Tuesday , October 23 2018
Home / གསར་འགྱུར། / བཅའ་ཁྲིམས་དང་འགལ་བའི་བསྙོན་འཛུགས་འོག་དགེ་འདུན་པ་གཉིས་འཛིན་བཟུང་བྱས།

བཅའ་ཁྲིམས་དང་འགལ་བའི་བསྙོན་འཛུགས་འོག་དགེ་འདུན་པ་གཉིས་འཛིན་བཟུང་བྱས།

རེས་གཟའ་ཟླ་བའི་ཉིན་འཕྲིན་ཕྲན་རྒྱབ་ལྗོངས་སུ་དྲ་རྒྱའི་བདེ་འཇགས་བཅའ་ཁྲིམས་དང་འགལ་བའི་པར་རིས་དང་རྩོམ་ཡིག་སྤེལ་བའི་ཉེས་འཛུགས་འོག་གཙང་དགོན་པའི་དགེ་འདུན་པ་གཉིས་འཛིན་བཟུང་གིས་གྲྭ་འོད་ཆུང་རྒྱ་མཚོ་མུ་མཐུད་བཀག་ཉར་བྱས་འདུག

ཕྱི་ཟླ་༤ ཚེས་༡༦ ཉིན་མཚོ་སྔོན་འབའ་རྫོང་སྤྱི་བདེ་ཉེན་རྟོག་མི་སྣས། གཙང་དགོན་དོན་གྲུབ་རབ་བརྟན་གླིང་གི་གྲྭ་འོད་ཆུང་རྒྱ་མཚོ་དང་དགེ་འདུན་པ་གཞན་གཅིག་བཅས་འཛིན་བཟུང་གིས་གྲྭ་འོད་ཆུང་རྒྱ་མཚོ་ཞུ་བ་ཞིག་བཀག་ཉར་བྱས་འདུག་ལ། ཁོང་བཀག་ཉར་བྱེད་དོན་ནི། ཁོང་གི་འཕྲིན་ཕྲན་རྒྱབ་ལྗོངས་སུ་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་དྲ་རྒྱའི་བདེ་འཇགས་བཅའ་ཁྲིམས་དང་འགལ་བའི་པར་རིས་དང་རྩོམ་ཡིག་སྤེལ་རབས་ཀྱི་ཉེས་འཛུགས་བྱས་པ་ཞིག་རེད།

གྲྭ་འོད་ཆུང་རྒྱ་མཚོའི་འདྲ་པར་འདི་ནི་ཁོང་ལ་ཆབ་སྲིད་སློབ་གསོ་སྤྲོད་སྐབས་སུ་བླངས་པ་ཞིག་ཡིན་ཞིང་། གནས་ཚུལ་འགྲེལ་བརྗོད་པས་འདི་ག་ལྟེ་གནས་ཁང་ལ་མཁོ་སྤྲོད་གནང་བ་ཡིན།

འབྲེལ་ཡོད་ཅིག་གིས་བརྗོད་དོན་ལྟར་ན། འདི་ལོའི་ཕྱི་ཟླ་༣ པའི་ནང་གཙང་དགོན་པའི་དགེ་འདུན་པ་ཚོར་གཙང་དགོན་པའི་ཁྲིམས་ལུགས་ཁྲིམས་སྲོལ་ཞེས་པའི་བརྗོད་གཞིའི་འོག་ཏུ། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་དྲ་རྒྱའི་བདེ་འཇགས་བཅའ་ཁྲིམས་སྐོར་གྱི་གསོ་སྦྱོང་ཚོགས་འདུ་བསྡུས་ཏེ། ཆབ་སྲིད་སློབ་གསོ་སྤྲད་པ་མ་ཟད། དོགས་གཞིའི་གནས་ཚུལ་ལ་ཞིབ་བཤེར་བྱས་པ་བརྒྱུད། གྲྭ་འོད་ཆུང་རྒྱ་མཚོ་དང་དགེ་འདུན་པ་ཁ་ཤས་ཀྱིས་འཕྲིན་སྟེགས་སྟེང་དུ་དྲ་རྒྱའི་བདེ་འཇགས་བཅའ་ཁྲིམས་དང་འགལ་བའི་པར་རིས་དང་རྩོམ་ཡིག་སྤེལ་ལུགས་བསྙད་ནས། ཁོ་ཚོར་རང་སྐྱོན་ངོས་ལེན་གྱི་ཡི་གེ་འབྲི་རུ་བཅུག་ཡོད་འདུག

