Thursday , July 18 2019
Home / གསར་འགྱུར། / བོད་ནང་དམར་ཤོག་མང་ཚོགས་ལམ་ཕྱོགས་ལས་འགུལ་སྐོར་ལ་ཉམས་ཞིབ་སྙན་ཐོ་ཞིག་འདོན་སྤེལ།

བོད་ནང་དམར་ཤོག་མང་ཚོགས་ལམ་ཕྱོགས་ལས་འགུལ་སྐོར་ལ་ཉམས་ཞིབ་སྙན་ཐོ་ཞིག་འདོན་སྤེལ།

massline cover 1འདི་ག་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས། རྒྱ་གཞུང་གིས་བོད་ནང་དམར་ཤོག་མང་ཚོགས་ལམ་ཕྱོགས་སློབ་གསོ་ཟེར་བའི་ཆབ་སྲིད་ལས་འགུལ་སྤེལ་ཏེ། བོད་ཀྱི་ས་ཁུལ་ཁག་ནང་བོད་མིའི་སྤྱི་དམངས་ཁེ་དབང་དང་འགྲོ་བ་མིའི་ཐོབ་ཐང་རྩ་གཏོར་གཏོང་བཞིན་པའི་ཐད། <<ལམ་ཕྱོགས་དམར་པོ>> ཞེས་པའི་ཉམས་ཞིབ་སྙན་ཐོ་ཞིག་ཉེ་ཆར་བོད་ཡིག་ཐོག་འདོན་སྤེལ་བྱས་ཡོད།

ཞི་ཅིན་ཕིན་རྒྱ་ནག་དམར་ཤོག་སྲིད་འཛིན་ཆགས་རྗེས། རྒྱ་ནག་ཁྱོན་ཡོངས་ལ་དམར་ཤོག་ ‘མང་ཚོགས་ལམ་ཕྱོགས’ ཟེར་བའི་མའོ་ཡི་འཐབ་རྩོད་ལས་འགུལ་གྱི་མེ་རོ་བསྐྱར་དུ་གསོས་ཤིང་། ‘སྟག་དང་སྦྲང་མ་མཉམ་རྡུང’ གི་རུལ་སུངས་ངོ་རྒོལ་གྱི་འབོད་ཚིག་འོག་དམར་ཤོག་མཐོ་རིམ་དཔོན་རིགས་ ༡༠༠ ལྷག་ལ་ཞིབ་བཤེར་ཁྲིམས་གཅོད་དང་། ‘སྤྱོད་ངན་བཞི།’ ‘དབུས་དམར་ཤོག་གི་གཏན་འབེབས་བརྒྱད’ སོགས་ཀྱི་དྲིལ་བསྒྲགས་འོག གཞི་རིམ་དམར་ཤོག་ལས་བྱེད་པར་ཞིབ་བཤེར་གྱིས་དམར་གཙང་སྲིད་གཙང་ཟེར་བའི་ལས་འགུལ་སྤེལ་ཏེ། དམར་ཤོག་དང་མང་ཚོགས་བར་ཤ་དང་རུས་པ་ལྟ་བུའི་འབྲེལ་བ་ཟབ་མོ་འཛུགས་རྒྱུ་ཡིན་པ་དང་། ཁྲིམས་སྐྱོང་སྤྱི་ཚོགས་འཛུགས་རྒྱུ་ཡིན་སྐོར་དྲིལ་སྒྲོག་ཤུགས་ཆེན་བྱས་ཡོད། ཡིན་ནའང་། འདས་པའི་ལོ་ ༣ ལྷག་གི་ཞིས་ཅིན་ཕིན་གྱིས་སྲིད་བསྐྱངས་དུས་ཡུན་རིང་། དམར་ཤོག་ ‘མང་ཚོགས་ལམ་ཕྱོགས’ དང་འབྲེལ་ཏེ་བོད་ནང་དམ་དྲག་སྲིད་ཇུས་མང་པོ་ལག་བསྟར་བྱས་ཏེ། བོད་མིའི་འགྲོ་བ་མིའི་ཐོབ་ཐང་གནས་སྟངས་སྔར་བའི་ཇེ་ཞན་ཇེ་སྡུག་ཏུ་ཕྱིན་ཡོད།

