ་བཞི་བོ་རེ་རེ་ལ་རྒྱ་གཞུང་གིས་ལོ་གསུམ་གྱི་བཙོན་འཇུག་ཁྲིམས་ཐག་བཅད་འདུག  ཁོང་ཚོ་བཞི་གང་བྱུང་འཇུ་བཟུང་བཙན་འཁྲིད་རྗེས།   ཟླ་བ་བཅུའི་རིང་ནང་མི་དང་ཕྱི་ཕྱོགས་ལ་འབྲེལ་བ་གང་ཡང་མ་བྱུང་ཞིང་།  ནང་མི་ཡིས་ཁོང་ཚོའི་སྐོར་གྱི་གནས་ཚུལ་དང་ཁྲིམས་ར་འཚོགས་ཡོད་མེད་སོགས་གང་ཡང་ཤེས་རྟོགས་བྱུང་མི་འདུག    བོད་ནང་དུ་བོད་མིའི་སྟེང་། རྒྱ་གཞུང་ཉེན་རྟོག་ཁང་གི་ལས་བྱེད་ཀྱིས་ཕྱི་ལ་འབྲེལ་བ་རྩ་བྲལ་གྱི་སྒོ་ནས་བཀག་ཉར་དང་ཉེན་སྲུང་གང་མང་མེད་པའི་བཅར་རྡུང་བྱེད་རྒྱུ་ནི་ཧ་ཅང་རྒྱུན་ལྡན་ལྟ་བུ་རེད། ཀིརྟི་དགོན་པའི་བློ་རིག་འཛིན་གྲྭའི་སློབ་མ་དང་དགུང་ལོ་༢༣ཡིན་པའི་བློ་བཟང་།  ཕྱི་ལོ་༢༠༡༥ཟླ་༩ཚེས་༡༠ཉིན་ས་གནས་སྤྱི་བདེ་མི་སྣས་བཀག་ཉར་བྱས་ཤིང་།  ཕྱི་ལོ་༢༠༡༦ཟླ་༧ཚེས་༡༩ཉིན་གཞི་ནས།  རྔ་བ་ཁུལ་ནས་བར་ཐག་་མ་ལེ་༢༡༧ ན་ཡོད་པའི་མའོ་ལྦུན་རྫོང་གི་ཁྲིམས་ཁང་གིས་གསང་བའི་སྒོ་ནས་ཁྲིམས་ར་ཚོགས་ནས་ལོ་གསུམ་གྱི་ཁྲིམས་ཐག་བཅད་འདུག་ཀྱང་།   ཁོང་གི་ནང་མི་དང་སྤུན་མཆེད་སོགས་ལ་ཁྲིམས་ར་འཚོགས་སྐོར་གྱི་བརྡ་ལན་བྱས་མི་འདུག ཉིན་མ་དེ་ག་རང་ལ་གོང་གི་ཁྲིམས་ཁང་དེ་གས།  དགེ་འདུན་པ་ཨ་གྲགས་ཞེས་པ་ཞིག་ལ་ཁྲིམས་ཐག་ལོ་གསུམ་བཅད་འདུག  དགུང་ལོ་༢༡ཡིན་པའི་ཨ་གྲགས་སྔ་ལོ་༢༠༡༥ཟླ་༩ཚེས་༡༠ཉིན་འཇུ་བཟུང་བཀག་ཉར་བྱས་འདུག ཕྱི་ལོ་༢༠༡༦ཟླ་༨ཚེས་༤ཉིན་གཞི་ནས་ཁོང་གི་གཉེན་ཉེ་རྣམས་ཀྱིས་ཨ་གྲགས་ཁྲེན་ཏོའི་དང་ཉེ་བའི་མན་ཡེང་བཙོན་ཁང་དུ་བཙོན་འཇུག་བྱས་ཡོད་པ་ཤེས་རྟོགས་བྱུང་འདུག དགུང་ལོ་༢༢ཡིན་པའི་དགེ་འདུན་པ་འཇམ་དཔལ་རྒྱ་མཚོ་སྔ་ལོ་༢༠༡༥ཟླ་༩་ཚེས་༩ཉིན།  གོང་བཞིན་གྱི་ཞི་རྒོལ་བྱས་པ་ལ་བརྟེན་ནས་འཇུ་བཟུང་བཀག་ཉར་གྱི་འདི་ལོ་ཕྱི་ཟླ་༨་ཚེས་༡ཉིན་ཁྲིམས་ཐག་བཅད་འདུག    