Friday , September 20 2019
Home / གསར་འགྱུར། / བླ་རུང་ནང་བསྟན་སློབ་གླིང་གཏོར་བཤིག་ལས་རྒྱ་ནག་གཞུང་གི་ཆོས་ལུགས་སྲིད་ཇུས་ཀྱི་གདོང་རིས་ངོ་མ་མངོན།

བླ་རུང་ནང་བསྟན་སློབ་གླིང་གཏོར་བཤིག་ལས་རྒྱ་ནག་གཞུང་གི་ཆོས་ལུགས་སྲིད་ཇུས་ཀྱི་གདོང་རིས་ངོ་མ་མངོན།

བོད་ཀྱི་ནང་ཆོས་སློབ་སྦྱོང་དང་ཉམས་ལེན་བྱེད་སའི་ལྟེ་གནས་གལ་ཆེན་བླ་རུང་ནང་བསྟན་སློབ་གླིང་གཏོར་བཤིག་དང་གྲྭ་བཙུན་ཕྱིར་འབུད་གཏོང་བཞིན་པའི་གནས་ཚུལ་འདིས་བདེན་དབང་བྱས་པ་ནི།བོད་པའི་རྒྱ་ཆེ་དད་ལྡན་མི་དམངས་ལ་མཚོན་ན་དོན་དན་གྱི་ཆོས་དད་རང་དབང་ནི་ཧ་ཅང་རྒྱང་ཐག་རིང་བ་ཞིག་ཡིན། འདི་ལོའི་ཕྱི་ཟླ་༧བའི་ཚེས་༢༠ནས་བཟུང་རྒྱ་ནག་གཞུང་གིས་གླས་བའི་གཏོར་བཤིག་དཔུང་སྡེ་བླ་རུང་ནང་བསྟན་སློབ་གླིང་དུ་ཡོང་ནས་གྲྭ་ཤག་སོགས་གཏོར་བཤིག་ལས་གཞི་འགོ་འཛུགས་གནང་ཡོད་པ་རེད།དེ་སྔོན་རྒྱ་ནག་གཞུང་གི་འཆར་གཞི་ལྟར་ན་ད་ལོའི་ལོ་མཇུག་པར་དུ་བླ་རུང་ནང་བསྟན་སློབ་གླིང་གི་གྲྭ་ཤག་ཕྱེད་ཀ་གཏོར་བཤིག་གཏོང་རྒྱུ་ཡིན་པ་དང་།  གྲྭ་བཙུན་སྟོང་ཕྲག་མང་པོ་ཕྱིར་འབུད་གཏོང་ནས་གྲྭ་བཙུན་༥༠༠༠ཡི་ཚད་བཀག་བཟོ་ཡོད་པ་རེད།   དེའི་ནང་གྲྭ་བ་༢༠༠༠་དང་བཙུན་མ་༣༠༠༠ལས་གཞན་ཚང་མ་ཕྱིར་འབུད་གཏོང་རྒྱུ་ཡིན་པ་རེད།བླ་རུང་ནང་བསྟན་སློབ་གླིང་གཏོར་བཤིག་མ་བཏང་བའི་སྔོན་དུ་གྲྭ་བཙུན་ཆིག་ཁྲི་ཡས་མས་ཀྱིས་བོད་ཀྱི་ནང་ཆོས་ལ་སློབ་སྦྱོང།   ཞིབ་འཇུག་དང་ཉམས་ལེན་བྱེད་ཀྱི་ཡོད་པ་རེད།

བླ་རུང་ནང་བསྟན་སློབ་གླིང་དུ་བོད་ཀྱི་ནང་ཆོས་རང་དབང་གིས་སློབ་སྦྱོང་དང་ཉམས་ལེན་བྱེད་མཁན་སྟོང་ཕྲག་མང་པོ་ཡོད་པའི་ནང་ངུ་བོད་པ།སོག་པོ་དང་རྒྱ་ནག་པ་སོགས་ཚུད་ཡོད།བླ་རུང་ནང་བསྟན་སློབ་གླིང་༡༩༨༧ལོར་ཕྱག་བཏབ་དང་དབུ་བརྙེས་པ་ནས་བཟུང་རྒྱ་ནག  ཐེ་ལེན། ཐེ་ཝེན།ཧང་ཀང་།སིན་གཱ་པོ།མ་ལེ་ཤི་ཡ།ཀོ་རེ་ཡ་སོགས་ནས་སློབ་གཉེར་བྱེད་མཁན་རྒྱུན་ཆད་མེད་པར་ཡོང་གི་པ་རེད།དེ་བཞིན་རྒྱ་ནག་རྒྱལ་ཡོངས་ཀྱི་ནང་བསྟན་སློབ་གཉེར་བ་དང་།  ལྗོངས་ལྔ།དེ་བཞིན་ཐད་སྐྱོང་གྲོང་ཁྱེར་བཞིའི་ནང་གི་ཞིབ་འཇུག་ཚན་པའི་དུས་སྐབས་མི་འདྲ་བའི་ཞིབ་འཇུག་དང་སློབ་གཉེར་བྱེད་བཞིན་ཡོད་པ་དང།བོད་པའི་སློབ་གཉེར་བ་ལ་མཚོན་ན་ཡང་ལྷ་ས།མངའ་རིས།ནག་ཆུ།ཆབ་མདོ།གསེར་རྟ། རྟའུ།དར་རྩེ་མདོ།དཀར་མཛེས།སྡེ་དགེ     ཉག་རོང་།མགོ་ལོག  བྲག་མགོ ཡུལ་ཤུལ།བླ་བྲང་།མཚོ་སྔོན་སོགས་ནས་ཡོད།

