Sunday , September 22 2019
Home / གསར་འགྱུར། / འབྲི་རུ་རྫོང་དུ་བོད་མི་གཉིས་ལ་ཁྲིམས་ཐག་ལྕི་མོ་དང་། གཅིག་དམར་གསོད་དང་གཅིག་གར་སོང་ཆ་མེད་ཆགས་འདུག

འབྲི་རུ་རྫོང་དུ་བོད་མི་གཉིས་ལ་ཁྲིམས་ཐག་ལྕི་མོ་དང་། གཅིག་དམར་གསོད་དང་གཅིག་གར་སོང་ཆ་མེད་ཆགས་འདུག

ལོ་ ༡༠ བཙོན་འཇུག་ཁྲིམས་ཐག་བཅད་ཡོད་པའི་གྲྭ་སྐལ་བཟང་ཆོས་གླང་ལགས།
ལོ་ ༡༠ བཙོན་འཇུག་ཁྲིམས་ཐག་བཅད་ཡོད་པའི་གྲྭ་སྐལ་བཟང་ཆོས་གླང་ལགས།

ཉེ་ཆར་རྒྱ་གཞུང་གིས་གྲྭ་སྐལ་བཟང་ཆོས་གླང་ལགས་ལ་ལོ་ ༡༠ དང་། རྡོ་རྗེ་གྲགས་རྩལ་ལགས་ལ་ལོ་ ༡༡ བཅས་ཀྱི་བཙོན་འཇུག་ཁྲིམས་ཐག་བཅད་ཡོད་པ་མ་ཟད།  བོད་མི་གཞོན་སྐྱེས་དཀོན་མཆོག་གྲགས་པ་ལགས་འཇུ་བཟུང་འོག་གཅར་རྡུང་དྲག་པོ་བཏང་སྟེ་དམར་གསོད་བཏང་ཡོད་པ་རེད། དེ་བཞིན། གྲྭ་ཚུལ་ཁྲིམས་སྙན་གྲགས་ལགས་ལོ་སྔོན་མའི་ལོ་མཇུག་ལྷ་ས་ནས་འཛིན་བཙན་འཁྲིད་རྗེས་ད་ལྟའི་བར་གར་སོང་ཆ་མེད་གྱུར་འདུག

 

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། རྒྱ་གཞུང་གིས་ཕྱི་ལོ་ ༢༠༡༣ ཟླ་ ༡༡ ཚེས་ ༢༣ ཉིན། བོད་ཀྱི་རྒྱལ་ས་ལྷ་ནས་ལྟར་མོས་དགོན་པའི་རྒན་ངག་དབང་འཇམ་དབྱངས་ལགས་དང་གྲྭ་སྐལ་བཟང་ཆོས་གླང་གཉིས་འཇུ་བཟུང་བྱས་རྗེས།  བཀག་ཉར་སྐབས་འདྲི་གཅོད་གཅར་རྡུང་ཡ་ང་བ་བྱས་ཏེ་རྒན་ངག་དབང་འཇམ་དབྱངས་ལགས་དམར་གསོད་བཏང་ཡོད་པ་ལྟར།  ཕྱི་ལོ་ ༢༠༡༤ ཟླ་ ༡ ནང་གྲྭ་སྐལ་བཟང་ཆོས་གླང་ལགས་ལ་ ༡༠ དུས་བཀག་བཙོན་འཇུག་གི་ཁྲིམས་ཐག་བཅད་འདུག

 

ལོ་ ༡༡ བཙོན་འཇུག་ཁྲིམས་ཐག་བཅད་ཡོད་པའི་རྡོ་རྗེ་གྲགས་རྩལ་ལགས།
ལོ་ ༡༡ བཙོན་འཇུག་ཁྲིམས་ཐག་བཅད་ཡོད་པའི་རྡོ་རྗེ་གྲགས་རྩལ་ལགས།

གྲྭ་སྐལ་བཟང་ཆོས་གླང་ལགས་ནི་འབྲི་རུ་རྫོང་ཚྭ་ཆུ་ཞང་ཨུ་ཐང་གྲོང་ནས་པ་དང་། ཁོང་ནི་ས་གནས་མང་ཚོགས་ལ་བོད་རང་གི་ཤེས་ཡོན་སྲུང་སྐྱོབ་དང་མི་རིགས་ནང་ཁུལ་ཕན་ཚུན་མཐུན་སྒྲིག་དགོས་པའི་ཡར་རབས་སློབ་གསོ་གཏོང་མཁན་ཞིག་ཡིན་སྟབས། རྒྱ་གཞུང་གིས་ཁོང་ལ་མི་མང་འདུ་འཛོམས་བྱེད་བཅུགས་པའི་ཉེས་མིང་བཏགས་ནས་འཇུ་བཟུང་ཁྲིམས་ཐག་བཅད་ཡོད་པ་རེད།

 

