Thursday , June 22 2017
Home / གསར་འགྱུར། / ༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གང་བྱུང་འཇུ་བཟུང་བྱས་ནས་མི་ལོ་༢༢འགོར་བའི་ཉིན་མོར། གང་བྱུང་འཇུ་བཟུང་ཐད་ཀྱི་དམིགས་བསལ་སྙན་ཐོ།

༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གང་བྱུང་འཇུ་བཟུང་བྱས་ནས་མི་ལོ་༢༢འགོར་བའི་ཉིན་མོར། གང་བྱུང་འཇུ་བཟུང་ཐད་ཀྱི་དམིགས་བསལ་སྙན་ཐོ།

དེ་རིང་ནི། རྒྱ་ནག་སྲིད་གཞུང་གིས་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གང་བྱུང་འཇུ་བཟུང་གིས་བཙན་འཁྲིད་རྗེས། ད་ལྟའི་བར་གར་སོང་ཆ་མེད་དུ་སོང་ནས་མི་ལོ་༢༢འགོར་བའི་དུས་ཚིགས་ཁྱད་པར་ཞིག་ཆགས་ཡོད།

     རྒྱ་གཞུང་གིས་ཕྱི་ལོ་ ༡༩༩༥ ཟླ་ ༥ ཚེས་ ༡༧ ཉིན།  ༸པཎ་ཆེན་ཆུང་སྲིད་དགེ་འདུན་ཆོས་ཀྱི་ཉི་མ་མཆོག་དང་། ཁོང་གི་ཕ་མ་ནང་མི་དང་བཅས་གང་བྱུང་འཇུ་བཟུང་བཙན་འཁྲིད་བྱས་ཤིང་། སྐབས་དེར་དགུང་ལོ་༦ཙམ་ཡིན་པའི་ཁོང་།  འཛམ་གླིང་སྟེང་གི་ཆབ་སྲིད་བཙོན་པ་ཆུང་ཤོས་སུ་གྱུར་བ་མ་ཟད། གར་ཆོས་ཆ་མེད་གྱུར་ནས་ད་ལྟའི་བར་མི་ལོ་༢༢སོང་བའི་༸ཁོང་ནིའཛམ་གླིང་སྟེང་ནས་གར་སོང་ཆ་མེད་དུ་སོང་བའི་ལོ་ཚད་རིང་ཤོས་ཀྱི་མི་སྣ་གཅིག་པུ་དང་། དེ་ནི་རྒྱ་གཞུང་གིས་ད་ལྟ་དགུང་ལོ་༢༨ཡིན་པའི་༸པཎ་ཆེན་རིན་པོ་ཆེ་གང་བྱུང་འཇུ་བཟུང་གིས་མི་ལོ་༢༢བཀག་ཉར་བྱས་པ་གཅིག་པུ་ཙམ་མ་ཡིན་པར། ༸ཁོང་གི་འཚོ་བསྡད་རང་དབང་དང་ངོ་རྟགས་རང་དབང་བརྩི་མེད་རྡོག་རོལ་དང་། ༸ཁོང་ལ་རང་ཆས་སུ་ཡོད་པའི་འགྲོ་བ་མིའི་གཞི་རྩའི་ཐོང་ཐང་ཆ་ཚང་བཀག་སྡོམ་དང་། ༸ཁོང་ལ་དད་པའི་བོད་མིའི་ཡོངས་ཀྱི་དད་ཆོས་རང་དབང་ལ་སྣང་མེད་བྱས་པ་སོགས་ནི།   རྒྱལ་སྤྱི་དང་རྒྱལ་ནང་གི་ཁྲིམས་སྒྲིག་ཁག་དང་འགལ་བའི་ཉེས་སྤྱོད་ཅིག་ཆགས་ཡོད་ན།