བོད་ཀྱི་འགྲོ་བ་མའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་ལ་འབྱོར་པའི་གནས་ཚུལ་ལྟར་ན་བླ་རུང་ནང་བསྟན་སློབ་གླིང་དུ་ཡོད་པའི་རྒྱ་ནག་དང་ཕྱི་རྒྱལ་གྱི་སློབ་གཉེར་བ་འབོར་ཆེན་ཕྱིར་འབུད་གཏོང་བཞིན་ཡོད་པ་དང་།  བླ་རུང་ནང་བསྟན་སློབ་གླིང་གི་སྐྱ་བོ་དང་སྔགས་པ་ཕྱིར་འབུད་ལས་འགུལ་ནང་ཚུད་མེད་པ་རེད།དེ་ལས་གཞན་གྲྭ་བཙུན་རྒན་གྲས་རིགས་ཕྱིར་འབུད་གཏོང་རྒྱུ་མིན་པར་བརྗོད། གྲྭ་བཙུན་གྲངས་འབོར་མང་པོ་ད་ལོ་ཕྱི་ཟླ་༧བའི་ཚེས་༢༠སྔོན་ལ་ཕྱིར་འབུད་བཏང་ཟིན་པ་རེད། ༢༠༡༣ལོར་བོད་ཀྱི་འགྲོ་བ་མའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་ལ་འབྱོར་བའི་གནས་ཚུལ་ལ།བོད་རང་སྐྱོང་ལྗོངས་ཟེར་བའི་ནང་གི་བཙུན་མ་སུ་ཞིག་གལ་ཏེ་བླ་རུང་ནང་བསྟན་སློབ་གླིང་དུ་ཕྱིན་ནས་སློབ་སྦྱོང་བྱས་པ་ཡིན་ན་བཀག་ཉར་དང་ཡང་ན་ཁྲིམས་གཅོད་གནང་རྒྱུ་ཡིན་པའི་འཇིགས་སྣང་སྐུལ་འདུག        ༢༠༡༤ལོར་ཆབ་མདོ་དང་འབྲི་རུ་སོགས་སུ་རྒྱ་ནག་གཞུང་གིས་གལ་ཏེ་སོ་སོའི་ནང་མིས་བླ་རུང་ནང་བསྟན་སློབ་གླིང་དང་ཡ་ཆེན་སྒར་དུ་སློབ་གཉེར་བྱེད་མཁན་ཡོད་ན་དུས་ལྟར་ཕྱིར་རང་ཡུལ་དུ་ལོག་དགོས་པ་དང་གལ་ཏེ་མ་ལོག་ན་ཐེམ་ཐོ་མེད་པར་བཟོ་རྒྱུ་ཡིན་པའི་འཇིགས་སྐུལ་ཡང་བྱས་འདུག

བླ་རུང་སྒར་ནི་གྲྭ་བ་དང་བཙུན་མར་གཅིག་མཚུངས་ཀྱི་སློབ་གཉེར་གོ་སྐབས་གནང་མཁན་གྱི་ནང་བསྟན་སློབ་གླིང་སྔ་གྲས་ཤིག་ཡིན།བླ་རུང་ནང་བསྟན་སློབ་གླིང་དུ་བཙུན་མའི་ཆེས་མཐོ་སློབ་གཉེར་ཁང་བཙུགས་ཡོད་པ་རེད།དེ་བས་མཁན་མོ་སློབ་མཐར་ཕྱིན་མཁན་ཇེ་མང་དང་ཇེ་མང་ཡིན།མཁན་མོ་ནི་མཁན་པོ་དང་འདྲ་བའི་སློབ་སྦྱོང་གི་གནས་རིམ་ཞིག་ཡིན།དེ་ནི་དེང་གི་འབུམ་རིམ་པའི་གནས་ཚུལ་དང་མཚུངས་པ་ཡིན།སྤྱི་བཏང་ཡིན་ན་ལོ་ངོ་༡༣ལ་གཞུང་ཆེན་བཀའ་པོད་ལྔ་ལ་སློབ་སྦྱོང་བྱེད་དགོས་པ་མ་ཟད།དེ་བཞིན་སྔ་འགྱུར་རྙིང་མ་དང་བཀའ་བརྒྱུད་སོགས་ཀྱི་གཞུང་ཆེན་རྣམས་ཀྱང་སློབ་གཉེར་བྱེད་དགོས་པ་ཡིན།༡༩༩༠ལོར་སློབ་གླིང་འདི་ནས་མཁན་མོ་དང་པོ་སློབ་ཐོན་བྱུང་པ་ནས་ད་པར་བཙུན་མ་བརྒྱ་ལས་མི་ཉུང་བས་མཁན་མོ་སློབ་ཐོན་བྱུང་ཡོད།  དེ་ལས་གཞན་བཙུན་མ་མང་པོ་ཞིག་ལ་བླ་རུང་ནང་བསྟན་སློབ་གླིང་ནས་སེམས་ཁམས་དང་འཇིག་རྟེན་འཚོ་བའི་ཕྱོགས་གཉིས་ནས་ཚེ་སྲོག་གསར་བ་ཞིག་གནང་ཡོད།

