Thursday , June 22 2017
Home / གསར་འགྱུར། / ཨ་མདོ་གཅན་ཚ་ནས་ན་གཞོན་དགེ་འདུན་པ་ཞིག་གིས་རང་ལུས་མེར་བསྲེགས་གནང་འདུག

ཨ་མདོ་གཅན་ཚ་ནས་ན་གཞོན་དགེ་འདུན་པ་ཞིག་གིས་རང་ལུས་མེར་བསྲེགས་གནང་འདུག

ཨ་མདོ་གཅན་ཚ་ནས་དགེ་འདུན་པ་འཇམ་དབྱངས་བློ་གསལ་གྱིས་རྒྱ་གཞུང་ལ་ངོ་རྒོལ་གྱི་རང་བསྲེགས་གནང་བ་བརྒྱུད་དེ་མུར་སྐུ་གྲོངས་ཡོད་འདུག

བརྒྱུད་ལམ་ཁག་ཏུ་གནས་ཚུལ་ཐོན་གསལ་ལྟར་ན། ཟླ་འདིའི་ཕྱི་ཚེས་༡༩ཉིན་གྱི་ཞོགས་པ་སྔ་པོར། དགེ་འདུན་པ་འཇམ་དབྱངས་བློ་གསལ་ལགས་ཀྱིས། གཙན་ཆ་རྫོང་ཐོག་གི་མི་དམངས་སྨན་ཁང་གི་ཉེ་འགྲམ་ནས། རྒྱ་གཞུང་ལ་ངོ་རྒོལ་གྱིས་རང་ལུས་མེར་བསྲེགས་ཀྱིས་སྐུ་གྲོངས་ཡོད་འདུག ས་གནས་ཉེན་རྟོག་པ་དེ་མུར་སླེབས་ནས་ཁོང་གི་སྐུ་ཕུང་བཙན་འཁྱེར་བྱས་པ་ལྷན། ས་གནས་དེར་ཉེན་རྟོག་པ་དང་དམག་མི་སོགས་འབོར་ཆེན་འགྲེམས་འཇོག་གིས་མི་མང་གི་འགྲོ་བསྐྱོད་དང་གནས་ཚུལ་དྲ་རྒྱ་རིགས་ལ་དམ་དྲག་བྱེད་འགོ་ཚུགས་ཡོད་འདུག

དགེ་འདུན་པ་འཇམ་དབྱངས་བློ་གསལ་ལགས་ཀྱི་ཕ་མ་གཙོས་པའི་ནང་མི་རྣམས་ཉེན་རྟོག་ཁང་དུ་ཁོང་གི་སྐུ་ཕུང་ལེན་དུ་ཕྱིན་ནས་དེའི་དོན་ཡར་ཞུ་བྱས་ཀྱང་། ཚུར་རྩིས་སྤྲད་བྱས་མི་འདུག

ད་ལྟ་དགུང་ལོ་༢༢ཡིན་པའི་དགེ་འདུན་པ་འཇམ་དབྱངས་བློ་གསལ་ནི། འདི་ལོའི་གསུམ་བཅུ་དུས་དྲན་རྗེས་ནས་ད་ལྟའི་བར། བོད་ནང་ནས་རང་ལུས་མེར་བསྲེགས་གནང་མཁན་ཨང་བཞི་བ་སྟེ་ཆགས་ཤིང་། རྒྱ་གཞུང་གིས་བོད་ས་བཅད་བགོས་ལྟར་ན། མདོ་སྨམཚོ་སྔོན་ཞིང་ཆེན་རྨ་ལྷོ་ཁུལ་གཅན་ཚ་རྫོང་གི་སྣང་ར་ཡུལ་ཚོའི་གྱེར་སྟེང་དགོན་པའི་ཨ་ཁུ་བཤད་སྒྲུབ་ཀྱི་དགེ་ཕྲུག་དང་། ཕ་ཡུལ་གཅན་ཚ་རྫོང་སྣང་ར་ཡུལ་ཚོའི་མདོང་རྒྱ་སྡེ་བ་ནས་ཡིན་འདུག