རྒྱ་གཞུང་གིས་མང་ཚོགས་ལམ་ཕྱོགས་ཀྱི་ལས་འགུལ་དང་འབྲེལ་ནས། བོད་ནང་ལས་བྱེད་པ་མང་པོ་གཞི་རིམ་དུ་བཏང་སྟེ་དབང་ཤུགས་ཀྱི་བཙན་བསྒྱུར་དང་དཔལ་འབྱོར་གྱི་བསླུ་འཁྲིད་བྱེད་ཐབས་གཉིས་ལ་བརྟེན་ནས། གཞི་རིམ་སྡེ་བ་སོ་སོའི་ནང་དམར་ཤོག་ཚོགས་མི་འཕར་སྣོན་ཐོག ཆེས་ཆུང་བའི་སྤྱི་ཚོགས་སྡེ་ཚན་ཁྱིམ་ཚང་ནས་སྡེ་བའི་བར་དུ་ཕན་ཚུན་བཤུ་གཞོག་དང་གཉའ་གནོན་རིམ་པ་བགར་ཏེ། གཞི་རིམ་མང་ཚོགས་ཁྲོད་དུད་དཔོན་དང་རུ་དཔོན། དྲ་བདག སྡེ་དཔོན། དམར་དཔོན་བཅས་རིམ་པ་ལྟར་ཕན་ཚུན་གཅིག་གིས་གཅིག་ལ་དབང་སྒྱུར་གྱི་ལམ་ལུགས་བཙུགས་ཤིང་། དེ་རྒྱུན་འཁྱོངས་ཡོང་ཐབས་སུ་སྡེ་བ་སོ་སོ་དྲ་མིག་ཅན་གྱི་ཁྱབ་ཁོངས་ཆུང་ངུར་བཅད་བགོས་ཀྱིས་གྲལ་རིམ་མཐོ་དམའ་ལྟར་བཤུ་གཞོག་བྲན་བསྒྱུར་གྱི་དབང་ཆ་སྤྲད་དེ། སྡེ་བ་སོ་སོའི་ནང་དུད་དཔོན་ལ་དུད་ཁྲིམས། རུ་དཔོན་ལ་རུ་ཁྲིམས། དྲ་བདག་ལ་དྲ་ཁྲིམས། སྡེ་དཔོན་ལ་སྡེ་ཁྲིམས། དམར་དཔོན་ལ་དམར་ཁྲིམས་བཅས་ཁྲིམས་དང་སྒྲིག་གཞིའི་གཟེབ་དྲ་ཆེན་པོ་ཞིག་བཟོས་ཐོག རྒྱ་གཞུང་གིས་ལས་འགུལ་དེ་ལ་ ‘ཁྲིམས་སྐྱོང་སྤྱི་ཚོགས’ ཞེས་པའི་ཕྱི་ཐུམ་མཛེས་པོ་ཞིག་སྤྲས་ནས་དྲིལ་བསྒྲགས་བྱེད་ཀྱིན་ཡོད།

འདི་ག་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས། རྒྱ་གཞུང་གིས་བོད་ནང་སྤེལ་བཞིན་པའི་མང་ཚོགས་ལམ་ཕྱོགས་སློབ་གསོའི་ལས་འགུལ་ཐད་ཉམས་ཞིབ་བརྒྱུད། ཉེ་ཆར་ <<ལམ་ཕྱོགས་དམར་པོ>> ཞེས་པའི་མང་ཚོགས་ལམ་ཕྱོགས་སྐོར་གྱི་སྙན་ཐོ་འདི་བཏོན་པ་ཡིན་ལ། སྙན་ཐོའི་ནང་ཞིས་ཅིན་ཕིན་གྱིས་ཚ་ཚ་འུར་འུར་གྱིས་རྒྱ་ནག་ཁྱོན་ཡོངས་ལ་སྤེལ་བཞིན་པའི་ ‘མང་ཚོགས་ལམ་ཕྱོགས’ ཀྱི་ལོ་རྒྱུས་རྒྱབ་ལྗོངས་དང་དམིགས་ཡུལ་དང་། དེ་བཞིན། བོད་ནང་སྤེལ་བཞིན་པའི་ ‘མང་ཚོགས་ལམ་ཕྱོགས’ ཀྱི་ལས་གཞི་ཁག་ལ་ཉམས་ཞིབ་ཐོག བོད་དང་རྒྱ་ནང་སྤེལ་བཞིན་པའི་མང་ཚོགས་ལམ་ཕྱོགས་ལས་འགུལ་བར་གྱི་ཁྱད་པར་དང་། ལྷག་པར་དུ་མང་ཚོགས་ལམ་ཕྱོགས་ལས་འགུལ་དང་འབྲེལ་ནས་བོད་ནང་གཞི་རིམ་དམར་ཤོག་སྒྲིག་འཛུགས་རྒྱ་བསྐྱེད། དྲ་མིག་ཅན་གྱི་སྤྱི་ཚོགས་དོ་དམ་གསར་འཛུགས། རྨང་བརྟན་དམངས་ཕན་ཟེར་བའི་དཔལ་འབྱོར་གྱི་བསླུ་འཁྲིད་ལ་བརྟེན་ནས་མང་ཚོགས་གཅུན་སྡོམ་གྱི་ལས་འགུལ་སྤེལ་བཞིན་པ་སོགས། མདོར་ན་རྒྱ་གཞུང་གིས་བོད་ནང་ ‘སྤྱི་ཚོགས་བཙོན་ར’ བཟོས་ཏེ་ ‘དམར་པོའི་བྲན་གཡོག་སྤྱི་ཚོགས’ ཤིག་བསྐྲུན་བཞིན་པ་གསལ་འདོན་བྱས་ཡོད།

