Thursday , May 25 2017
Home / གསར་འགྱུར། / ཨ་མདོ་རྔ་བ་ནས་༣་༡༦དམར་གསོད་ཆེན་མོ་རྗེས་དྲན་གྱི་ཞི་རྒོལ་མུ་མཐུད་འབྱུང་བཞིན་འདུག

ཨ་མདོ་རྔ་བ་ནས་༣་༡༦དམར་གསོད་ཆེན་མོ་རྗེས་དྲན་གྱི་ཞི་རྒོལ་མུ་མཐུད་འབྱུང་བཞིན་འདུག

དགེ་འདུན་པ་བློ་བཟང་དར་རྒྱས།

༣ཿ་༡༦་རྔ་བའི་དམར་གསོད་ཆེན་མོའི་དུས་དྲན་ལ་སྲུང་བརྩི་བྱས་དབང་གིས། ཨ་མདོ་རྔ་བ་རྫོང་སྲིད་གཞུང་གིས་ཉེ་བའི་བདུན་ཕྲག་ནང་། རྔ་བའི་དགེ་འདུན་པ་ཞིག་དང་བུད་མེད་ཅིག་འཇུ་བཟུང་བཀག་ཉར་བྱས་འདུག

རྔ་བ་ཀིརྟི་དགོན་པ་ནས་ཡིན་པའི་དགེ་འདུན་པ་བློ་བཟང་དར་རྒྱས་ལགས་ཀྱིས་ཟླ་འདིའི་ཕྱི་ཚེས་༡༦ཉིན། རྔ་བ་རྫོང་གི་དཔའ་བོ་སྲུང་ལམ་དུ་ཁེར་རྐྱང་ངོ་རྒོལ་གྱི་གོམ་བགྲོད་བྱས་ནས་ཅུང་མ་འགོར་བར། ཉེན་རྟོག་པ་གློ་བུར་སླེབས་ནས་འཇུ་བཟུང་བཙན་འཁྲིད་བྱས་འདུག་ལ། ཁོང་གིས་གོམ་བགྲོད་སྐབས་སུ་༸གོང་ས་མཆོག་བོད་དུ་ཕེབས་བཅུག་དགོས་ཡོད། བོད་ལ་རང་དབང་དགོས་ཞེས་འབོད་ཚིག་སྒྲོག་ཡོད་པ་གསལ་འདུག

རྒྱ་གཞུང་གིས་ཕྱི་ཟླ་༣ནང་། བོད་ཁུལ་གྱི་སྤྱི་ཚོགས་ཀྱི་བདེ་འཇགས་དང་བརྟན་ལྷིང་སྲུང་སྐྱོབ་ཅེས་དུས་རྒྱུན་ཁྲོམ་སྲིང་དུ་ཉེན་རྟོག་པ་འབོར་ཆེན་འགྲེམས་འཇོག་དང་།    སྤྱི་ཚོགས་དྲ་ལམ་ཁག་བཀག་སྡོམ་ཤུགས་ཆེར་བྱས་དབང་གིས། གནས་ཚུལ་ཁག་ཕྱི་ཕྱོགས་སུ་བརྡ་ལན་བྱེད་རྒྱུ་ཇེ་དཀའ་རུ་སོང་དབང་གིས། བློ་བཟང་དར་རྒྱས་ཀྱི་གནས་ཚུལ་གྱི་དངོས་སུ་བྱུང་ནས་བདུན་གཅིག་འགོར་རྗེས་མ་གཏོགས། ཁོང་གི་མིང་དང་ཕའི་མིང་ལ་མགོན་པོ་དང་། མའི་མིང་ལ་བསོད་ནམས་སྐྱིད། རྔ་བ་གཅའ་རོ་སྟོད་མ་ནས་ཡིན་པ་ཙམ་ལས། ཁོང་གི་ད་ལྟའི་གནས་སྟངས་དང་་གང་དུ་བཀག་ཉར་བྱས་ཡོད་མེད་སོགས་ཤེས་རྟོགས་མ་ཐུབ་པར་ལྷག་ཡོད།