འདི་ག་ལྟེ་གནས་ཁང་གིས།    ད་ལྟ་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་ནི་གཞན་གྱི་བྱ་རའི་འོག་སྡོད་དགོས་པའི་བྱིས་པ་ཞིག་མ་ཡིན་པར། རང་ལོ་ ༢༨ སོན་པའི་གཞོན་ནུ་དར་མ་ཞིག་ཆགས་ཡོད་སྟབས།   རྒྱ་གཞུང་གི་ <<རྩ་ཁྲིམས>> དོན་ཚན་ ༣༤ པའི་ནང་རང་ལོ་ ༡༨ ལ་སོན་པའི་ན་གཞོན་སུ་ཞིག་ཡིན་ཡང་། འགྲོ་བ་མིའི་གཞི་རྩའི་ཐོབ་ཐང་སྟེ་ཆོས་དད་རང་དབང་དང་། ལས་རིགས་གཉེར་བའི་རང་དབང་། ཤེས་ཡོན་གྱི་ཐོབ་ཐང་སོགས་ལོངས་སྤྱོད་ཀྱི་ཁེ་དབང་ཆ་ཚང་ཡོད་པ་འཁོད་ཡོད་པ་ལྟར། ༸པཎ་ཆེན་རིན་པོ་ཆེ་མཆོག་ཆ་རྐྱེན་གང་མང་མེད་པའི་སྒོ་ནས་གློད་གྲོལ་བྱས་དགོས་པ་མ་ཟད། མི་སེར་དཀྱུས་མ་ཞིག་ནང་བཞིན་རང་དབང་ཐོག་གནས་བསྡད་དང་འཚོ་བ་རོལ་ཆོག་པའི་ཐོབ་ཐང་ཆ་ཚང་སྤྲོད་དགོས་ཞེས་འབོད་བསྐུལ་ཞུ་ཡི་ཡོད།

