Sunday , September 22 2019
Home / གསར་འགྱུར།

གསར་འགྱུར།

རྒྱ་རིགས་ཆེད་མཁས་པས་རྒྱ་ནག་སྲིད་གཞུང་ལ་ཞིང་འབྲོག་མང་ཚོགས་རང་བྱུང་སྲུང་སྐྱོང་ཁུལ་ནས་གནས་སྤོར་གཏོང་མི་རུང་བའི་འབོད་སྐུལ་ཞུས། 

ཀྲུང་གོའི་ཚན་རིག་གླིང་ས་རྒྱུས་ཐོན་ཁུངས་ཚན་ཁག་གི་རང་བྱུང་དང་རིག་གནས་ཤུལ་བཞག་ཞིབ་འཇུག་ལྟེ་གནས་ཀྱི་ཆེད་མཁས་པ་མཱིན་ཆིང་བེན། རྒྱ་རིགས་སྐྱེ་ཁམས་ཚན་རིག་པ་དང་སྤྱི་ཚོགས་ཚན་རིག་པའི་ཚོགས་འདུར་མཉམ་ཞུགས་ཀྱིས་བོད་ཁུལ་གྱི་ཁོར་ཡུག་སྲུང་སྐྱོབ་མ་ཐུབ་པའི་གནད་དོན་གསལ་སྟོན་བྱས་ཡོད་པ་རེད། ཟླ་འདིའི་ཟླ་འགོར་རྒྱ་ནག་རྒྱལ་ཡོངས་སྲིད་གྲོས་ཀྱི་ལས་སྟེགས་སྟེང་སྤེལ་བའི་གནས་ཚུལ་ཞིག་གི་ནང་དུ། རྒྱ་རིགས་ཆེད་མཁས་པ་མཱིན་ཆིང་བེན་གྱིས། རྒྱ་ནག་གི་རྒྱལ་ཁབ་སྤྱི་གླིང་ལམ་ལུགས་༼རྒྱ་ནག་སྲིད་གཞུང་གིས་གཏེན་འབེབས་བྱས་པའི་ཁོར་ཡུག་སྲུང་སྐྱོང་སྲིད་ཇུས།༽ལག་བསྟར་བྱས་བའི་ཁྲོད་དུ། ས་གནས་མང་ཚོགས་ཀྱི་ཁེ་ཕན་དང་། ཞིང་འབྲོག་མང་ཚོགས་ཀྱི་དུས་ཡུན་རིང་བོའི་སྲོལ་རྒྱུན་ཞིང་ཕྱུགས་ཐོན་བསྐྱེད་བྱེད་ཐབས་ཀྱིས་སྐྱེ་ཁམས་ལ་སྲུང་སྐྱོབ་བྱེད་པར་ནུས་པ་གལ་ཆེན་ཐོན་ཐུབ་པ་དེ་སྣང་མེད་དུ་བཞག་ཡོད་སྐོར་བཤད་པ་ལུང་འདྲེན་བྱས་འདུག ཚན་རིག་པ་དེས། རྒྱལ་ཁབ་སྤྱི་གླིང་བསྐྲུན་རྗེས་མང་ཚོགས་གང་དུ་འགྲོ་དགོས། ཞེས་གནད་དོན་དེར་བསམ་གཞིག་གཏོང་གི་ཡོད་པ་རེད། ཕྱི་ལོ་༢༠༡༧ ལོ་ནས་བཟུང་རྒྱ་ནག་སྲིད་གཞུང་གིས་རྒྱལ་ཁབ་སྤྱི་གླིང་ལམ་ལུགས་བཅོས་བསྒྱུར་དང་འཛུགས་བསྐྲུན་འཕེལ་རིམ་དང་འབྲེལ་ཏེ། ཆེད་མཁས་པ་མཱིན་ཆིང་བེན་གྱིས། སྲིད་གཞུང་གིས་ངེས་པར་དུ་ས་གནས་མང་ཚོགས་ཀྱི་འགྲོ་སྡོད་ནི། ས་གནས་འཛུགས་སྐྲུན་གྱི་འཕེལ་རིམ་ཁྲོད་དུ་འདང་རྒྱག་དང་དོ་སྣང་བྱ་དགོས་པའི་གནད་འགག་གལ་ཆེན་ཞིག་ཡིན་པར་གསལ་བཤད་བྱས་དོན། “རྒྱལ་ཁབ་གཞན་དག་དང་མི་འདྲ་པར། རང་རྒྱལ་གྱི་རྒྱལ་ཁབ་སྤྱི་གླིང་ཚོད་ལྟ་ཁུལ་དུ་ཞིང་ཕྱུགས་ལས་ཀ་བ་མང་ཚོགས་མི་ཉུང་བ་ཞིག་ཡོད་པས། རང་རྒྱལ་གྱིས་རྒྱལ་ཁབ་སྤྱི་གླིང་འཛུགས་སྐྲུན་བྱ་དགོས་ན། སྐྱེ་ཁམས་སྲུང་སྐྱོབ་གནད་དོན་ཐག་གཅོད་བྱེད་དགོས་པར་མ་ཟད། མང་ཚོགས་དེ་དག་གི་འཚོ་བ་དང་ཐོན་སྐྱེད་ཀྱི་གནད་དོན་ཡང་ཐག་གཅོད་བྱེད་དགོས།” ཟེར། ཞིབ་འཇུག་རྒྱུས་ལོན་བྱས་བརྒྱུད་ནས་མཱིན་ཆིང་བེན་གྱིས། རྒྱལ་ཁབ་སྤྱི་གླིང་འཛུགས་སྐྲུན་གྱི་འཕེལ་རིམ་ཁྲོད་དུ་སྤྱི་གླིང་དོ་དམ་པས་སྲུང་སྐྱོབ་བྱ་ཡུལ་དམིགས་སུ་བཟུང་བ་མ་གཏོགས། དམིགས་ཡུལ་སྲུང་སྐྱོབ་བྱེད་པའི་སྣང་ཚུལ་ལ་མཐོང་ཆེན་བྱས་མེད་པར་བསྟན་ཡོད། “ཡུལ་མི་གནས་སྤོར་གྱི་བྱེད་ཐབས་དེ་དངོས་ཡོད་གནས་ཚུལ་ཁྲོད་དུ་ལག་ལེན་བྱེད་དཀའ་བར་མ་ཟད། སྐྱེ་ཁམས་ཁོར་ཡུག་སྲུང་སྐྱོབ་ཐད་ལའང་ཕན་པ་ཆེན་པོ་མེད་པས། ས་གནས་མང་ཚོགས་རྣམས་རྒྱལ་ཁབ་སྤྱི་གླིང་འཛུགས་སྐྲུན་ཐད་སྐྱེ་ཁམས་སྲུང་སྐྱོབ་བྱེད་མཁན་གྱི་ཐོབ་ཐང་གིས་ཚབ་ཞུགས་བྱེད་དུ་འཇུག་དགོས།” ཞེས་མཱིན་ཆིང་བེན་གྱིས་བརྗོད་ཡོད། ས་གནས་བོད་མི་གནས་སྤོར་བཏང་བ་དེས་སྐྱེ་ཁམས་དོ་དམ་ཐད་ལ་ལྡོག་ཕྱོགས་ཀྱི་ཤན་ཤུགས་ཐེབས་པའི་སྐོར་ནས་མཱིན་ཆིང་བེན་གྱིས་ད་ལྟའི་གཙང་གསུམ་ཆུ་འགོའི་༼རྨ་འབྲི་རྫ་གསུམ་འབྱུང་ཡུལ་གྱི་ས་ཁུལ།༽གནས་སྟངས་དཔེ་མཚོན་དུ་འཁོད་ཅིང་། ས་ཁུལ་དེར་ཕྱི་ལོ་༢༠༢༠ ལོར་རྒྱལ་ཁབ་སྤྱི་གླིང་ཐོག་མ་ཟེར་བ་སྒོ་འབྱེད་བྱ་འཆར་ཡོད་པ་རེད། མཱིན་ཆིང་བེན་གྱིས། “ཉེ་བའི་ཆར་རྨ་འབྲི་རྫ་གསུམ་གྱི་ས་ཆ་མང་པོར་ཁ་བ་བབས་ནས་རི་སྐྱེས་སྲོག་ཆགས་མང་པོར་གནོད་པ་ཚབས་ཆེན་བྱུང་ཞིང་། སྲོག་ཆགས་མང་པོར་བཀྲེས་སྐོམ་གྱི་མུ་གེ་བྱུང་སྐབས། ས་གནས་དེ་གའི་མང་ཚོགས་དང་དགོན་སྡེ་ཁག་གི་གྲྭ་བ་ཚོས་གནོད་ཐེབས་ས་ཁུལ་དུ་གཟན་རྩྭ་སྐྱེལ་འདྲེན་བྱས་ཏེ་ཉམས་ཆུང་བའི་སྲོག་ཆགས་མང་པོ་གངས་སྐྱོན་གྱི་གནོད་པ་ལས་ཐར་དུ་བཅུག གློ་བུར་བའི་དོན་རྐྱེན་དེ་ལྟ་བུ་བྱུང་བ་ལ་དོ་དམ་པ་རེ་འགའ་ཞིག་གི་ནུས་པར་བརྟེན་ན་ཟློག་ག་ལ་སྲིད།” ཅེས་བརྗོད་འདུག གཙང་གསུམ་འབྱུང་ཡུལ་གྱི་ས་ཁུལ་ནི་མཚོ་སྔོན་ཞིང་ཆེན་མགོ་ལོག་དང་ཡུལ་ཤུལ་བོད་རིགས་རང་སྐྱོང་ཁུལ། མཚོ་ལྷོ་བོད་རིགས་རང་སྐྱོང་ཁུལ། རྨ་ལྷོ་བོད་རིགས་རང་སྐྱོང་ཁུལ། མཚོ་ནུབ་སོག་རིགས་དང་བོད་རིགས་རང་སྐྱོང་ཁུལ་བཅས་སུ་འཁེལ་ཡོད་པ་དང་། ས་ཁུལ་དེའི་མི་འབོར་གྱི་བརྒྱ་ཆ་༩༠ བོད་རིགས་ཡིན་པ་རེད། ཆེད་མཁས་པ་མཱིན་ཆིང་བེན་གྱིས་མུ་མཐུད་དུ། “ཡང་སྒོས་མི་རབས་ནས་མི་རབས་སུ་རྒྱུན་མ་ཆད་པར་གནས་དེར་འཚོ་སྡོད་བྱས་པའི་རོང་འབྲོག་མང་ཚོསགས་ཚོས་རང་བྱུང་ཁམས་ལ་གོང་བཀུར་བྱེད་རྒྱུ་ནི་ཁོ་ཚོའི་སྐྱེ་ཁམས་རིག་གནས་ཀྱི་སྲོག་ཤིང་ལྟ་བུར་གྲུབ་ཡོད་ལ། དུས་ཡུན་རིང་བོའི་སྲོལ་རྒྱུན་སྐྱེ་ཁམས་ཞིང་ལས་ཐོན་སྐྱེད་དང་རྩྭ་ཆུ་གང་བཟང་ལ་བསྟུན་ནས་འཚོ་སྡོད་བྱེད་པའི་འབྲོག་ལས་ཀྱི་རྣམ་པ་སོགས་ཞིང་ཕྱུགས་ཀྱི་ཤུལ་བཞག་རིག་གནས་དེས། སྐྱེ་ཁམས་ལ་གནོད་སྐྱོན་མི་ཐེབས་པར་མ་ཟད། མི་དང་རང་བྱུང་ཁམས་ཀྱི་མཐུན་འགྲིག་དང་སྐྱེ་ཁམས་མ་ལག་གི་ནུས་པ་མཐོར་འདེགས་སུ་གཏོང་ཐུབ་ལ། ས་གནས་དེའི་མི་རིགས་རིག་གནས་དང་སྲོལ་རྒྱུན་ཞིང་ཕྱུགས་ཐོན་སྐྱེད་བྱེད་ཐབས་ཀྱིས་སྐྱེ་ཁམས་སྲུང་སྐྱོབ་བྱེད་པར་ནུས་པ་གལ་ཆེན་འཐོན་ཐུབ།” ཅེས་དང་། “དེ་བས། …

