Monday , August 26 2019
Home / གསར་འགྱུར། / ལྕོག་རི་དགོན་པའི་མཁན་པོ་དང་དགེ་བཤེས་ཤིག་འཇུ་བཟུང་བྱས་འདུག

ལྕོག་རི་དགོན་པའི་མཁན་པོ་དང་དགེ་བཤེས་ཤིག་འཇུ་བཟུང་བྱས་འདུག

ལྕོག་རི་དགོན་གྲོང་གཉིས་ནས་༧རྒྱལ་བའི་ཞབས་རིམ་གསོག་སྒྲུབ་དང་འབྲེལ་བའི་ཐོག་ནས། རྒྱ་གཞུང་ཉེན་རྟོག་པས་ཉིན་ཤས་གོང་ལྕོག་རི་དགོན་པའི་མཁན་པོ་དཔལ་དགའ་དང་དགེ་བཤེས་ཨོ་རྒྱན་རྣམ་གཉིས་འཇུ་བཟུང་བཙན་འཁྲིད་བྱས་འདུག

ལྕོག་རི་དགོན་པའི་མཁན་པོ་དཔའ་དགའ་ལགས།
ལྕོག་རི་དགོན་པའི་མཁན་པོ་དཔའ་དགའ་ལགས།

ཕྱི་ལོ་ ༢༠༡༦ ཟླ་ ༡ ཚེས་ ༢༥ ཉིན་ཁམས་དཀར་མཛེས་ཏྲེ་ཧོར་ལྕོག་རི་དགོན་དུ་ཏྲེ་ཧོར་སེར་སྐྱ་མི་མང་ཡོངས་ནས། ༸རྒྱལ་བའི་སྐུ་ཕྱྭའི་ཞབས་རིམ་རྒྱས་པ་ཞིག་ཚོགས་ཡོད་པའི་གནས་ཚུལ་རྣམས་བོད་ཕྱི་ནང་གཉིས་ཀྱི་སྤྱི་ཚོགས་དྲྭ་རྒྱའི་ཐོག་གང་སར་ཁྱབ་གདལ་དུ་ཕྱིན་ཡོད་པ་ལྟར། སྐབས་དེར་རྒྱ་ནག་གཞུང་གི་ཁ་ཐུག་དྲག་གནོན་བཀག་སྡོམ་རིགས་བྱས་མེད་པ་རེད། དེའི་རྗེས་ཕྱི་ལོ་ ༢༠༡༦ ཟླ་ ༡ ཚེས་ ༣༡ ཉིན་བྲག་མགོ་རྫོང་རིག་གནས་ཡུལ་སྐོར་ལས་ཁུངས་དང་བྲག་མགོ་རྫོང་སྤྱི་བདེ་ལས་ཁུངས། མི་རིགས་ཆོས་དོན་ལས་ཁུངས་བཅས་ཀྱིས་ཏཱ་ལའི་བླ་མའི་སྐུ་པར་སྒྲིག་གཤོམ་བྱས་པ་ནི་དྲིལ་བསྒྲགས་ལོག་པར་འགྲོ་བའི་དངོས་རྫས་ཡིན་པས་ཚོང་ཁང་དང་མི་མང་འདུ་འཛོམས་བྱ་སའི་སྤྱི་པའི་ཚོང་ར་བཅས་ཀྱི་ནང་སྒྲིག་གཤོམ་མི་ཆོག་པ་དང་། ཕྱི་ཟླ་ ༢ ཚེས་ ༢ སྔོན་དུ་རང་འགུལ་རང་རྫོང་རིག་གནས་ཁྲིམས་འཛིན་རུ་ཆེན་ཟེར་བར་སྤྲོད་དགོས་པ་མ་ཟད། དུས་ཚོད་ཕྱིར་འགྱངས་བྱེད་པ་དང་གཏན་ནས་མི་སྤྲོད་མཁན་ལ་ཐབས་ཤེས་དྲག་པོ་སྤྱད་ནས་རྩིས་ལེན་བྱེད་པ་དང་དོ་བདག་གི་མི་ལ་ཐག་གཅོད་ནན་མོ་བྱེད་རྒྱུ་ཡིན་སྐོར་ས་གནས་རྒྱ་གཞུང་འབྲེལ་ཡོད་ལས་ཁུངས་བཞིའི་ཐེལ་ཙེ་བརྒྱབ་སྟེ་བཙན་བཀའ་བཏང་ཡོད་པ་རེད།