ཁྲིམས་ཐག་བཅད་རྗེས། མའོ་ལྦུན་རྫོང་གི་བཀག་ཉར་ཁང་ནས་ཡུན་རིང་ཕྱི་ལ་འབྲེལ་བ་གང་ཡང་བྱེད་དུ་མ་བཅུག་པའི་དགེ་འདུན་པ་ཁོང་བདེ་ཡེང་བཙོན་ཁང་དུ་གནས་སྤོར་གཏོང་ཡོད་ཚོད་འདུག དགུང་ལོ་༢༠ཡིན་པའི་དགེ་འདུན་པ་བློ་བཟང་སྐལ་བཟང་ཡང་།  སྔར་ལོ་ཕྱི་ཟླ་༩ཚེས་༧ཉིན་ཁོང་མི་སྒེར་ཁེར་རྐྱང་ཞི་རྒོལ་བྱས་ནས་འཇུ་བཟུང་བཀག་ཉར་རྗེས་གར་སོང་ཆ་མེད་བྱུང་ཞིང་།  ཟླ་འདིའི་ཟླ་མགོ་ཙམ་ལ།  ཁོང་གི་ནང་མི་དང་གཉེན་ཉེ་རྣམས་ཀྱིས་ཁོང་ལ་ལོ་གསུམ་གྱི་ཁྲིམས་ཐག་བཅད་པ་བརྒྱུད་གཞི་ནས་དེ་སྔ་གསང་བའི་སྒོ་ནས་མའོ་ལྦུན་རྫོང་གི་བཀག་ཉར་ཁང་དུ་ཟླ་བ་མང་བོར་བཀག་ཉར་བྱས་འདུག་པ་ཤེས་རྟོགས་བྱུང་འདུག       དེང་འདིར་དགེ་འདུན་པ་ཁོང་ཟི་ཁྲོན་ཞིང་ཆེན་གྱི་ཧོང་ཞི་མཁར་གྲོང་གི་མན་ཡེང་བཙོན་ཁང་དུ་བཙོན་འཇུག་བྱས་ཡོད་འདུག   འདི་ག་ལྟེ་གནས་ཁང་ལ་དེ་སྔོན་བརྙན་ཐུང་ཞིག་ལག་སོན་བྱུང་བའི་ནང་དུ།  དགེ་འདུན་པ་བློ་བཟང་སྐལ་བཟང་འཇུ་བཟུང་བཙན་འཁྲིད་བྱས་སྐབས།  བོད་མི་མང་བོ་ཞིག་དེ་མུར་མཐའ་རུ་སྐོར་ཁྲོད།    ལོ་ན་ཅུང་ཟད་མཐོ་བའི་བུད་མེད་ཅིག་ཉེན་རྟོག་ཁང་གི་ཕྱོགས་སུ་བསྐྱོད་ནས་ངོ་རྒོལ་བྱས་པ་མཐོང་ལ།ཡང་མཚོན་ཆ་ཁྱེར་བའི་དྲག་ཆས་ཉེན་རྟོག་པས་བོད་མིའི་སྟེང་དྲག་རྡུང་དང་།  མི་ཚོགས་རྗེས་འདེད་བྱེད་ཀྱིན་འདུག   སྐབས་དེར་རྒྱབ་ཕྱོགས་ནས་བུད་མེད་ཅིག་གིས་གདུང་འབོད་ཆེན་པོས་༧གོང་ས་མཆོག་ལ་སྨོན་ལམ་དང་ཉེན་རྟོག་པས་བོད་མི་ཚོ་བསྡད་དུ་མི་བཅུག་པའི་སྨྲེ་སྔགས་འདོན་གྱིན་པ་ཐོས་ཐུབ། དགེ་འདུན་པ་བློ་བཟང་སྐལ་བཟང་ནི་བློ་བཟང་བསྟན་པའི་ཚ་བོ་ཡིན་ལ།  བློ་བཟང་བསྟན་པས་ཕྱི་ལོ་༢༠༡༤ཟླ་༡༡ནང་མི་སྒེར་ཁེར་རྐྱང་གི་ཞི་རྒོལ་བྱས་པར་བརྟེན་ནས་བཙོན་འཇུག་བྱས་ཡོད་པ་མ་ཟད།       ཁོང་གི་ཨ་ཞང་ཚེ་དཔོག་མགོན་པོ་དང་ཆོས་འཕེལ་གཉིས་ཀྱིས་ཀྱང་ཕྱི་ལོ་༢༠༠༨ཟླ་༣ས་རྔ་བའི་ས་བྱི་ཞི་རྒོལ་ཁྲོད་མཉམ་ཞུགས་བྱས་པ་ལ་བརྟེན་ནས་བཙོན་འཇུག་ཁྲིམས་ཐག་ལོ་དྲུག་དང་བཞི་བར་བཅད་ཡོད་པ་ཡིན། འདི་ལོའི་ཕྱི་ཟླ་༧ནང་།  