གདུགས་བྷེ།

ཡང་ཟླ་འདིའི་ཕྱི་ཚེས་༡༨ཉིན། དམར་གསོད་ཆེན་མོར་རྗེས་དྲན་མྱ་ངན་གྱི་སླད་དུ། ཕྲུ་གུ་གཉིས་ཀྱི་ཨ་མ་ཡིན་པའི་བུད་མེད་གདུགས་བྷེ་ཞེས་པ་ཞིག་གིས་ཀྱང་ཁེར་རྐྱང་ངོ་རྒོལ་གནང་བ་དང་། དེ་མུར་ཉེན་རྟོག་པ་སླེབས་ནས་ཁོང་མོ་འཇུ་བཟུང་བཙན་འཁྲིད་བྱས་རྗེས། ད་ལྟའི་ཆར་ཁོང་མོ་གང་དུ་བཀག་ཉར་བྱས་ཡོད་མེད་སོགས་གསལ་ཁ་མ་ཐུབ་པར་བསྡད་ཡོད། དེ་སྔ་ཁོང་མོས་རྔ་བ་ཀིརྟི་དགོན་ཆེན་གྱི་མདུན་དུ་ཡོད་པའི་སྟོན་པའི་སྐུ་འདྲར་གཙང་བཟོ་ཡི་ལས་ཀ་བྱས་ཀྱི་ཡོད་ཅིང་། རྔ་བ་རྫོང་ར་རུ་ཞང་ནས་ཡིན་ཞིང་། ཁོང་མོའི་བཟའ་ཟླའི་མིང་ལ་བསོད་ནམས་དང་། ཨ་ཕའི་མིང་ལ་སྔགས་ཆུང་དང་ཨ་མའི་མིང་ལ་དཔལ་སྐྱིད་རེད་འདུག

ཡང་འདི་ལོའི་ཁེར་རྐྱང་ངོ་རྒོལ་ཐོག་མ་དེ་ཉིད། ཕྱི་ཟླ་༢ཚེས་༢༥ཉིན། དགེ་འདུན་པ་བློ་བཟང་ཚུལ་ཁྲིམས་ལགས་ཀྱི་བོད་ལུགས་ཀྱི་ལོ་སར་དགུ་ཐུག་ཉིན་མོར་རྔ་བ་རྫོང་ཐོག་ནས། ༸གོང་ས་མཆོག་གི་སྐུ་པར་ཁྱེར་ནས་བོད་ལ་རང་དབང་དགོས། ༸གོང་ས་མཆོག་བོད་དུ་ཕེབས་དགོས་ཡོད་ཅེས་སྐད་འབོད་བྱས་ཞོར་གོམ་བགྲོད་བྱས་ནས་ཅུང་མ་འགོར་བས། ས་གནས་ཉེན་རྟོག་པ་སླེབས་ནས་འཇུ་བཟུང་བཙན་འཁྲིད་བྱས་པ་ལས། ཞིབ་ཕྲའི་གནས་ཚུལ་གང་ཡང་ཤེས་རྟོགས་ཐུབ་ཀྱི་མེད་པ་རེད།

ཕྱི་ལོ་༢༠༠༨ཟླ་༣ཚེས་༡༦ཉིན། རྔ་བ་ཀིརྟིའི་དགོན་པའི་དགེ་འདུན་པ་རྣམས་ཀྱིས་བཀག་སྡོམ་བྱས་པའི་བོད་ཀྱི་རྒྱལ་དར་ཁྱེར་ནས་ཞི་བའི་ངོ་རྒོལ་གནང་ནས་ཅུང་མ་འགོར་པར། བོད་མི་མི་སྐྱ་ཕོ་མོ་གང་མང་ཞིག་ཀྱང་མཉམ་ཞུགས་ཀྱི་སྐད་འབོད་བྱས། སྐྱ་སེར་མཉམ་འདུ་ཡི་ངོ་རྒོལ་ལས་འགུལ་དེ་ཉིད་སྤེལ་ནས་ཆུ་ཚོད་རིང་བོ་མ་སོང་བར།