ང་བྱུང་འཇུ་བཟུང་དང་བཀག་ཉར་ཐད་ཀྱི་དམིགས་བསལ་སྙན་ཐོ།

༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་རྒྱ་གཞུང་གིས་འཇུ་བཟུང་བཙན་འཁྲིད་བྱས་ནས་མི་ལོ་༢༢འགོར་བའི་དུས་དྲན་ཉིན་མོ་དང་བསྟུན། འདི་ག་ལྟེ་གནས་ཁང་གིས་རྒྱ་གཞུང་གིས་བོད་ནང་གི་བོད་མི་གང་མང་ཞིག་གང་བྱུང་འཇུ་བཟུང་དང་བཙན་ཁྲིད་བྱས་པའི་སྐོར་གྱི་དམིགས་བསམ་སྙན་ཐོ་ཞིག་འགྲེམས་སྤེལ་ཞུ་ཡི་ཡོད། དེ་ནི་གཙོ་བོ། རྒྱ་གཞུང་གིས་དུས་རྒྱུན་ལག་ཏུ་མཚོན་ཆ་རྐང་གཅིག་ཀྱང་མེད་པའི་བོད་མི་མེད་ཞི་རྒོལ་བ་དང་། རྩོམ་པ་པོ། ཟིན་བྲིས་པ། སྒྱུ་རྩལ་བ། གཞས་པ། ཁོར་ཡུག་སྲུང་སྐྱོབ་པ། སྐད་ཡིག་སྲུང་སྐྱོབ་པ་སོགས་ཀྱིས། རྒྱ་གཞུང་གིས་བོད་སྟེང་དུ་ལག་བསྟར་བྱེད་བཞིན་པའི་གདུག་རྩུབ་སྲིད་ཇུས་དང་། གྲངས་ཉུང་མི་རིགས་སྐོར་གྱི་བཅའ་ཁྲིམས་དང། རྩ་ཁྲིམས་ནང་གི་འཁོད་དོན་དང་མཐུན་པའི་བསམ་འཆར་བཤད་པ་དང་། བྱེད་སྒོ་དང་ལས་འགུལ་ཅི་ཞིག་སྤེལ་ཡང་། རྒྱ་གཞུང་གིས་དེ་མུར་ཁྲིམས་འགལ་རྩིས་ནས་གང་བྱུང་འཇུ་བཟུང་གིས་བཀག་ཉར་བྱས་པ་མ་ཟད། ལོ་དང་ཟླ་བ་མང་བོའི་རིང་ནང་མི་དང་འབྲེལ་ཡོད་ལ་བརྡ་ལན་མ་བྱས་པར་གར་སོང་ཆ་མེད་ཀྱི་ངོ་བོར་བཞག་གི་ཡོད། དེ་ལྟ་བུ་གར་སོང་ཆ་མེད་ཀྱི་དུས་སྐབས་དེར། ད་གཟོད། མི་སྤྱོད་ལས་རྡུང་རྡེག་དང་ཚ་འདྲི། བཙན་ཤེད་ཀྱིས་ཉེས་པ་མེད་ཀྱང་ནག་ཉེས་གང་རུང་ཞིག་ཁས་ལེན་བྱེད་དུ་བཅུག་པ་སོགས། དུས་ཚོད་སྡུག་ཤོས་ཤིག་ཆགས་ཡོད་པས། རྒྱ་གཞུང་གིས་བྱེད་སྟངས་དེ་ནི་རྒྱལ་སྤྱིའི་ཁྲིམས་སྒྲིག་དང་ཆིངས་དོན་གང་མང་ཞིག་ལ་རྒྱབ་འགལ་དང་བརྩི་མེད་རྡོག་རོལ་བཏང་བ་ཞིག་ཆགས་ཡོད་ན། ང་ཚོའི་རྒྱལ་སྤྱིའི་ཁྲིམས་སྒྲིག་རིམ་པ་ནས་རེ་རེ་བཞིན་གསལ་འདོན་དང་ར་སྤྲོད་ཀྱི་ལམ་ནས་རྒྱ་གཞུང་གིས་མུ་མཐུད་དེ་ལྟར་བོད་མི་རྣམས་གང་རུང་འཇུ་བཟུང་དང་བཀག་ཉར་བྱེད་པའི་ཁྲིམས་འགལ་རང་བཞིན་བདའ་འདེད་བྱས་ཡོད་ལ། དེའང་ཡང་གང་བྱུང་འཇུ་བཟུང་གིས་གར་སོང་ཆ་མེད་དུ་གྱུར་བའི་གནས་སྟངས་དེ་ནི། འགྲོ་བ་མིའི་གཞི་རྩའི་ཐོབ་ཐང་ཁག་ལ་བརྡལ་བཤིག་གཏོང་བཞིན་ཡོད་དེ། འགྲོ་བ་མིའི་གཞི་རྩའི་བདེ་འཇགས་དང་ཆེ་མཐོང་གི་ཐོབ་ཐང་། མི་སྤྱོད་ལས་འདས་པའི་མནར་གཅོད་མྱོང་མི་དགོས་པའི་རང་དབང་། འཛིན་བཟུང་བཀག་ཉར་སྐབས་མིའི་འདུ་ཤེས་འཛིན་དགོས་པའི་ཐོབ་ཐང་། ཁྲིམས་གཏུགས་ཀྱི་ཐོབ་ཐང་། དྲང་བདེན་ཁྲིམས་གཅོད་ཀྱི་ཐོབ་ཐང་། ཁྱིམ་ཚང་དང་ཚེ་སྲོག་གི་ཐོབ་ཐང་སོགས་བརྡལ་བཤིག་གཏོང་བ་ཞིག་ཆགས་ཡོད།