Read More »

དགེ་འདུན་པ་ཞིག་མི་ལོ་གཅིག་ལྷག་རིང་གསང་བའི་ངང་བཀག་ཉར་བྱས་རྗེས་ལོ་གསུམ་གྱི་བཙོན་ཐག་བཅད་འདུག

རྒྱ་གཞུང་གིས་མདོ་སྨད་རྔ་བ་བོད་རིགས་ཆང་རིགས་རང་སྐྱོང་ཁུལ་རྔ་བ་རྫོང་ཕྱོགས་ཀྱི་དགེ་འདུན་པ་ཞིག་ལ་རྒྱལ་ཁབ་ཀྱི་གསང་བ་ཕྱི་བསྒྲགས་པའི་དོགས་ཡོད་ཉེས་འཛུགས་འོག་ཏུ་མི་ལོ་གསུམ་གྱི་དུས་བཀག་བཙོན་འཇུག་གི་ཁྲིམས་ཐག་བཅད་འདུག འདས་ལོའི་ཕྱི་ཟླ་༧ པའི་ནང་འཛིན་བཟུང་བཀག་ཉར་བྱས་རྗེས། ཟླ་འདིའི་ཕྱི་ཚེས་༣ ཉིན་རང་ལོ་༣༦ ཡིན་ཞིང་རྔ་བ་ཀིརྟི་དགོན་གྱི་དགེ་འདུན་པ་བློ་བཟང་རྡོ་རྗེ་ལ་མི་ལོ་གསུམ་རིང་བཙོན་འཇུག་གི་ཁྲིམས་ཐག་བཅད་ཡོད་པ་དང་། དེ་ཡང་ས་གནས་ཉེན་རྟོག་པས་ཁོང་མཚན་གུང་ཙམ་ལ་ཀིརྟི་དགོན་གྱི་རང་ཤག་ནས་འཛིན་བཟུང་བཙན་ཁྲིད་ཀྱིས་ད་བར་དུ་བཀག་བསྐྱིལ་བྱས་ཡོད་པ་རེད། དེ་སྔོན་ཁོང་གིས་བྱེས་ཀྱི་བོད་མིར་འབྲེལ་གཏུག་གནང་བའི་དོགས་གཞིའི་འོག་ཏུ་རྒྱ་གཞུང་གིས་བཀག་བསྐྱིལ་བྱས་པར་ཡིད་ཆེས་བྱེད་ཀྱི་ཡོད་ཀྱང་། དོན་དངོས་སུ་རྒྱ་གཞུང་གིས་ཁོང་ལ་མི་ལོ་གསུམ་གྱི་དུས་བཀག་བཙོན་འཇུག་བྱེད་དགོས་པའི་ཉེས་གསོག་ག་རེ་ཡིན་མིན་ཤེས་རྟོགས་ཐུབ་མེད་མོད། རྒྱ་ནག་སྲིད་གཞུང་གི་ཉེས་ཁྲིམས་ཟེར་བའི་འོག་ཏུ་བོད་མི་ཚོར་ནམ་ཞར་རྒྱལ་ཁབ་ཀྱི་གསང་བ་ཕྱི་ལ་བསྒྲགས་པའི་ནག་ཉེས་བཙན་འགེལ་གྱིས། དུས་ཡུན་མི་ལོ་གསུམ་རིང་ལ་བཙོན་འཇུག་བྱེད་པ་ནི་ཆེས་རྒྱུན་ལྡན་གྱི་གནས་སྟངས་ཤིག་ཆགས་ཡོད། དགེ་འདུན་པ་བློ་བཟང་རྡོ་རྗེ་ནི་རྔ་བ་རྫོང་ཕྱུགས་ལས་འགབ་མའི་ཕ་སངས་རིས་ཀྱི་བུ་ཡིན་པ་དང་། ཁོང་ལོ་ན་ཆུང་དུས་ནས་ཀིརྟི་དགོན་གྱི་ཆོས་སྒོར་ཞུགས་ཡོད། ཕྱི་ལོ་༢༠༠༨ ལོར་ཡང་རྒྱ་གཞུང་གིས་ཁོང་འཛིན་བཟུང་གིས་མི་ལོ་༢ གྱི་དུས་བཀག་བཙོན་འཇུག་གི་ཁྲིམས་ཐག་བཅད་མྱོང་ཡོད་པ་རེད། དེ་ཡང་​ཕྱི་ལོ་༢༠༠༨  ཟླ་༥ ཚེས་༢༣ ཉིན་བློ་བཟང་རྡོ་རྗེ་དང་གཞན་དགེ་འདུན་ཀུན་དགའ་གཉིས་ཀིརྟི་དགོན་ནས་འཛིན་བཟུང་བཀག་བསྐྱིལ་བྱས་ཡོད་པ་དང་། ཁོང་གཉིས་བཀག་བསྐྱིལ་བྱས་དོན་ནི། ཁོང་རྣམ་པ་གཉིས་ནས་རྒྱ་ནག་དམར་ཤོག་སྲིད་གཞུང་གི་རྒྱལ་གཅེས་ཆོས་གཅེས་ཟེར་བའི་ཆབ་སྲིད་སློབ་གསོ་དང་ལེན་མ་གནང་བའི་རྐྱེན་གྱིས། ཕྱིས་སུ་ཁོང་གཉིས་ལ་མི་ལོ་༢ གྱི་དུས་བཀག་བཙོན་འཇུག་བྱས་པ་ཞིག་རེད། སྐབས་དེའི་ཡུལ་ངོས་ཀྱི་དགེ་འདུན་པ་ཚོས། ཁོང་གཉིས་འཛིན་བཟུང་བྱས་པ་དེས་ག་རེ་མཚོན་གྱི་ཡོད་པ་རེད་ཅེ་ན། ང་ཚོ་སུ་ཡིན་ཡང་འདི་ལྟར་དགོན་པ་ནས་རྒྱ་ནག་སྲིད་གཞུང་གི་ལས་བྱེད་ཚོའི་འོག་ཏུ་མགོ་སྒུར་ནས་བསྡད་པ་དེ་ནི་བཙོན་འཇུག་བྱེད་རྒྱུར་སྒུག་པ་ལས་གཞན་ཅི་ཡང་མ་ཡིན་པ་མཚོན་གྱི་ཡོད་པའི་བསམ་ཚུལ་བརྗོད་ཡོད། འདི་ག་ལྟེ་གནས་ཁང་གི་ངོས་ནས། རྒྱ་གཞུང་གིས་དགེ་འདུན་པ་བློ་བཟང་རྡོ་རྗེ་ལ་དྲང་བདེན་མ་ཡིན་པའི་ཁྲིམས་ཐག་བཅད་པ་དེ་ནི། བོད་མིའི་ཆབ་སྲིད་དང་ཆོས་དད་རང་དབང་ལ་དམིགས་ཡུལ་དང་འཆར་གཞི་ལྡན་པའི་ཉེས་ཁྲིམས་ལག་བསྟར་གྱི་མཇུག་འབྲས་ཡིན་དུས།  རྒྱ་ནག་དམར་ཤོག་སྲིད་གཞུང་གིས་དགེ་འདུན་པ་ཁོང་དང་བོད་མི་གཞན་དག་ཚང་མ་ཆ་རྐྱེན་ཅི་ཡང་མེད་པའི་ཐོག་ནས་མྱུར་དུ་གློད་གྲོལ་གཏོང་དགོས་པའི་ཛ་དྲག་གི་འབོད་སྐུལ་ཞུ་ཡི་ཡོད། རྒྱ་ནག་སྲིད་གཞུང་གིས་ངེས་པར་དུ་རྒྱལ་སྤྱིའི་རྩ་ཁྲིམས་དང་འགྲོ་བ་མིའི་ཐོབ་ཐང་གི་ཁྲིམས་ནང་གསལ་གྱི་གཞི་རྩའི་འགྲོ་བ་མིའི་ཐོབ་ཐང་ཁག་ལ་བརྩི་འཇོག་དང་འགན་སྲུང་བྱེད་དགོས། གསལ་བཤད། ཐེངས་སྔོན་པའི་གནས་ཚུལ་ནང་དུ། དགེ་འདུན་པ་བློ་བཟང་རྡོ་རྗེ་ཕྱི་ལོ་༢༠༡༡ ལོར་དུས་ཡུན་མི་ལོ་གཉིས་རིང་བཙོན་འཇུག་བྱས་པའི་གནས་ཚུལ་གྱི་ཟླ་ཚེས་ནོར་འདུག་པས། ད་ལན་གྱི་གནས་ཚུལ་འདིའི་ནང་དུ་ཟླ་ཚེས་ནོར་བཅོས་བྱས་ཡོད་པ་དགོངས་འཇགས་འཚལ། 

Read More »

རྒྱ་གཞུང་གིས་སྤྱི་ཚོགས་བརྒྱུད་ལམ་དུ་ཁྲིམས་འགལ་ཆ་འཕྲིན་སྤེལ་ན་མི་ལོ་བརྒྱད་ཀྱི་ཁྲིམས་ཆད་གཅོད་རྒྱུ་ཡིན་ཟེར།