ད་ལོའི་བླ་རུང་ནང་བསྟན་སློབ་གླིང་གི་གཏོར་བཤིག་སྲིད་ཇུས་འདི་༢༠༠༡ལོའི་གཏོར་བཤིག་དང་ཧ་ལས་པའི་འདྲ་བོ་རེད།ཉམས་ཞིབ་བྱས་པ་ལྟར་ན་ལོ་ངོ་༡༥ནང་རྒྱ་ནག་གི་ཆོས་ལུགས་སྲིད་ཇུས་ལ་འགྱུར་བ་གང་ཡང་བྱུང་མེད།(འདི་ན་༢༠༠༡ལོའི་བླ་རུང་སྒར་གཏོར་བཤིག་གི་སྙན་ཐོ་ཆ་ཚང་ཡོད།)གང་ལྟར་རྒྱ་ནག་གཞུང་གིས་ཡང་བསྐྱར་བླ་རུང་ནང་བསྟན་སློབ་གླིང་གཏོར་བཤིག་བྱས་པ་འདིས་རྒྱ་ནག་གཞུང་གི་འགོ་ཁྲིད། ཡང་ན་རྒྱ་ནག་གི་ནུས་སྟོབས་རྒྱལ་སྤྱིའི་ཐོག་ཤུགས་ཆེ་རུ་འགྲོ་བཞིན་པའི་སྐབས་འདིེར་འགྱུར་བ་དང་ཡང་ན་སྲིད་ཇུས་ཅི་ཞིག་ལག་བསྟར་གྱིས་བོད་ཀྱི་ཆོས་ལུགས་རང་དབང་འགན་ལེན་བྱེད་རྒྱུ་དེ་ཡིན།རྒྱ་ནག་འགོ་ཁྲིད་ཚོས་བོད་ཀྱི་ཆོས་ལུགས་མི་སྣ་དང་ཆོས་ལུགས་བྱེད་སྒོ་སོགས་ལ་དོགས་པ་དང་ཧ་ཅང་གུ་དོག་པོ་བྱེད་ཀྱི་ཡོད་པ་ཡིན། ཆབ་སྲིད་ཀྱི་རྒྱབ་ལྗོངས་མེད་ཀྱང་དེ་ལྟར་བྱེད་ཀྱི་ཡོད་པ་རེད།དོན་ངོ་མར་རྒྱ་ནག་གིས་ཆོས་ལུགས་ལ་ལག་བསྟར་བྱེད་བཞིན་པའི་སྲིད་ཇུས་ནི།དྲག་གནོན་ངོ་བོ་ཅན་གྱི་ཁྲིམས་དང་ཁྲིམས་སྲོལ་བེད་སྤྱོད།དེ་བཞིན་རྒྱལ་ཁབ་ཀྱིས་ཁྱབ་བསྒྲགས་དང་ཇུས་བཀོད་ལེགས་པར་གནང་བའི་གཟབ་ནན་གྱི་དམ་དྲག་ཡིན། ༢༠༡༦ལོར་སི་ཁྲན་ཞིང་ཆེན་གྱིས་ཁྱབ་བསྒྲགས་གནང་པའི་བླ་རུང་ནང་བསྟན་སློབ་གླིང་གཏོར་བཤིག་གི་བཀའ་རྒྱས་བོད་ཀྱི་ལས་དོན་བཞུགས་མོལ་ཚོགས་འདུ་ཐེངས་དྲུག་པ་དང་རྒྱལ་ཡོངས་ཐེངས་གཉིས་པའི་ཆོས་ལུགས་ལས་དོན་ཚོགས་འདུ་གཉིས་ལུང་འདྲེན་བྱས་ཡོད།བླ་རུང་ནང་བསྟན་སློབ་གླིང་ལ་བརྗོད་པ་ལྟར་ན་གཏོར་བཤིག་དང་ཕྱིར་འབུད་ནི་ཤི་ཅིན་ཕན་གནང་པའི་བཀའ་རྒྱ་ཡིན།ད་ལོ་ཕྱི་ཟླ་༤བའི་ཚེས་༢༢ནས་༢༣པར་གྱི་ཆོས་ལུགས་ཚོགས་འདུ་ཐོག་ཤི་ཅིན་ཕན་གྱིས། “ཀྲུང་གོ་གུང་ཁྲན་ཏང་གི་འགོ་ཁྲིད་ལ་བརྩི་བཀུར་དང་སྤྱི་ཚོགས་རིང་ལུགས་ཀྱི་ལམ་ལུགས་གོང་དུ་བཀུར་ནས་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་བགྲོད་ལམ་ཐོག་བསྐྱོད་རྒྱུ་མཐའ་འཁྱོངས་བྱེད་དགོས་པ།”ཞེས་བརྗོད་ཡོད།

༢༠༠༡ལོར་བླ་རུང་ནང་བསྟན་སློབ་གླིང་གཏོར་བཤིག་གཏོང་དུས་ཀྱང་བཀའ་རྒྱ་པེ་ཅིན་ནས་ཅིང་ཙི་མིན་ནས་ཐད་ཀར་བཏང་བ་ཡིན་པར་འགྲེལ་བརྗོད་གནང་ཡོད།འདི་ནི་༢༠༡༦ལོའི་གཏོར་བཤིག་གི་འགྲེལ་བརྗོད་ཀྱང་དེ་བཞིན་རེད།ང་ཚོས་གོང་རིམ་གྱི་བཀའ་ལག་བསྟར་བྱེད་ཀྱི་ཡོད་ཟེར་པ་ལས་ཡིག་ཐོག་གི་བདེན་དཔུང་སོགས་མེད་པ་རེད།དེ་ནི་༡༩༩༣ལོར་རྒྱལ་ཡོངས་འཐབ་ཕྱོགས་གཅིག་གྱུར་གྱི་ཚོགས་འདུ་དང་༢༠༠༡ལོའི་རྒྱལ་ཡོངས་ཆོས་ལུགས་ལས་དོན་ཚོགས་འདུ་ཐོག་ཅིང་ཙི་མིན་ནས་ཆོས་ལུགས་སྲིད་ཇུས་སྐོར་གྱི་བཀོད་པ་གསུམ་བཏང་ཡོད་པ་རེད།༡།ཕྱོགས་ཡོངས་ནས་ཏང་གི་ཆོས་དད་རང་མོས་ཀྱི་སྲིད་ཇུས་ཡང་དག་པ་ལག་བསྟར་བྱེད་དགོས་པ།༢།ཁྲིམས་ལྟར་ཆོས་ལུགས་ལས་དོན་དོ་དམ་བྱེད་དགོས།༣།ཆོས་ལུགས་དེ་སྤྱི་ཚོགས་རིང་ལུགས་སྤྱི་ཚོགས་དང་འཚམ་མཐུན་ཡོང་བར་སྣེ་ཁྲིད།