རྒྱ་གཞུང་ནི་<<རྒྱལ་སྤྱིའི་འགྲོ་བ་མིའི་ཐོབ་ཐང་ཡོངས་ཁྱབ་གསལ་བསྒྲགས>> ཀྱིས་མཚོན་པའི། མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་སྐོར་གྱི་སྤྱི་ཆིངས་ཁག་ལ་ངོས་འཛིན་མིང་རྟགས་བཀོད་མཁན་གྱི་ཚོགས་ཞུགས་རྒྱལ་ཁབ་ཅིག་ཆགས་ཡོད། ཡིན་ནའང་། རྒྱ་གཞུང་གིས་འགྲོ་བ་མིའི་ཐོབ་ཐང་ཐད་ཀྱི་རྒྱལ་སྤྱིའི་ཁས་ལེན་དམ་བཅའ་ཁག་རྡོག་རོལ་བཏང་སྟེ། མི་རིགས་དབྱེ་འབྱེད་ཀྱི་སྒོ་ནས་བོད་ནང་འགྲོ་བ་མིའི་ཐོབ་ཐང་རྩ་གཏོར་གྱི་སྲིད་ཇུས་འདྲ་མིན་སྤེལ་བཞིན་ཡོད། ད་ལྟའི་ཆར་བོད་ནང་འཕྲད་བཞིན་པའི་ཛ་དྲག་གནས་སྟངས་འདི་ནི། བོད་མི་གཅིག་པུའི་དཀའ་སྡུག་གནད་དོན་ཁོ་ན་ཙམ་མ་ཡིན་པར། འཛམ་གླིང་མི་འབོར་གྱི་བདུན་ཆ་གཅིག་ཟིན་པའི་རྒྱ་དམར་དབང་སྒྱུར་འོག་གི་མི་དམངས་ཡོངས་དང་། འཛམ་གླིང་འགྲོ་བ་མིའི་རིགས་སྤྱིའི་རང་དབང་དང་ཐོབ་ཐབ་གནད་དོན་ལ་ཐད་ཀར་འབྲེལ་བ་ཆགས་ཡོད།

དེ་བས། <<ལམ་ཕྱོགས་དམར་པོ>> ཞེས་པའི་སྙན་ཐོ་འདི་བརྒྱུད་ནས་རྒྱ་གཞུང་གིས་བོད་ནང་སྲིད་ཇུས་དང་ལས་འགུལ་རང་བཞིན་གྱི་སྒོ་ནས་འགྲོ་བ་མིའི་ཐོབ་ཐང་བརྡལ་བཤིག་གཏོང་བཞིན་པའི་གནས་ཚུལ་ཐད། མཉམ་འབྲེལ་རྒྱལ་ཚོགས་ཀྱི་འབྲེལ་ཡོད་འགྲོ་བ་མིའི་ཐོབ་ཐང་སྡེ་ཚན་དང་། རྒྱལ་སྤྱིའི་གཞུང་འབྲེལ་དང་གཞུང་འབྲེལ་མ་ཡིན་པའི་འགྲོ་བ་མིའི་ཐོབ་ཐང་ཚོགས་སྡེ་ཁག་གི་ངོས་ནས་སྔར་ལྷག་དོ་སྣང་དང་། དངོས་ཤུགས་བརྒྱུད་གསུམ་ནས་རྒྱ་གཞུང་ལ་གནོན་ཤུགས་སྤྲད་དེ་བོད་ནང་སྤེལ་བཞིན་པའི་འགྲོ་བ་མིའི་ཐོབ་ཐང་རྩ་གཏོར་གྱི་སྲིད་ཇུས་དེ་དག་མཚམས་འཇོག་ཡོང་བའི་རེ་བ་ཞུ་བཞིན་ཡོད།