གཟའ་འཁོར་འདིའི་ནང་རྒྱ་ནག་ས་གནས་སྲིད་གཞུང་གིས་བོད་རྒྱ་སྐད་གཉིས་ཀྱི་ཐོག་ནས་བརྡ་ཁྱབ་བསྒྲགས་པ་ལྟར་ན། མཚོ་སྔོན་ཞིང་ཆེན་སྲིད་གཞུང་གིས་བརྡ་ཐོ་བཀྲམ་ཏེ། དུས་ཚོད་ནམ་ཞིག་དང་། ས་གནས་གང་དུ་ཡིན་རུང་། སྐད་འཕྲིན་ཚོགས་པ་དང་མི་སྒེར་སུ་ཡིན་ནའང་ཚང་མས་སྐད་འཕྲིན་ཚོགས་པར་ལྟ་རྟོག་དང་དོ་དམ་བྱེད་པར་སྔར་ལས་ལྷག་པར་ཤུགས་སྣོན་རྒྱག་དགོས་པའི་ཛ་དྲག་གི་བཀའ་ཁྱབ་བཏང་འདུག བརྡ་ཁྱབ་ནང་དུ། སྐད་འཕྲིན་ནང་རྒྱལ་ཁབ་བམ་ཏང་ལ་གནོད་པའི་བརྗོད་གཞིའི་རིགས་སྤེལ་བའམ་བསྐུར་མི་ཆོག་པ་དང་། དེ་ལྟར་མ་བྱས་ཚེ། མཇུག་འབྲས་མི་ལོ་བརྒྱད་ཀྱི་ཁྲིམས་ཆད་གཅོད་རྒྱུ་ཡིན་ལུགས་བཤད་འདུག བརྡ་ཁྱབ་ནང་དུ་མི་བཅུས་གྲུབ་པའི་ཚོགས་པ་དང་ཚོགས་མི་ཚང་མས། བརྡ་ཁྱབ་དེ་ཕན་ཚུན་དབར་བརྒྱུད་སྒྲོག་བྱས་ཏེ། ད་ནས་བཟུང་སྐད་འཕྲིན་ནང་ཆབ་སྲིད་ཚོར་སྐྱེན་གྱི་བརྗོད་གཞི་མི་བསྐུར་བ་དང་། འཆལ་གཏམ་མི་སྒྲོག་པ། ཁ་ལ་བདག་པོ་རྒྱག་དགོས་པ། རང་སྲུང་བྱེད་དགོས་རབས་གསལ་བཤད་བྱས་འདུག བརྡ་ཁྱབ་ནང་དུ་ད་དུང་སྐད་འཕྲིན་ཚོགས་པ་དང་མི་སྒེར་སུ་ཡིན་རུང་ཁྲིམས་འགལ་ཆ་འཕྲིན་སྤེལ་བ་དང་བསྐུར་བ་ཡིན་ན། ཐེངས་འདིའི་ནག་སེལ་གཤེད་བཅོམ་གྱི་ཆེད་དོན་འཐབ་རྩོད་ཁྲོད་དུ་ཉེས་ཆད་འགེལ་རྒྱུ་ཡིན་ཟེར། སྐད་འཕྲིན་ཚོགས་གཙོ་ཚང་མར་ཚོགས་མིར་དོ་དམ་དང་ཆ་འཕྲིན་བརྒྱུད་བསྐུར་བྱེད་དུ་མི་འཇུག་པའི་འགན་ཆེན་པོ་ཡོད་པ་དང་། འབྲེལ་ཡོད་སྲིད་གཞུང་དང་དྲ་རྒྱ་དོ་དམ་ཚན་ཁག་གིས་སྐད་འཕྲིན་ཚོགས་པ་དང་། ཆ་འཕྲིན་སྤེལ་བ། ཞབས་མཆན་འཁོད་པ་བཅས་ལ་ཞིབ་བཤེར་ནན་མོ་བྱས་ནས། དོགས་ཡོད་ཉེས་ཅན་པར་ཁྲིམས་ལྟར་ཐག་གཅོད་ནན་མོ་བྱེད་དགོས་ཞེས་ཀྱང་བཤད་འདུག བརྡ་ཁྱབ་དེའི་ནང་ངེས་པར་དུ་བརྩི་སྲུང་དགོས་པའི་གླེང་བྱ་དོན་ཚན་བཅུ་བསྒྲགས་པ་གཤམ་གསལ། གཅིག ཆབ་སྲིད་ཚོར་སྐྱེན་གྱི་བརྗོད་གཞི་མི་སྒྲོག་པ། གཉིས། འཆལ་གཏམ་ལ་ཡིད་མི་ཆེ་ཞིང་མི་སྒྲོག་པ། གསུམ། ནང་ཁུལ་གྱི་རྒྱུ་ཆ་ཕྱི་རུ་མི་སྐུར་བ། བཞི། དེ་དང་འབྲེལ་བ་ཡོད་པའི་འཇིགས་སྐུལ་གྱི་བརྡ་འཕྲིན་མི་སྐུར་བ། ལྔ། ཞང་ཀང་དང་ཨོ་མིན། ཐའེ་ཝན་བཅས་ཀྱི་གསར་འགྱུར་གཞུང་ཕྱོགས་དྲ་ཚིགས་ཀྱིས་ཁྱབ་བསྒྲགས་མ་བྱས་གོང་མི་སྐུར་བ། དྲུག དམག་དོན་དཔྱད་གཞིའི་ཡིག་རིགས་གསར་འགྱུར་མི་སྐུར་བ། བདུན། རྒྱལ་ཁབ་ཀྱི་གསང་དོན་དང་འབྲེལ་བའི་ཡིག་ཆ་མི་སྐུར་བ། བརྒྱད། ཞིབ་དཔྱོད་མ་བྱས་པའི་རྣམ་པ་སྣ་ཚོགས་ཀྱི་གསར་འགྱུར་བསྡུ་ལེན་མི་བྱེད་པ། དགུ གོ་རིམ་སྣ་ཚོགས་ཀྱི་པར་བརྙན་སོགས་མི་སྐུར་བ། བཅུ། ངེས་པར་དུ་ཁྲིམས་བརྩི་སྲུང་བྱེད་གོས། ཕྱི་ལོ་༢༠༡༧ ལོར་ཀན་སུའུ་ཞིང་ཆེན་ཀན་ལྷོ་བོད་རིགས་རང་སྐྱོང་ཁུལ་རྨ་ཆུ་རྫོང་སྤྱི་བདེ་ལས་ཁུངས་ནས་གླེང་བྱ་དོན་ཚན་དགུ་ཅན་གྱི་བརྡ་ཁྱབ་སྤེལ་བ་དང་། བརྡ་ཁྱབ་དེའི་དོན་ཚན་བཞི་བ་དང་། བརྒྱད་པ། དགུ་བ། བཅུ་བ་བཅས་གོང་གི་མཚོ་སྔོན་ཞིང་ཆེན་སྲིད་གཞུང་གིས་སྤེལ་བའི་བརྡ་ཁྱབ་ཀྱི་དོན་ཚན་ཁག་དང་གཅིག་མཚུངས་ཡིན་པ་རེད། …

Read More »

རྒྱ་གཞུང་གིས་ཆབ་སྲིད་ཀྱི་མནར་གཅོད་མཚམས་བཞག་སྟེ་གར་སོང་ཆ་མེད་བཟོས་པའི་དགེ་འདུན་པ་ཚོའི་དངོས་ཡོད་གནས་ཚུལ་གསལ་བཤད་བྱེད་དགོས།

འདི་ག་ལྟེ་གནས་ཁང་གི་ངོས་ནས། རྒྱ་གཞུང་གིས་ཟི་ཁྲོན་ཞིང་ཆེན་རྔ་བ་བོད་རིགས་ཆང་རིགས་རང་སྐྱོང་ཁུལ་གྱི་དགེ་འདུན་པ་གསུམ་གང་བྱུང་བཀག་ཉར་བྱས་པ་དང་བཙན་གྱིས་གར་སོང་ཆ་མེད་བཟོས་པ། དྲང་བདེན་མ་ཡིན་པའི་ཁྲིམས་ཐག་བཅད་པའི་གནས་ཚུལ་ངེས་པར་དུ་གསལ་བཤད་བྱེད་དགོས་པའི་ཛ་དྲག་གི་འབོད་སྐུལ་ཞུ་བཞིན་ཡོད་ལ། འདི་ག་ལྟེ་གནས་ཁང་གིས། རྒྱ་གཞུང་ནས་ཆོས་དད་དང་ཆབ་སྲིད་ཀྱི་ཉེས་འཛུགས་འོག་ཏུ་དགེ་འདུན་པ་དེ་དག་ལ་སྡུག་སྦྱོང་མནར་གཅོད་བཏང་བ་དང་། གང་བྱུང་བཀག་བསྐྱིལ་བཙོན་འཇུག་བྱས་པ་དེ་ནི། རྒྱལ་སྤྱིའི་འགྲོ་བ་མིའི་ཐོབ་ཐང་གི་ཁྲིམས་གཞི་དང་རྩ་འཛིན་ཁག་རྩིས་མེད་རྡོག་རོལ་བཏང་བར་ཡིད་ཆེས་བྱེད་ཀྱིན་ཡོད། འཛམ་གླིང་མཉམ་འབྲེལ་རྒྱལ་ཚོགས་ཀྱི་ཆིངས་གནས་རྒྱལ་ཁབ་ཡིན་པའི་ཆ་ནས། རྒྱ་ནག་དམར་ཤོག་སྲིད་གཞུང་ལ་རྒྱལ་སྤྱིའི་ཁྲིམས་གཞི་རྩ་འཛིན་དེ་དག་ལ་བརྩི་འཇོག་དང་སྲུང་སྐྱོབ། ལག་བསྟར་བྱེད་པའི་འགན་ཡོད། འདི་ལོའི་ཕྱི་ཟླ་༧ ཚེས་༣༠ ཉིན་རང་ལོ་༣༧ ཡིན་པའི་དགེ་འདུན་པ་བློ་བཟང་ཐབས་མཁས་ལ་མི་ལོ་༤ ཡི་དུས་བཀག་བཙོན་འཇུག་གི་ཁྲིམས་ཐག་བཅད་ཡོད་པ་དང་། རྔ་བ་ཀིརྟི་དགོན་ནས་ཡིན་པའི་དགེ་འདུན་པ་ཁོང་ལོ་སྔོན་མ་ནས་རྒྱ་གཞུང་གིས་བཀག་བསྐྱིལ་བྱས་ཡོད་ནའང་། ཁོང་ག་དུས་བཀག་ཉར་བྱས་པ་དང་གནས་སྟངས་ཅི་འདྲ་ཡིན་མིན་ཤེས་རྟོགས་ཐུབ་མེད། དགེ་འདུན་པ་ཁོང་ནི་རྔ་བ་ལྷ་སྡེ་གོང་མའི་བློ་ཁོའི་བུ་ཡིན་པ་དང་། རྒྱ་གཞུང་གིས་ཁོང་འཛིན་བཟུང་བྱས་སྐབས། ཁོང་ཀིརྟི་དགོན་མཚན་ཉིད་གྲྭ་ཚང་གི་དབུ་མའི་འཛིན་གྲྭར་སླེབས་ཡོད་པ་དང་། ཁོང་དེ་སྔོན་འཛུལ་ཞུགས་གནང་བའི་ནང་བསྟན་གཞོན་ནུའི་རིག་སློབ་ཁང་ནི་ཀིརྟི་དགོན་གྱི་ནང་བསྟན་སློབ་གླིང་ཡིན་པ་དང་། ཕྱི་ལོ་༢༠༠༣ ལོར་རྒྱ་གཞུང་གིས་བྱེད་ཐབས་སྣ་ཚོགས་སྤྱད་དེ་བཙན་དང་དབང་གིས་སློབ་གྲྭ་དེའི་སྒོ་རྒྱག་ཏུ་བཅུག་ཡོད་པ་རེད། གཞན་དགེ་འདུན་གཉིས་རྒྱ་གཞུང་གི་ས་གནས་ཉེན་རྟོག་པས་འཛིན་བཟུང་བྱས་རྗེས་གང་སོང་ཆ་མེད་ཆགས་པའི་གྲས་ནས། རྔ་བ་སྤྲོ་ཚིགས་དགོན་གྱི་དགེ་འདུན་པ་ཐུབ་པ་ད་ལྟ་རང་ལོ་༣༢ ཡིན་ཞིང་། ཕྱི་ལོ་༢༠༡༧ ལོའི་ལོ་མཇུག་གི་མཚན་མོ་ཞིག་ལ་རྒྱ་གཞུང་ས་གནས་ཉེན་རྟོག་པས་ཁོང་རང་ཤག་ནས་འཛིན་བཟུང་བཙན་ཁྲིད་བྱས་པ་ནས་བཟུང་གར་སོང་ཆ་མེད་ཀྱི་གནས་སྟངས་ཆགས་ཡོད། ཁོང་ནི་སྤྲོ་ཚིགས་ཐང་བ་མའི་མགར་བ་ཚང་གི་ཡིན་པ་དང་། དེ་སྔོན་ཕྱི་ལོ་༢༠༠༨ ཟླ་༣ ཚེས་༡༦ ཉིན་ཁོང་གིས་སྤྲོ་ཚིགས་ཡུལ་ཚོའི་ཐོག་ཞི་རྒོལ་སྐད་འབོད་དང་རྒྱ་གཞུང་གི་དར་དམར་མེར་སྲེག་བཏང་བའི་ཉེས་འཛུགས་འོག་དུས་ཡུན་ཟླ་བ་༡༨ རིང་ངལ་རྩོལ་བསྒྱུར་བཀོལ་གྱི་མིང་ཐོག་ནས་བཙོན་འཇུག་བྱས་མྱོང་བ་དང་། ཁོང་གི་ཕ་རྒན་སྐལ་བཟང་༼མགོན་དཀར་ཞེས་ཀྱང་འབོད།༽ ཡང་ཕྱི་ལོ་༢༠༡༡ ཟླ་༣ ཚེས་༡༦ ཉིན་ཞི་རྒོལ་སྐད་འབོད་བྱས་པའི་ཉེས་འཛུགས་འོག་འཛིན་བཟུང་གིས་བཙོན་འཇུག་བྱས་མྱོང་འདུག ཀིརྟི་དགོན་གྱི་དགེ་འདུན་པ་བློ་བཟང་རྡོ་རྗེ་ད་ལྟ་རང་ལོ་༣༦ ཡིན་ཞིང་། ཕྱི་ལོ་༢༠༡༨ ཟླ་༨ པའི་མཚན་མོ་ཞིག་ལ་རྒྱ་གཞུང་གི་ཉེན་རྟོག་པས་རང་ཤག་ནས་འཛིན་བཟུང་བཙན་ཁྲིད་བྱས་རྗེས། ད་བར་དུ་ཁོང་གར་ཁྱེར་ཅི་བྱས་ཀྱི་གནས་ཚུལ་ཅི་ཡང་ཤེས་རྟོགས་མ་ཐུབ་པར་ལྷག་ཡོད། ཁོང་ནི་རྔ་བ་རྫོང་ཕྱུགས་ལས་འགབ་མའི་ཕ་སངས་རིས་ཀྱི་བུ་ཡིན་པ་དང་། དེ་སྔོན་ཕྱི་ལོ་༢༠༡༡ ལོར་ཡང་རྒྱ་གཞུང་གིས་ཁོང་འཛིན་བཟུང་གིས་མི་ལོ་༣ གྱི་དུས་བཀག་བཙོན་འཇུག་གི་ཁྲིམས་ཐག་བཅད་མྱོང་ཡོད་པ་རེད།