ཡང་ཟླ་འདིའི་ཕྱི་ཚེས་༢ཉིན་གྱི་དགོང་དྲོ་ལྟར་ན། ཨ་མདོ་བླ་བྲང་བསང་ཆུ་རྫོང་གི་འབོ་བ་དགོན་པའི་ཉེ་འདབས་ནས་རང་ལུས་མེར་བསྲེགས་གནང་བའི་སློབ་འབྲིང་སློབ་མ་དང་། རང་ལོ་༡༦ཡིན་པའི་ཕྱག་རྡོར་སྐྱབས་ལགས་ཉེ་ཆར་སྐུ་གྲོངས་ཡོད་པའི་གནས་ཚུལ་ཟླ་འདིའི་ཕྱི་ཚེས་༡༨ཉིན་ཐོན་ཐོག ཁོང་གི་ཕ་མ་གཉིས་ཀྱང་སླར་ཡང་ཉེན་རྟོག་པས་འཇུ་བཟུང་བཙན་འཁྲིད་ཡོད་འདུག དེ་ནི་ཉེན་རྟོག་པས་ཁོང་གི་ཕ་མ་འཇུ་བཟུང་བྱས་པ་ཐེངས་གཉིས་པ་དེ་ཆགས་ཡོད་ཅིང་། དེ་སྔ་ཕྱག་རྡོར་སྐྱབས་ལགས་ཀྱིས་རང་ལུས་མེར་བསྲེགས་གནང་བའི་ཉིན་མ་དེ་ག་རང་ལ་། ཉེན་རྟོག་པས་ཕྱག་རྡོར་སྐྱབས་ཀྱི་ཕ་བཟོད་པ་དང་། མ་སྒྲོལ་མ་མཚོ། ཁོང་གི་སྲིང་མོ་བཅས་འདྲི་བརྩད་ཆེད་དུ་འགྲོ་དགོས་ཞེས་བཙན་འཁྲིད་བྱས་པ་དང། རྗེས་ནས་གློད་གྲོལ་བྱས་ཡོད་ཀྱང་། དུས་དེ་ནས་བཟུང་། ཕྱག་རྡོར་སྐྱབས་ཀྱི་སྲིང་མོ་སེམས་ཁམས་མི་བདེ་བར་ཆགས་ནས་ད་ལྟ་ཉལ་སར་ལྷུང་ཡོད་ཀྱང་། ཕ་མ་གཉིས་སླར་ཡང་འཇུ་བཟུང་བྱས་པར་བརྟེན། ཉལ་སར་ལྷུང་བའི་ནད་པར་ལྟ་རྟོག་བྱེད་མི་མེད་པའི་དཀའ་ངལ་འཕྲད་ཀྱི་ཡོད་འདུག

ཕྱག་རྡོར་སྐྱབས་ནི་འབོ་ར་རྡར་མདོ་སྡེ་བའི་མ་སྒྲོལ་མ་འཚོ་དང་། ཕ་བཟོད་པ་གཉིས་ཀྱི་བུ་ཡིན་པ་དང་། ཁོང་ནི་འབོ་ར་ས་ཁུལ་དེར་བྱུང་བའི་རང་ལུས་མེར་བསྲེགས་གནང་མཁན་ཨང་བཞི་བ་དེ་ཆགས་ཡོད་འདུག

ཡང་ཕྱི་ཟླ་༤ཚེས་༡༥ཉིན། དཀར་མཛེས་རྫོང་གི་ཁྲོམ་གཞུང་དུ་བོད་མི་དབང་ཕྱུག་ཚེ་བརྟན་ལགས་ཀྱིས་རང་ལུས་མེར་བསྲེགས་གནང་བ་དང་དེ་མུར་ས་གནས་དེ་ག་རང་ལ་སྐུ་གྲོངས་ཡོད་པའི་པར་དང་བརྙན་ཞིག་ཕྱི་རུ་གྱར་ཡང་། གསལ་ཁ་བྱུང་མེད།

༢༠༡༧ཟླ་༣ཚེས་༡༨ཉིན་གྱི་བོད་ནང་གི་ཆུ་ཚོད་༤ཡས་མས་སུ།  ཁམས་དཀར་མཛེས་ཁུལ་ཉག་རོང་རྫོང་ནས་ཡིན་ཞིང་། རང་ལོ་༢༤ཡིན་པའི་བོད་མི་ན་གཞོན་པདྨ་རྒྱལ་མཚན་ལགས་ཀྱིས། ཉག་རོང་གི་མཚོ་ཁ་དགོན་པ་ཞེས་པའི་ཉེ་འཁྲིས་སུ་རང་ལུས་མེར་བསྲེགས་གནང་ཡོད་འདུག་ཀྱང་། སྐབས་དེའི་ཡས་མས་སུ་རྒྱ་གཞུང་གིས་བོད་ས་ཁྱོན་ཡོངས་སུ་དམ་དྲག་དང་སྟངས་འཛིན་ཆེ་ཆེར་བྱེད་བཞིན་པའི་དུས་སྐབས་ཤིག་ཆགས་ཡོད། པད་མ་རྒྱལ་མཚན་དང་དབང་ཕྱུག་ཚེ་བརྟན་གཉིས་ཀྱིས་གནས་ཚུལ་དུས་ཐོག་ཏུ་ཕྱི་རུ་མ་འབྱོར་བ་དང་། ཕྲན་ཙམ་འབྱོར་ཡང་ཞིབ་ཕྲ་མ་རག་པ་སོགས་ཀྱི་དཀའ་ངལ་འཕྲད་ཡོད།