༡༩༩༤ལོར་ཅིང་ཙི་མིན་གྱིས་བོད་ཀྱི་ལས་དོན་བཞུགས་མོལ་ཚོགས་འདུ་ཐེངས་གསུམ་པ་གཙོ་སྐྱོང་གནང་ཡོད་པ་རེད།དེ་བས་ཁོ་རང་གིས་ཆོས་ལུགས་ལས་ཁུངས་བརྒྱུད་ནས་གྲྭ་བཙུན་ལ་དམ་དྲག་བྱེད་པ་ཤུགས་ཆེ་རུ་བཏང་པ་རེད།དེ་འབྲས་བུ་ནི་རྒྱལ་གཅེས་ཆོས་གཅེས་ཀྱི་ལས་འགུལ་རེད།བོད་ས་ཡོངས་སུ་བཙན་དབང་གིས་ཏཱ་ལའི་བླ་མ་སྐྱོན་བརྗོད་དང་།གུང་ཁྲན་ཏང་ལ་ལྷག་བསམ་ཡིན་དགོས་པའི་དྲག་རྡུང་ལས་འགུལ་སྤེལ་པ་རེད།

སི་ཁྲན་ཞིང་ཆེན་གྱིས་༢༠༠༡ལོའི་ཡིག་ཆ་ལྟར་ན་གྲྭ་བཙུན་༡༤༠༠དང་༢༠༡༦ལོ་ཡི་ཡིག་ཆ་ལྟར་ན་གྲྭ་བཙུན་༥༠༠༠སློབ་གླིང་དུ་སྡད་ཆོག་གི་ཡོད་པ་རེད།   གནས་སྟངས་འདི་འདྲ་གཉིས་ཀྱི་འོག་ཏུ་རྒྱ་ནག་གཞུང་གིས་སྲིད་གཞུང་འགོ་ཁྲིད་དང་གཏོར་བཤིག་ལས་བཟོ་བ་མ་སླེབས་སྔོན་ལ་སློབ་གླིང་གི་སློབ་གཉེར་བ་དག་ལ་གཟབ་ནན་ངང་རྒྱལ་གཅེས་རིང་ལུགས་ཀྱི་སློབ་གསོ་ལས་འགུལ་སྤེལ་པ་རེད།དེ་མ་ཟད་གཞུང་གིས་ས་གནས་རྫོང་དང་ཁུལ་སོགས་ཀྱི་འགོ་ཁྲིད་དང་ལས་བྱེད་འབོད་བཀུག་གིས་རང་རང་ས་གནས་ཀྱི་སློབ་གཉེར་བ་རྣམས་རང་ཡུལ་དུ་ཁྲིད་ཅིག་པ་རེད།༢༠༡༦ལོར་རྒྱ་ནག་གི་དཔོན་རིགས་ཚོས་དངུལ་བརྔན་སྤྲད་ནས་རང་འགུལ་ངང་ཕ་ཡུལ་ལོག་པའི་གཡོ་ཐབས་བྱེད་བཞིན་འདུག ༢༠༠༡ལོར་བཙུན་མ་རྣམས་ལ་བྱ་དགའ་སྣ་ཚོགས་གནང་ནས་སློབ་གླིང་དང་བྲལ་ཐབས་བྱས་ཡོད། དཔེར་ན་དངུལ།གཡག་དྲུག་གམ་འབྲི་དྲུག དེ་བཞིན་འཛུགས་སྐྲུན་དང་ཁང་པ།ལས་ཀ་སྤྲད་པ་སོགས།

ཕྱི་ལོ་༡༩༩༩ལོའི་ཟླ་བ་༣བའི་ནང་སི་ཁྲན་ཞིང་ཆེན་སྲིད་གཞུང་གིས་བླ་རུང་ནང་བསྟན་སློབ་གླིང་གི་དོ་དམ་མི་ལེགས་པ།འཕྲོད་བསྟན་ཆ་རྐྱེན་མི་ལེགས་པ་སོགས་མང་པོ་ཞིག་བགྲངས་པ་རེད།དེ་དག་ནི་༢༠༠༡ལོར་གཏོར་བཤིག་གི་སྔོན་འགྲོ་རེད།༢༠༡༦ལོའི་ཟླ་བ་༧ནང་དཀར་མཛེས་ས་གནས་སྲིད་གཞུང་གིས་ཡང་བསྐྱར་སློབ་གླིང་གི་མེ་སྐྱོན་འགོག་གསོད་བྱེད་ཐབས་ལ་དཀའ་ངལ་ཡོད་རབས་སོགས་བརྗོད་པ་རེད།སྐབས་དེར་ཁོ་ཚོས་༢༠༡༤ལོའི་ཟླ་བ་༡པོར་སློབ་གླིང་དུ་བྱུང་བའི་མེ་སྐྱོན་དོན་རྐྱེན་ཤུགས་ཆེན་གླེང་པ་རེད།མེ་སྐྱོན་དེ་ནང་གྲྭ་ཤག་༡༠༠ལྷག་ལ་མེ་སྐྱོན་བྱུང་པ་རེད།ཡིན་ཡང་མེ་སྐྱོན་བྱུང་རྐྱེན་གང་ཡིན་ཤེས་མེད་པ་རེད།ཟླ་བ་དེ་ནང་དཀར་མཛེས་ལི་ཐང་དགོན་དུ་ཡང་མེ་སྐྱོན་བྱུང་པ་རེད།དེའི་འབྱུང་རྐྱེན་ཡང་གང་ཡིན་ཤེས་མེད་པ་རེད།