Read More »

རྒྱ་གཞུང་གིས་དྲ་ལམ་བདེ་འཇགས་ཀྱི་མིང་བྱང་འོག་ཏུ་སྨྲ་བརྗོད་རང་དབང་ལ་དམ་དྲག་བྱེད་ཀྱིན་འདུག 

བོད་རང་སྐྱོང་ལྗོངས་སྲིད་གཞུང་གིས་བརྡ་ཁྱབ་སྤེལ་ཏེ། ཁྲིམས་འགལ་ཉེས་གསོག་ཆ་འཕྲིན་གྱི་ཁུངས་སྣེ་ཐེར་འདོན་བྱས་ན་བྱ་དགའ་མཐོ་ཤོས་རྒྱ་སྒོར་ཁྲི་༣༠༠༠༠༠ སྤྲོད་རྒྱུ་ཡིན་རབས་བཤད་ཅིང་། དེ་ནི་རྒྱ་གཞུང་གིས་སྤྱི་ཚོགས་དོ་དམ་གྱི་འཐབ་ཇུས་སྤྱད་ནས་མང་ཚོགས་ནང་ཕན་ཚུན་དབར་གསང་མྱུལ་གྱི་ཞེན་སྐུལ་བཏང་སྟེ་ཁྲིམས་འགལ་ཉེས་གསོག་དང་འབྲེལ་བའི་ཆ་འཕྲིན་རིགས་ཚང་མ་བཀག་སྡོམ་བྱེད་ཐབས་ཤིག་རེད། གོང་ཞུས་བརྡ་ཁྱབ་དེ་ནི་འདི་ལོའི་ཕྱི་ཟླ་༢ ཚེས་༢༨ ཉིན་བོད་རང་སྐྱོང་ལྗོངས་དྲ་འཕྲིན་གཞུང་ལས་ཁང་དང་སྤྱི་བདེ་ལས་ཐིང་། ལྗོངས་འཕྲིན་གཏོང་དོ་དམ་པུའུ་ཟེར་བ་སོགས་མཉམ་འབྲེལ་གྱི་ཐོག་ནས་བཏང་བ་ཞིག་ཡིན་པ་དང་། བརྡ་ཁྱབ་དེ་དྲིལ་བསྒྲགས་བྱས་ཉིན་ནས་དངོས་སུ་ལག་ལེན་བསྟར་དགོས་པའི་ལྐུལ་འདེད་བཏང་འདུག བོད་རང་སྐྱོང་ལྗོངས་སྲིད་གཞུང་གིས། རྒྱ་ནག་ནང་ཁུལ་གྱི་ཁྲིམས་སྒྲིག་ཁག་གཞིར་བཟུང་གིས་རང་སྐྱོང་ལྗོངས་ནང་ལོགས་ཀྱི་དངོས་ཡོད་གནས་སྟངས་དང་སྦྲེལ་ནས་ལག་བསྟར་བྱ་རྒྱུ་ཡིན་ལུགས་བཤད་ཅིང་། ཁྲིམས་སྒྲིག་དེ་དག་གི་ནང་དུ། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་དང་། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ཉེས་ཁྲིམས། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་འཇིགས་སྐུལ་རིང་ལུགས་ལ་ངོ་རྒོལ་གྱི་བཅའ་ཁྲིམས། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ཉེས་དོན་གཏུག་བཤེར་བཅའ་ཁྲིམས། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་དྲ་རྒྱའི་བདེ་འཇགས་བཅའ་ཁྲིམས། རྒྱལ་ཡོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་མཉམ་འབྲེལ་དྲ་རྒྱའི་བདེ་འཇགས་སྐོར་གྱི་གཏན་འདེབས་ཟེར་བ་སོགས་ཚུད་འདུག བརྡ་ཁྱབ་དེ་ལ་བརྟེན་ནས་རྒྱ་གཞུང་གིས། མང་ཚོགས་ནས་གནས་ཚུལ་འཚོལ་བསྡུ་དང་སྒྲིག་བཟོ། ཕབ་ལེན། གསོག་ཉར། ཁྱབ་སྤེལ། བརྒྱུད་སྐུར་བྱེད་པ་སོགས་གཏན་འགོག་དང་། ཡང་ཏང་སྲིད་གཞུང་དང་། སྤྱི་ཚོགས་རིང་ལུགས་ལམ་ལུགས། མི་རིགས་ས་ཁོངས་རང་སྐྱོང་ལམ་ལུགས། ཏང་དང་སྲིད་གཞུང་གི་བོད་སྐྱོང་སྲིད་ཇུས་ཟེར་བ་བཅས་ལ་སྐྱོན་བརྗོད་དང་འབྲེལ་བའི་གནས་ཚུལ་རིགས་མང་ཚོགས་ནང་དྲིལ་བསྒྲགས་བྱེད་ཀྱི་ཡོད་པ་རེད། བརྡ་ཁྱབ་དེ་ལ་བརྟེན་ནས་རྒྱ་གཞུང་གིས་ད་དུང་ཏང་དང་རྒྱལ་ཁབ། དམག་དཔུང་བཅས་ཀྱི་ལོ་རྒྱུས་འཁྱོག་བཤད་དང་། རྒྱལ་ཁབ་ཀྱི་ཁེ་ཕན་ལ་གནོད་འཚེ་ཚབས་ཆེན་བཟོ་བ། ཁྱབ་ཆེའི་ཆ་འཕྲིན་ལ་ལྟ་ཞིབ་དང་ཆ་འཕྲིན་རྫུན་སྒྲིག་རིགས་ཚང་མ་གཏན་འགོག་བྱ་རྒྱུ་ཡིན་རབས་བཤད་འདུག དེར་མ་ཟད། བརྡ་ཁྱབ་དེའི་ནང་དུ། རྒྱལ་ཁབ་ཀྱི་སྲིད་དབང་མགོ་རྟིང་སློག་པ་དང་སྤྱི་ཚོགས་ཀྱི་ལམ་ལུགས་རྩ་སློག་གཏོང་བ། རྒྱལ་ཁབ་ཁ་བྲལ་སོགས་ཀྱི་ཆ་འཕྲིན་རིགས་ཚང་མ་ཁྲིམས་འགལ་ནག་ཉེས་ཀྱི་ངོ་བོར་བསྒྱུར་ཡོད་པ་རེད། རྒྱ་གཞུང་གི་བརྡ་ཁྱབ་ལྟར་ན། དྲ་རྒྱའི་འཕྲིན་གཏོང་ཡོ་བྱད་གྲས་སུ། གློག་ཀླད་དང་། ལག་ཐོག་ཁ་པར། དུས་ཐོག་འཕྲིན་གཏོང་། གཟུགས་མཐོང་ཁ་པར། གྱོན་འདོགས་རྣམ་པའི་དྲ་རྒྱའི་སྒྲིག་ཆས་༼ལག་འདོགས་ཆུ་ཚོད་སོགས།༽སོགས་ཚུད་ཡོད་ཀྱང་དེ་དག་གིས་མི་ཚད་པ་དང་། དྲ་རྒྱའི་འཕྲིན་གཏོང་ཁྱབ་ཁོངས་སུ་ཡི་གེ་དང་། པར་རིས། སྒྲ་གློག་བརྙན་གསུམ། མཚོན་རིས། སྒེར་གྱི་ཆ་འཕྲིན། ཟུར་ཟའི་རི་མོ་སོགས་ཚུད་ཡོད་ཀྱང་དེ་དག་གིས་ཚད་ཀྱི་མེད་པ་རེད། དྲ་ཐོག་ཏུ་དངུལ་གཏོང་ལེན་དང་། …

Read More »

བོད་སྐད་ཡིག་སློབ་གསོའི་ཐོབ་ཐང་དོན་གཉེར་བས་དྲང་བདེན་མིན་པའི་ཁྲིམས་ཆད་ལ་གོང་གཏུག་ཞུ་བར་མུ་མཐུད་འགོག་རྐྱེན་བཟོས་འདུག