གནས་ཚུལ་གྱི་རྒྱབ་ལྗོངས།

     ཕྱི་ལོ་༡༩༩༥ཟླ་༥་༡༤ཉིན། བོད་ཀྱི་བླ་མ་མེད་པའི་དབུ་འཁྲིད་སྤྱི་ནོར་༸གོང་ས་སྐྱབས་མགོན་ཆེན་པ་མཆོག་གིས་༸པཎ་ཆེན་སྐུ་ཕྲེང་བཅུ་པའི་ཡོང་དུ་ངོས་འཛིན་ཀྱིས་གསལ་བསྒྲགས་གནང་རྗེས། ཕྱི་ཉིན་༡༥ཉིན། རྒྱ་གཞུང་གིས་༸གོང་ས་མཆོག་གིས་ངོས་འཛིན་གནང་བའི་༸པཎ་ཆེན་དགེ་འདུན་ཆོས་ཀྱི་ཉི་མ་ངོས་འཛིན་དང་ཁས་ལེན་མེད་རབས་ཀྱི་གསལ་བསྒྲགས་སྐྱོང་བ་མ་ཟད། ཕྱི་ཚེས་༡༧ཉིན་༸པཎ་ཆེན་རིན་པོ་ཆེ་དང་༸ཁོང་གི་ཡབ་ཡུམ་འཁོར་དང་བཅས་ནག་ཆུ་ས་གནས་ལྷ་རི་རྫོང་བཞུགས་གནས་ནས་བཙན་འཁྲིད་བྱས་མ་ཟད། ལོ་དེའི་ཕྱི་ཟླ་༡༡ཚེས་༢༩ཉིན་རྒྱ་གཞུང་གིས་ཆབ་སྲིད་ཀྱི་དགོས་མཁོ་ཁོ་ནའི་དབང་གིས་རྒྱལ་མཚན་ནོར་བུ་ཟེར་བའི་བོད་མི་ཕྲུ་གུ་ཞིག་༸པཎ་ཆེན་སྐུ་ཕྲེང་བཅུ་བའི་ཡོང་སྲིད་དུ་ངོས་འཛིན་དང་བསྐོ་བཞག་བྱས།

རྒྱ་གཞུང་གིས་༸པཎ་ཆེན་རིན་པོ་ཆེ་ཡི་ཡོང་སྲིད་ཐུགས་ཐག་ཆད་པའི་ཐད་ལ། བོད་ཕྱི་ནང་གཉིས་ནས་བསྟུད་མར་ངོ་རྒོལ་དང་། ལྷག་པར་རྒྱལ་སྤྱིའི་གནོན་ཤུགས་འོག ཕྱི་ལོ་༡༩༩༦ཟླ་༥ཚེས་༡༤ཉིན། རྒྱ་གཞུང་གིས་༸པཎ་ཆེན་དགེ་འདུན་ཆོས་ཀྱི་ཉི་མའི་ཕ་མའི་རེ་བ་ལྟར། ཁ་བྲལ་རིང་ལུགས་པས་༸ཁོང་བཙན་འཁྲིད་བྱ་རྒྱའི་ཉེན་ཁ་ཡོད་པར་བརྟེན། ཕྲུ་གུ་དཀྱུས་མ་ཞིག་གི་བདེ་འཇགས་ཆེད་ང་ཚོས་སྲུང་སྐྱོབ་བྱེད་བཞིན་ཡོད་སྐོར་བརྗོད་ཡོད་ལ། ཡང་རྒྱལ་སྤྱིའི་ཚོགས་སྡེ་ཁག་གིས་མུ་མཐུད་རྒྱ་གཞུང་ལ་༸པཎ་ཆེན་རིན་པོ་ཆེ་མཆོག་དང་ཁོང་གི་ཡབ་ཡུམ་ནང་མི་བཅས་ཀྱི་གནད་སྟངས་སྐོར་ནས་དྲི་བརྩད་མང་པོ་བྱས་ནས་སུན་གཙེར་བྱས་རྐྱེན། ཕྱི་ལོ་ ༢༠༡༥ ཟླ་ ༩ ཚེས་ ༦ ཉིན། བོད་རང་སྐྱོང་ལྗོངས་ཀྱི་འཐབ་ཕྱོགས་གཅིག་གྱུར་ལས་བྱེད་ནོར་བུ་དོན་འགྲུབ་ཀྱིས་གསར་འགོད་པའི་དྲི་བར་ལན་འདེབས་སྐབས། ༧པཎ་ཆེན་དགེ་འདུན་ཆོས་ཀྱི་ཉི་མ་མཆོག་གིས་ “སློབ་སྦྱོང་བྱེད་མུས་ཡིན་པ། བདེ་ཐང་ངང་འཚར་ལོངས་དང་རྒྱུན་ལྡན་གྱི་འཚོ་བ་རོལ་བཞིན་ཡོད་པ། ཁོང་གིས་དཀའ་རྙོག་བར་ཆད་གང་ཡང་མྱོང་འདོད་མེད།” སྐོར་ཙམ་ལས། དོན་དངོས་ཐོག་༧པཎ་ཆེན་རིན་པོ་ཆེ་མཆོག་དང་ཁོང་གི་ཡབ་ཡུམ་ནང་མི་བཅས་ཀྱི་ད་ལྟའི་གནས་སྟངས་དང་། ཁོང་རྣམས་གར་ཡོད་གང་གནས་ཀྱི་གནས་ཚུལ་སོགས་རྩ་བ་ནས་འགྲེལ་བརྗོད་བྱས་མེད་པ་རེད།