ལྕོག་རི་དགོན་པའི་དགེ་བཤེས་ཨོ་རྒྱན་ལགས།
ལྕོག་རི་དགོན་པའི་དགེ་བཤེས་ཨོ་རྒྱན་ལགས།

འདི་ལྟེ་གནས་ཁང་ལ་གནས་ཚུལ་འབྱོར་དོན་ལྟར་ན། ཉེ་སྔོན་ལྕོག་རི་དགོན་པར་༸རྒྱལ་བའི་ཞབས་རིམ་གསོག་སྒྲུབ་དང་འབྲེལ་བའི་ཐོག་ནས། ལྕོག་རི་དགོན་པའི་མཁན་པོ་དཔའ་དགའ་ལགས་དང་དགེ་བཤེས་ཨོ་རྒྱན་ལགས་རྣམ་གཉིས་རྒྱ་ནག་ཉེན་རྟོག་པས་ཉིན་ཤས་གོང་འཇུ་བཟུང་བཙན་འཁྲིད་ཐོག་འདྲི་རྩད་བྱེད་བཞིན་ཡོད་འདུག

གཞན་ཡང་། རྒྱ་ནག་གཞུང་ནས་ལྕོག་རི་སེར་སྐྱ་མི་མང་གིས་ཡར་ལངས་བྱ་དོགས་ཀྱིས་ལྕོག་རི་དགོན་གྲོང་གཉིས་ཀྱི་གཡས་གཡོན་དུ་དྲག་དམག་ཕོན་ཆེན་འགྲེམས་འཇོག་བྱས་ཡོད་འདུག ད་དུང་ཁུལ་དེའི་ཁ་པར་དང་སྤྱི་ཚོགས་དྲ་རྒྱ་སོགས་བཀག་སྡོམ་བྱས་ཟིན་སྟབས། ད་ལྟའི་ཆར་ཞིབ་ཕྲའི་གནས་ཚུལ་ཤེས་རྟོགས་ཐུབ་རྒྱུ་ཧ་ཅང་ཁག་པོ་ཆགས་འདུག

མཁན་པོ་དཔའ་དགའ་ལགས་ནི་དེ་སྔོན་རྒྱ་གར་ལྷོ་ཕྱོགས་འབྲས་སྤུངས་དགོན་ནས་དགེ་བཤེས་ཐོན་རྗེས་ཕྱིར་བོད་དུ་ལོག་ཡོད་པ་རེད། ད་ལྟའི་ཆར་ལྕོག་རི་དགོན་པའི་མཁན་པོ་ཡིན་འདུག ཁོང་ད་ལྟ་དགུང་ལོ་ ༤༠ མ་ཟིན་ཙམ་ཡིན་པ་དང་། ཕ་ཡུལ་བྲག་མགོ་རྫོང་མཚོ་སྒོ་ཤང་མཚོ་སྒོ་གྲོང་ནས་ཡིན་འདུག

དེ་བཞིན། དགེ་བཤེས་ཨོ་རྒྱན་ལགས་ཡང་དེ་སྔོན་རྒྱ་གར་ལྷོ་ཕྱོགས་སེ་ར་ནས་དགེ་བཤེས་ཐོན་རྗེས་ཕྱིར་ཕ་ཡུལ་དུ་ལོག་ཡོད་པ་དང་། ཁོང་ནི་ཏྲེ་ཧོར་ནས་ཡིན་ཞིང་ད་ལོ་ཕལ་ཆེར་དགུང་ལོ་ ༥༠ ཙམ་ཡིན་འདུག