བོད་སྐད་ཡིག་སློབ་གསོའི་ཐོབ་ཐང་དོན་གཉེར་བ་བཀྲ་ཤིས་དབང་ཕྱུག་གི་ཁྲིམས་པ་གཉིས་མཚོ་སྔོན་ཞིང་ཆེན་ཏོང་ཁྲུན་བཙོན་ཁང་དུ་ཕྱིན་ནས་བཀྲ་ཤིས་དབང་ཕྱུག་ལ་ཐུག་འཕྲད་ཀྱི་ཆོག་མཆན་ཞུས་ཀྱང་། རྒྱ་གཞུང་གི་དབང་འཛིན་དཔོན་རིགས་ཚོས་ཁྲིམས་རྩོད་པ་གཉིས་ཁོང་ལ་ཐུག་འཕྲད་བྱེད་དུ་བཅུག་མེད་པ་རེད། ཕྱི་ལོ་༢༠༡༨ ཟླ་༥ ནང་བཀྲ་ཤིས་དབང་ཕྱུག་ལ་རྒྱལ་ཁབ་ཁ་བྲལ་གྱི་ནག་ཉེས་བཙན་འགལ་བྱས་ཏེ་མི་ལོ་༥ ཡི་དུས་བཀག་བཙོན་འཇུག་གི་ཁྲིམས་ཐག་བཅད་པ་རེད། རྒྱུ་མཚན་ནི། ཁོང་གིས་རྒྱ་ནག་དམར་ཤོག་སྲིད་གཞུང་གི་དབང་སྒྱུར་སྲིད་ཇུས་ལ་སྐྱོན་བརྗོད་དང་བོད་སྐད་ཡིག་སློབ་གསོའི་ཐོབ་ཐང་སྲུང་སྐྱོབ་གནང་བས་རེད། ཁོང་གིས་རྒྱ་གཞུང་གི་ནག་མེད་ཉེས་འཛུགས་ཀྱི་བཅད་ཁྲ་དང་ལེན་མ་བྱས་པར་མུ་མཐུད་དུ་གོང་གཏུག་གནང་མུས་ཡིན་པ་རེད། ཁ་སང་ཕྱི་ཚེས་༡ ཉིན་བཀྲ་ཤིས་དབང་ཕྱུག་གི་ཁྲིམས་རྩོད་པ་ལིན་ཆི་ལི་དང་ལིང་ཞོ་ཅིན་གཉིས་ཏོང་ཁྲུན་བཙོན་ཁང་དུ་ཕྱིན་ནས་བཀྲ་ཤིས་དབང་ཕྱུག་ལ་ཐུག་འཕྲད་ཀྱི་ཆོག་མཆན་ཞུས་སྐབས། ཁོང་གཉིས་ལ་པེ་ཅིན་ཁྲིམས་འཛིན་ལས་ཁུངས་ཀྱི་ངོ་སྤྲོད་ཡི་གེ་༼བཀའ་ཡིག༽དགོས་ལུགས་བཤད་འདུག ཏོང་ཁྲུན་བཙོན་ཁང་གི་དབང་འཛིན་དཔོན་རིགས་ཚོས་ཁྲིམས་རྩོད་པ་གཉིས་ལ་ཡིག་ཆ་དེ་དག་གི་དགོས་མཁོ་བཏོན་པ་ནི་ཁྲིམས་འགལ་རེད་ལ། དེ་ནི་བཀྲ་ཤིས་དབང་ཕྱུག་གི་གོང་གཏུག་ལ་འགོག་རྐྱེན་ཐབས་ཤིག་ཀྱང་ཡིན་པ་རེད། དེ་རིང་ཁྲིམས་རྩོད་པས་ཁོང་གི་ཊི་ཝེ་ཊི་སྟེང་གནས་ཚུལ་སྤེལ་བའི་ནང་དུ། “ཁ་སང་ཞོགས་པར་ལིན་ཆི་ལི་དང་ངེད་གཉིས་མཚོ་སྔོན་ཞིང་ཆེན་ཏོང་ཁྲུན་བཙོན་ཁང་དུ་སོང་ནས་བཀྲ་ཤིས་དབང་ཕྱུག་ལ་ཐུག་པའི་ཆོག་མཆན་ཞུས་ཡིན། འགན་ཡོད་མི་སྣས་ངེད་གཉིས་ཀྱི་ཞུ་ཡིག་བཙོན་ཁང་གི་མཐོ་རིམ་དབང་འཛིན་དཔོན་རིགས་ཀྱི་སར་ཁྱེར་ནས་དུས་ཡུན་ཆུ་ཚོད་གཅིག་གི་རྗེས་སུ་ཕྱིར་ཡོང་སྟེ། ངེད་གཉིས་ལ་པེ་ཅིན་ཁྲིམས་འཛིན་ལས་ཁུངས་ཀྱི་ངོ་སྤྲོད་ཡི་གེ་༼བཀའ་ཡིག༽སྟོན་དགོས་ཟེར། ངེད་གཉིས་ཀྱིས་དེ་ནི་ཁྲིམས་འགལ་རེད་ཅེས་བཤད་པ་ཡིན། དེའི་རྗེས་ནས་ངེད་གཉིས་མཚོ་སྔོན་ཞིང་ཆེན་བཙོན་ཁང་དོ་དམ་ལས་ཁུངས་ལ་སོང་ནས་ཞུས་ཡིན། དེ་གར་བཙོན་ཁང་དོ་དམ་ཁང་གི་འགན་འཛིན་གཞོན་པས་ངེད་གཉིས་ལ་འདོད་བློ་མེད་པའི་རྣམ་འགྱུར་བསྟན་ནས། གནད་དོན་དེ་ལ་ཞིབ་འཇུག་མང་པོ་བྱེད་དགོས། རྒྱུ་མཚན་དེ་ནི་ཚོར་བ་སྐྱེན་པའི་གནད་དོན་ཡིན་པ་དང་དམིགས་བསལ་ལྟ་ཞིབ་དབྱེད་དགོས། བཀྲ་ཤིས་དབང་ཕྱུག་གིས་བཅད་ཁྲ་དང་ལེན་མ་བྱས་པར་མུ་མཐུད་དུ་དོ་དམ་ཁྲིམས་སྲོལ་ལ་རྒྱབ་འགལ་བྱེད་ཀྱི་ཡོད་ཟེར།” ཞེས་འཁོད་འདུག ཁྲིམས་རྩོད་པ་ལིང་གི་གནས་ཚུལ་འདི་ལས་ང་ཚོས། རྒྱ་གཞུང་གིས་བཀྲ་ཤིས་དབང་ཕྱུག་ལ་དྲང་བདེན་མ་ཡིན་པའི་ཁྲིམས་ཐག་ཆད་པ་དེ་ལ་ཁྲིམས་རྩོད་པས་མུ་མཐུད་དུ་གདོང་ལེན་གནང་ནས་གོང་གཏུག་བྱེད་བཞིན་ཡོད་པར་མ་ཟད། རྒྱ་གཞུང་གིས་བོད་སྐད་ཡིག་སློབ་གསོའི་ཐོབ་ཐང་དོན་གཉེར་བའི་འགྲོ་བ་མིའི་ཐོབ་ཐང་ཁག་རྩིས་མེད་རྡོག་རོལ་གཏོང་བཞིན་པ་གསལ་བོར་རྟོགས་ཐུབ། དེར་མ་ཟད། ཁོང་གིས་གཞུང་ཕྱོགས་ཀྱི་འགོག་རྐྱེན་ལ་མ་བལྟས་པར་སེམས་ཐག་གཙང་བཅད་ཀྱིས་མུ་མཐུད་ཞུ་གཏུག་གི་རྒྱུན་སྐྱོང་བཞིན་པ་བསྟན་ཡོད། འདི་ནི་འདས་པའི་ཟླ་བ་དྲུག་གི་རྗེས་སུ་བཀྲ་ཤིས་དབང་ཕྱུག་གི་ཁྲིམས་རྩོད་པས་ཡང་བསྐྱར་བཀྲ་ཤིས་དབང་ཕྱུག་ལ་ཐུག་འཕྲད་ཀྱི་ཆོག་མཆན་སྤྲོད་པར་འབད་བརྩོན་གནང་ཡང་། རྒྱ་གཞུང་གིས་སྔར་བཞིན་འགོག་རྐྱེན་བཟོས་ཡོད་པ་རེད། འདི་ལོའི་ཕྱི་ཟླ་༥ ཚེས་༡༥ ཉིན་ཁྲིམས་རྩོད་པ་ལིན་ཆི་ལི་བཀྲ་ཤིས་དབང་ཕྱུག་ལ་ཐུག་འཕྲད་དུ་བསྐྱོད་ཀྱང་བཙོན་ཁང་གི་དབང་འཛིན་དཔོན་རིགས་ཚོས་ད་ལན་ནང་བཞིན་བཀག་འགོག་གི་རྒྱུ་མཚན་གསལ་བཤད་མ་བྱས་པར་ཁོང་ཕྱིར་སློབ་བཏང་ཡོད། འདི་ག་ལྟེ་གནས་ཁང་གི་ངོས་ནས། རྒྱ་གཞུང་གི་དབང་འཛིན་དཔོན་རིགས་ཚོས་བཀྲ་ཤིས་དབང་ཕྱུག་གི་ཁྲིམས་རྩོད་པ་ཁོང་ལ་ཐུག་པར་འགོག་རྐྱེན་བཟོ་བཞིན་པ་མྱུར་དུ་མཚམས་བཞག་ནས་དྲང་བདེན་གྱིས་ཉེས་དོན་ཐག་གཅོད་བྱེད་དུ་འཇུག་དགོས། རྒྱལ་སྤྱིའི་གཞུང་དང་འགྲོ་བ་མིའི་ཐོབ་ཐང་ཚོགས་སྡེ་ཁག མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་རྟོགས་ཞིབ་པ་མང་པོས། རྒྱ་གཞུང་གིས་བཀྲ་ཤིས་དབང་ཕྱུག་ལ་དྲང་བདེན་མིན་པའི་ཁྲིམས་ཐག་གཅད་པ་དང་། རྒྱལ་ཁབ་ཀྱི་ཉེས་དོན་ཁྲིམས་སྒྲིག་དེ་ཆབ་སྲིད་ཀྱི་ངོ་བོར་སྒྱུར་བཞིན་པར་སྐྱོན་བརྗོད་ཤུགས་ཆེན་གནང་མུས་ཡིན། རྒྱ་གཞུང་གིས་ངེས་པར་དུ་ནར་འགྱང་མི་གཏོང་བར་བཀྲ་ཤིས་དབང་ཕྱུག་གི་གོང་གཏུག་ལ་བརྩི་འཇོག་གིས། ཁོང་ཁྲིམས་རྩོད་པར་ཐུག་འཕྲད་ཀྱི་ཐོབ་ཐང་ལོངས་སུ་སྤྱོད་དུ་འཇུག་དགོས་པའི་འབོད་སྐུལ་ཞུ་བཞིན་ཡོད།

Read More »

རྒྱ་གཞུང་གིས་གར་སོང་ཆ་མེད་བཟོས་པའི་པཎ་ཆེན་ཆུང་སྲིད་རིན་པོ་ཆེ་གློད་གྲོལ་གཏོང་དགོས་པའི་འབོད་སྐུལ་སྣང་མེད་བཏང་སྟེ་རྒྱ་ནག་གི་པཎ་ཆེན་རྒྱལ་མཚན་ནོར་བུ་བོད་ལྗོངས་ནང་བསྟན་མཐུན་ཚོགས་ཀྱི་ཚོགས་གཙོར་བསྐོས་འདུག