རྒྱ་གཞུང་གིས་རྔ་བ་ཁུལ་གྱི་དགོན་མ་ལག་༤༢ལ་གྱོད་དཔེ་ཞེས་པའི་ཁྲིམས་སྒྲིག་གི་ཡིག་ཆ་ཞིག་བགྲེམས་སྤེལ་བྱས་པ་དེའི་ནང་དུ།   བོད་ཁུལ་གྱི་སྨྲ་བརྗོད་རང་དབང་ཁྲིམས་འགལ་ཡིན་པ་གསལ་ཡོད། ཡང་མི་སྒེར་ཁེར་རྐྱང་གི་ཞི་རྒོལ་མཚོན།     འགྲོ་བ་མིའི་ཐོང་ཐང་དོན་གཉེར་སྲུང་སྐྱོབ་མཁན་དང་འགྲོ་བ་མིའི་གཞི་རྩའི་ཐོང་ཐང་ལོངས་སུ་སྤྱོད་མཁན་ཡོངས་ལ་༼ཁ་བྲལ་ལ་ངན་སྐུལ་༽ཞེས་པའི་ནག་ཉེས་བཙུགས་ཀྱི་ཡོད་པ་རེད། ཁ་བྲལ་ལ་ངན་སྐུལ་ཞེས་པའི་ཁྲིམས་སྒྲིག་དེ་ནི།  ཕྱི་ལོ་༡༩༩༧ལོར།  རྒྱ་ནག་གི་<<ཉེས་ཁྲིམས་>>དོན་ཚན་༡༠༣བསྐྱར་བཅོས་དང་བསྟུན་ནས་ཁ་སྣོན་བྱས་པ་ཞིག་ཡིན་ལ།    དོན་ཚན་འདིའི་ནང་དུ་གསལ་པའི་ནག་ཉེས་རིགས་ལ་ཁྲིམས་བཅད་དུས་ཡུན་གཏན་འབབ་ནི། མང་མཐའ་ལོ་ལྔ་བཙོན་འཇུག་དང་། དུས་ཐུང་བཀག་ཉར། ལྟ་རྟོག་འོག་གི་བཙོན་གྲོལ་དང་། ཆབ་སྲིད་ཀྱི་དབང་ཆ་འཕྲོག་པ་བཅས་རེད། འདི་ག་ལྟེ་གནས་ཁང་གི་ཆབ་སྲིད་བཙོན་པ་ཐོ་འགོད་སྡེ་ཚན་གྱིས།  ཕྱི་ལོ་༢༠༡༤ ནས་ད་བར་མི་སྒེར་ཁེར་རྐྱང་གི་ཞི་རྒོལ་གནང་མཁན་མི་གྲངས་༢༨ ལག་སོན་བྱུང་ཁྲོད། བུད་མེད་༦་དང་། དགེ་འདུན་པ་༡༤། མི་སྐྱ་༨བཅས་རེད། མི་སྒེར་ཁེར་རྐྱང་ཞི་རྒོལ་བྱུང་སའི་ས་ཁུལ་ནི་ཨ་མདོ་རྔ་བ་ཆགས་འདུག་ལ།        ས་ཁུལ་འདི་ནི་རང་ལུས་མེར་བསྲེགས་ཀྱི་དོན་རྐྱེན་མང་ཤོས་བྱུང་སའི་ས་ཁུལ་ཞིག་ཀྱང་ཆགས་ཡོད། འདི་ག་ལྟེ་གནས་ཁང་གི་ངོས་ནས།   གོང་གི་གྲངས་ཀར་མ་ཚུད་པའི་བོད་མི་གང་མང་ཞིག་གིས།    རྒྱ་གཞུང་གི་ཚད་ལས་འགལ་བའི་བཙད་ཤེད་དང་དྲག་གནོན་ལ་གོང་མཚུངས་ཀྱི་ལས་འགུལ་བརྩམས་པ་དང་བསྟུན་ནས།   འཇུ་བཟུང་བཀག་ཉར་བྱེད་ཡོད་ཀྱང་།     ང་ཚོས་ད་སྔ་ཤེས་རྟོགས་ཐུབ་ཐབས་མེད་པར་ལུས་ཡོད་པའི་ཡིད་ཆེས་བྱེད་ཀྱིན་ཡོད།

Read More »