Check Also

རྒྱ་གཞུང་གིས་གར་སོང་ཆ་མེད་བཟོས་པའི་པཎ་ཆེན་ཆུང་སྲིད་རིན་པོ་ཆེ་གློད་གྲོལ་གཏོང་དགོས་པའི་འབོད་སྐུལ་སྣང་མེད་བཏང་སྟེ་རྒྱ་ནག་གི་པཎ་ཆེན་རྒྱལ་མཚན་ནོར་བུ་བོད་ལྗོངས་ནང་བསྟན་མཐུན་ཚོགས་ཀྱི་ཚོགས་གཙོར་བསྐོས་འདུག

༸གོང་ས་སྐྱབས་མགོན་ཆེན་པོ་མཆོག་གིས་ངོས་འཛིན་ཐུགས་ཐག་བཅད་བའི་༸ཀུན་གཟིགས་པཎ་ཆེན་ཆུང་སྲིད་རིན་པོ་ཆེ་རྩིས་མེད་བཙོན་འཇུག་བྱས་ཏེ། རྒྱ་ནག་དམར་ཤོག་སྲིད་གཞུང་གི་པཎ་ཆེན་རྒྱལ་མཚན་ནོར་བུ་ཀྲུང་གོ་ནང་བསྟན་མཐུན་ཚོགས་ཀྱི་ཡན་ལག་བོད་རང་སྐྱོང་ལྗོངས་ནང་བསྟན་མཐུན་ཚོགས་ཀྱི་ཚོགས་གཙོར་བསྐོས་ཡོད་པ་རེད། འདི་ལོའི་ཕྱི་ཟླ་༦ ཚེས་༢༢ ཉིན་བོད་རང་སྐྱོང་ལྗོངས་དམར་ཤོག་ཚོགས་པའི་དྲུང་ཆེ་ཝུ་ཡང་ཅེ་(Wu Yingjie)གསར་དུ་བསྐོ་བཞག་བྱས་པའི་ཚོགས་མི་ཚོར་ཐུག་འཕྲད་བྱས་ཡོད་པ་དང་། བོད་ལྗོངས་ནང་བསྟན་མཐུན་ཚོགས་ནི་ཀྲུང་གོ་ནང་བསྟན་མཐུན་ཚོགས་ཀྱི་སྟངས་འཛིན་འོག་ཏུ་ཡོད་པའི་ཡན་ལག་མཐུན་ཚོགས་ཡིན་པ་རེད། ཚོགས་མི་གསར་བར་གཏམ་བཤད་སྐབས་སུ། ཝུ་ཡང་ཅེས། རྒྱ་གཞུང་གི་ཆོས་ལུགས་སྲིད་ཇུས་ཀྱི་གལ་གནད་ཁག་གསལ་འདོན་བྱས་ཏེ། “ཏང་གི་རྗེས་སུ་འབྲང་བ་དང་། རྒྱལ་གཅེས་རིང་ལུགས་ཀྱི་བརྩེ་སེམས་ཟབ་ཏུ་གཏོང་བ། དར་ཆ་གསལ་སྟོན་ངང་ཁ་བྲལ་ལ་ངོ་རྒོལ་བྱེད་དགོས་པ་དང་མངའ་ཁོངས་ཕྱི་རོལ་གྱིས་ཆོས་ལུགས་བེད་སྤྱད་དེ་སིམ་འཛུལ་བྱ་བར་འགོག་རྒོལ་མཐའ་གཅིག་ཏུ་བྱེད་དགོས་པ། ཆོས་ལུགས་སྤྱི་ཚོགས་རིང་ལུགས་ཀྱི་སྤྱི་ཚོགས་དང་འཚམ་མཐུན་ཡོང་བར་ཁྲིད་སྟོན་ཧུར་ཐག་བྱེད་དགོས”ལུགས་བཤད་འདུག ལྷ་མེད་སྨྲ་བ་དམར་ཤོག་སྲིད་གཞུང་གིས་དུས་ཡུན་རིང་བོར་ཆོས་ལུགས་ལ་གཞི་རྒྱ་ཆེ་བའི་སྟངས་འཛིན་དང་དོ་དམ་ཤུགས་ཆེན་བྱས་པ་དང་། …