དགེ་འདུན་པ་བློ་བཟང་ཚུལ་ཁྲིམས།

གློ་བུར་དགོན་པའི་ལྕགས་རའི་ནང་དུ་རྒྱ་མའི་བདེ་འཇགས་མི་སྣ་འབོར་ཆེན་སླེབས་ནས་ཞི་རྒོལ་བོད་མིའི་སྟེང་དུ་མིག་སྒྲིབ་རླུང་དབུགས་གཏོར་བ་མ་ཟད། ལྕགས་རའི་ཕྱི་རུ་ཐོན་དུ་མ་བཅུག་པས། དམངས་ཚོགས་འཚིང་ཁ་ཇེ་ཆེར་སོང་བའི་ཁྲོད་མེ་མདའ་གང་བྱུང་རྒྱབ་ནས་མི་གྲངས་༡༥ལྷག་ཙམ་དེ་མུར་བསད་ཡོད་ལ། བརྒྱ་ཕྲག་མང་བོ་རྨས་སྐྱོན་འཚབ་ཆེན་བྱུང་མིན་ལ་མ་ལྟོས་པར། ཉེན་རྟོག་པས་ནང་འཁྲོལ་དང་སྒྱུད་མ་སོགས་ཕྱི་རུ་ཐོན་ཞིང་། ཁྲག་གིས་འཚོས་པའི་བེམ་པོ་རྣམས་མི་དམངས་ཀྱི་མིག་མདུན་དུ་བསྒྲིགས་ནས་འཇིགས་སྐུལ་བྱས་ཡོད།

མཉམ་འབྲེལ་རྒྱལ་ཚོགས་ཀྱིས་༢༠༠༨་གྱི་མནར་གཅོད་གཏན་བཀག་སྡོམ་ཚན་པའི་ངོས་ནས།  རྔ་བ་དང་དཀར་མཛེས། ལྷ་སའི་ཕྱོགས་ཀྱི་བོད་མི་ཞི་རྒོལ་བའི་སྟེང་དུ་ཉེན་འཇགས་ཉེན་རྟོག་པས་དྲག་གནོན་བྱས་པ་བརྒྱུད་ཤི་རྨས་བྱུང་བའི་བོད་མི་ཐད་ལ་རྩད་གཅོད་འདྲི་ཞིབ་བྱས་ཀྱང་། རྒྱ་གཞུང་གིས་དེའི་ཐད་ལ་ལན་འདེབས་བྱས་ཐུབ་མེད་ལ། དེ་བཞིན་ཕྱི་ལོ་༢༠༡༥ཟླ་༡༢ནང་། རྒྱལ་ཚོགས་ཀྱིས་རྒྱ་ནག་གི་དུས་བཀག་བསྐྱར་ཞིབ་ཐེངས་༥ སྐབས་སུའང་གོང་གི་འདྲི་བ་དང་ལྷག་པར་བོད་མི་༢༤ནས་༢༦ཙམ་གྱི་མིང་འདོན་བྱས་ནས་དེ་དག་གི་གནས་སྟངས་དང་ཅི་ཞིག་སྐོར་རྒྱ་ནག་ལ་བྲིས་ཀྱང་། སླར་ཡང་ལན་འདེབས་མ་ཐུབ་པར་ལྷག་པ་རེད།

About Tibetan Section TCHRD

Check Also

རང་ལུས་མེར་བསྲེགས་གནང་མཁན་ཞིག་གི་ཕུང་བོར་འཐམ་ནས་བོད་དོན་སྐད་འབོད་བྱས་པའི་བུད་མེད་ཚེ་སྒྲུབ་སྐྱིད་ལོ་བཞིར་བཙོན་འཇུག་གི་དུས་ཡུན་ཚང་ནས་གློད་གྲོལ་བྱུང་འདུག