༸གོང་ས་སྐྱབས་མགོན་ཆེན་པོ་མཆོག་གིས་ངོས་འཛིན་ཐུགས་ཐག་བཅད་བའི་༸ཀུན་གཟིགས་པཎ་ཆེན་ཆུང་སྲིད་རིན་པོ་ཆེ་རྩིས་མེད་བཙོན་འཇུག་བྱས་ཏེ། རྒྱ་ནག་དམར་ཤོག་སྲིད་གཞུང་གི་པཎ་ཆེན་རྒྱལ་མཚན་ནོར་བུ་ཀྲུང་གོ་ནང་བསྟན་མཐུན་ཚོགས་ཀྱི་ཡན་ལག་བོད་རང་སྐྱོང་ལྗོངས་ནང་བསྟན་མཐུན་ཚོགས་ཀྱི་ཚོགས་གཙོར་བསྐོས་ཡོད་པ་རེད། འདི་ལོའི་ཕྱི་ཟླ་༦ ཚེས་༢༢ ཉིན་བོད་རང་སྐྱོང་ལྗོངས་དམར་ཤོག་ཚོགས་པའི་དྲུང་ཆེ་ཝུ་ཡང་ཅེ་(Wu Yingjie)གསར་དུ་བསྐོ་བཞག་བྱས་པའི་ཚོགས་མི་ཚོར་ཐུག་འཕྲད་བྱས་ཡོད་པ་དང་། བོད་ལྗོངས་ནང་བསྟན་མཐུན་ཚོགས་ནི་ཀྲུང་གོ་ནང་བསྟན་མཐུན་ཚོགས་ཀྱི་སྟངས་འཛིན་འོག་ཏུ་ཡོད་པའི་ཡན་ལག་མཐུན་ཚོགས་ཡིན་པ་རེད། ཚོགས་མི་གསར་བར་གཏམ་བཤད་སྐབས་སུ། ཝུ་ཡང་ཅེས། རྒྱ་གཞུང་གི་ཆོས་ལུགས་སྲིད་ཇུས་ཀྱི་གལ་གནད་ཁག་གསལ་འདོན་བྱས་ཏེ། “ཏང་གི་རྗེས་སུ་འབྲང་བ་དང་། རྒྱལ་གཅེས་རིང་ལུགས་ཀྱི་བརྩེ་སེམས་ཟབ་ཏུ་གཏོང་བ། དར་ཆ་གསལ་སྟོན་ངང་ཁ་བྲལ་ལ་ངོ་རྒོལ་བྱེད་དགོས་པ་དང་མངའ་ཁོངས་ཕྱི་རོལ་གྱིས་ཆོས་ལུགས་བེད་སྤྱད་དེ་སིམ་འཛུལ་བྱ་བར་འགོག་རྒོལ་མཐའ་གཅིག་ཏུ་བྱེད་དགོས་པ། ཆོས་ལུགས་སྤྱི་ཚོགས་རིང་ལུགས་ཀྱི་སྤྱི་ཚོགས་དང་འཚམ་མཐུན་ཡོང་བར་ཁྲིད་སྟོན་ཧུར་ཐག་བྱེད་དགོས”ལུགས་བཤད་འདུག ལྷ་མེད་སྨྲ་བ་དམར་ཤོག་སྲིད་གཞུང་གིས་དུས་ཡུན་རིང་བོར་ཆོས་ལུགས་ལ་གཞི་རྒྱ་ཆེ་བའི་སྟངས་འཛིན་དང་དོ་དམ་ཤུགས་ཆེན་བྱས་པ་དང་། ཆོས་ལུགས་རང་དབང་གི་སྲོལ་ཡིག་ནང་དུ་ཡང་ཆ་རྐྱེན་མང་པོ་བཏོན་ཡོད། རྒྱ་གཞུང་གི་མགོ་རྙོག་དྲན་འཁྲུལ་གྱི་ཆོས་ལུགས་ལས་དོན་སྲོལ་ཡིག་དང་དེའི་ནང་འཁོད་ཀྱི་ཆ་རྐྱེན་དེ་དག་གི་ཐོག་ནས། ཆོས་ལུགས་ལ་ལོག་འགྲེལ་བྱ་ཐབས་དང་ཆབ་སྲིད་ཀྱི་དགོས་དམིགས་སྒྲུབ་ཐབས། ཆོས་ལུགས་བྱེད་སྒོའི་རིགས་ཚང་མ་དོགས་གཞི་དང་ཁྲིམས་འགལ་གྱི་ངོ་བོར་བསྒྱུར་ཐབས་ཀྱི་སྲིད་ཇུས་གཏན་འབེབས་བྱས་ཡོད་པ་རེད། རྒྱ་ནག་དབུས་གཞུང་གི་ཆོས་ལུགས་ལས་དོན་ཁང་དང་ནང་བསྟན་མཐུན་ཚོགས་སོགས། ཚོགས་པ་སྒྲིག་འཛུགས་གང་དང་གང་ཡིན་ཡང་། དེ་དག་ནི་དམར་ཤོག་སྲིད་གཞུང་གི་ཆོས་ལུགས་སྲིད་ཇུས་དང་བསྟུན་ནས་ཆོས་ལུགས་འཆད་འཁྲིད་དང་ཆོས་ལུགས་ལ་ལོག་འགྲེལ་བྱེད་མཁན་རྒྱ་ནག་དབུས་སྲིད་གཞུང་གི་ལས་ཁུངས་འབའ་ཞིག་ཡིན་པ་རེད། ཀྲུང་གོ་ནང་བསྟན་མཐུན་ཚོགས་ཀྱིས་བོད་ནང་དུ་ནང་བསྟན་སློབ་གླིང་དང་སློབ་ཆེན་མང་པོ་གསར་འཛུགས་བྱས་ཏེ་གྲྭ་བཙུན་དང་བླ་སྤྲུལ་ཚོར་རྒྱལ་གཅེས་སློབ་གསོ་སྤྲོད་བཞིན་ཡོད་པ་རེད། ཀྲུང་གོ་ནང་བསྟན་མཐུན་ཚོགས་ནི་དབུས་འཐབ་ཕྱོགས་གཅིག་གྱུར་ཁང་གི་སྟངས་འཛིན་འོག་གི་རྒྱལ་གཅེས་སློབ་གསོ་སྤེལ་མཁན་གྱི་སྒྲིག་འཛུགས་ཤིག་ཡིན་པ་དང་། ཕྱི་ལོ་༡༩༥༣ ལོར་རྒྱ་ནག་གི་རྒྱལ་ས་པེ་ཅིན་དུ་བཙུགས་པ་རེད། མཐུན་ཚོགས་དེའི་ཚོགས་མི་ཚང་མ་ཆོས་ལུགས་ཀྱི་གནད་ཡོད་མི་སྣ་དང་ནང་བསྟན་གྱི་ཆེད་མཁས་པ་ཤ་སྟག་རེད། ཁོ་ཚོའི་ལས་འགན་གཙོ་བོ་ནི་གཞི་རིམ་གྱི་ཆོས་ལུགས་སྡེ་ཁག་ཏུ་དམར་ཤོག་ཚོགས་པའི་སྲིད་ཇུས་སྒྲོག་འགྲེལ་བྱ་རྒྱུ་དང་། ཆོས་ལུགས་དང་འབྲེལ་བའི་མང་ཚོགས་ཀྱི་བསམ་བློ་འཁྱེར་ཕྱོགས་ཀྱི་གནས་ཚུལ་ཁག་རྒྱ་ནག་དབུས་སྲིད་གཞུང་ལ་སྙན་སེང་ཞུ་རྒྱུ་དེ་རེད། ཕྱི་ལོ་༡༩༥༧ ལོར་ཀྲུང་གོ་ནང་བསྟན་མཐུན་ཚོགས་ཀྱིས་རྒྱ་ནག་ས་གནས་སྲིད་གཞུང་རིམ་པར་ཡན་ལག་ཁག་བཙུགས་པ་དང་། ཀྲུང་གོ་ནང་བསྟན་མཐུན་ཚོགས་དང་ཆོས་ལུགས་ལས་དོན་ཁང་གཉིས་ཀྱི་ཚོགས་མི་ཚང་མ་ཆོས་ལུགས་དང་སྲིད་དབང་སྒེར་གཅོད་མི་སྣ་ཁ་ཅིག་ཡིན་པ་དང་། ཁོ་ཚོས་རྩ་འཛུགས་མང་པོ་གསར་འཛུགས་བྱས་ཏེ་དམར་ཤོག་ཚོགས་པའི་ཆོས་ལུགས་སྲིད་ཇུས་ལ་མོས་མཐུན་དང་ལག་ལེན་བསྟར་གྱི་ཡོད། རྒྱ་གཞུང་གིས་བོད་མིའི་ཆོས་སྡེ་མང་པོ་རིག་གཞུང་དང་ཡུལ་སྐོར་ལྗོངས་རྒྱུའི་བསྟི་གནས་སུ་འཛུགས་སྐྲུན་བྱས་ཏེ། རིམ་གྱིས་ནང་བའི་གནས་ཆེན་ཁག་ཚང་མ་ཚོང་སྒྱུར་བྱས་ཡོད། རྒྱལ་མཚན་ནོར་བུ་ཀྲུང་གོ་ནང་བསྟན་མཐུན་ཚོགས་ཀྱི་ཡན་ལག་བོད་རང་སྐྱོང་ལྗོངས་ནང་བསྟན་མཐུན་ཚོགས་ཀྱི་ཚོགས་གཙོར་བསྐོ་བཞག་བྱས་པ་དེ་ནི། རྒྱ་ནག་དབུས་འཐབ་ཕྱོགས་གཅིག་གྱུར་གྱི་བཀོད་ཇུས་འོག་ཏུ་གཞི་རིམ་གྱི་རྒྱ་ནག་ས་གནས་སྲིད་གཞུང་རིམ་པའི་ཆོས་ལུགས་ལས་དོན་ལ་སྟངས་འཛིན་ཤུགས་ཆེར་གཏོང་ཐབས་ཤིག་ཡིན་པ་དང་། དམར་ཤོག་ཚོགས་པས་སླར་ཡང་གོང་རིམ་ནས་གཞི་རིམ་བར་དུ་སྲིད་དབང་གཅིག་སྡུད་དང་སྒེར་གཅོད་བྱ་ཐབས་སུ། ན་ནིང་ནས་བཟུང་རྒྱ་གཞུང་གིས་འཐབ་ཕྱོགས་གཅིག་གྱུར་ཁང་ནས་ཆོས་དད་མང་ཚོགས་དང་དམར་ཤོག་ཚོགས་པའི་དབར་གྱི་འབྲེལ་ལམ་ལ་དོ་དམ་བྱ་བའི་དབང་ཆ་ཆེན་པོ་སྤྲད་ཡོད ། ཕྱི་ལོ་༡༩༤༠ གནས་སྟངས་ནང་བཞིན། ད་ལྟ་དབུས་འཐབ་ཕྱོགས་གཅིག་གྱུར་ཁང་གིས་མི་རིགས་ཆོས་ལུགས་ལས་དོན་ཁང་ལ་སྟངས་འཛིན་བྱས་ཡོད་པ་རེད། ཞིབ་འཇུག་ལྟེ་གནས་ཀྱི་ཞིབ་འཇུག་ཚོད་རྩིས་ལྟར་ན་རྒྱ་ནག་ནང་དུ་ནང་པ་ས་ཡ་༢༤༥ ཙམ་ཟིན་པའི་གྲས་སུ། སྤྱི་དམངས་ཀྱི་གྲངས་འབོར་བརྒྱ་ཆ་༡༨ དང་། རྒྱ་རིགས་ཆོས་དད་མང་གིས་བརྒྱ་ཆ་༢༡ ཟིན་པ་དང་། དེ་དག་ཚང་མ་ནང་པའི་དད་ལྡན་མང་ཚོགས་ནང་མཉམ་བསྲེས་བྱས་ཡོད་པ་གསལ་འདུག …

Read More »

རྒྱ་གཞུང་གིས་ནག་སེལ་ངན་འཇོམས་ཟེར་བའི་ཆབ་སྲིད་ལས་འགུལ་མཚམས་བཞག་ནས་ཉེས་མེད་བཀག་བསྐྱིལ་བྱས་པའི་བོད་མི་ཚང་མ་གློད་གྲོལ་གཏོང་དགོས།