དེ་ནི་འདི་ལོའི་ཕྱི་ཟླ་༣པའི་ཚེས་༣་དང་༥་ཉིན། རྒྱ་ནག་གཞུང་གིས་སྔ་ཕྱི་རུ་རྒྱལ་ཡོངས་མི་དམངས་འཐུས་ཚོགས་སྐབས་བཅུ་གཉིས་པའི་པའི་གྲོས་ཚོགས་ཐེངས་ལྔ་བ་དང་།  རྒྱལ་ཡོངས་སྲིད་གྲོས་ཐེངས་བཅུ་གཉིས་པའི་གྲོས་ཚོགས་ཐེངས་ལྔ་བ་ཞེས་པ་འཚོགས་འགོ་ཚུགས་ཤིང་། ཆབ་སྲིད་ཀྱི་ཚོར་བ་ཧ་ཅང་རྣོ་ངར་ཅན་གྱི་ཚོགས་འདུ་འདི་གཉིས་ནམ་འཚོགས་་ལ། རྒྱ་ནག་རྒྱལ་ཡོངས་དང་། ལྷག་པར་དུ་བོད་ས་ཁྱོན་ཡོངས་ལ་དམ་དྲག་དང་སྟངས་འཛིན་བྱེད་ཤུགས་སྔར་བས་ཆེ་རུ་འགྲོ་བ་ནི་རྒྱུན་ལྡན་ལྟ་བུ་ཡིན་ལ། དམིགས་བསལ་གྱི།  ཕྱི་ཟླ་༣ནི་བོད་རང་ལ་མཚོན། ༡༩༥༩ལོའི་ཟླ་༣ཚེས་༡༠ཉིན། བོད་མིས་བོད་ས་ཡོངས་ཁྲིམས་འགལ་ཐོག་དབང་སྒྱུར་བྱས་མཁན་རྒྱ་གཞུང་ལ་ངོ་རྒོལ་ཡར་ལངས་དང་། ༢༠༠༨ཟླ་༣ཚེས་༡༤ཉིན། བོད་ས་ཡོངས་སུ་ས་བྱིའི་ཞི་རྒོལ་ཆེན་མོ་བྱུང་བ་དང་། ཟླ་༣ཚེས་༡༦ཉིན། ཨ་མདོ་རྔ་བར་དྲག་གནོན་གྱིས་བོད་མི་བརྒྱ་ཕྲག་མང་བོ་ཤི་རྨས་བྱུང་བ་བཅས། ལོ་ལྟར།  ཕྱི་ཟླ་གསུམ་པ་ནི་བོད་མི་སེམས་ནས་གསོས་ཐབས་མེད་པའི་རྨ་ཁ་དང་སེམས་ཀྱི་སྙིང་ནད་བསྐྱར་དུ་འཕར་པའི་དུས་སྐབས་ཤིག་ཡིན་པ་ལྟར། རྒྱ་གཞུང་གིས་ཀྱང་དེ་ལྟར་ཡིན་པ་ཤེས་པ་དང་། སླར་ཡང་གནད་དོན་འཚབ་ཆེན་བྱུང་རྒྱུའི་འཇིགས་དངངས་དང་སྐྲག་སྣང་གིས།    དུས་སྐབས་འདིར་ཕྱི་ནང་གི་གནས་ཚུལ་བརྒྱུད་ལམ་དང་སྤྱི་ཚོགས་དྲ་རྒྱ་ཁག་ལ་བཀག་སྡོམ་བྱེད་སྲོལ་ཡོད་པ་ལྟར། ཕྱི་ཟླ་༣པའི་༣ཚེས་ནས་བར། ཁམས་ཉག་རོང་ཚུད་པའི་དཀར་མཛེས་ཁུལ་གྱི་རྫོང་ཁོངས་༡༨ལས། ལྕགས་ཟམ་ཁ་དང་། ཕྱག་ཕྲེང་། འདབ་པ། སྡེ་རོང་། འབའ་ཐང་བཅས་རྫོང་ཁོངས་ལྔ་མ་གཏོགས། དེ་མིན་ལྷག་མ་རྫོང་ཁོངས་༡༣ཡི་སྤྱི་ཚོགས་དྲ་རྒྱ་མ་ལུས་པར་དུས་ཚོད་ངེས་མེད་ལ་གཏན་འགོག་བྱ་རྒྱུ་ཡིན་པའི་བརྡ་སྦྱོར་བཀྲམས་འདུག་པའི་ཤེས་རྟོགས་བྱུང་ཞིང་།  ཐེངས་འདིར་ཡང་གང་སར་དམ་དྲག་གིས་ཁུངས་སྣེ་ལག་སོན་བྱུང་རྒྱུ་ཁག་པོ་ཆགས་འདུག