ད་ལྟ་རྒྱ་ནག་གཞུང་གིས་བོད་ཁུལ་གྱི་དྲ་ལམ་དང་ཁ་པར་སོགས་སྤྱི་ཚོགས་བརྒྱུད་ལམ་ཁག་བཀག་སྡོམ་ཤུགས་ཆེར་བཏང་ཡོད་པའི་རྐྱེན་གྱིས། གནས་ཚུལ་ཁ་གསལ་ཞིག་རྒྱུས་ལོན་བྱེད་ཐབས་མེད་ཀྱང་། གནས་ཚུལ་མཁོ་སྤྲོད་པའི་འགྲེལ་བརྗོད་ལ་གཞིགས་ན། གཙང་དགོན་པའི་དགེ་འདུན་པ་ཚོར་དྲ་རྒྱའི་བདེ་འཇགས་བཅའ་ཁྲིམས་སྐོར་སྒྲོག་འགྲེལ་དང་ཆབ་སྲིད་སློབ་གསོ་སྤྲད་པ་ཙམ་མ་ཟད། དོགས་ཡོད་དགེ་འདུན་པ་མང་པོར་ཞིབ་བཤེར་བརྒྱུད། གང་བྱུང་འཛིན་བཟུང་བཙན་འཁྲིད་དང་བཀག་ཉར་འདྲི་གཅོད། ཉེས་འཛུགས་ཆད་གཅོད་སོགས་ལག་བསྟར་བྱས་ཡོད་པ་དཔག་ཐུབ་པ་ཞིག་རེད།

ཕྱི་ལོ་༢༠༡༧ ཟླ་༦ ཚེས་༡ ཉིན་ནས་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་དྲ་རྒྱའི་བདེ་འཇགས་བཅའ་ཁྲིམས་ཟེར་བ་དངོས་སུ་ལག་བསྟར་བྱས་པ་ནས། བཅའ་ཁྲིམས་དེའི་འོག་ཏུ་སྤྱི་དམངས་ཀྱི་གཞི་རྩའི་བསམ་བརྗོད་རང་དབང་རྡོག་རོལ་བཏང་སྟེ། མི་མང་གིས་དྲ་ལམ་དུ་དངོས་ཡོད་གནས་ཚུལ་སྤེལ་བའམ་སོ་སོའི་བསམ་ཚུལ་བརྗོད་པ་ནི། རྒྱ་ནག་གི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་སྤྱི་ཚོགས་དང་མེས་རྒྱལ་གོང་བུ་གཅིག་གྱུར་མགོ་རྟོག་སློག་པའི་ངན་སྐུལ་དང་། ཆོས་ལུགས་ལོག་སྤྱོད་དང་འཇིགས་སྐུལ་ཐལ་སྤྱོད་རིང་ལུགས་པར་ངན་འབྲེལ། མི་རིགས་མཐུན་སྒྲིལ་ལ་གཏོར་བརླག ཁ་བྲལ་རིང་ལུགས་པར་ངན་སྐུལ་བྱས་ནས། རྒྱལ་ཁབ་ཀྱི་བདེ་འཇགས་ལ་ཉེན་ཁ་བཟོས་རབས་ཀྱི་ནག་ཉེས་བཙན་འགེལ་བྱེད་ཀྱིན་ཡོད་ལ། ཐ་ན་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་དང་མི་རིགས་ས་གནས་རང་སྐྱོང་གི་བཅའ་ཁྲིམས་ནང་གསལ་གྱི་སྤྱི་དམངས་ཀྱི་རང་དབང་ཐོབ་ཐང་ཁག་བརྩིས་མེད་བཏང་ནས། ས་གནས་སྲིད་གཞུང་གིས། སྲིད་གཞུང་ལ་སྐྱོན་བརྗོད་དམ་དངོས་ཡོད་གནས་ཚུལ་བཤད་མཁན་དང་འབྲི་མཁན། ལྷག་པར་དུ་ཆབ་སྲིད་ཀྱི་བསམ་ཚུལ་མི་མཐུན་པའི་མི་མང་གང་བྱུང་འཛིན་བཟུང་བཀག་ཉར་གྱིས། འདྲི་གཅོད་དང་མནར་གཅོད། ཆད་གཅོད་སོགས་ལག་བསྟར་བྱེད་བཞིན་ཡོད་པ་རེད།