<<ལམ་ཕྱོགས་དམར་པོ>>ཞེས་པའི་ཉམས་ཞིབ་སྙན་ཐོའི་གློག་རྡུལ་དེབ་གཟུགས་མཁོ་རིགས་ནས་འདིར་འཐེབ་གནོན་གྱིས་ཕབ་ལེན་བྱེད་ཆོག

Check Also

འདི་ག་ལྟེ་གནས་ཁང་ལ་འདྲ་པར་ཞིག་འབྱོར་བ་དང་དེ་ནི་རང་སྲེག་ཞི་རྒོལ་གནང་མཁན་རྡོ་རྗེ་ཡི་སྐུ་པར་ཡིན་ཞིང་ཁོང་གིས་ཕྱི་ལོ་༢༠༡༢ ལོར་རྒྱ་གཞུང་ནས་བོད་ཐོག་འཛིན་པའི་དྲག་གནོན་སྲིད་ཇུས་ལ་རང་སྲེག་ཞི་རྒོལ་གནང་སྟེ་སྐུ་གྲོངས་ཡོད་པ་རེད།

རྒྱ་གཞུང་གིས་བོད་ནང་གི་རང་སྲེག་ཞི་རྒོལ་རིགས་ཚང་མ་ཁྲིམས་འགལ་ནག་ཉེས་ཀྱི་ངོ་བོར་བསྒྱུར་ཏེ་གཞི་རྒྱ་ཆེ་བའི་དོགས་ཟོན་མྱུལ་ཞིབ་ཤུགས་ཆེར་བཏང་བའི་རྐྱེན་གྱིས་ད་བར་དུ་རྡོ་རྗེ་ཡི་སྐུ་པར་ལག་སོན་བྱུང་ཐུབ་མེད། རྒྱ་གཞུང་གིས་བོད་ནང་གི་རང་སྲེག་ཞི་རྒོལ་གྱི་གནས་ཚུལ་དང་འདྲ་པར་ཕྱི་ཕྱོགས་སུ་གཏོང་མཁན་བོད་མི་མང་པོར་རྒྱལ་ཁབ་ཀྱི་གསང་བ་ཕྱི་གྱར་དང་ཁྲིམས་འགལ་གྱི་ཕྱི་ཕྱོགས་སུ་འབྲེལ་གཏུག་བྱས་ལུགས་ཀྱི་ནག་ཉེས་བཙན་འགེལ་གྱིས་ཁྲིམས་འགལ་བཙོན་འཇུག་བྱས་ཡོད། རང་ལོ་༡༨ ཡིན་པའི་རྡོ་རྗེ་ཡིས་ཕྱི་ལོ་༢༠༡༢ ཟླ་༣ ཚེས་༥ ཉིན་གྱི་བོད་ནང་གི་ཆུ་ཚོད་༦།༣༠ ཙམ་ལ་གཅའ་ཡུལ་ཚོའི་ཉེ་འགྲམ་གྱི་ཟམ་ཁ་ཞིག་ནས་གཅའ་ཞང་ཐོག་གི་རྒྱ་མིའི་ལས་ཁུངས་ཡོད་སའི་བར་དུ་རང་སྲེག་གོམ་བགྲོད་གནང་ནས་སྐུ་གྲོངས་ཡོད་པ་དང་། ཁོང་གིས་རང་སྲེག་གནང་དོན་ནི་རྒྱ་གཞུང་གིས་བོད་ཐོག་འཛིན་པའི་སྲིད་ཇུས་ལ་ཞི་རྒོལ་གནང་བ་ཡིན་འདུག གནས་ཚུལ་ལྟར་ན། ཉེ་འཁོར་གྱི་བོད་མི་རྣམས་ཀྱིས་སྐུ་ཕུང་འཁྱེར་བརྩིས་བྱས་སྐབས། ཉེན་རྟོག་པ་སླེབས་ནས་ཁོང་གི་སྐུ་ཕུང་བཙན་འཕྲོག་གིས་རྔ་བ་རྫོང་ཐོག་ཏུ་ཁྱེར་ཡོད་པ་དང་། ཕྱིས་སུ་ཁོང་གི་ནང་མི་ཚོར་གདུང་ཐལ་ཡིན་ཟེར་ནས་རུས་ཐལ་ཙམ་སྤྲད་འདུག དེ་ཡང་རྒྱ་གཞུང་གིས་ཕྱི་ལོ་༢༠༡༡ ཟླ་༣ …