ཕྱི་ལོ་ ༢༠༡༣ ཟླ་ ༡༠ ཚེས་ ༣ ཉིན། འབྲི་རུ་རྫོང་ཟླ་ཐང་ཞང་གཡང་ཐང་གྲོང་ཚོ་བཞི་པ་ནས་ཡིན་པའི་བོད་མི་རྡོ་རྗེ་གྲགས་རྩལ་ལགས་རྒྱ་གཞུང་གིས་འཇུ་བཟུང་བཙན་འཁྲིད་བྱས་ཡོད་པ་ལྟར།  ཕྱི་ལོ་ ༢༠༡༤ ཟླ་ ༡ ནང་རྒྱ་གཞུང་གིས་ཁོང་ལ་ལོ་ ༡༡ དུས་བཀག་བཙོན་འཇུག་གི་ཁྲིམས་ཐག་བཅད་འདུག  རྒྱ་གཞུང་གིས་ཁོང་བཀལ་བའི་ནག་ཉེས་ནི་དེ་སྔོན་གནས་རི་ནགས་ལྷའི་གཏེར་ཁ་སྔོག་འདོན་ལ་བཀག་འགོག་བྱེད་མཁན་གཙོ་གྲས་ཡིན་པའི་ཐད་ནས་ལོ་ ༧ དང་། མི་གཞན་པར་དངུལ་མང་པོ་བསྐྱི་གཡར་བྱས་པར་ལོ་ ༣ ། རྒྱ་གཞུང་གི་བཅའ་སྡོད་ལས་བྱེད་མི་སྣ་བཀག་འགོག་བྱས་པར་ལོ་ ༡ བཅས། ཁྱོན་བསྡོམས་ལོ་ ༡༡ ཁྲིམས་ཐག་བཅད་ཡོད་པ་རེད།

 

གཞན་ཡང་། ཕྱི་ལོ་༢༠༡༣ ཟླ་ ༡༢ ནང་། ཁམས་འབྲི་རུ་རྫོང་འབྲི་རུ་ཞང་ལྕམ་རམ་གྲོང་གི་ན་གཞོན་དཀོན་མཆོག་གྲགས་པ་ལགས། རྒྱ་གཞུང་གིས་འཛིན་བཟུང་བཙན་འཁྲིད་ཀྱིས་གར་སོང་ཆ་མེད་གྱུར་ཡོད་པ་ལྟར། ཕྱི་ལོ་ ༢༠༡༤ ཟླ་ ༡ ཚེས་ ༢༠ ཡས་མས་ཙམ་ལ། རྒྱ་གཞུང་ཉེན་རྟོག་པས་བཙོན་ཁང་ནང་ཁོང་ལ་ཉེས་རྡུང་ཚད་མེད་བཏང་སྟེ་དམར་གསོད་བྱས་རྗེས། ཕུང་པོ་ནང་མིར་རྩིས་སྤྲོད་བྱས་ཡོད་པ་དང་། ཕུང་པོ་རྩིས་སྤྲོད་སྐབས་གནས་ཚུལ་དེའི་སྐོར་ཕྱིར་སྒྲོག་མི་ཆོག་པའི་བཙན་བཀའ་བཏང་ཡོད་པ་རེད།

རྒྱ་གཞུང་གིས་དཀོན་མཆོག་གྲགས་པ་ལགས་འཛིན་བཟུང་དམར་གསོད་གཏོང་དགོས་དོན་ནི། ཕྱི་ལོ་ ༢༠༡༣ ཟླ་ ༥ པའི་ནང་གནས་རི་ནགས་ལྷ་འཛམ་བྷར་གཏེར་ཁ་བསྔོག་འདོན་སྐབས། རྒྱ་གཞུང་ལ་ངོ་རྒོལ་བྱས་པའི་རྐྱེན་གྱིས་ཡིན་པར་ས་གནས་ཡུལ་མིས་ངོས་འཛིན་བྱེད་ཀྱི་ཡོད་འདུག

 

རྒྱ་གཞུང་གི་འཇུ་བཟུང་བཙན་ཁྲིད་འོག་གར་སོང་ཆ་མེད་དུ་གྱུར་བའི་གྲྭ་ཚུལ་ཁྲིམས་སྙན་གྲགས་ལགས།
རྒྱ་གཞུང་གི་འཇུ་བཟུང་བཙན་ཁྲིད་འོག་གར་སོང་ཆ་མེད་དུ་གྱུར་བའི་གྲྭ་ཚུལ་ཁྲིམས་སྙན་གྲགས་ལགས།

དེ་བཞིན། ཕྱི་ལོ་ ༢༠༡༣ ཟླ་ ༡༢ པའི་ནང་། ཁམས་འབྲི་རུ་རྫོང་ཚ་ཆུ་ཞང་རབ་བརྟན་དགོན་པའི་གྲྭ་ཚུལ་ཁྲིམས་སྙན་གྲགས་ལགས་ལྷ་ས་ནས་འཛིན་བཟུང་བྱས་ཡོད་པ་མ་ཟད།  ད་ལྟའི་བར་དུ་གནས་ཚུལ་གང་ཡང་ཤེས་རྟོགས་མི་ཐུབ་པར་གར་སོང་ཆ་མེད་ཆགས་ཡོད་འདུག