ཡང་རྒྱ་གཞུང་གིས་ནམ་རྒྱུན་ཁུངས་ལྡན་ཡིད་ཆེས་འཕེར་བའི་བདེན་དཔང་གང་ཡང་སྟོན་རྒྱུ་མེད་པར། ༸པཎ་ཆེན་རིན་པོ་ཆེ་མཆོག་བདེ་ཐང་ངང་འཚར་ལོངས་འབྱུང་བཞིན་ཡོད་ལུགས་བཤད་དེ། རྒྱལ་སྤྱིའི་སྤྱི་ཚོགས་ཀྱི་གླེང་སློང་དང་གནོན་ཤུགས་ལ་གཡོལ་ཐབས་བྱེད་ཀྱིན་ཡོད། དེ་སྔོན་མཉམ་སྦྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ནས་ཀྱང་། ༸པཎ་ཆེན་རིན་པོ་ཆེ་མཆོག་དང་ཐད་ཀར་ཐུགས་འཕྲད་ཡོང་རྒྱུར་འབོད་སྐུལ་རིམ་པར་ཞུས་ཡོད་ཀྱང་རྒྱ་གཞུང་གིས་ཁས་ལེན་རྩ་བ་ནས་བྱས་མེད།

སྤྱིར་སྤྲུལ་སྐུ་ངོས་འཛིན་ཞེས་པ་ནི་གོང་རིམ་གྱིས་བསྐོ་གཞག་གམ། མང་ཚོགས་ཀྱིས་འདེམས་སྒྲུག ཡང་ན་གདན་ཐོབ་དང་གོ་གནས་སྦྱིན་པ་ལྟ་བུ་མ་ཡིན་པར་སྐུ་གོང་མ་དེ་ཉིད་སླར་ཡང་སྐྱེ་བ་གང་དུ་བཞེས་པ་དེ་འཚོལ་སྒྲུག་བྱེད་རྒྱུ་ཡིན་པས། དེ་ནི་སྤྲུལ་སྐུ་རང་ཉིད་ཀྱིས་སྔོན་གནས་རྗེས་དྲན་གྱི་དན་རྟགས་དང་། མངོན་ཤེས་ཅན་གྱི་བླ་མའམ་ལྷ་སྲུང་། ཡང་ན་ཆོས་ཕྱོགས་ཀྱི་བརྟག་དཔྱད་བྱ་བའི་ཐབས་ལམ་གཞན་དག་གི་བརྒྱུད་ནས་ངོས་འཛིན་བྱ་རྒྱུ་མ་གཏོགས། རྒྱ་གཞུང་གིས་དགོས་པ་རྒྱུ་མཚན་བྱེ་བྲག་ཅིག་དབང་གིས་ཐག་ཆོད་ཆོག་པ་ཞིག་གཏན་ནས་མིན། དེ་བས་རྒྱ་གཞུང་གི་བྱེད་བབ་དེ་ནི་བོད་ཀྱི་ཆོས་དང་རིག་གཞུང་། ཡུལ་སྲོལ་གོམས་གཤིས་སོགས་བོད་མིའི་ངོ་བོ་རྩ་གཏོར་དང་། བོད་ཀྱི་སྣོད་བཅུད་གཉིས་ཀ་རྩ་བརླག་ཏུ་གཏོང་ཐབས་ཀྱི་མི་སེར་སྤེལ་བའི་དབང་བསྒྱུར་གྱི་རྔམ་གནག་སྲིད་ཇུས་ཤིག་ཆགས་ཡོད།