འདི་ག་ལྟེ་གནས་ཁང་ལ་གནས་ཚུལ་འབྱོར་གསལ་ལྟར་ན། ཕྱི་ཟླ་༤ཚེས་་༥ཉིན། ཨ་མདོ་རྔ་བའི་ཆོས་རྗེ་མ་ནས་ཡིན་པའི་བུད་མེད་ཚེ་སྒྲུབ་སྐྱིད་ཅེས་པ་ཞིག་ཟི་ཁྲོན་མན་ཡང་བཙོན་ཁང་ནས་གློད་གྲོལ་གྱིས་ཚུར་ཁྱྲིམ་དུ་འབྱོར་དུས་མཚན་དཀྱྲིལ་ཆགས་ཡོད་ཀྱང་། ནང་མི་གཉེན་ཚན་དང་ཡུལ་མི་༢༠༠ལྷག་གིས་སྣེ་ཕེབས་གཟབ་རྒྱས་ཞུས་ཡོད་འདུག དུས་རྒྱུན་རྒྱ་གཞུང་གིས་བོད་ཐོག་འཛིན་པའི་དམ་དྲག་སྲིད་ཇུས་དང་དོ་དམ་ནན་ཏིག་གིས་དབང་གིས་གནས་ཚུལ་ཁག་དུས་ཐོག་ཕྱི་ཕྱོགས་སུ་མཁོ་སྤྲོད་དང་ལག་སོན་ཁག་པོ་ཡོད་པ་བཞིན། འདི་ག་ལྟེ་གནས་ཁང་གི་ཆབ་སྲིད་བཙོན་པའི་ཐོ་གཞུང་དང་སྤྱི་ཚོགས་བརྒྱུད་ལམ་ཁག་ཏུ་ཚེ་སྒྲུབ་སྐྱིད་དེ་སྔ་འཇུ་བཟུང་བྱས་པའི་གནས་ཚུལ་གང་ཡང་ཐོན་མེད་པས། འདི་ག་ལྟེ་གནས་ཁང་གི་གནས་ཚུལ་མཁོ་འདོན་མཁན་ལ་འདྲི་བརྩད་བྱས་པ་བརྒྱུད། དེ་སྔ་ཕྱི་ལོ་༢༠༡༢ཟླ་༡༢ཚེས་༣ཉིན། ཨ་མདོ་མགོ་ལོག་པདྨ་རྫོང་སེ་ལེ་ཐང་ཡུལ་ཚོ་ནས་ཡིན་པའི་གྲྭ་བློ་བཟང་དགེ་འདུན་ལགས་ཀྱིས་རྒྱ་རྒོལ་གྱི་རང་ལུས་མེར་བསྲེགས་གནང་རྗེས་སྐུ་འདས་སུ་སོང་ཞིང་། འདས་པོའི་སྐུ་ཕུང་རྒྱའི་ཉེན་རྟོག་པའི་ལག་ཏུ་མི་ཤོར་བའི་ཆེད་དུ། སྐབས་དེར་ཡོད་པའི་ཡུལ་མི་དང་གཡས་གཡོན་གྱི་མིས་སྐུ་ཕུང་དགོན་པར་འོར་འདྲེན་དང་ཉེན་རྟོག་པ་བཀག་སྡོམ་བྱས་པའི་ཁ་ཐུག་ཏུ། ཚེ་སྒྲུབ་སྐྱིད་ཀྱིས་འདས་པོའི་སྐུ་ཕུང་ལ་ཇུས་ནས། བོད་ལ་རང་དབང་དགོས། རྒྱལ་བ་རིན་པོ་ཆེ་ཕེབས་འཇུག་དགོས་ཞེས་སྐད་འབོད་བྱས་དབང་གིས་རུང་མིན་ཉེན་རྟོག་པས་འཇུ་བཟུང་བཙན་འཁྲིད་ཡོད་ཚོད་འདུག་ལ། ཕྱི་ལོ་༢༠༡༣ཟླ་༤ཚེས་༥ཉིན། …

Leave a Reply

Your email address will not be published. Required fields are marked *