རྒྱ་ནག་དམར་ཤོག་སྲིད་གཞུང་གིས་བོད་ས་ཡོངས་སུ་ནག་སེལ་གཤེད་བཅོམ་གྱི་ཆེད་དོན་འཐབ་རྩོད་སྤེལ་བཞིན་པའི་ཁྲོད་དུ་མཚོ་སྔོན་ཞིང་ཆེན་ཡུལ་ཤུལ་ཁུལ་ནང་ཆེན་རྫོང་ཤོར་མདའ་གྲོང་རྡལ་ནས་ཡིན་པའི་བོད་མི་༢༡ ལ་ཁྲིམས་ཐག་བཅད་ཡོད་པ་དང་། དེའི་གྲས་ཀྱི་མི་གཉིས་ནི་གྲོང་སྡེ་རིམ་པའི་འགོ་ཁྲིད་ཟུར་བ་ཡིན་འདུག འདི་ལོའི་ཕྱི་ཟླ་༥ ནང་། ནང་ཆེན་རྫོང་མི་དམངས་ཁྲིམས་ཁང་ནས་ཁྲིམས་ཐག་བཅད་པའི་བོད་མི་དེ་ཚོ་ཚོགས་ཁག་གཉིས་ནས་ཡིན་པ་དང་། ཚོགས་པ་དང་པོར་ཤོར་མདའ་གྲོང་རྡལ་རྡོ་ཁྲང་སྡེ་བ་ནས་ཡིན་པའི་བོད་མི་༡༡ ཡོད་པ་དང་། ཁོ་ཚོར་མི་ལོ་༢ ནས་༦ བར་གྱི་དུས་བཙོན་དང་རྒྱ་སྒོར་༥༠༠༠༠ ནས་༡༠༠༠༠ བར་གྱི་དངུལ་ཆད་བཅད་འདུག རྒྱ་ནག་ས་གནས་སྲིད་གཞུང་གིས་ཉེས་འཛུགས་བྱས་པའི་བོད་མི་དེ་དག་གི་མིང་ཡིག་ཆ་ཚང་མ་བྲིས་པར། མིང་གི་ཡིག་འབྲུ་དང་པོ་དེ། དཔེར་ན་འཛོམས་ཆེ་གེ་མོ་ཞེས་གསལ་ཁ་མེད་པར་བྲིས་འདུག དུས་བཀག་བཙོན་འཇུག་བྱས་པའི་བོད་མི་༡༡ གི་གྲས་སུ་རྡོ་ཁྲང་སྡེ་བའི་སྡེ་དམངས་ཨུ་ལྷན་གྱི་འགོ་གཙོ་ཟུར་བ་དབང་ཆེ་གེ་མོ་ཞུ་བའང་འདུག རྒྱ་གཞུང་གིས་བོད་མི་དེ་ཚོར“ནག་ཚོགས་རྩ་འཛུགས་བྱས་པ་དང་། སྡེ་མིའི་ལས་དོན་ལ་ཁ་ལོ་བསྒྱུར་ནས་གཞི་རིམ་གྱི་སྤྱི་ཚོགས་དོ་དམ་གྱི་སྒྲིག་ལམ་ལ་གཏོར་བརླག་བཏང་བ། བྱེ་མ་སྔོག་འདོན་དང་ས་ཞིང་ལྐོག་འཚོང་བརྒྱབ་ལུགས་དང་། ཚོགས་པ་དེས་ད་དུང་རྒྱལ་ཁབ་ཀྱི་སྲིད་ཇུས་ལ་འགོག་རྒོལ་བྱས་པ་དང་། རྒྱལ་ཁབ་ཀྱི་རྩྭ་ཐང་སྣོད་བཅུད་བྱ་དགའི་ཁ་གསབ་དངུལ་མ་བླངས་པར་མ་ཟད། སྡེ་མི་ཚོས་ལེན་པར་བཀག་འགོག་བྱས་པས། སྡེ་དམངས་ཨུ་ལྷན་དང་ཏང་ཨུ་སྲིད་གཞུང་བཅས་ཀྱི་ལས་ཀའི་སྒྲིག་ལམ་ལ་ཤུགས་རྐྱེན་ངན་པ་བཟོས”རབས་ཀྱི་ཉེས་འཛུགས་འོག་ཏུ་ཁྲིམས་ཐག་བཅད་འདུག ཚོགས་པ་གཞན་པ་དེར་འཛོམས་ཆེ་གེ་མོ་ཟེར་བ་ཚུད་པའི་བོད་མི་༡༠ ཡོད་པ་དང་། འཛོམས་ཆེ་གེ་མོ་ནི་རྡོ་ཁྲང་སྡེ་བའི་རུ་ཁག་༥ བའི་རུ་དཔོན་ཟུར་བ་ཞིག་ཡིན་ཞིང་། ཁོ་ཚོར་མི་ལོ་༣ དང་ཕྱེད་ཀ་ནས་མི་ལོ་༦ བར་གྱི་དུས་བཙོན་དང་རྒྱ་སྒོར་༣༥༠༠༠༠ ནས་༢༠༠༠༠༠ བར་གྱི་དངུལ་ཆད་བཅད་འདུག འཛོམས་ཆེ་གེ་མོ་དང་ཁོའི་ཚོགས་མི་དེ་ཚོར། སྡེ་བའི་ས་ཞིང་བཤུག་སྤྲོད་དང་ཉོ་འཚོང་བྱས་རབས་ཀྱི་ཉེས་འཛུགས་འོག་ཏུ་དུས་བཙོན་བྱས་ཡོད་པ་དང་། དེ་ཡང་རྒྱ་ནག་ས་གནས་སྲིད་གཞུང་གིས། འཛོམས་ཆེ་གེ་མོ་གཙོས་སྡེ་མི་དེ་ཚོས་ཁོར་ཡུག་སྲུང་སྐྱོང་གི་མིང་ཐོག་ནས་ནག་ཚོགས་རྩ་འཛུགས་བྱས་ལུགས་བཤད་འདུག རྒྱ་ནག་ས་གནས་སྲིད་གཞུང་གིས། “འཛིམས་ཆེ་གེ་མོས་ལོ་མང་རིང་ཁོར་ཡུག་སྲུང་སྐྱོང་ཚོགས་པའི་འགན་ཁུར་ཡོད་ནའང་། ཁོས་ཁོར་ཡུག་དོ་དམ་དང་སྲུང་སྐྱོང་། དམངས་ཁྲོད་རྩོད་གཞི་འདུམ་འགྲིག་མ་བྱས་པར། ཁོ་རང་ནག་ཚོགས་ནང་ཧུར་ཐག་གིས་ཞུགས་ནས་ས་ཞིང་བཤུག་སྤྲོད་དང་། བཙན་ཤེད་ཀྱིས་ས་ཞིང་ཉོ་འཚོང་། སྡེ་མིས་རྒྱལ་ཁབ་རྩྭ་ཐང་སྣོད་བཅུད་ཀྱི་ཁ་གསབ་དངུལ་ལེན་རྒྱུར་བཀག་འགོག་བྱས་པ་དེས། སྤྱི་ཚོགས་ལ་ཤུགས་རྐྱེན་ངན་པ་ཐེབས་པ་དང་། ཏང་ཨུ་སྲིད་གཞུང་གི་བཀོད་ཇུས་ལ་གཏོར་བརླག་ཚབས་ཆེན་བཟོས”ཟེར་བ་དང་། ཡང“ཕྱི་ལོ་༢༠༡༣ ནས་༢༠༡༨ བར་དུ་ཚོགས་པ་དེས་སྔ་རྗེས་ཐེངས་༥ …

Read More »

རྒྱ་གཞུང་གི་དབུལ་ཐར་མཁྲེགས་གཏོར་སྲིད་ཇུས་དེས་བོད་མིའི་འབྲོག་ལས་ཉམས་རྒུད་དུ་གཏོང་བཞིན་འདུག