ཉེ་དུས་བོད་ནང་ལོག་གི་བོད་མི་ཞིག་གིས་ ༼གསེར་རྟ་བླ་རུང་གི་སྐྱིད་སྡུག་ཡར་ཞུ། ༽ཞིག་སྤྱི་ཚོགས་དྲ་རྒྱ་ཐོག་བཀོད་ཡོད་པ་རེད།ཡར་ཞུ་ཡི་གེ་དེ་ནང་དུ་ཆབ་སྲིད་ཐོག་ངོས་ལེན་ཡོད་པས་ཆེད་དུ་ཞུ་ཡིག་གིས་ཐོག་མར་ཏང་ཀྲུང་དབྱངས་ཀྱི་དབུ་ཁྲིད་འཚམ་འདྲི་ཞུས་ཡོད་པ་དང་།༼བློ་མཐུན་ཞི་ཅིན་ཕིན་དང་ཏང་ཀྲུང་དབྱངས་ཀྱིས་དབུ་ཁྲིད་འོག ང་ཚོའི་རྒྱལ་ནང་གིི་འགྲོ་བ་མིའི་ཐོབ་ཐང་དང་། ཆོས་ལུགས་དད་མོས། རང་དབང་འདྲ་མཉམ།  དམངས་གཙོ་འཕེལ་རྒྱས། རིག་གནས་སློབ་སྦྱོང་སོགས་ཀྱི་ཕྱོགས་ལ་བཟང་ཕྱོགས་ཀྱི་གྲུབ་འབྲས་ངེས་ཅན་ཐོན་པར་ངོས་རང་ནས་དགའ་གུས་ཚད་མེད་བྱེད་བཞིན་ཡོད།༽སོགས་བཀོད་ཡོད་པ་དང་།དེ་རྗེས་ཁོས་རྒྱ་ནག་གཞུང་གིས་མངོན་གསལ་དོ་བོས་གསེར་རྟ་བླ་རུང་སློབ་གླིང་གི་མི་འབོར་ཉུང་དུ་གཏོང་བའི་གྲོས་ཆོད་ལ་དོགས་འདྲི་དང་བཅས་དེ་འདྲ་ཉུང་དུ་བཏང་རྗེས་ཀྱི་ངན་འབྲས་ནི་བོད་ཀྱི་སྐད་ཡིག་དང་རིག་གཞུང་།ཆོས་ལུགས་སོགས་རྒྱུན་འཛིན་དང་དར་སྤེལ་ལ་གནོད་པ་ཡོད་པར་བརྗོད་ཡོད།  འདི་ནི་ཁོས་ཡར་ཞུ་ཐེངས་གཉིས་པ་དེ་ཡིན།ཡར་ཞུ་ཡི་གེ་གཤམ་གསལ།

 

གསེར་རྟ་བླ་རུང་གི་སྐྱིད་སྡུག་ཡར་ཞུ།

2016-10-01

དྲིན་ཆེན་རྩ་བའི་བླ་མ་མཁྱེན་ནོ།

གསེར་རྟ་བླ་རུང་གི་སྐྱིད་སྡུག་ཡར་ཞུ།

ཐོག་མར་རླབས་ཆེ་བའི་ཏང་ཀྲུང་དབྱངས་ཀྱི་དབུ་ཁྲིད་རིགས་ལ་འཚམ་འདྲི་ཞུ་བ་དང་ཆབས་གཅིག དེ་རིང་ཁོ་བོས་ཡང་བསྐྱར་ཁམས་ཀྱི་ཆོས་སྡེ་ཆེན་མོ་གསེར་རྟ་བླ་རུང་གི་སྐྱིད་སྡུག་སྐོར་ཡར་ཞུ་ཐེངས་གཉིས་པ་དེ་བྱེད་རྒྱུ་ཡིན།

༼༡༽ཉེ་བའི་ལོ་འདི་དག་གི་རིང་རླབས་ཆེ་བའི་བློ་མཐུན་ཞི་ཅིན་ཕིན་དང་ཏང་ཀྲུང་དབྱངས་ཀྱིས་དབུ་ཁྲིད་འོག ང་ཚོའི་རྒྱལ་ནང་གིི་འགྲོ་བ་མིའི་ཐོབ་ཐང་དང་། ཆོས་ལུགས་དད་མོས། རང་དབང་འདྲ་མཉམ། དམངས་གཙོ་འཕེལ་རྒྱས། རིག་གནས་སློབ་སྦྱོང་སོགས་ཀྱི་ཕྱོགས་ལ་བཟང་ཕྱོགས་ཀྱི་གྲུབ་འབྲས་ངེས་ཅན་ཐོན་པར་ངོས་རང་ནས་དགའ་གུས་ཚད་མེད་བྱེད་བཞིན་ཡོད།

ལྷག་པར་དུ་དགའ་འོས་པ་ཞིག་ལ/༢༠༡༦/ད་ལོར་ཏང་ཀྲུང་དབྱངས་ཀྱིས་ང་ཚོ་གྲངས་ཉུང་མི་རིགས་ཀྱི་སྐྱིད་སྡུག་དམིགས་སུ་བཟུང་ནས་ཆེད་དུ་སྐབས་༦་པའི་བོད་ཁུལ་ལས་སྒྲུབ་བྱ་བའི་ཚོགས་འདུ་བསྡུས་པར་བཀའ་དྲིན་ཞུ་བ་དང་། ཏང་ཀྲུང་དབྱངས་ཀྱི་བརྩེ་སེམས་དང་དབུ་ཁྲིད་ཞི་ཅིན་ཕིན་སོགས་ཀྱིས་མཛད་རྗེས་ལ་བསྟོད་སྨོན་དང་ཡི་རང་བྱེད་བཞིན་ཡོད།