ད་ལྟ་བཀག་ཉར་བྱས་པའི་གྲྭ་འོད་ཆུང་རྒྱ་མཚོ་ནི་མཚོ་སྔོན་ཞིང་ཆེན་རྨ་ལྷོ་ཁུལ་སོག་རྫོང་གཙང་ཨ་རིག་ཉི་མཐའ་ཡུལ་ཚོ་བདེ་ལྡན་སྡེ་བ་ནས་ཡིན་ཞིང་། གཙང་དགོན་དོན་གྲུབ་རབ་བརྟན་གླིང་གི་གྲྭ་བ་ཡིན་འདུག ཕྱི་ལོ་༢༠༠༨ ལོའི་བོད་ས་བྱི་ཞི་རྒོལ་སྐབས་སུ། གཙང་དགོན་པའི་དགེ་འདུན་པ་༥༠༠ ལྷག་གིས་དགོན་པའི་ཁང་ཐོག་ཏུ་བོད་ཀྱི་རྒྱལ་དར་སྒྲེང་འཛུགས་དང་། ༧གོང་ས་རྒྱལ་བ་རིན་པོ་ཆེ་མཆོག་གི་སྐུ་པར་ཁྱེར་ནས་ཞི་རྒོལ་གནང་ཞིང་། ཕྱི་ལོ་༢༠༡༧ ཟླ་༤ ཚེས་༢༨ ཉིན་དགེ་འདུན་པ་མཆོག་སྤྲིན་རྒྱ་མཚོ་མི་ལོ་༡༠ ཡི་དུས་བཀག་བཙོན་འཇུག་གི་དུས་ཡུན་ཚང་ནས་གློད་གྲོལ་བཏང་བ་དང་། ཁོང་ནི་ཕྱི་ལོ་༢༠༠༨ ཟླ་༣ ནང་ཞི་རྒོལ་ནང་མཉམ་ཞུགས་གནང་མཁན་དགེ་འདུན་པ་གཞན་གཉིས་དང་མཉམ་དུ་འཛིན་བཟུང་བཙོན་འཇུག་བྱས་པ་རེད།

About Tibetan Section TCHRD

Check Also

གཞོན་སྐྱེས་རྩོམ་པ་པོ་བསྟན་འཛིན་དགེ་ལེགས་ཀྱིས་ཁེར་རྐྱང་ཞི་རྒོལ་གནང་རྐྱེན་རྒྱ་གཞུང་གིས་ཁོང་འཛིན་བཟུང་གིས་གར་སོང་ཆ་མེད་བཟོས་འདུག