ས་གནས་ཡུལ་མིས་བརྗོད་དོན་ལྟར་ན། དེང་སྐབས་འབྲི་རུ་རྫོང་དུ་བོད་མི་འཛིན་བཟུང་བྱས་པའི་གྲངས་འབོར་སྟོང་ཕྲག་བརྒལ་ཡོད་པ་མ་ཟད།  ད་དུང་ཉེས་མིང་སྣ་ཚོགས་འོག་བོད་མི་འཇུ་བཟུང་གི་གྲངས་འབོར་ཉིན་རེ་བཞིན་མང་དུ་འགྲོ་བཞིན་ཡོད་འདུག ཡིན་ནའང་། འབྲི་རུ་རྫོང་རྒྱ་གཞུང་གིས་དམ་དྲག་ཧ་ཅང་ཆེ་པོ་བྱས་ཡོད་སྟབས། གནས་ཚུལ་མང་པོ་ཞིག་ཤེས་རྟོགས་ཐུབ་ཀྱི་མེད་པ་དང་། ནག་ཆུ་ས་ཁུལ་གྱི་ཤར་ཕྱོགས་རྫོང་གསུམ་ནང་དྲ་ལམ་ཡོངས་རྫོགས་བཀག་ནས། ཕན་ཚུན་འབྲེལ་བ་བྱེད་ཁག་པོ་ཆགས་ཡོད་འདུག

Check Also

རྒྱ་གཞུང་གིས་ཆབ་སྲིད་ཀྱི་མནར་གཅོད་མཚམས་བཞག་སྟེ་གར་སོང་ཆ་མེད་བཟོས་པའི་དགེ་འདུན་པ་ཚོའི་དངོས་ཡོད་གནས་ཚུལ་གསལ་བཤད་བྱེད་དགོས།

འདི་ག་ལྟེ་གནས་ཁང་གི་ངོས་ནས། རྒྱ་གཞུང་གིས་ཟི་ཁྲོན་ཞིང་ཆེན་རྔ་བ་བོད་རིགས་ཆང་རིགས་རང་སྐྱོང་ཁུལ་གྱི་དགེ་འདུན་པ་གསུམ་གང་བྱུང་བཀག་ཉར་བྱས་པ་དང་བཙན་གྱིས་གར་སོང་ཆ་མེད་བཟོས་པ། དྲང་བདེན་མ་ཡིན་པའི་ཁྲིམས་ཐག་བཅད་པའི་གནས་ཚུལ་ངེས་པར་དུ་གསལ་བཤད་བྱེད་དགོས་པའི་ཛ་དྲག་གི་འབོད་སྐུལ་ཞུ་བཞིན་ཡོད་ལ། འདི་ག་ལྟེ་གནས་ཁང་གིས། རྒྱ་གཞུང་ནས་ཆོས་དད་དང་ཆབ་སྲིད་ཀྱི་ཉེས་འཛུགས་འོག་ཏུ་དགེ་འདུན་པ་དེ་དག་ལ་སྡུག་སྦྱོང་མནར་གཅོད་བཏང་བ་དང་། གང་བྱུང་བཀག་བསྐྱིལ་བཙོན་འཇུག་བྱས་པ་དེ་ནི། རྒྱལ་སྤྱིའི་འགྲོ་བ་མིའི་ཐོབ་ཐང་གི་ཁྲིམས་གཞི་དང་རྩ་འཛིན་ཁག་རྩིས་མེད་རྡོག་རོལ་བཏང་བར་ཡིད་ཆེས་བྱེད་ཀྱིན་ཡོད། འཛམ་གླིང་མཉམ་འབྲེལ་རྒྱལ་ཚོགས་ཀྱི་ཆིངས་གནས་རྒྱལ་ཁབ་ཡིན་པའི་ཆ་ནས། རྒྱ་ནག་དམར་ཤོག་སྲིད་གཞུང་ལ་རྒྱལ་སྤྱིའི་ཁྲིམས་གཞི་རྩ་འཛིན་དེ་དག་ལ་བརྩི་འཇོག་དང་སྲུང་སྐྱོབ། ལག་བསྟར་བྱེད་པའི་འགན་ཡོད། འདི་ལོའི་ཕྱི་ཟླ་༧ ཚེས་༣༠ ཉིན་རང་ལོ་༣༧ ཡིན་པའི་དགེ་འདུན་པ་བློ་བཟང་ཐབས་མཁས་ལ་མི་ལོ་༤ ཡི་དུས་བཀག་བཙོན་འཇུག་གི་ཁྲིམས་ཐག་བཅད་ཡོད་པ་དང་། …