༼༢༽འོན་ཀྱང་བོད་ཁུལ་ལས་སྒྲུབ་ཚོགས་ཐོག་ཏུ་གསེར་རྟ་བླ་རུང་སྒར་གྱི་མི་འབོར་ཉུང་དུ་གཏོང་བའི་གྲོས་ཆོད་ཅིག་བྱུང་བ་དེ། ངོས་ཀྱིས་ཏང་ཀྲུང་དབྱངས་ཀྱིས་ཡང་སྙིང་གང་ཞིག་ལ་དམིགས་པ་ཡིན་རྟོགས་དཀའ་བར་འདུག་པས་གསལ་བཤད་ཡང་དག་ཅིག་ལ་སྒུག་ནས་ཡོད། གལ་ཏེ་གྲངས་ཚད་ལས་བརྒལ་ལོ་ཟེར་ན། འོ་ན་རྒྱ་ནག་གི་སློབ་ཆེན་ཚོའི་ནང་ནས་ཆུང་ཤོས། དཔེར་ན་ནུབ་བྱང་མི་རིགས་སློབ་ཆེན་གཅིག་ལ་མཚོན་ནའང་། ན་ནིང་ལོར་སྡོམ་རྩིས་བྱས་པའི་གྲངས་ཀ་ཁྲི་གསུམ་ལས་བརྒལ་བའི་གནས་ཚུལ་འདུག་ན། བླ་རུང་གི་གྲྭ་ཇོ་ཡོངས་རྫོགས་སྤྱི་སྡོམ་བྱས་ནའང་ཁྲི་གཉིས་ལ་ལོང་གིན་མེད་པས་མི་འབོར་ཉུང་དུ་གཏོང་དགོས་པའི་རྒྱུ་མཚན་མི་འདུག་མོད།

གལ་ཏེ་སློབ་གྲྭ་དང་དགོན་པ་གཉིས་མི་འདྲ་ཟེར་ན། དེ་ནི་འདྲ་སྟེ། དགོན་པ་ནི་མཚན་ཉིད་རིག་པ་སོགས་ནང་པའི་རིགས་གནས་སློབ་ས་ཡིན་ལ། སློབ་གྲྭ་ནི་ཆབ་སྲིད་དང་དམག་དོན། དཔལ་འབྱོར་རིག་པ། རྩོལ་སྒྲུབ་རིག་པ་སོགས་འཇིག་རྟེན་གྱི་རིག་གནས་སློབ་ས་ཞིག་ཡིན་པས། སྦྱང་བྱའི་ངོ་བོ་ཙམ་མ་འདྲ་བ་མ་གཏོགས། རིག་གནས་སྦྱང་ས་ཡིན་པའི་ཆ་ནས་གཅིག་མ་ཡིན་ནམ།

གལ་ཏེ་ཆབ་སྲིད་དང་འབྲེལ་བ་འདུག་ཅེས་ཉེས་འགེལ་བྱེད་ན། བླ་རུང་སྒར་ནི་མ་གཞི་ནས་ཆབ་སྲིད་ཀྱི་ལྟེ་གནས་གང་ཡང་མ་ཡིན་ལ། འདིར་འདུས་ཀྱི་རབ་བྱུང་ཕོ་མོ་རྣམས་ཀྱང་། ལུང་སྡེ་སྣོད་གསུམ་ལ་འཆད་ཉན་དང་། ལམ་བསླབ་པ་གསུམ་ལ་ཉམས་ལེན་མཁན་རྐྱང་བ་ལས་ཆབ་སྲིད་ཀྱི་བྱ་བ་སྒྲུབ་མཁན་ཞིག་ད་སྔོན་ཡོད་མ་མྱོང་ལ་ད་ཕན་ཆོད་ཀྱང་ཡོད་མི་སྲིད།

༼༣༽ཡང་གཅིག་བཤད་ན་སློབ་གླིང་འདི་ནི་ཀྲུང་གོ་རྒྱལ་ཁབ་ལ་མཚོན་ན་དམངས་གཙོ་དང་རང་དབང་གི་གཟི་དཔལ་མཚོན་པའི་མཛེས་རྒྱན་ཞིག་དང་། བོད་ལ་མཚོན་ན་མི་རིགས་རིག་གནས་ཀྱི་ལྟེ་གནས། ནང་བསྟན་པ་སྤྱི་ལ་མཚོན་ན་སེམས་ཀྱི་དད་རྟེན་གལ་ཆེན་དུ་གྲུབ་རྐྱེན། འདི་ལ་སྲུང་སྐྱོབ་དང་རྒྱབ་སྐྱོར་བྱེད་པ་ནི་ད་གཟོད་ཚུལ་ལྡན་རྒྱལ་ཁབ་ཅིག་གི་འོས་འགན་དུ་མཐོང་།

༼༤༽རྩ་ཁྲིམས་ཟེར་བ་ནི་དྲང་བདེན་བརྩི་སྲུང་དང་ངན་གཡོ་ཚར་གཅོད་ཀྱི་ཆེད་དུ་གཏན་འབེབས་བྱས་པ་ཞིག་ཡིན་ན། རྩ་ཁྲིམས་ཀྱི་བསྟན་དོན་དང་མི་འགལ་བར་བྱ་བ་སྒྲུབ་པ་ནི། དམངས་དང་སྲིད་གཞུང་ཡོངས་ཀྱི་ཐུན་མོང་གི་འགན་འཁྲི་རུ་མཐོང་། དེར་བརྟེན། ཐེངས་འདིར་སྲིད་གཞུང་གིས་རྩ་ཁྲིམས་ལས་བསྟན་པའི་ཆོས་ལུགས་དད་མོས་རང་དབང་དང་། རིག་གནས་སློབ་སྦྱོང་རང་དབང་། ཁེ་དབང་སྲུང་སྐྱོབ་རང་དབང་སོགས་ལ་ཐུགས་བསམ་རེ་བཞེས་རྒྱུ་ནི་ཧ་ཅང་གལ་ཆེ་བར་སེམས།

༼༥༽ཀྲུང་གོ་ལྟ་བུའི་ཚུལ་ལྡན་གྱི་དམངས་གཙོའི་རྒྱལ་ཁབ་ཅིག་གིས་སློབ་གླིང་བཅོས་སྒྱུར་གྱི་བྱ་བ་འདི་ནི་བོད་རིགས་གཙོའི་ནང་པ་བ་སྤྱིའི་བསམ་འཆར་བསྡུ་ལེན་བྱས་ཏེ་ངོས་ལེན་ཡོད་མེད་ལ་བསྟུན་དགོས་པ་ཞིག་ལས། གཞུང་དཔོན་ག་གེ་མོ་ཁ་ཤས་ཀྱི་འདོད་བློ་ཁོ་ན་ལ་བསྟུན་ནས་ཐག་གཅོད་རྒྱུ་ཞིག་མ་རེད་འདོད།