རྒྱ་གཞུང་གིས་རྔ་བའི་རྫོང་ཐོག་ཏུ་བོད་རང་དབང་གི་སྐད་འབོད་གནང་མཁན་གཞོན་སྐྱེས་རྩོམ་པ་པོ་གྲྭ་བསྟན་འཛིན་དགེ་ལེགས་འཛིན་བཟུང་གིས་གར་ཁྲིད་ཅི་བྱས་ཀྱི་གནས་ཚུལ་ཤེས་རྟོགས་ཐུབ་མེད་འདུག འདི་ག་ལྟེ་གནས་ཁང་ལ་གནས་ཚུལ་འབྱོར་གསལ་ལྟར་ན། ཟླ་འདིའི་ཕྱི་ཚེས་༦ ཉིན་རྔ་བ་ཀིརྟི་དགོན་གྱི་དགེ་འདུན་པ་དང་གཞོན་སྐྱེས་རྩོམ་པ་པོ་བསྟན་འཛིན་དགེ་ལེགས་ཞུ་བ་ཞིག་གིས་རྔ་བའི་རྫོང་ཐོག་ཏུ་བོད་རང་དབང་གི་སྐད་འབོད་གནང་ཡོད་པ་དང་། དེ་མ་ཐག་ཉེན་རྟོག་པ་ཐོན་ནས་ཁོང་འཛིན་བཟུང་བཙན་ཁྲིད་ཀྱིས་བཀག་ཉར་བྱས་ཡོད་ཅིང་། རྒྱ་གཞུང་གིས་བོད་ཕྱི་ནང་གི་འབྲེལ་ལམ་གཙོ་བོ་ལག་འཁྱེར་ཁ་པར་དང་འཕྲིན་ཕྲན་སོགས་ལ་ཞིབ་བཤེར་དང་སྟངས་འཛིན་ཤུགས་ཆེན་བྱས་པའི་རྐྱེན་གྱིས། ད་ལྟ་དགེ་འདུན་པ་བསྟན་འཛིན་དགེ་ལེགས་ས་གནས་གང་དུ་བཀག་ཉར་བྱས་ཡོད་པ་དང་། ཁོང་གི་གནས་སྟངས་ཅི་འདྲ་ཡིན་པ་སོགས་ཞིབ་ཕྲའི་གནས་ཚུལ་ལ་རྒྱུས་ལོན་བྱུང་ཐུབ་མེད་པ་རེད། གནས་ཚུལ་མཁོ་སྤྲོད་པས་བརྗོད་དོན་ལྟར་ན། དགེ་འདུན་པ་བསྟན་འཛིན་དགེ་ལེགས་འཇུ་བཟུང་བཙན་ཁྲིད་མ་བྱས་པའི་སྔོན་ལ་ཁོང་གིས་འཕྲིན་ཕྲན་རྒྱལ་ལྗོངས་སུ་<<ཁྱེད་ཅག་གིས་བལྟས་ན་ང་རང་འདུག་བཟོད་དམ་>>ཞེས་དང་<<རྒྱ་ནག་ཀྲུང་གོར་ལབ་པ་>>ཞེས་པའི་སྙན་རྩོམ་གཉིས་སྔ་རྗེས་སུ་སྤེལ་ཡོད་པ་དང་། ཁོང་ནམ་རྒྱུན་ས་རིན་ཞེས་པའི་སྨྱུག་མིང་སྤྱད་དེ་རྩོམ་ཡིག་མང་པོ་འབྲི་མཁན་ཞིག་ཡིན་འདུག། ཁོང་གི་ཕ་ཡུལ་རྔ་བ་རྨེའུ་རུ་མ་རུ་ཆེན་གཉིས་པའི་ཡོ་ཚང་སྡེ་ནས་ཡིན་ཞིང་། ཁོང་གི་ཕ་མིང་ལ་མ་ཉོ་དང་མ་མིང་ལ་དཀོན་སྒྲོལ་ཞུ་བ་དང་། ད་ལྟ་རང་ལོ་༡༨ ཡིན་པའི་བསྟན་འཛིན་དགེ་ལེགས་ནི་རྔ་བ་ཀིརྟི་དགོན་གྱི་གྲྭ་བ་ཡིན་པ་རེད། རྒྱ་གཞུང་གིས་མེས་རྒྱལ་བརྟན་སྲུང་དང་ཁ་བྲལ་ལ་ངོ་རྒོལ་སོགས་ཀྱི་མིང་བྱང་སྣ་ཚོགས་འོག་ཏུ་བོད་མིའི་སྤྱི་ཚོགས་བརྒྱུད་ལམ་ཁག་དང་། …

Leave a Reply

Your email address will not be published. Required fields are marked *