ཟླ་སྔོན་མར་རྒྱ་གཞུང་གིས་མཚོ་སྔོན་ཞིང་ཆེན་མཚོ་ལྷོ་ཁུལ་འབའ་རྫོང་ནང་ཆ་སྒྲིག་རོགས་སྐྱོར་ལས་གཞི་ཇེ་མགྱོགས་སུ་གཏོང་དགོས་རབས་བསྒྲགས་པ་དང་། ལས་གཞི་དེའི་ཆ་ཤས་ཤིག་དབུལ་ཐར་གཏོང་བའི་དམིགས་ཡུལ་ཡིན་ལུགས་བཤད་ཀྱང་། ལས་གཞི་དེ་ཐོག་མར་བོད་ས་ཡོངས་སུ་ལག་ལེན་བསྟར་བ་དང་མཉམ་དུ་རྒྱ་ནག་ས་གནས་སྲིད་གཞུང་གི་ལས་བྱེད་དང་ཏང་ཡོན་འབོར་ཆེན་གྲོང་ཁུལ་དང་འབྲོག་ཁུལ་དུ་ཆེད་གཏོང་བྱས་ཏེ་ས་གནས་མང་ཚོགས་ཀྱི་གནས་སྟངས་ལ་མྱུལ་ཞིབ་རྒྱུས་ལོན་དང་། ལྷག་པར་དུ་ཆབ་སྲིད་དང་འབྲེལ་བའི་དཀའ་རྙོག་རིགས་ལ་དམ་དྲག་བྱེད་བཞིན་ཡོད་པ་རེད། དོན་དངོས་སུ་དམིགས་ཡུལ་དང་ལྡན་པའི་ལས་གཞི་དེ་ནི། དབུལ་ཐར་མཁྲེགས་གཏོར་གྱི་མིང་བྱང་འོག་ཏུ་ས་གནས་བོད་མིའི་བསམ་སྤྱོད་ལ་མྱུལ་ཞིབ་དང་དམ་དྲག་བྱ་ཐབས་ཤིག་ཡིན་པ་དང་། རྒྱ་གཞུང་གི་ལས་བྱེད་དང་ཏང་ཡོན་ཚོས་ཞིང་འབྲོག་ས་ཁུལ་གྱི་ཁྱིམ་ཚང་ནང་ལ་སོང་སྟེ་གཟའ་འཁོར་མང་པོར་བསྡད་ནས་མང་ཚོགས་ལ་ཆབ་སྲིད་ཀྱི་སློབ་གསོ་སྤེལ་བའི་ཞོར་དུ་ཚོར་ཤུགས་ལྡན་པའི་གནས་ཚུལ་འཚོལ་བསྡུ་བྱེད་བཞིན་འདུག དེ་ནི་ཕྱི་ལོ་༢༠༡༢ ལོ་ནས་སྐྱེ་ཁམས་ཁོར་ཡུག་སྲུང་སྐྱོང་དང་དབུལ་ཐར་མཁྲེགས་གཏོར་གྱི་ལས་གཞི་ཁག་དང་མཉམ་དུ་སྤེལ་བ་ཞིག་ཡིན་ཞིང་། ལས་གཞི་དེ་དང་མཉམ་དུ་བོད་ཁུལ་ལ་གཞི་རྒྱ་ཆེ་བའི་དོགས་ཟོན་མྱུལ་ཞིབ་དང་བོད་མིའི་བསམ་བློར་སྟངས་འཛིན་བྱ་ཐབས་ཀྱི་ཆབ་སྲིད་སློབ་གསོའི་ལས་གཞི་སྣ་ཚོགས་སྤེལ་མུས་ཡིན་འདུག བོད་ནང་དུ་ལས་གཞི་དེ་ནི་དམངས་ཕན་ཞབས་ཞུ་ཞེས་པའི་མིང་བྱང་འོག་གི་ལས་འགུལ་ཆེན་པོ་ཞིག་ཡིན་པ་དང་། ཕྱི་ལོ་༢༠༡༡ ལོའི་ལོ་མཇུག་ནས་ལས་གཞི་དེ་གཏན་འབེབས་ལག་བསྟར་བྱས་ཡོད། ཕྱི་ལོ་༢༠༡༦ ལོར་རྒྱ་ནག་རྒྱལ་ཡོངས་སུ་ཆེད་མངགས་ལས་བྱེད་༧༧༥༠༠༠ ས་གནས་རིམ་པར་བཅའ་སྡོད་བྱས་ཏེ་དུས་ཡུན་ལོ་ངོ་གསུམ་རིང་ལ་ས་ཁུལ་རིམ་པར་གཙང་བཤེར་བྱས་ཤིང་། དེའི་གྲས་ཀྱི་ལས་བྱེད་མང་པོ་ཞིག་ཏང་ཀྲུང་དབྱང་ནས་ཆེད་གཏོང་གིས། གཞི་རིམ་གྲོང་ཁུལ་དུ་དམ་དྲག་དང་དག་སྒྲིག་བྱས་ཏེ་དམར་ཤོག་ཚོགས་པའི་སྲིད་དབང་སྲ་བརྟན་བཟོས་ཡོད། ཕྱི་ལོ་༢༠༡༦ལོར་བོད་རང་སྐྱོང་ལྗོངས་ནང་གྲོང་སྡོད་ལས་དོན་རུ་ཁག་གི་ཡན་ལག་རུ་ཁག་༦ རྩ་འཛུགས་བྱས་ཏེ་ས་གནས་འབྲེལ་ཡོད་ལས་ཁུངས་དང་གྲོང་སྡེ་༥༤༦༧ ནང་ཏང་སྲིད་ཀྱི་ལས་བྱེད་པ་ཁྱོན་༢༢༠༠༠ བཅའ་སྡོད་བྱས་པ་དང་། དེའི་ནང་དུ་དགོན་སྡོད་ལས་དོན་རུ་ཁག་༡༧༠༠ ཚུད་ཡོད། ཕྱི་ལོ་༢༠༡༦ ལོར་ལས་གཞི་དེ་ཤུགས་ཆེར་ཁྱབ་ཆེར་བཏང་སྟེ། རིམ་པ་དམའ་ཤོས་ཀྱི་དོགས་ཟོན་མྱུལ་ཞིབ་ཚན་པ་ཁག་ད་ཆར་བོད་ཁུལ་དུ་བཅའ་སྡོད་བྱས་འདུག ལས་གཞི་དེའི་རྒྱ་ཆེ་ཤོས་དེ་གཞི་རིམ་མང་ཚོགས་ནང་ཆབ་སྲིད་ཀྱི་སློབ་གསོ་སྤེལ་ནས་དམར་ཤོག་ཚོགས་པའི་དབང་ཆ་དང་ཆབ་སྲིད་ཤུགས་ཆེར་གཏོང་རྒྱུ་དེ་རེད། རྒྱ་ནག་གི་སྲིད་འཛིན་ཞི་ཅིན་ཕིན་གྱིས་དབུལ་ཐར་མཁྲེགས་གཏོར་ནི་ཕྱི་ལོ་༢༠༡༧ ནས་༢༠༢༠ བར་གྱི་དམག་འཐབ་ཆེན་པོ་གསུམ་གྱི་ནང་གི་གཅིག་ཡིན་རབས་དང་། དམག་ཐབས་གཞན་གཉིས་ནི་ཉེན་ཁ་སྔོན་འགོག་དང་དུག་རླངས་ཚོད་འཛིན་བྱ་རྒྱུ་དེ་ཡིན་པར་ངོས་འཛིན་བྱས་ཤིང་། ཕྱི་ལོ་༢༠༡༩ ལོར་དམར་ཤོག་ཚོགས་པའི་སྲིད་གཞུང་རིམ་ཁག་གིས་མི་དམངས་ས་ཡ་༡༠ དབུལ་ཐར་གཏོང་བའི་འགན་སྤྲད་ཡོད་པ་རེད། ཕྱི་ལོ་༢༠༢༠ ལོའི་དམིགས་འབེན་མངོན་འགྱུར་བྱ་བར། རྒྱ་གཞུང་གིས་ཟླ་རེར་མི་དམངས་ས་ཡ་༡ ཙམ་དང་སྐར་མ་རེ་རེར་ཁྱིམ་ཚང་༢༠ དབུལ་ཐར་གཏོང་དགོས་ཆགས་ཡོད། དབུལ་ཐར་མཁྲེགས་གཏོར་ཁྲོད་དུ། ད་ལྟ་ལག་ལེན་བསྟར་བཞིན་པའི་གནས་སྤོར་ལས་གཞི་ཁག་གིས་བོད་མིའི་འགྲོ་བ་མིའི་ཐོབ་ཐང་ལ་ཚད་མི་འདྲ་བའི་བརྡལ་བཤིག་བཏང་ཡོད། རྩྭ་ཐང་གི་འབྲོག་ལས་ཁྲིམས་འགལ་གྱི་ངོ་བོར་བསྒྱུར་བ། དབུལ་ཐར་མཁྲེགས་གཏོར་སྲིད་ཇུས་ཀྱི་ཕྱོགས་གཞན་ཞིག་ནས། ས་གནས་མང་ཚོགས་ཀྱི་འཚོ་བ་གོང་འཕེལ་དང་རྩྭ་ས་སྲུང་སྐྱོང་གི་མིང་ཐོག་ནས་ཕྱི་ལོ་༢༠༠༣ ལོ་ནས་བཟུང་གནས་སྤོར་ལས་གཞི་ལག་བསྟར་བྱས་པ་རེད། དེ་ཡང་ཕྱུགས་བསྐྱུར་རྩྭ་གསོ་ཟེར་བའི་སྲིད་ཇུས་འོག་ཏུ་བོད་ཁུལ་གྱི་འབྲོག་ཁྱིམ་སྟོང་ཕྲག་མང་པོའི་རྩྭ་ས་དང་ཕྱུགས་ཟོག་མེད་པར་བཟོས་ནས་བཙན་གྱིས་གྲོང་མཐའ་ཁག་ཏུ་གནས་སྤོར་བཏང་བ་དང་། སྲིད་ཇུས་དེ་ནི་སྐྱེ་ཁམས་དཔལ་ཡོན་སྲུང་སྐྱོང་དང་གནས་སྤོར་དབུལ་སྐྱོར་གྱི་མིང་ཐོག་ནས་ལག་བསྟར་བྱས་འདུག སྲིད་ཇུས་དེའི་དམིགས་ཡུལ་གཙོ་བོ་ནི་རྒྱ་ནག་ཁོ་རང་ཚོའི་ཆུའི་ཐོན་ཁུངས་དང་བདེ་འཇགས་སྲུང་སྐྱོང་བྱ་ཐབས་ཤིག་ཡིན་པ་དང་། དེ་ལ་དམིགས་ནས་ཕྱི་ལོ་༢༠༠༣ …

Read More »

འདི་ག་ལྟེ་གནས་ཁང་ལ་འདྲ་པར་ཞིག་འབྱོར་བ་དང་དེ་ནི་རང་སྲེག་ཞི་རྒོལ་གནང་མཁན་རྡོ་རྗེ་ཡི་སྐུ་པར་ཡིན་ཞིང་ཁོང་གིས་ཕྱི་ལོ་༢༠༡༢ ལོར་རྒྱ་གཞུང་ནས་བོད་ཐོག་འཛིན་པའི་དྲག་གནོན་སྲིད་ཇུས་ལ་རང་སྲེག་ཞི་རྒོལ་གནང་སྟེ་སྐུ་གྲོངས་ཡོད་པ་རེད།

རྒྱ་གཞུང་གིས་བོད་ནང་གི་རང་སྲེག་ཞི་རྒོལ་རིགས་ཚང་མ་ཁྲིམས་འགལ་ནག་ཉེས་ཀྱི་ངོ་བོར་བསྒྱུར་ཏེ་གཞི་རྒྱ་ཆེ་བའི་དོགས་ཟོན་མྱུལ་ཞིབ་ཤུགས་ཆེར་བཏང་བའི་རྐྱེན་གྱིས་ད་བར་དུ་རྡོ་རྗེ་ཡི་སྐུ་པར་ལག་སོན་བྱུང་ཐུབ་མེད། རྒྱ་གཞུང་གིས་བོད་ནང་གི་རང་སྲེག་ཞི་རྒོལ་གྱི་གནས་ཚུལ་དང་འདྲ་པར་ཕྱི་ཕྱོགས་སུ་གཏོང་མཁན་བོད་མི་མང་པོར་རྒྱལ་ཁབ་ཀྱི་གསང་བ་ཕྱི་གྱར་དང་ཁྲིམས་འགལ་གྱི་ཕྱི་ཕྱོགས་སུ་འབྲེལ་གཏུག་བྱས་ལུགས་ཀྱི་ནག་ཉེས་བཙན་འགེལ་གྱིས་ཁྲིམས་འགལ་བཙོན་འཇུག་བྱས་ཡོད། རང་ལོ་༡༨ ཡིན་པའི་རྡོ་རྗེ་ཡིས་ཕྱི་ལོ་༢༠༡༢ ཟླ་༣ ཚེས་༥ ཉིན་གྱི་བོད་ནང་གི་ཆུ་ཚོད་༦།༣༠ ཙམ་ལ་གཅའ་ཡུལ་ཚོའི་ཉེ་འགྲམ་གྱི་ཟམ་ཁ་ཞིག་ནས་གཅའ་ཞང་ཐོག་གི་རྒྱ་མིའི་ལས་ཁུངས་ཡོད་སའི་བར་དུ་རང་སྲེག་གོམ་བགྲོད་གནང་ནས་སྐུ་གྲོངས་ཡོད་པ་དང་། ཁོང་གིས་རང་སྲེག་གནང་དོན་ནི་རྒྱ་གཞུང་གིས་བོད་ཐོག་འཛིན་པའི་སྲིད་ཇུས་ལ་ཞི་རྒོལ་གནང་བ་ཡིན་འདུག གནས་ཚུལ་ལྟར་ན། ཉེ་འཁོར་གྱི་བོད་མི་རྣམས་ཀྱིས་སྐུ་ཕུང་འཁྱེར་བརྩིས་བྱས་སྐབས། ཉེན་རྟོག་པ་སླེབས་ནས་ཁོང་གི་སྐུ་ཕུང་བཙན་འཕྲོག་གིས་རྔ་བ་རྫོང་ཐོག་ཏུ་ཁྱེར་ཡོད་པ་དང་། ཕྱིས་སུ་ཁོང་གི་ནང་མི་ཚོར་གདུང་ཐལ་ཡིན་ཟེར་ནས་རུས་ཐལ་ཙམ་སྤྲད་འདུག དེ་ཡང་རྒྱ་གཞུང་གིས་ཕྱི་ལོ་༢༠༡༡ ཟླ་༣ ནང་རང་སྲེག་ཞི་རྒོལ་གནང་མཁན་ཕུན་ཚོགས་མ་གཏོགས། གཞན་རང་སྲེག་ཞི་རྒོལ་གནང་མཁན་གྱི་སྐུ་ཕུང་བཙན་འཁྱེར་བྱས་པ་ཚང་མ་ཕྱིར་ནང་མི་ཚོར་མ་སྤྲད་པར་རྒྱ་ནག་ས་གནས་སྲིད་གཞུང་གིས་མེར་སྲེག་བཏང་འདུག རྒྱ་གཞུང་གི་དྲག་གནོན་སྲིད་ཇུས་ལ་ཞི་རྒོལ་གནང་མཁན་རྡོ་རྗེ་ནི་རྔ་བ་རྫོང་གཅའ་ཞང་གཅའ་རུ་བའི་གཤོག་སྨད་མའི་མགར་སྐྱ་ཚང་གི་ཡིན་པ་དང་། ཕ་མིང་ལ་ཅཱ་ཅཱ་ཞུ་བ་དང་། གཅའ་ཞང་ནི་མདོ་སྨད་རྔ་བ་རྫོང་ཐོག་ནས་ཤར་ཕྱོགས་ཀྱི་སྤྱི་ལེ་༧༠ ཙམ་གྱི་སར་ཡོད་པ་དང་། དེ་ནི་འབྲོག་སྡེ་གཅའ་རུ་བ་དང་རྭ་རུ་བ། ནག་ཚང་མ་བཅས་ཀྱི་ཡུལ་ཚོ་ཡིན་འདུག ལག་སོན་ཡིག་ཆ་ལྟར་ན། ཕྱི་ལོ་༢༠༡༢ ལོ་གཅིག་པུར་བོད་ནང་གི་བོད་མི་༨༤ ཙམ་གྱིས་རྒྱ་གཞུང་ལ་རང་སྲེག་ཞི་རྒོལ་གནང་བ་གསལ་འདུག

Read More »