༼༦༽གལ་ཏེ་དམངས་ཀྱིས་ངོས་ལེན་མེད་བཞིན་དུ་བཅོས་སྒྱུར་གྱི་བྱ་བ་བརྩམ་པ་ཡིན་ན་ནི། མི་རིགས་མཐུན་སྒྲིལ་དང་། གཞུང་དམངས་ཀྱི་མཛའ་བརྩེ།རྒྱལ་ཁབ་ཀྱི་མཚན་སྙན་སོགས་ལ་གནོད་སྐྱོན་ཚབ་ཆེན་ཐེབས་ཉེན་ཡོད་པས་མཇུག་འབྲས་འདིའི་འགན་སུ་ཞིག་གིས་ཁུར་ཐུབ།

༼༧༽བླ་རུང་སྒར་ནི་ང་ཚོ་བོད་མི་རིགས་ཀྱི་རིག་གནས་ཀྱི་ལྟེ་གནས་གཙོ་བོར་གྲུབ་རྐྱེན། འདི་ཉིད་གཞི་རྒྱ་ཆུང་དུ་སོང་ན་ང་ཚོའི་སྐད་ཡིག་དང་། རིག་གནས། ཆོས་ལུགས་སོགས་ལ་ཉམས་ཉེས་ཆེན་པོ་ཐེབས་སྲིད་པས། ཏང་ཀྲུང་དབྱངས་ཀྱིས་ང་ཚོ་གྲངས་ཉུང་མི་རིགས་ཀྱི་སྐད་ཡིག་དང་རིག་གནས་ཀྱི་འབྱུང་འགྱུར་ལ་བསམ་བློ་རེ་གཏོང་བར་མཁྱེན།

༼༨༽བླ་རུང་སྒར་ནི་ནང་བསྟན་པ་ཚོའི་བསྟན་པའི་སྲོག་ཤིང་ལྟ་བུར་གྱུར་ཡོད་པས། སྒར་འདི་ཆུང་དུ་གཏོང་བ་ནི་ནང་བསྟན་ལ་མཚོན་ན་གྱོང་རྒུད་ཆེ་ཞིག་ཏུ་མཐོང་བས། ཏང་ཀྲུང་དབྱངས་ཀྱིས་ནང་བསྟན་གྱི་འབྱུང་འགྱུར་དང་མི་སྒེར་གྱི་ཁེ་དབང་ལ་ཐུགས་བསམ་རེ་བཞེས་རོགས།

༼༩༽བླ་རུང་སྒར་ནི་བོད་རིགས་མང་ཚོགས་ལ་མཚོན་ན་འཆམ་མཐུན་དང་ཞི་བདེའི་འབྱུང་རྩ་གལ་ཆེན་ཞིག་སྟེ། ལོ་འདི་དག་གི་རིང་ལ་སྒར་འདིའི་མཁན་སྤྲུལ་རྣམ་པ་གཙོས་འདུས་སྡེ་སྤྱིའི་བཀའ་དྲིན་གྱིས། ཆོལ་གསུམ་གྱི་ས་གནས་སོ་སོར་རྐུ་འཕྲོག་བཅོམ་གསུམ་དང་། དམེ་འཁྲུག་འཐབ་རྩོད་སོགས་ཇེ་ཉུང་དུ་སོང་བ་མངོན་གསལ་ཡིན་པས། སྤྱི་ཚོགས་བདེ་འཇགས་དང་འཆམ་མཐུན་མཉམ་གནས་སོགས་ལ་བསམ་ནས་སྲིད་གཞུང་གི་འཆར་གཞི་འདི་སླར་ལྡོག་པར་ཞུ།

༼༡༠༽དམངས་གཙོ་དོན་དུ་གཉེེར་ཞིང་བརྩི་སྲུང་བྱ་བའི་ཀྲུང་གོ་གུང་ཁྲན་ཏང་ལྟ་བུའི་ཚུལ་ལྡན་སྲིད་གཞུང་ཞིག་ལ་མཚོན་ན། དམངས་ཀྱི་ཁེ་དབང་དང་དད་མོས་སོགས་ལ་འགན་སྲུང་བྱ་བ་ནི་འོས་བབས་ཀྱི་འགན་འཁྲི་ཞིག་དང་རྩ་ཁྲིམས་ཀྱིས་གཏན་འབེབས་ཞིག་རེད། དེེ་བས། ཐེངས་འདིའི་འཆར་གཞི་འདི་ཁྲིམས་ཀྱི་དགོངས་པ་དང་དམངས་གཙོའི་རྩ་དོན་སོགས་དང་དངོས་འགལ་རེད་འདོད།

༼༡༡༽ཏང་སྲིད་ཀྱི་དབུ་ཁྲིད་རྣམས་ནས་ཁོ་བོའི་སྐད་ཆ་འདི་ཆབ་སྲིད་ཀྱི་དམིགས་ཡུལ་སོགས་སུ་ལོག་སྒྱུར་མི་བྱེད་པར་ཐུགས་བསམ་ཞིབ་མོ་རེ་གཏོང་བར་མཁྱེན་མཁྱེན།། །།