དེ་ལྟར་ད་སྔ་བར་བོད་ནང་ནས་ཁྱོན་བསྡོམས་རང་ལུས་མེར་བསྲེགས་གནང་མཁན་༡༥༠བྱུང་བ་དང་།   དགེ་འདུན་པ་འཇམ་དབྱངས་བློ་གསལ་ལགས་ནི་རང་ལུས་མེར་བསྲེགས་གནང་མཁན་༡༥༠སྟེ་ཆགས་ཡོད།

About Tibetan Section TCHRD

Check Also

༢༠༠༨ལོའི་ཞི་རྒོལ་གྱི་སྣེ་ཁྲིད་པར་བསྙད་ནས་འཇུ་བཟུང་བྱས་པའི་དགེ་འདུན་པ་ཞིག་ལོ་བཅུའི་བཙོན་འཇུག་དུས་ཡུན་ཚང་ནས་གློད་གྲོལ་བྱུང་འདུག

རྒྱ་གཞུང་གིས་༢༠༠༨ལོའི་ཞི་རྒོལ་ཆེན་མོའི་འགོ་ཁྲིད་ལ་བསྙད་ནས་འཇུ་བཟུང་བྱས་པའི་གཙང་དགོན་པའི་དགེ་འདུན་པ་མཆོག་སྤྲིན་རྒྱ་གློད་གྲོལ་གྱི་ཚུར་ཁྱིམ་དུ་འབྱོར་ཡོད་འདུག འདི་ག་ལྟེ་གནས་ཁང་དུ་ཁུངས་ལྡན་གནས་ཚུལ་འབྱོར་གསལ་ལྟར་ན། ཟླ་འདིའི་ཕྱི་ཚེས་༡༥་ཉིན་གྱི་བོད་ནང་གི་ཕྱི་དྲོ་ཆུ་ཚོད་༥ཡས་མས་སུ། མདོ་སྨད་གཙང་དགོན་པའི་དགེ་འདུན་པ་མཆོག་སྤྲིན་རྒྱ་མཚོ་ལགས་ཟི་ལིང་ཏོ་པ་བཙོན་ཁང་ནས་ལོ་༡༠བཙོན་འཇུག་དུས་ཡུན་ཚང་ནས་གློད་གྲོལ་བྱས་ཡོད་འདུག་ལ། ཟི་ལིང་ནས་གཙང་ཨ་རིག་གི་རང་ཁྱིམ་དུ་འབྱོར་དུས་མཚན་དཀྱིལ་རེད་ཡོད་འདུག དེ་ནི་རྒྱ་གཞུང་གིས་དེ་སྔ་ནས་དགེ་འདུན་པ་ཁོང་ཚུར་འབྱོར་བར་གཟབ་རྒྱས་ཕེབས་བསུ་དང་པར་སོགས་རྒྱག་མི་ཆོག་པའི་བཙན་བཀའ་བཏང་ཡོད་པ་བཞིན་འཆར་གཞི་ལྡན་པའི་གོ་སྒྲིག་ཅིག་ཡིན་འདུག ༢༠༠༨ལོའི་ཟླ་༣་ཚེས་༡༧ཉིན།  བོད་ས་ཁྱོན་ཡོངས་ལ་ས་བྱི་ཞི་རྒོལ་ཆེན་མོ་བྱུང་བ་བཞིན། མདོ་སྨད་གཙང་དགོན་པའི་ལྷ་སྡེ་མི་སྡེ་གཉིས་ངོས་ནས་སྔ་ཕྱི་ཞི་རྒོལ་དང་སྐད་འབོད་གནང་བར། རྒྱ་གཞུང་གིས་དེ་མུར་ཞི་རྒོལ་གྱི་འགོ་འཁྲིད་བྱེད་མཁན་དུ་བསྙད་ནས། གཙང་དགོན་པའི་དགེ་འདུན་པ་མཆོག་སྤྲིན་རྒྱ་མཚོ་དང་། མཁས་སྒྲུབ་རྒྱ་མཚོ། ཚུལ་བཟང་རྒྱ་མཚོ་བཅས་སྔ་ཕྱི་རུ་འཇུ་བཟུང་བཙན་འཁྲིད་ཀྱིས། ཁོང་ཚོར་ཕྱི་ཕྱོགས་ལ་ངན་འབྲེལ་ཡོད་པ་དང་། ཞི་རྒོལ་གྱི་སྣེ་འཁྲིད་ཡིན་པའི་ཉེས་འཛུགས་འོག མཆོག་སྤྲིན་རྒྱ་མཚོ་དང་མཁས་གྲུབ་རྒྱ་མཚོ་ཁོང་གཉིས་ལ་བཙོན་ཐག་༡༠རེ་བཅད་པ་དང་། …

Leave a Reply

Your email address will not be published. Required fields are marked *