About Tibetan Section TCHRD

Check Also

༢༠༠༨ལོའི་ཞི་རྒོལ་གྱི་སྣེ་ཁྲིད་པར་བསྙད་ནས་འཇུ་བཟུང་བྱས་པའི་དགེ་འདུན་པ་ཞིག་ལོ་བཅུའི་བཙོན་འཇུག་དུས་ཡུན་ཚང་ནས་གློད་གྲོལ་བྱུང་འདུག

རྒྱ་གཞུང་གིས་༢༠༠༨ལོའི་ཞི་རྒོལ་ཆེན་མོའི་འགོ་ཁྲིད་ལ་བསྙད་ནས་འཇུ་བཟུང་བྱས་པའི་གཙང་དགོན་པའི་དགེ་འདུན་པ་མཆོག་སྤྲིན་རྒྱ་གློད་གྲོལ་གྱི་ཚུར་ཁྱིམ་དུ་འབྱོར་ཡོད་འདུག འདི་ག་ལྟེ་གནས་ཁང་དུ་ཁུངས་ལྡན་གནས་ཚུལ་འབྱོར་གསལ་ལྟར་ན། ཟླ་འདིའི་ཕྱི་ཚེས་༡༥་ཉིན་གྱི་བོད་ནང་གི་ཕྱི་དྲོ་ཆུ་ཚོད་༥ཡས་མས་སུ། མདོ་སྨད་གཙང་དགོན་པའི་དགེ་འདུན་པ་མཆོག་སྤྲིན་རྒྱ་མཚོ་ལགས་ཟི་ལིང་ཏོ་པ་བཙོན་ཁང་ནས་ལོ་༡༠བཙོན་འཇུག་དུས་ཡུན་ཚང་ནས་གློད་གྲོལ་བྱས་ཡོད་འདུག་ལ། ཟི་ལིང་ནས་གཙང་ཨ་རིག་གི་རང་ཁྱིམ་དུ་འབྱོར་དུས་མཚན་དཀྱིལ་རེད་ཡོད་འདུག དེ་ནི་རྒྱ་གཞུང་གིས་དེ་སྔ་ནས་དགེ་འདུན་པ་ཁོང་ཚུར་འབྱོར་བར་གཟབ་རྒྱས་ཕེབས་བསུ་དང་པར་སོགས་རྒྱག་མི་ཆོག་པའི་བཙན་བཀའ་བཏང་ཡོད་པ་བཞིན་འཆར་གཞི་ལྡན་པའི་གོ་སྒྲིག་ཅིག་ཡིན་འདུག ༢༠༠༨ལོའི་ཟླ་༣་ཚེས་༡༧ཉིན།  བོད་ས་ཁྱོན་ཡོངས་ལ་ས་བྱི་ཞི་རྒོལ་ཆེན་མོ་བྱུང་བ་བཞིན། མདོ་སྨད་གཙང་དགོན་པའི་ལྷ་སྡེ་མི་སྡེ་གཉིས་ངོས་ནས་སྔ་ཕྱི་ཞི་རྒོལ་དང་སྐད་འབོད་གནང་བར། རྒྱ་གཞུང་གིས་དེ་མུར་ཞི་རྒོལ་གྱི་འགོ་འཁྲིད་བྱེད་མཁན་དུ་བསྙད་ནས། གཙང་དགོན་པའི་དགེ་འདུན་པ་མཆོག་སྤྲིན་རྒྱ་མཚོ་དང་། མཁས་སྒྲུབ་རྒྱ་མཚོ། ཚུལ་བཟང་རྒྱ་མཚོ་བཅས་སྔ་ཕྱི་རུ་འཇུ་བཟུང་བཙན་འཁྲིད་ཀྱིས། ཁོང་ཚོར་ཕྱི་ཕྱོགས་ལ་ངན་འབྲེལ་ཡོད་པ་དང་། ཞི་རྒོལ་གྱི་སྣེ་འཁྲིད་ཡིན་པའི་ཉེས་འཛུགས་འོག མཆོག་སྤྲིན་རྒྱ་མཚོ་དང་མཁས་གྲུབ་རྒྱ་མཚོ་ཁོང་གཉིས་ལ་བཙོན་ཐག་༡༠རེ་བཅད་པ་དང་། …

Leave a Reply

Your email address will not be published. Required fields are marked *