བོད་མེ་ཕོ་སྤྲེལ་ལོ། ༢༠༡༦

༼ལྷམ་མེར་འཚོ་དགོས།༽

ཡིད་ལྷུང་། སྤྲེལ་སྙུག་གིས།

ཆོས་རྗེ་ཡིད་བཞིན་ནོར་བུའི་གདན་ས་དཔལ་གསེར་ལྗོངས་བླ་མ་རུང་ལྔ་རིག་ནང་བསྟན་སློབ་གླིང་ནང་བསྟན་རིག་གཞུང་གི་གཟི་བརྗིད་འཚེར་ས་ཡིན། བླ་རུང་ཆོས་སྡེ་ཆེན་མོ་འཛམ་གླིང་མི་དམངས་ཀྱི་སེམས་ཁམས་ཀྱི་བདེ་བ་འཚོལ་སའི་ཞིང་ཁམས་ཡིན། ཁམས་བོད་སློབ་གྲྭ་ཆེན་མོ་གསེར་རྟ་བླ་རུང་སྒར་མི་ཡུལ་གྱི་བདེ་སྐྱིད་འཚོལ་སའི་ནང་བསྟན་སློབ་གྲྭ་བའི་ཨ་མ་ཡིན། བླ་རུང་ཆོས་ཀྱི་གྲོང་ཁྱེར་བོད་མི་དམངས་ཙམ་མ་ཡིན་པར་ས་ཆེན་གོ་ལའི་ཁྱོན་གྱི

་རེ་འདུན་གྱི་དད་པའི་ལྷ་ཕྱག་ཀེར་ས་ཡིན།

ཁྱེད་ཀྱི་ཚེ་སྲོག་ལ་གས་ཆག་ཡོང་བ་འཛམ་གླིང་སྤྱིའི་བདེ་སྐྱིད་ཀྱི་རྒུད་པ་ཚང་བའི་སྔ་ལྟས་རེད། ཁྱེད་ཀྱི་མཛད་འཕྲིན་ལ་རྨ་ཁ་ཕོག་པ་འུ་ཅག་བོད་ཙམ་མ་ཡིན་མི་རིགས་ཐུན་མོང་བའི་བསོད་ནམས་ཀྱི་གོ་སྐབས་བཀག་པ་རེད། ཁྱེད་ཀྱི་ཁོར་ཡུག་ལ་གཏོར་གཤིག་སྟངས་བ་འགྲོ་མིའི་བདེ་སྐྱིད་ཀྱི་རྩ་བ་ཡོད་རྒུ་ཅོག་སྒོ་ཟ་རྒྱག་པ་རེད། ཨེ་མ་བླ་རུང་ཆོས་སྡེ། འུ་ཚོ་བོད་པ་ཚོའི་མིག་ལྟོས་ཡར་ལ་བཅའ་ས། འུ་ཅག་ཁ་བ་ཚང་གི་རིག་གཞུང་གི་སྒོ་འཕར་འབྱེད་ས། ཁྱེད་ཀྱི་ཚེ་སྲོག་བསྐལ་པ་མ་སྟོང་པ་དང་། ཁྱེད་ཀྱི་ཟུངས་ཁྲག་སྲིད་པ་མ་འཇིག་པར་བརྟན་པོར་གནས་དགོས་ལ། ལྷམ་མེར་འཚོ་དགོས།

 

Check Also

རྒྱ་གཞུང་གིས་ཆབ་སྲིད་ཀྱི་མནར་གཅོད་མཚམས་བཞག་སྟེ་གར་སོང་ཆ་མེད་བཟོས་པའི་དགེ་འདུན་པ་ཚོའི་དངོས་ཡོད་གནས་ཚུལ་གསལ་བཤད་བྱེད་དགོས།

འདི་ག་ལྟེ་གནས་ཁང་གི་ངོས་ནས། རྒྱ་གཞུང་གིས་ཟི་ཁྲོན་ཞིང་ཆེན་རྔ་བ་བོད་རིགས་ཆང་རིགས་རང་སྐྱོང་ཁུལ་གྱི་དགེ་འདུན་པ་གསུམ་གང་བྱུང་བཀག་ཉར་བྱས་པ་དང་བཙན་གྱིས་གར་སོང་ཆ་མེད་བཟོས་པ། དྲང་བདེན་མ་ཡིན་པའི་ཁྲིམས་ཐག་བཅད་པའི་གནས་ཚུལ་ངེས་པར་དུ་གསལ་བཤད་བྱེད་དགོས་པའི་ཛ་དྲག་གི་འབོད་སྐུལ་ཞུ་བཞིན་ཡོད་ལ། འདི་ག་ལྟེ་གནས་ཁང་གིས། རྒྱ་གཞུང་ནས་ཆོས་དད་དང་ཆབ་སྲིད་ཀྱི་ཉེས་འཛུགས་འོག་ཏུ་དགེ་འདུན་པ་དེ་དག་ལ་སྡུག་སྦྱོང་མནར་གཅོད་བཏང་བ་དང་། གང་བྱུང་བཀག་བསྐྱིལ་བཙོན་འཇུག་བྱས་པ་དེ་ནི། རྒྱལ་སྤྱིའི་འགྲོ་བ་མིའི་ཐོབ་ཐང་གི་ཁྲིམས་གཞི་དང་རྩ་འཛིན་ཁག་རྩིས་མེད་རྡོག་རོལ་བཏང་བར་ཡིད་ཆེས་བྱེད་ཀྱིན་ཡོད། འཛམ་གླིང་མཉམ་འབྲེལ་རྒྱལ་ཚོགས་ཀྱི་ཆིངས་གནས་རྒྱལ་ཁབ་ཡིན་པའི་ཆ་ནས། རྒྱ་ནག་དམར་ཤོག་སྲིད་གཞུང་ལ་རྒྱལ་སྤྱིའི་ཁྲིམས་གཞི་རྩ་འཛིན་དེ་དག་ལ་བརྩི་འཇོག་དང་སྲུང་སྐྱོབ། ལག་བསྟར་བྱེད་པའི་འགན་ཡོད། འདི་ལོའི་ཕྱི་ཟླ་༧ ཚེས་༣༠ ཉིན་རང་ལོ་༣༧ ཡིན་པའི་དགེ་འདུན་པ་བློ་བཟང་ཐབས་མཁས་ལ་མི་ལོ་༤ ཡི་དུས་བཀག་བཙོན་འཇུག་གི་ཁྲིམས་ཐག་བཅད་ཡོད་པ་དང་། …